Kaaku Ohiɛ Oshwie Ŋwɛi Maŋtsɛ Lɛ Nɔ

ETAMƆ NƆ NI beni Yesu yɔɔ shikpɔŋ nɔ akɛ gbɔmɔ lɛ, egbalaaa jwɛŋmɔ kɛbaaa egbekɛbiiashi nɔ kwraa. Be ko ni eshiɛɔ lɛ, yoo ko jɛ asafo ni boɔ lɛ toi lɛ ateŋ ebo akɛ: “Miishɛɛ ji musu ni hiɛo kɛ fufɔ ni oye lɛ!” Shi Yesu ha hetoo akɛ: “Dabi, shi moŋ, miishɛɛ ji mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!” (Luka 11:​27, 28, NW) Ewooo mɛi ahewalɛ ni amɛkɛ henumɔ awie efɔmɔ loo gbɛfaŋnɔ ni Maria na yɛ mli lɛ he.

Nɔ ni sa kadimɔ ji akɛ Biblia lɛ kɛ Yesu fɔmɔ be haaa wɔ, ni he ko bɛ ni Yesu fã akɛ aye efɔmɔ gbi. Agbɛnɛ, nɔ ko bɛ ni aŋma afɔ shi ni tsɔɔ akɛ Kristofoi ye Blonya yɛ Kristo gbele sɛɛ kɛ afii ohai abɔ ni nyiɛ sɛɛ lɛ amli.

Yɛ enɛ hewɔ​—kɛ agbɛnɛ yɛ wɔŋjalɔi akusum nifeemɔi babaoo ni akɛkpɛtɛ Blonya he lɛ hewɔ lɛ​—mɛi pii kɛ amɛhe wooo gbijurɔ nɛɛ yeli mli ŋmɛnɛ. Amɛmiisumɔ ni amɛjie bulɛ ni amɛyɔɔ kɛha Yesu lɛ kpo yɛ gbɛi krokomɛi anɔ. Kɛha amɛ lɛ, Yesu jeee abifao ni ka kooloi aniyeniianɔ mli dɔŋŋ. Eda ebatsɔ mɔ ko ni da kwraa fe nakai.

NƆ NI BIBLIA LƐ KƐƆ

Kɛ aaye Blonya gbijurɔ lɛ, akaneɔ wiemɔi komɛi kɛjɛɔ Biblia lɛ mli yɛ sɔlemɔi lɛ amli, ni yɛ enɛ hewɔ lɛ abale nomɛi jogbaŋŋ. Susumɔ wiemɔi nɛɛ ni jeɔ kpo yɛ ŋmɛnɛŋmɛnɛ Biblia shishitsɔɔmɔi komɛi amli lɛ ahe, ni okwɛ nɔ ni amɛkɛɔ yɛ bɔ ni esa akɛ wɔsusu Yesu he ŋmɛnɛ lɛ he.

Ŋmalɛ lɛ loo wiemɔ lɛ eko kɛɔ bɔ ni fee ni Maria nu klɛŋklɛŋ akɛ lɛ ebaatsɔ nyɛ kɛha Yesu. Bɔfo Gabriel pue ni etswa adafi akɛ: “Naa, obaana musu, ni ooofɔ binuu, ni ooowo lɛ gbɛi akɛ Yesu.” Sane ni ba nɛɛ he hiaa waa. Shi kɛ̃ lɛ, ani okadi bɔfo lɛ wiemɔi ni kɔɔ Yesu he ni nyiɛ sɛɛ lɛ jogbaŋŋ da? “Eeetsɔ agbo, aaatsɛ lɛ Ŋwɛinyo lɛ Bi, ni Yehowa aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaate naanɔ, ni emaŋtsɛyeli lɛ sɛɛ efoŋ.”​—Luka 1:​31-33.

Hɛɛ, bɔfo Gabriel tsɔɔ akɛ babaoo yɛ enɛ mli fe abifao ko fɔmɔ ko kɛkɛ. Maria binuu lɛ baatsɔ agbo. Ebaatsɔ Maŋtsɛ David seshinyo odehe ni ebaaye maŋtsɛ kɛya naanɔ.

