NIKASEMƆ 53

Halamɔ Hiɛtserɛjiemɔ Ni Baahã Yehowa Aná Miishɛɛ

Nɔ Ni Aprinti

Yehowa ji “miishɛɛ Nyɔŋmɔ lɛ.” (1 Timoteo 1:11) Eesumɔ ni wɔná miishɛɛ ni wɔtsui anyɔ wɔmli yɛ shihilɛ mli. Kɛ́ yɛ be kɛ beiaŋ lɛ, wɔtoɔ be kɛjɔɔ wɔhe ni wɔjieɔ wɔhiɛtserɛ lɛ, eŋɔɔ enaa. Yɛ nikasemɔ nɛɛ mli lɛ, wɔbaana bɔ ni wɔbaafee wɔjie wɔhiɛtserɛ yɛ gbɛi ni baahã wɔná miishɛɛ ni wɔtsui anyɔ wɔmli lɛ anɔ—ni yɛ nakai beiaŋ nɔŋŋ lɛ, wɔsa Yehowa hiɛ.

1. Kɛ́ wɔmiihala nɔ ni wɔkɛbaajie wɔhiɛtserɛ lɛ, mɛni esa akɛ wɔhã ehi wɔjwɛŋmɔŋ?

Kɛ́ oojɔɔ ohe lɛ, mɛni ofeɔ? Mɛi komɛi sumɔɔ ni amɛhɔ shĩa ni amɛkane wolo, amɛbo lala toi, amɛkwɛ fim, loo amɛkpa Intanɛt lɛ nɔ. Mɛi komɛi hu sumɔɔ ni amɛkɛ amɛnanemɛi afee ekome kɛfee nibii komɛi—amɛyashara shi, amɛyawu nu, loo amɛshwɛ shwɛmɔ ko. Ekɔɔɔ he eko nɔ ni wɔfeɔ kɛjieɔ wɔhiɛtserɛ lɛ, esa akɛ efee nɔ ni “sa Nuŋtsɔ lɛ hiɛ.” (Efesobii 5:10) Enɛ he hiaa waa, ejaakɛ yiwalɛ, bɔlɛnamɔ, kɛ mumɔi kɛsharamɔ nifeemɔi sɔŋŋ yɔɔ nibii ni mɛi pii kɛjieɔ amɛhiɛtserɛ lɛ amli, ni Yehowa nyɛɔ enɛɛmɛi. (Kanemɔ Lala 11:5.) Mɛni baawa wɔ ni wɔhala hiɛtserɛjiemɔi ni sa?

Kɛ́ wɔkɛ mɛi ni sumɔɔ Yehowa bɔ naanyo lɛ, amɛbaanyɛ amɛhã wɔba wɔjeŋ jogbaŋŋ, ni wɔhala hiɛtserɛjiemɔi ni sa. Tamɔ wɔna yɛ nikasemɔi lɛ ekome mli lɛ, “mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ.” Shi kɛ́ wɔkɛ mɛi ni ehiii shi yɛ Nyɔŋmɔ mlai lɛ anaa bɔ lɛ, ‘wɔgbeŋ naa ekpakpa.’—Abɛi 13:20.

2. Mɛni hewɔ ehe hiaa ni wɔkudɔ be falɛ ni wɔkɛjieɔ wɔhiɛtserɛ lɛ?

Kɛ́ nɔ ni wɔfeɔ kɛjieɔ wɔhiɛtserɛ lɛ sa po lɛ, esa akɛ wɔkwɛ jogbaŋŋ ni wɔkɛ bei pii akafee. Kɛjeee nakai lɛ, wɔnáŋ be ni fa kɛhãŋ nibii ni he hiaa fe no lɛ. Biblia lɛ woɔ wɔ hewalɛ ni ‘wɔkɛ wɔbe atsu nii jogbaŋŋ.’—Kanemɔ Efesobii 5:15, 16.

KASEMƆ PII OFATA HE

Obaana bɔ ni obaafee okpɛ yiŋ kpakpai yɛ hiɛtserɛjiemɔ he.

3. Tsi ohe kɛje hiɛtserɛjiemɔi ni esaaa ahe

Mɛni hewɔ esa akɛ wɔkwɛ jogbaŋŋ yɛ nɔ ni wɔfeɔ kɛjieɔ wɔhiɛtserɛ lɛ ahe lɛ? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

VIDIO: Mɛni Esa Akɛ Mikɛjie Mihiɛtserɛ? (4:39)

Mɛɛ gbɛ nɔ nibii komɛi ni mɛi kɛjie amɛhiɛtserɛ yɛ blema Roma lɛ tamɔ nibii komɛi ni mɛi kɛjieɔ amɛhiɛtserɛ ŋmɛnɛ lɛ nɔŋŋ?
Mɛni Danny kase yɛ hiɛtserɛjiemɔ he?

