Nyɔŋmɔ Wiemɔ Lɛ Hiɛ Ka
Mɛni Ji Nyɔŋmɔ Maŋtsɛyeli Lɛ?
BENI Yesu Kristo yɔɔ shikpɔŋ nɔ lɛ, no mli lɛ enitsumɔ titri ji ni eshiɛ ni etsɔɔ Nyɔŋmɔ Maŋtsɛyeli lɛ he nii. Be ko lɛ etsɔɔ mli akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43) Taakɛ obaana yɛ biɛ lɛ, Yesu tsu esɛɛnyiɛlɔi lɛ ni amɛyashiɛ nɛkɛ Maŋtsɛyeli nɛɛ nɔŋŋ. (Mateo 10:1, 7) Etsɔɔ esɛɛnyiɛlɔi lɛ ni amɛsɔle amɛha Nyɔŋmɔ akɛ: “Omaŋtsɛyeli lɛ aba. Afee nɔ ni osumɔɔ yɛ shikpɔŋ nɔ taakɛ afeɔ yɛ ŋwɛi lɛ.”—Mateo 6:10.
Mɛni ji Nyɔŋmɔ maŋtsɛyeli nɛɛ, ni mɛni hewɔ ehe hiaa nakai lɛ? Ojogbaŋŋ, ole mɔ ni maŋtsɛ ji. Eji maŋ loo shikpɔŋ ko nɔyelɔ. Akɛni eji maŋtsɛ hewɔ lɛ atsɛɔ enɔyeli lɛ akɛ maŋtsɛyeli. Nyɔŋmɔ Maŋtsɛyeli lɛ hu ji nɔyeli. Biblia lɛ wieɔ he yɛ nɛkɛ wiemɔi nɛɛ amli: “Ejaakɛ afɔ bi fufɔoo aha wɔ, aha wɔ binuu hu; ni elumɔyeli lɛ aaaka ekɔŋ nɔ, ni aaatsɛ egbɛi akɛ . . . hejɔlɛ lumɔ. Elumɔyeli lɛ shweremɔ kɛ hejɔlɛ lɛ sɛɛ efoŋ.”—Yesaia 9:5, 6.
Nɛkɛ maŋtsɛ bi—nɛkɛ Maŋtsɛ Kpeteŋkpele, Yehowa Nyɔŋmɔ nɛɛ Bi ji Yesu Kristo. Nyɔŋmɔ ehala lɛ koni efee E-Maŋtsɛyeli nɔyeli lɛ nɔyelɔ. Bɔni afee ni ona akɛ Nyɔŋmɔ Maŋtsɛyeli lɛ ji sane ni he hiaa yɛ Kristo sɔɔmɔ lɛ mli lɛ, susumɔ nɔ ni ba yɛ egbele gbi lɛ nɔ lɛ he.
Biblia lɛ kɛɔ wɔ akɛ gbɔmɛi lɛ folɔ Yesu naa, akɛ: “Wɔna nuu nɛɛ ni eewo maŋ lɛ yiŋ eegu oniatsumɔ yɛ Kaisare hamɔ, ni ekɛɔ akɛ lɛ diɛŋtsɛ ji Kristo maŋtsɛ lɛ.”
Beni enu nɛkɛ wiemɔi nɛɛ lɛ, Roma amralo Pontio Pilato bi Yesu akɛ: “Ani bo ji Yudafoi lɛ amaŋtsɛ lɛ?”—Luka 23:1-3.
Yesu haaa Pilato sanebimɔ lɛ hetoo tɛ̃ɛ, shi moŋ ekɛɛ: “Mimaŋtsɛyeli lɛ jɛɛɛ je nɛŋ.” (Yohane 18:36) Yesu ha hetoo yɛ nɛkɛ gbɛ nɔ ejaakɛ e-Maŋtsɛyeli lɛ efeŋ shikpɔŋ nɔ nɔ̃ ni kɔɔ adesa maŋkwramɔ he. Ákɛ Nyɔŋmɔ Maŋtsɛ lɛ, ebaaye nɔ kɛjɛ ŋwɛi, jeee tamɔ gbɔmɔ kɛmiijɛ shikpɔŋ nɔ maŋtsɛsɛi ko nɔ.
Ani okadi nɔ ni Nyɔŋmɔ nɔyeli lɛ baaha afa ni ebaŋ naagbee lɛ yɛ Yesaia wolo lɛ mli? Hɛɛ, hejɔlɛ. No hewɔ lɛ obaanyɛ ona nɔ hewɔ ni nɔyeli lɛ he hiaa waa bianɛ? Adesa nɔyeli ko bɛ ni kɛ naanɔ hejɔlɛ loo toiŋjɔlɛ baaba. Nyɔŋmɔ Maŋtsɛyeli lɛ pɛ baanyɛ afee nakai. Yesu kɛ ewala tsu nii yɛ shikpɔŋ nɔ ekɛgba gbɔmɛi lɛ naakpɛɛ anɔkwalei ni kɔɔ Nyɔŋmɔ Maŋtsɛyeli nɔyeli lɛ he lɛ he sane. No ji eshiɛmɔ sane titri. Maŋtsɛyeli lɛ ka he eji sane oti ni he hiaa ŋmɛnɛ.