Beni afɔ Yesu lɛ, sane ko ni ale jogbaŋŋ hu tee nɔ. Bɔfo ko jie ehe kpo etsɔɔ tookwɛlɔi ni miikwɛ amɛtooi yɛ ŋa nɔ ni ekɛɛ: “Mibagbanyɛ miishɛɛ sane kpele ni ji maŋ fɛɛ nɔ; akɛ ŋmɛnɛ afɔ walaherelɔ ni ji Kristo, Nuŋtsɔ lɛ, ahanyɛ yɛ David mã lɛŋ. Ni enɛ aaafee okadi ahanyɛ: Nyɛaana abifao ni aŋɔ mama abala ehe ni eka kooloi aniyeniianɔ mli.” Kɛkɛ ni ŋwɛibɔfoi asafoi babaoo bafata klɛŋklɛŋ mɔ lɛ he amɛjie Nyɔŋmɔ yi amɛkɛɛ: “Anunyam aha Nyɔŋmɔ yɛ ŋwɛi flooflo, ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ.”​—Luka 2:​8-14.

Bɔfo lɛ kɛɛ tookwɛlɔi lɛ akɛ amɛbaana Yesu ni eka kooloi aniyeniianɔ mli​—enɛ ji okadi kɛha amɛ, koni amɛyoo abifao ni awieɔ ehe lɛ. Shi te sane nɛɛ fa ni osusuɔ akɛ eŋɔɔ tookwɛlɔi lɛ anaa fe fɛɛ lɛ? Yɛ anɔkwale mli lɛ, sane ni ji akɛ agbɛnɛ naa yiwalaherelɔ ni awo shi yɛ ehe lɛ, mɔ ni eka shi faŋŋ akɛ ebaatsɔ Kristo lɛ. Agbɛnɛ afɔ mɔ ni kɛji akɛ eda lɛ̀, ekɛ toiŋjɔlɛ baaba shikpɔŋ nɔ yɛ gbɔmɛi ni yɔɔ tsuijurɔ lɛ ateŋ.

Ŋmalɛ kroko ni afɔɔ kɛ nitsumɔ yɛ Blonya sɔlemɔi amli yɛ Kristendom sɔlemɔi lɛ amli ji nɔ ni anaa yɛ Yesaia yitso nɛɛhu lɛ. Jɛmɛ ji heni aŋma nɛkɛ wiemɔi nɛɛ yɛ: “Ejaakɛ afɔ bi fufɔoo ahawɔ, ahawɔ binuu hu; ni elumɔyeli lɛ aaaka ekɔŋ nɔ, ni aaatsɛ egbɛi akɛ Naakpɛɛ, Ŋaawoolɔ, Nyɔŋmɔ hewalɔ, Naanɔtsɛ kɛ Hejɔlɛ Lumɔ.”​—Yesaia 9:⁠5.

Afee lalai kɛ emli wiemɔi ni aŋmala ni ŋɔɔ akɛfata nɛkɛ wiemɔi nɛɛ ahe ni afɔɔ enɛ tswaa yɛ Blonya be mli. Shi kɛ̃ lɛ, mɛi enyiɛ boɔ wiemɔi ni nyiɛɔ “afɔ bi fufɔo” aha wɔ lɛ sɛɛ lɛ toi? Akɛ sabalai ni tsiitsii ni shishinumɔ yɔɔ mli eha Yesu yɛ biɛ. Ni kuku ekpaa lɛ tsɔɔ akɛ eji mɔ ni kɛ jɔɔmɔi ni bɛ naagbee baatsɔ e-Maŋtsɛyeli nɔyeli lɛ nɔ aba. Ani enɛ jeee gbɛ ni esa akɛ wɔtsɔ nɔ wɔsusu ehe ŋmɛnɛ nɛ?

NƆ NI YESU JI BIANƐ

Kɛ mɔ ko miiye efɔmɔ gbi lɛ, nifeemɔ lɛ ji akɛ enine shɛɔ nikeenii kɛ omanyeyeli nɔ yɛ be mli ni ena afi efata e-afii lɛ ahe lɛ. Te ebaanu he eha tɛŋŋ, kɛji akɛ be fɛɛ be ni efɔmɔ gbi lɛ aaashɛ lɛ, enyɛ baama nɔ mi doo akɛ ja ekɛ egbekɛbiashi mfoniri yɛ be mli ni eji abifao lɛ aaatsɔɔ? Gbɔmɛi sumɔɔ ni ayoo amɛ bɔ ni amɛji bianɛ, jeee be mli ni amɛji fufɔbii.

