Kristofoi Kɛ Tsuishiŋmɛɛ Damɔɔ Yiwaa Naa
1, 2. Te Yehowa odasefoi anɔkwafoi lɛ kpeɔ yiwaa naa amɛhaa tɛŋŋ, shi mɛɛ sanebimɔ enɛ kɛbaa?
1 YEHOWA ODASEFOI taooo ni amɛtsɔmɔ lá Odasefoi. Shi kɛlɛ, amɛle akɛ “mɛi fɛɛ hu ni taoɔ akɛ amɛaahi shi yɛ Nyɔŋmɔjamɔ naa yɛ Kristo Yesu mli lɛ, aaawa amɛ yi.” (2 Timoteo 3:12) Ani enɛ haa amɛhaoɔ?
2 Dabi, ejaakɛ anɔkwa Kristofoi baanyɛ ni amɛkɛ “tsuishiŋmɛɛ akpee yiwaa naa.” (1 Korintobii 4:12, The Twentieth Century New Testament, Revised Edition) Shi te wɔɔfee tɛŋŋ wɔsaa wɔhe wɔha nɛkɛ piŋmɔ nɛɛ dani eba wɔnɔ?
Hesaamɔ Kɛha Yiwaa
3. Mɛni ji gbɛi komɛi ni aaatsɔ nɔ asaa he kɛha yiwaa?
3 Nikasemɔ ni tsɔ hiɛ lɛ tsɔɔ wɔ gbɛ ni wɔɔtsɔ nɔ wɔsaa wɔhe kɛha yiwaa. Akɛ nɔkwɛmɔ nɔ lɛ, ehe miihia ni wɔkai Abonsam yiŋtoo—ni efite wekukpaa ni ka wɔkɛ Yehowa teŋ lɛ. Yɛ Nyɔŋmɔ duromɔ naa lɛ, ekaba kɔkɔɔkɔ akɛ wɔɔha aba lɛ nakai! Wɔbaanyɛ wɔsaa wɔhe wɔha yiwaa hu kɛji akɛ wɔsusu nɔ hewɔ ni Nyɔŋmɔ ŋmɛɔ gbɛ lɛ he. Efeɔ nakai titri lɛ yɛ je muu fɛɛ nɔyeli he sane ni ka shi lɛ hewɔ, kɛ agbɛnɛ hu koni ekɛka wɔ anɔkwayeli ekwɛ. No hewɔ lɛ, nyɛhaa wɔtsɔ̃a hiɛ wɔtswa wɔfai shi akɛ yɛ ŋwɛi yelikɛbuamɔ naa lɛ, wɔbaafee Nyɔŋmɔ nɔyeli lɛ sɛɛfilɔi anɔkwafoi. Nɔ ni fata he lɛ, abaanyɛ asaa wɔ kɛha yiwaa kɛji akɛ Maŋtsɛyeli hiɛnɔkamɔ lɛ yɛ wɔtsui mli.
4, 5. Te wɔɔfee tɛŋŋ wɔtswa wɔhemɔkɛyeli wɔma shi yɛ be mli ni wɔsaa wɔhe dani yiwaa aba wɔnɔ lɛ?
4 Beni wɔsaa wɔhe dani yiwaa aba wɔnɔ lɛ, ehe miihia ni wɔtswa wɔhemɔkɛyeli, ekaa kɛ tsuishiŋmɛɛ wɔma shi daa gbi. Kɛ wɔɔna hemɔkɛyeli diɛŋtsɛ lɛ, belɛ esa akɛ wɔsumɔ Yehowa yɛ anɔkwayeli mli, ni enɛ biɔ e-Wiemɔ lɛ he anɔkwale nilee. Nɔ ni enɛ hu biɔ ji ni wɔkane ni wɔkase Ŋmalɛ lɛ daa kɛ Kristofoi awoji krokomɛi ni kɔɔ he. Agbɛnɛ hu, nɔ ni he hiaa hemɔkɛyeli ni wa ji naanyobɔɔ kɛ nanemɛi heyelilɔi yɛ Yehowa jamɔ kɛ sɔɔmɔ mli.—Hebribii 10:23-25; 12:28; Kpojiemɔ 7:9, 10, 15.