Nyɛkanea Romabii 12:9 lɛ, ni nyɛsusua sanebimɔ nɛɛ he:

Mɛɛ gbɛ nɔ ŋmalɛ nɛɛ baanyɛ awa bo ni ohala hiɛtserɛjiemɔ ni sa?

Mɛɛ nibii komɛi Yehowa nyɛɔ? Nyɛkanea Abɛi 6:16, 17 kɛ Galatiabii 5:19-21 lɛ. Kɛ́ nyɛkane ŋmalɛi lɛ eko fɛɛ eko nyɛgbe naa lɛ, nyɛsusua sanebimɔ nɛɛ he:

Mɛɛ nibii komɛi yɔɔ ŋmalɛi nɛɛ amli ni ehe shi waa yɛ hiɛtserɛjiemɔi amli ŋmɛnɛ?

Nɔ ni baawa bo ni ohala hiɛtserɛjiemɔi ni sa

Bi ohe akɛ:

Mɛni he ekɔɔ? Ani ekɔɔ nɔ ko ni Yehowa nyɛɔ he?
Mɛɛ be mafee? Ani ehãŋ maná be ni fa mahã nibii ni he hiaa fe no lɛ?
Namɛi mikɛbaafee? Ani ebaahã mikɛ mɛi ni sumɔɔɔ Yehowa abɔ waa loo mikɛ amɛ afɔ bɔɔ?

Nilee yɛ mli akɛ wɔbaatsi wɔhe kwraa kɛje oshãra he. No hewɔ ni esa akɛ wɔtsi wɔhe kɛje hiɛtserɛjiemɔ fɛɛ hiɛtserɛjiemɔ ni wɔnaa akɛ ebaanyɛ eye wɔ awui lɛ he lɛ

Tsɔne ko nyiɛ gbɛ ko ni ka gɔŋ ko nɔ lɛ nɔ; ebɛŋkɛ gbɛ lɛ toi. Tsɔne lɛ sɛɛgbɛ miihe abote jɔɔ lɛ mli.

4. Okɛ obe atsu nii jogbaŋŋ

Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

VIDIO: Te Okɛ Obe Tsuɔ Nii Ohãa Tɛŋŋ? (2:45)

Eyɛ mli akɛ nyɛmi nuu lɛ kwɛɛɛ nɔ ko gbonyo moŋ, shi mɛni ji naagba lɛ?

Nyɛkanea Filipibii 1:10 lɛ, ni nyɛsusua sanebimɔ nɛɛ he:

Mɛɛ gbɛ nɔ ŋmalɛ nɛɛ baanyɛ aye abua wɔ ni wɔna be falɛ ni esa akɛ wɔkɛjie wɔhiɛtserɛ?

5. Halamɔ hiɛtserɛjiemɔ ni sa

Eyɛ mli akɛ hiɛtserɛjiemɔi komɛi esaaa Yehowa hiɛ moŋ, shi pii yɛ ni saa ehiɛ. Nyɛkanea Jajelɔ 8:15 kɛ Filipibii 4:8 lɛ, ni nyɛsusua sanebimɔ nɛɛ he:

Mɛɛ nibii ni sa ofeɔ kɛjieɔ ohiɛtserɛ?

Mfonirii ni ato naa: Mɛi ni eye afii srɔtoi miifee nibii ni sa kɛmiijie amɛhiɛtserɛ. 1. Oblayoo ko miibo lala toi ni eetɛŋ nii. 2. Oblahii etɛ komɛi miitswa basketball. 3. Gbekɛbii hii enyɔ komɛi miita baisiko. 4. Gbekɛ nuu ko miifee lɔle. 5. Nuu ko miitswa baŋ. 6. Gbekɛ nuu ko kɛ epapa miitswa vidio gem. 7. Yoo ko miisha foto. — Obaanyɛ ofee nibii ni sa kɛjie ohiɛtserɛ

MƐI KOMƐI KƐƆ AKƐ: “Naagba ko bɛ he akɛ mikɛ nibii ni yiwalɛ, bɔlɛnamɔ, loo mumɔi fɔji asaji yɔɔ mli baajie mihiɛtserɛ, ejaakɛ mikɛ mihe wooo mli.”