Eji nɔ ko ni tamɔ wala kɛ gbele nɔŋŋ. Gbɔmɛi ahiɛ ka nɔ ákɛ akɛ nibii ni amɛnyɛ amɛtsu yɛ wala be mli baakai amɛ shi jeee bɔ ni amɛtamɔ yɛ amɛ gbele be mli. No hewɔ lɛ, kɛ ashɔ̃ kaimɔ nɔ̃ ko ama shi ni akɛmiiwo gbɔmɔ ko ni he gbɛi waa lɛ hiɛ nyam lɛ, ashɔ̃ɔ lɛ ni edamɔ shi jaŋŋ ni eyɛ hewalɛ hu, aloo ni ekɛ ehe ewo nitsumɔ ko ni ha ehe gbɛ́i lɛ mli, shi jeee ni eepĩi kɛ gbele pĩimɔi.

Yɛ enɛ hewɔ lɛ, bɔ ni gbɔmɛi pii susuɔ Yesu he lɛ yɛ miishɛɛ waa. Yɛ Blonya be mli lɛ, afeɔ ehe mfoniri akɛ eji fufɔo ko ni he waaa ni ka kooloi aniyeniianɔ mli. Yɛ no sɛɛ lɛ ehe mfoniri ni afɔɔ namɔ ji nuu ni miigbo yɛ piimɔ mli yɛ sɛŋmɔtso nɔ. Ani enɛ ji ehe mfoniri ko ni ŋmɛɔ pɛpɛɛpɛ?

Eji anɔkwale, Yesu jie heshibaa su ko ni yɔɔ naakpɛɛ kpo yɛ bei enyɔ nɛɛ fɛɛ mli. Klɛŋklɛŋ lɛ eŋmɛɛ anunyam gbɛhe ni eyɔɔ yɛ ŋwɛi lɛ he. “Ejie yɛ ehe efɔ shi, eŋɔ tsulɔ su efɔ enɔ, etsɔ tamɔ gbɔmɔ.” Akɛ gbɔmɔ lɛ, “eba ehe shi ni ebo toi kɛtee gbele mli kɛtee sɛŋmɔtso nɔ gbele mli tete.”​—Filipibii 2:​7,8.

Esa akɛ wɔle afɔlei ni Yesu shã nɛɛ jogbaŋŋ, ejaakɛ amɛji heshibaa ni mlikwɔ he nɔkwɛmɔ nii kɛha wɔ. (Filipibii 2:​5, 6) Agbɛnɛ hu nɛkɛ niiashikpamɔi nɛɛ eko fɛɛ eko he miihia kɛha Yesu koni eha e-Tsɛ lɛ suɔmɔnaa nii aba mli ni ekɛ ewala akɛ adesa lɛ aha kɛha adesai aweku lɛ yiwalaheremɔ. Nɛkɛ gbɛ nɔ ebaanyɛ ebatsɔ wɔ “Yiwalaherelɔ, ni ji Kristo, nuŋtsɔ lɛ.”

Shi Yesu niiashikpamɔ lɛ waaa biɛ. Ejeee fufɔo ko ni ka kooloi aniyeniianɔ mli ni bɛ hewalɛ ko bianɛ. Ni asaŋ ejeee mɔ ni egbo ni etsotsoro sɛŋmɔtso nɔ. Yɛ egbele sɛɛ lɛ, Nyɔŋmɔ tee lɛ shi kɛtee wala mli ni “Nyɔŋmɔ wo enɔ gojoo ni eduro lɛ gbɛi ni ta gbɛi fɛɛ gbɛi nɔ koni . . . nakutso fɛɛ nakutso akula shi yɛ Yesu gbɛi lɛ amli.”​—Filipibii 2:​9, 10.