5 Dani wɔɔsaa wɔhe wɔha yiwaa lɛ, ehe miihia hu ni “wɔya nɔ wɔnyiɛ yɛ anɔkwale lɛ mli,” wɔkɛfee wɔshihilɛ, ni wɔha “Anɔkwale lɛ akudɔ wɔ” daa. (3 Yohane 3, 4, NW; TCNT) Kɛ wɔkpɛlɛ Nyɔŋmɔ gbɛtsɔɔmɔ nɔ yɛ be mli ni wɔkɛ kaai bibii kpeɔ daa gbi Iɛ, wɔbaatswa wɔhemɔkɛyeli ni yɔɔ Yehowa kɛ egbɛi amli lɛ wɔma shi. Nɔ ni baajɛ mli aba ji, enɛ hu baatsirɛ wɔ koni “Anɔkwale lɛ atsɔɔ wɔ gbɛ” yɛ be mli ni awaa wɔ yi.
6. Yɛ mɛɛ gbɛ nɔ sɔlemɔ baanyɛ eye abuɔ wɔ ni wɔsaa wɔhe kɛha yiwaa?
6 Kɛ wɔkɛfee wɔsubaŋ akɛ wɔɔsɔle daa gbi wɔha Yehowa lɛ, ebaagbala wɔ kɛbɛŋkɛ ehe, ni enɛ hu baaye abua wɔ ni esaa wɔ kɛha yiwaa. Babaoo ni wɔtsɔɔ sɔlemɔ nɔ wɔkɛ wɔhe fɔɔ wɔŋwɛi Tsɛ lɛ nɔ Iɛ, babaoo hu ni wɔkɛ wɔhiɛ aaafɔ enɔ ji no. (2 Korintobii 1:8-10) No hewɔ lɛ wekukpaa ni ka wɔkɛ lɛ teŋ lɛ mli baawa tsɔ akɛ wɔhenyɛlɔi, adesai loo daimonioi nyɛŋ afite lɛ.—Okɛto Lala 9:1-6; 1 Yohane 2:12-14 he.
Tsuishiŋmɛɛ Ni Wɔkɛaakpee Naa
7. Kɛ aawa wɔ yi lɛ, mɛni Nyɔŋmɔ baanyɛ afee kɛji akɛ wɔ diɛntsɛ wɔhewalɛ ta?
7 Kɛ yiwaa ba wɔnɔ diɛŋtsɛ lɛ, titri lɛ yɛ niseniianifeemɔ mli lɛ, mɛni wɔbaanyɛ wɔfee ni wɔkɛ tsuishiŋmɛɛ akpee naa? Hewalɛ kɛmiijɛ Yehowa ŋɔɔ he hiaa! “Hewalɛ ni fa kɛteke nɔ” lɛ he miihia wɔ tamɔ Paulo, ni esa akɛ wɔsɔle kɛha enɛ. (2 Korintobii 4:7-12) Kɛkɛ lɛ beni wɔkɛ wɔhe fɔɔ wɔŋwɛi Tsɛ lɛ nɔ babaoo lɛ, wɔbaanyɛ wɔna hekɛnɔfɔɔ taakɛ Paulo ji beni ekɛɛ akɛ: “Minyɛɔ nii fɛɛ mifeɔ yɛ mɔ ni wajeɔ mi [Yehowa Nyɔŋmɔ] lɛ mli.” (Filipibii 4:13, Byington) Yɛ be mli ni wɔ diɛŋtsɛ wɔgbɔmɔtsoŋ hewalɛ lɛ eta po lɛ, nibii ni Yehowa kɛhaa wɔ lɛ etaŋ. Enyɛɔ ni ekɛ hewalɛ hu haa ewebii. (Yesaia 40:28-31; 45:22-25) Kɛ wɔkpasa Yehowa lɛ, ebaaha wɔ hewalɛ fe bɔ ni wɔ diɛŋtsɛ wɔɔnyɛ yɛ haomɔ be mli. Ni nyɛkahaa wɔshea gbeyei. Nɔ ni gbɔmɔ baanyɛ afee pɛ ji ni ekpata wɔŋmɛnɛŋmɛnɛ wala nɛɛ hiɛ, shi Yehowa ji mɔ ni yɔɔ hewalɛ ni ekɛ wɔ aaaba wala mli kɛtsɔ gbohiiashitee nɔ.—Lala 46:1, 2; Luka 12:4-7; Yohane 5:28, 29.
