Nyɔŋmɔ Wiemɔ Lɛ Hiɛ Ka

Mɛni Yesu Gbele Iɛ Tsɔɔ Kɛha Wɔ?

YƐ YESU KRISTO gbele sɛɛ lɛ, Klopa kɛ enaanyo ni ji gbɛfalɔi lɛ damɔ gbɛ lɛ nɔ diŋŋ ni amɛfee amɛhiɛ “mɔbɔmɔbɔ.” (Luka 24:17) Gbele ji henyɛlɔ, no hewɔ lɛ ekɛ awerɛho baa. Shi nɛkɛ gbɔmɛi nɛɛ baanyɛ ana miishɛɛ diɛŋtsɛ akɛ Yesu egbo, ni wɔ hu nakai nɔŋŋ. Ani ole nɔ hewɔ?

Biblia lɛ tsɔɔ mli: “Kristo gbo yɛ wɔhe eshai lɛ ahewɔ.” “Mɔ ni gbo wɔyi gbele, koni wɔhiɛ akamɔ.” (1 Korintobii 15:3; 1 Tesalonikabii 5:​10, NW) Hɛɛ, atsu Yesu kɛba shikpɔŋ nɔ koni ebahere wɔyiwala. Lɛ diɛŋtsɛ ekɛɛ: “Gbɔmɔ bi lɛ . . . eba . . ni eŋɔ esusuma [aloo, wala] eha yɛ mɛi pii akpɔmɔ hewɔ.” (Mateo 20:28) Shi ákɛ Yesu kɛ ewala ha akɛ “kpɔmɔ nɔ” lɛ tsɔɔ mɛni? Mɛni ji kpɔmɔ nɔ?

Akɛ wiemɔ “kpɔmɔ nɔ” lɛ fɔɔ nitsumɔ be mli ni amɔ mɔ ko ato. Kɛ efɔŋfeelɔ ko mɔ̃ mɔ ko eto lɛ, ebaakɛɛ akɛ ebaaŋmɛɛ mɔ ni emɔ lɛ eto lɛ he kɛ awo shika ko aha lɛ akɛ kpɔmɔ nɔ. No hewɔ lɛ kpɔmɔ nɔ lɛ ji nɔ ko ni kɛ mɔ ni amɔ lɛ ato lɛ jiemɔ loo yiwalaheremɔ baa. Eji nyɔmɔ ko ni awoɔ koni mɔ lɛ akalaaje ewala. Akɛ Yesu adesa gbɔmɔtso ni yeɔ emuu lɛ ha koni akɛjie adesai kɛjɛ esha kɛ gbele nyɔŋyeli mli. (1 Petro 1:​18, 19; Efesobii 1:17) Mɛni hewɔ kpɔmɔ ni tamɔ nɛkɛ he hiaa lɛ?

Ehe hiaa ejaakɛ Adam, wɔblematsɛ lɛ tse atua eshi Nyɔŋmɔ. (1 Mose 2:​17; 3:​11, 12) Emlakwamɔ nifeemɔ lɛ fee lɛ eshafeelɔ, akɛni Biblia lɛ tsɔɔ mli akɛ “esha ji mlakwamɔ” hewɔ. (1 Yohane 3:4; 5:​17, NW) Nɔ ni lɛ mli ba ji akɛ, ebafee mɔ ni esaaa akɛ enine shɛɔ Nyɔŋmɔ nikee nii ni ji naanɔ wala nɔ. (Romabii 6:23) No hewɔ lɛ Adam laaje adesa wala ni yeɔ emuu kɛha lɛ diɛŋtsɛ ehe yɛ paradeiso shikpɔŋ nɔ. Elaaje nɛkɛ gbɛkpamɔ ni yɔɔ naakpɛɛ nɛɛ kɛha ebii fɛɛ ni ebaafɔ lɛ. Shi obaabi akɛ, ‘mɛni hewɔ esa akɛ ebii fɛɛ hu agboi, akɛni Adam pɛ ji mɔ ni fee esha?’

Nɔ hewɔ ji akɛ, beni Adam bafee eshafeelɔ lɛ, ekɛ esha kɛ gbele ha ebii, ni adesai fɛɛ ni yɔɔ wala mli bianɛ lɛ fata he. (Hiob 14:4; Romabii 5:12) No hewɔ lɛ adesai miigboi yɛ esha ni amɛna kɛjɛ Adam dɛŋ lɛ hewɔ. Belɛ te aaafee tɛŋŋ ni Yesu gbele aaaha mɛi fɛɛ aye amɛhe kɛjɛ esha kɛ gbele nyɔŋyeli mli?

Ekɔɔ mla naa taomɔ nii ko ni Nyɔŋmɔ kɛha Israel maŋ lɛ he. Etsɔɔ akɛ ‘akɛ wala ato wala najiaŋ.’ (2 Mose 21:23) Kɛtsɔ etoigbele nɔ hewɔ lɛ gbɔmɔ Adam ní yeɔ emuu lɛ laaje wala ni yeɔ emuu yɛ paradeiso shikpɔŋ nɔ kɛha lɛ diɛŋtsɛ ehe kɛ ebii fɛɛ. Yesu Kristo kɛ lɛ diɛŋtsɛ ewala ni yeɔ emuu lɛ ha koni ekɛhe nɔ ni Adam laaje lɛ. Taakɛ Biblia lɛ tsɔɔ mli lɛ, Yesu “kɛ ehe ha akɛ kpɔmɔ nɔ ni yeɔ egbɔ kɛha mɛi fɛɛ.”​—1 Timoteo 2:​5, 6, NW.

Bo lɛ susumɔ nɔ ni enɛ tsɔɔ kɛha wɔ lɛ he! Etsɔɔ akɛ Yesu fɔse ewala ni ji ela ewo gbele mli bɔni afee ni wɔna hegbɛ wɔhi shi kɛya naanɔ yɛ Nyɔŋmɔ maŋtsɛyeli lɛ nɔyeli shishi. Ani obaatsɔɔ hiɛsɔɔ ni oyɔɔ kɛtsɔ owala ni okɛaasɔmɔ Nyɔŋmɔ kɛ eŋwɛi Bi Yesu Kristo lɛ nɔ?​—2 Korintobii 5:​14, 15.

[Mfoniri ni yɔɔ baafa 8]

Mɛɛ gbɛ nɔ “kpɔmɔ nɔ shika’ aaanyɛ aye abua wɔ ni wɔnu Yesu kpɔmɔ nɔ lɛ shishi?

[Mfonirii ni yɔɔ baafa 9]

Akɛni Yesu kɛ Adam ni yeɔ emuu lɛ yeɔ egbɔ hewɔ lɛ, mɛni ji nɔ ni no tsɔɔ kɛha wɔ?

Mɛni jɛ Adam toigbele lɛ mli ba lɛ diɛŋtsɛ enɔ kɛ adesa weku lɛ fɛɛ nɔ?