Yesu diɛŋtsɛ kɛɛ akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ.” (Mateo 28:18) Amrɔ nɛɛ eji maŋtsɛ ni Nyɔŋmɔ efɔlɛ mu ni eeye maŋtsɛ yɛ ŋwɛi yɛ maŋtsɛyeli ni ato ama shi bianɛ lɛ mli. Daniel gbalɛ lɛ eba mli momo po yɛ enɔ: “Ni aha lɛ nɔyeli kɛ anunyam kɛ maŋtsɛyeli, koni majimaji asafoi kɛ wiemɔi lɛ fɛɛ asɔmɔ lɛ, enɔyeli lɛ naanɔ nɔyeli ni hoŋ eyaŋ ni, emaŋtsɛyeli lɛ nɔ ni fiteŋ ni.”​—Daniel 7:⁠14.

BƆ NI NYƆŊMƆ MAŊTSƐYELI LƐ HE HIAA HA

Beni eyɔɔ shikpɔŋ nɔ lɛ, Yesu kɛ nɛkɛ maŋtsɛyeli nɛɛ fee eshiɛmɔ lɛ yitso, akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ!” (Mateo 4:17) Etsɔɔ esɛɛnyiɛlɔi lɛ ni amɛsɔle amɛha nakai maŋtsɛyeli lɛ, ni ekɛ nakai feemɔ ma bɔ ni ehe hiaa ha lɛ nɔ mi. Ekɛɛ akɛ: “Esa akɛ nyɛsɔlea nɛkɛ: ‘Wɔ Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ, taakɛ afeɔ yɛ ŋwɛi hu.’” (Mateo 6, 9, 10 NW) Ekɛ enɛ tsɔɔ akɛ abaafee Nyɔŋmɔ suɔmɔnaa nii, kɛtsɔ nɛkɛ maŋtsɛyeli ni Yesu ji enɔ maŋtsɛ ni ahala lɛ bianɛ lɛ nɔ.

Mɛni ji Nyɔŋmɔ suɔmɔnaa nii? No ji akɛ Yesu afee “Toiŋjɔlɛ Lumɔ.” No hewɔ lɛ “ehaa tai asɛɛ foɔ kɛyaa shikpɔŋ lɛ naagbeehei lɛ.” (Lala 46:10) Yɛ Yesu gbele lɛ hewɔ lɛ, Nyɔŋmɔ yiŋtoo ji ni ehere adesai ayiwala kɛjɛ esha kɛ gbele mli ni ekɛ hegbɛ ni wɔkɛ aaahi shi kɛya naanɔ lɛ aha wɔ. No hewɔ lɛ Yesu batsɔɔ wɔ “Yiwalaherelɔ, ni ji Kristo nuŋtsɔ lɛ.” Yiwalaheremɔ nitsumɔi nɛɛ mli sɛɛnamɔi lɛ baaba adesai anɔ kɛtsɔ Maŋtsɛyeli lɛ nɔ.

MƐNI JI NƆ NI ENƐ TSƆƆ KƐHA BO?

Beni Yesu da ni ebatsɔ onukpa lɛ, ejie sui komɛi ni ha wɔbaasumɔ esane akɛ gbɔmɔ kpo. Emusuŋ tsɔɔ lɛ haa mɛi ni awaa amɛyi lɛ, ni mɛi ni he yeɔ lɛ anii fee lɛ mɔbɔ, ni ebɔ mɔdɛŋ ni eye ebua amɛ. (Mateo 14:14) Esumɔɔ gbekɛbii ni gbekɛbii bɛŋkɛɔ lɛ. (Mateo 19:​13-15) Esumɔɔ jalɛ ni enyɛɔ mlakwamɔ. (Hebribii 1:⁠9) Agbɛnɛ esumɔ ekaselɔi lɛ “kɛwula shi.”​—Yohane 13:⁠1.

Ani ehiɛ nɛkɛ sui nɛɛ lolo, amrɔ nɛɛ ni eji ŋwɛi maŋtsɛ lɛ? Eka shi faŋŋ akɛ nakai ni. Nɛkɛ sui nɛɛ ni ejie lɛ kpo yɛ be mli ni eji gbɔmɔ yɛ shikpɔŋ nɔ lɛ feɔ lɛ nɔyelɔ ni hi fe fɛɛ kɛha adesa weku lɛ.