8. Mɛni hewɔ sɔlemɔ he hiaa waa bɔni afee ni wɔnyɛ wɔkɛ tsuishiŋmɛɛ akpee yiwaa naa lɛ?
8 Sɔlemɔ ni akɛaafɔ Yehowa hiɛ lɛ ji nɔ ko ni anyɛŋ ajie kɛjɛ mli yɛ tsuishiŋmɛɛ ni wɔkɛaakpee yiwaa naa lɛ mli. Yesu, ni tsɔ piŋmɔi babaoo mli lɛ kɛ ehe kpɛtɛ e-Tsɛ lɛ he yɛ be fɛɛ mli yɛ sɔlemɔ ni jɛ tsuiŋ tɔɔ ni efeɔ ehaa lɛ lɛ mli, ejaakɛ wɔkaneɔ akɛ: “Eheloo gbii lɛ amli lɛ eŋɔ sɔlemɔi kɛ faikpamɔi ni bolɔmɔ ni naa wa kɛ yaafonui fata he esha afɔle eha mɔ ni yɔɔ hewalɛ ni ekɛaahere lɛ kɛaajɛ gbele mli lɛ, ni abo lɛ toi hu.” (Hebribii 5:7) Yɛ nɔmimaa mli lɛ, ‘sɔlemɔ Toibolɔ’ lɛ hu baabo wɔ toi yɛ Nyɔŋmɔ ni wɔsheɔ lɛ gbeyei lɛ hewɔ. (Lala 65:3) Yɛ yiwaa be mli lɛ bɔ ni ehe hiaa akɛ ‘wɔhiɛ sɔlemɔ mli daa’ ni agbɛnɛ ‘wɔsɔle ni wɔkafɔɔ’ koni ‘wɔhiɛ aka shi aha sɔlemɔ’ lɛ nyɛŋ afee nɔ ni aama nɔ mi tsɔ. (Romabii 12:12; 1 Tesalonikabii 5:17; 1 Petro 4:7) Kɛjeee nakai lɛ, wɔbaanyɛ wɔsusu nibii ni eŋɔɔɔ kɛ piŋmɔ lɛ pɛ he, ni eeeha wɔshwe akɛ aaajie wɔ kɛaajɛ piŋmɔ lɛ shishi, ni wɔŋmɛɛ wɔhe wɔha heloo lɛ akɔnɔi kɛtsɔ wɔhemɔkɛyeli lɛ ni wɔɔŋmɛɛ he ni wɔkɛsaa lɛ nɔ.
9, 10. (a) “Nyɔŋmɔ toiŋjɔlɛ” lɛ baanyɛ aye abua wɔ yɛ be mli ni awaa wɔ yi lɛ yɛ mɛɛ gbɛ nɔ? (b) Mɛni wɔbaanyɛ wɔkase kɛjɛ Stefano dioofeemɔ yɛ be mli ni ekɛ yiwalɔi lɛ kpeɔ lɛ mli?
9 Taomɔ “Nyɔŋmɔ toiŋjɔlɛ” kɛ oyɛ nɔnyɛɛ loo haomɔ shishi. Kɛ wɔsɔle wɔha Yehowa daa gbi lɛ, etsɔɔ akɛ wɔto shihilɛ gbɛ fɛfɛo ko he nɔkwɛmɔ nɔ wɔfɔ shi, ni esa akɛ wɔya nɔ wɔkɛ anɔkwayeli abɛŋkɛ lɛ be mli ni awaa wɔ yi. Ehi jogbaŋŋ akɛ wɔɔsɔle kɛha “Nyɔŋmɔ toiŋjɔlɛ ni fe jwɛŋmɔi fɛɛ lɛ.” Eeenyɛ ‘ebu wɔtsui kɛ wɔjwɛŋmɔŋ nyɛmɔi ahe kɛtsɔ Kristo Yesu nɔ kɛyashi gbele yɛ hemɔkɛyeli mli nɔ, kɛ ehe miihia nakai.—Filipibii 4:6, 7.
10 Ákɛ nɛkɛ hejɔlɛ ni nɔ ko bɛ ni fe lɛ nɛɛ baanyɛ afee wɔ nɔ yɛ be mli ni awaa wɔ yi lɛ, wɔnaa enɛ yɛ anɔkwafo Stefano, klɛŋklɛŋ Kristofonyo lá odasefonyo lɛ sane lɛ mli. Dani mumɔ krɔŋkrɔŋ lɛ aaatsirɛ lɛ ni eye enaagbee odase ni ekɛ ekãa ye lɛ, Biblia lɛ kɛɔ akɛ: “Ni mɛi ni tara akuashɔŋ lɛ mli lɛ fɛɛ tsuu amɛhiŋmɛii amɛshwie enɔ, ni amɛna ehiɛ tamɔ Nyɔŋmɔ bɔfo ko hiɛ.” (Bɔfoi lɛ Asaji 6:15) Ehiɛ tamɔɔɔ efɔŋfeelɔ ni nijiaŋ eje wui hiɛ, shi moŋ ehiɛ tamɔ ŋwɛibɔfo, Nyɔŋmɔ bɔfo hiɛ, kɛ hekɛnɔfɔɔ akɛ Nyɔŋmɔ yɛ esɛɛ. Stefano yɛ ekãa kɛ toiŋjɔlɛ. (Okɛto Yohane 14:27 he.) Yɛ be mli ni ekpa kojolɔi lɛ atɔmɔ lɛ he mama sɛɛ yɛ gbe ni amɛgbe Yesu Kristo hewɔ lɛ, “etsurɔ amɛtsuii amli, ni amɛkpe amɛnyanyɔji ashishi amɛshwie enɔ.” Shi akɛni “mumɔ krɔŋkrɔŋ eyi lɛ [Stefano] obɔ lɛ, ekwɛ ŋwɛi gaa, ni ena Nyɔŋmɔ anunyam lɛ kɛ Yesu ni edamɔ Nyɔŋmɔ ninejurɔ nɔ.” Akɛni nakai ninaa lɛ wo lɛ hewalɛ hewɔ lɛ, Stefano baanyɛ adamɔ nakai kojolɔi ni ejaaa lɛ ahiɛ kɛ ekãa kɛ hekɛnɔfɔɔ akɛ efee Yehowa suɔmɔnaa nii. (Bɔfoi lɛ Asaji 7:52-56) Eyɛ mli akɛ Kristofoi ni yɔɔ ŋmɛnɛ lɛ kpaaa gbɛ akɛ amɛbaana ninaa ko ni tamɔ nakai moŋ, shi kɛlɛ amɛyɛ toiŋjɔlɛ ni Nyɔŋmɔ kɛhaa lɛ yɛ be mli ni amɛkɛ tsuishiŋmɛɛ kpeɔ yiwaa naa lɛ.
11. Mɛni nɔ jwɛŋmɔ baanyɛ aye abua Yehowa webii ni amɛŋmɛ amɛtsui shi yɛ yiwaa shishi?
11 Jwɛŋmɔ Yehowa Wiemɔ lɛ, enifeemɔi kɛ yiŋtooi ahe. Kɛji akɛ ashɔ̃ wɔ-Biblia kɛ woji ni kɔɔ Ŋmalɛi lɛ ahe lɛ kɛjɛ wɔdɛŋ po lɛ, susumɔ Nyɔŋmɔ Wiemɔ lɛ he. Kaimɔ Biblia mli kukuji kɛ saji, ofee enɛ kɛtsɔ gbi muu lɛ fɛɛ mli kɛ agbɛnɛ be mli ni onyɛɛɛ owɔ gbɛkɛ. (Okɛto Lala 77:3, 7, 12, 13 he.) Susumɔ naakpɛɛ gbɛ ni Yehowa tsɔ nɔ ekɛ eblemabii ni awa amɛ yi loo ahao amɛ lɛ ye ha lɛ he. Akɛ nɔkwɛmɔ nɔ lɛ, jwɛŋmɔ bɔ ni Nyɔŋmɔ jie Israelbii lɛ kɛjɛ Mizraim nyɔŋyeli mli, ewaje Daniel kɛ enanemɛi Hebribii etɛ lɛ yɛ amɛkaai amli, ebaa Yudafoi lɛ ayi yɛ Mordekai kɛ Ester gbii lɛ amli, ni efi bɔfoi lɛ kɛ mra be mli Kristofoi lɛ asɛɛ yɛ amɛpiŋmɔi yɛ jalɛ hewɔ lɛ he. (2 Mose 12:1–15:21; Daniel 3:1-30; 6:1-28; Ester 3:1–9:32; Bɔfoi lɛ Asaji 4:1–5:42; 12:1-17; 14:1-7, 19, 20; 16:16-40; 18:12-17; 19:23-41; 21:26–26:32) Agbɛnɛ hu susumɔ bɔ ni Yehowa ye ebua eŋmɛnɛŋmɛnɛ beaŋ tsuji lɛ yɛ Nazi gbokɛlɛfoi aŋsraŋ lɛ kɛ kɔmunist gbokɛlɛfoi atsui amli lɛ he. Kɛ aawa amɛ yi lɛ, Yehowa jalɔi nuɔ Nyɔŋmɔ “naanɔ niji” lɛ Sɛɛfimɔ he.—5 Mose 33:27.