Aaafee afii 2,000 ni eho nɛ, ni atswa Yesu fɔmɔ he adafi ni ŋwɛibɔfoi nya babaoo. Shi agbɛnɛ nakai fufɔo lɛ eba! Wɔnyɛŋ wɔku wɔhiɛ wɔshwie anɔkwale ni eji akɛ amrɔ nɛɛ eji “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ” lɛ nɔ. (1 Timoteo 6:15) No hewɔ lɛ, ekɛ ‘toiŋjɔlɛ baaba shikpɔŋ nɔ yɛ gbɔmɛi ni ayɔɔ amɛhe tsuijurɔ lɛ ateŋ’ taakɛ bɔ ni wɔteŋ mɛi pii shweɔ lɛ, shi jeee akɛ fufɔo, shi moŋ akɛ maŋtsɛ ni yeɔ nɔ.

Mɛni hewɔ bo diɛŋtsɛ lɛ otaooo Biblia lɛ mli ni ole Yesu taakɛ eji diɛŋtsɛ, Nyɔŋmɔ maŋtsɛ ni yeɔ nɔ bianɛ lɛ? Mɛni hewɔ okaseee nii ni ona bɔ ni bo hu aaanyɛ akane bo afata gbɔmɛi ni ayɔɔ amɛhe tsuijurɔ ni baana ‘toiŋjɔlɛ yɛ shikpɔŋ nɔ’ ni ewo shi yɛ he fe afii 2,000 ni eho nɛ lɛ ahe? Ohiɛ akakpa nɔ akɛ Yesu diɛŋtsɛ efɔ nine ni tamɔ nɛkɛ etsɛ wɔ: “Nyɛbaa miŋɔɔ, nyɛ mɛi fɛɛ ni etɔnyɛ ni nyɛjatsui fe nyɛ lɛ, ni mahanyɛ hejɔɔmɔ. Nyɛwoa mipa lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛɔ mitsui mli; ni nyɛaana hejɔɔmɔ nyɛha nyɛsusumai lɛ.” (Mateo 11:​28-30) Ani ooonyɛ okpoo ninefɔɔ ni mlihilɛ yɔɔ mli ni jɛ maŋtsɛ ni tamɔ nɛkɛ lɛ ŋɔɔ lɛ yɛ nilee mli?

Wɔsɛɛ be yɛ Kristo maŋtsɛyeli lɛ shishi baayi obɔ kɛ jɔɔmɔi kɛha mɛi ni kpɛlɛɔ hegbɛ nɛɛ nɔ lɛ. Hela bɛ dɔŋŋ, gbele bɛ dɔŋŋ, wɔ suɔlɔi ni amɛgboi lɛ ashitee kɛ mumɔŋ kɛ gbɔmɔtsoŋ shweremɔ ji nɔ ni awo shi aha adesai anɔkwafoi ni yɔɔ Yesu, mɔ ni Gabriel kɛɛ Maria akɛ, “eeeye . . . maŋtsɛ kɛaatee naanɔ” lɛ shishi lɛ.​—Kpojiemɔ 21:4; Yohane 5:​28, 29; Luka 1:⁠33.

Te aaafee tɛŋŋ ni enɛ aaanyɛ aba mli hu, yɛ he mli ni adesai anɔyelii ji nɔ ni yeɔ shikpɔŋ lɛ nɔ ŋmɛnɛ ni amɛyeɔ amɛnɔyelii lɛ ahe awuŋa waa lɛ? Jeee toiŋjɔlɛ lumɔ pɛ Biblia lɛ feɔ Yesu he mfoniri akɛ eji, shi moŋ akɛ maŋtsɛ ni yeɔ kunim ni jieɔ nibii ni tsiɔ adesai anaanɔ miishɛɛnamɔ gbɛ fɛɛ kɛjɛɔ ehiɛ. (Lala 2:​10-12) Biblia lɛ kɛɔ mɛi ni kuɔ amɛhiɛ amɛshwieɔ enɔyeli lɛ nɔ lɛ akɛ: “Ni nɛkɛ maŋtsɛmɛi nɛɛ [ŋmɛnɛŋmɛnɛ maŋkwramɔ nɔyelɔi] ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ, eeedamɔ shi kɛaatee naanɔ.” No hewɔ lɛ Yesu baatsɔ jeŋ nɔyelɔ.​—Daniel 2:⁠44.

[Mfoniri ni yɔɔ baafa 4]

Maria nu akɛ Yesu ‘baaye maŋtsɛ . . . kɛya naanɔ’