12. Kɛ aawa wɔ yi lɛ, mɛni esa akɛ wɔkai yɛ wɔpiŋmɔ lɛ he, ni mɛɛ hekɛnɔfɔɔ kɛ hiɛnɔkamɔ esa akɛ wɔna?
12 Piŋmɔ baaba naagbaa. Enɛ ni wɔɔkai lɛ hu baaye abua wɔ ni wɔkɛ tsuishiŋmɛɛ akpee yiwaa naa. Agbɛnɛ hu, ‘Nyɔŋmɔ baahao mɛi ni haoɔ wɔ Iɛ eto najiaŋ, yɛ be mli ni ekɛ hejɔlɛ haa wɔ lɛ. (2 Tesalonikabii 1:6-10) No hewɔ lɛ, yɛ be mli ni wɔnaa nɔ̃ akɛ Yehowa odasefoi lɛ, esa akɛ wɔkwɛ wɔsɛɛ be, kɛ hekɛnɔfɔɔ akɛ wɔ nɔnaa lɛ sɛɛ baafo ni anɔkwa ni wɔɔye lɛ baaha wɔna jɔɔmɔi babaoo kɛjɛ wɔŋwɛi Tsɛ lɛ dɛŋ. Akɛ nɔkwɛmɔ nɔ lɛ, be baashɛ ni abaajie wɔ kɛjɛ gbokɛlɛfoi atsui amli ni agbɛnɛ wɔna miishɛɛ ekoŋŋ ni wɔkɛsɔmɔ lɛ ni naatsii ko bɛ mli akɛ Maŋtsɛyeli jajelɔi ni yɔɔ miishɛɛ. Shi kɛji akɛ nakai baaa amrɔ nɔŋŋ po lɛ, wɔpiŋmɔ lɛ eyaŋ nɔ kɛyaŋ naanɔ. Ni wɔbaanyɛ wɔŋmɛ wɔtsui shi yɛ mli kɛji akɛ wɔkɛ wɔhiɛ fɔ Yehowa nɔ kwraa ni wɔkɛ wɔhe fɔ eshiwoo ni kɔɔ jɔɔmɔi ni eko bɛ ni tamɔ nakai yɛ e-Gbɛjianɔtoo Hee ni egba efɔ shi lɛ mlibaa nɔ lɛ. Kpojiemɔ 21:1-4; Okɛto 2 Korintobii 1:19, 20 he.
13. Mɛɛ miishɛjemɔ wɔbaanyɛ wɔna kɛjɛ 1 Korintobii 10:13 yɛ yiwaa be mli?
13 Nyɔmŋɔ eŋmɛŋ gbɛ ni aka wɔ fe bɔ ni wɔɔnyɛ wɔtere. Bɔfo Paulo kɛ nakai nɔmimaa lɛ ha beni eŋma akɛ: “Kaa ko bako nyɛnɔ ni jeee gbɔmɔ he nɔ; shi anɔkwafo ji Nyɔŋmɔ, mɔ ni haŋ akanyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ ahanyɛ ni nyɛje mli hu, koni nyɛnyɛ mli nyɛmɔ.” (1 Korintobii 10:13) Jeee Kristofoi fɛɛ abiɔ ni amɛŋmɛ amɛtsui shi yɛ nakai piŋmɔi lɛ nɔŋŋ mli. No hewɔ lɛ, ehe ehiaaa ni wɔsusu yiwaa ko ni mli wa fe fɛɛ ni ehe hiaa akɛ eba yɛ wɔgbɛfaŋ lɛ he. Yehowa haŋ wɔnine anyɛ shi aloo ni eeeŋmɛ gbɛ ni nɔ ko ni wɔnyɛŋ wɔtere yɛ lɛ ehewalɛ mli kɛ emumɔ krɔŋkrɔŋ lɛ yelikɛbuamɔ mli aba wɔnɔ. Shi esa akɛ wɔkɛ wɔhe afɔ enɔ kwraa ni wɔhe nɔ ni e-Wiemɔ lɛ kɛɔ lɛ wɔye. Shi kɛlɛ, kɛ wɔkɛ wɔhe fɔɔ Yehowa nɔ kwraa lɛ wɔbaanyɛ wɔtsɔ tsuishiŋmɛɛ nɔ wɔkɛ yiwaa akpe.—Lala 9:9, 10.
Satan Nyɛɛ Lɛ Ji Yaka Nyɛɛ
14, 15. Yɛ mɛɛ gbɛ nɔ aha mɔdɛŋ ni Satan bɔɔ koni ekɛkumɔ Yehowa webii kɛtsɔ yiwaa nɔ lɛ efee yaka?
14 Nyɔŋmɔ ni he wa fe fɛɛ ni mɔ ko kɛ lɛ yeee egbɔ Iɛ kudɔɔ Yehowa odasefoi anɔkwafoi lɛ, ni eyeɔ ebuaa amɛ babaoo hewɔ lɛ, Satan Abonsam kɛ emɛi ni eshishiu amɛ ni waa amɛ yi lɛ nyɛŋ aye nɛkɛ anɔkwale Kristofoi diɛŋtsɛ nɛɛ anɔ kunim kɔkɔɔkɔ. Mɔdɛŋ ni Abonsam bɔɔ koni ekɛkumɔ Yehowa webii kɛtsɔ yiwaa nɔ lɛ efee yaka shii abɔ. Anɔkwale mli lɛ, eshɛɔ be ni yiwaa nɛɛ diɛŋtsɛ yabuaa Yehowa kɛ E-webii a-Henyɛlɔ Kpele lɛ diɛŋtsɛ pampam, ni ehaa ŋwɛi suɔmɔnaa nii yeɔ kunim.
15 Nɔ ni yeɔ enɛ he odase lɛ, susumɔ “yiwaa babaoo” ni akɛte shi awo asafo lɛ ni yɔɔ Yerusalem lɛ yɛ be mli ni agbe Stefano akɛ lá Odasefonyo nɔŋŋ lɛ sɛɛ lɛ he. Akɛɔ wɔ akɛ: “Amɛ fɛɛ amɛgbɛ amɛshwa Yudea kɛ Samaria niiaŋ, ja bɔfoi lɛ kɛkɛ shwɛ.” Shi kaselɔi ni agbɛ amɛ ashwa lɛ “yakpa shi, ni amɛjaje sanekpakpa lɛ,” ni ajɔɔ amɛmɔdɛŋbɔɔi lɛ anɔ. Akɛ nɔkwɛmɔ nɔ lɛ, mumɔŋ shweremɔ babaoo ba Samaria maŋtiase lɛ mli. (Bɔfoi lɛ Asaji 8:1-8) Kaselɔi krokomɛi ni agbɛ amɛ ashwa lɛ shiɛ yɛ Foinike, Kipro kɛ Antiokia, Siria. Ni be mli ni amɛyɔɔ Antiokia lɛ “Nuŋtsɔ lɛ nine fata amɛhe, ni mɛi babaoo he ye, ni amɛtsɔ amɛhe kɛba Nuŋtsɔ lɛ ŋɔɔ.” (Bɔfoi lɛ Asaji 11:19-21) Wɔbaanyɛ wɔna nɔmimaa akɛ nɔ ni ba nɛɛ fite nɔ ni Yiwalɔ Kpeteŋkpele lɛ shweɔ akɛ kulɛ eeeba lɛ.—Okɛto Filipibii 1:12-14 he.
16. Mɛni baa mɛi ni waa wɔ yi lɛ anɔ yɛ bei komɛi amli?
16 Be fɛɛ be ni Yehowa Odasefonyo anɔkwafo ko aaaŋmɛ etsui shi yɛ yiwaa mli lɛ enɛ kɛ hiɛshishwiemɔ baa Satan nɔ, ni ehaa aleɔ lɛ akɛ amalelɔ. Agbɛnɛ hu, kɛ tsutsu yiwalɔ ko batsɔ Nyɔŋmɔ kɛ Kristo Odasefonyo anɔkwafo ni awaa lɛ yi ni ehi shi nakai lɛ, Abonsam hiɛ shwieɔ shi ekoŋŋ akɛ aye enɔ kunim. Akɛ nɔkwɛmɔ nɔ lɛ, be mli ni tsutsu yiwalɔ Saul ni jɛ Tarso lɛ batsɔ Yesu sɛɛnyiɛlɔi ni awaa amɛ yi lɛ ateŋ mɔ kome ni tsu nii waa yɛ sanekpakpa lɛ gbɛɛkɛshwamɔ mli yɛ yiwaa kɛ piŋmɔi babaoo lɛ fɛɛ sɛɛ lɛ esumɔɔɔ kwraa.—2 Korintobii 11:23-27, 1 Timoteo 1:12-16.
17. Esa akɛ Yehowa Odasefoi ni awaa amɛ yi lɛ ana mɛɛ su yɛ mɛi ni waa amɛ yi lɛ ahe?
17 Belɛ kwɛ bɔ ni ehe hiaa akɛ Yehowa odasefoi ni awaa amɛ yi lɛ aaana mɛi ni waa amɛ yi lɛ ahe jwɛŋmɔ kpakpa! Stefano naaa mɛi ni waa lɛ yi lɛ ahe jwɛŋmɔ fɔŋ ko. Yɛ anɔkwale mli lɛ, yɛ be mli ni amɛtswiaa lɛ tɛi lɛ ekula shi, ni dani eeewɔ yɛ gbele mli lɛ, “ebo kɛ gbee walɛ akɛ: Nuŋtsɔ Yehowa, kaaŋɔ nɛkɛ esha nɛɛ oŋmɛ amɛnɔ.” (Bɔfoi lɛ Asaji 7:57-60) Agbɛnɛ hu, Yesu kɛɛ: “Nyɛsumɔa nyɛhenyɛlɔi, . .. nyɛsɔlea nyɛhaa mɛi ni haoɔ nyɛ ni amɛwala nyɛ yi lɛ.”—Mateo 5:44; Romabii 12:14; 1 Korintobii 4:11-13.
Wɔ-Bɔlɔ Lɛ Haŋ Wɔnine Anyɛ Shi
18. Mɛni baaba be mli ni Satan tutuaa Yehowa webii yɛ naagbee kwraa lɛ?
18 Adesa yinɔsane be ni mli wa fe fɛɛ mli wɔyɔɔ bianɛ lɛ. Eji be ni akɛkaa ni ashaa mɛi ni kɛɔ akɛ amɛji Kristofoi lɛ amli. (Okɛto Luka 22:31, 32; 1 Petro 4:16, 17 he) Satan be lɛ faaa dɔŋŋ, ni etsɛŋ ni ebaatutua Yehowa webii yɛ naagbee kwraa. Shi Nyɔŋmɔ baaye abua amɛ ni amɛnyɛ amɛkɛ tsuishiŋmɛɛ adamɔ nɛkɛ yiwaa nɛɛ naa ni amɛbaaje mli akɛ kunimyelɔi. Shikome ekoŋŋ, Satan (akɛ Gog ni jɛ Magog) lɛ hiɛnɔkamɔ lɛ baafee yaka ni abaaye enɔ kunim kwraa. Nɔ ni fata he lɛ, yɛ be mli ni etaa E-webii lɛ ahe nɛɛ mli lɛ, Nyɔŋmɔ ‘baafee ehe agbo ni efee lɛ diɛŋtsɛ ehe krɔŋkrɔŋ, ni eha ale lɛ yɛ jeŋmaji fɛɛ mli, koni amɛna amɛle akɛ lɛ ji Yehowa.’ Agbɛnɛ hu, enɛ ji nɔ ni Satan taooo kwraa lɛ.—Ezekiel 38:14–39:7; Kpojiemɔ 12:12.
19. Yɛ ŋwɛi yelikɛbuamɔ hewɔ lɛ mɛni Yehowa Odasefoi ni awaa amɛ yi lɛ baafee?
19 Akɛ Yehowa odasefoi ni wɔjɔɔ wɔhe nɔ lɛ, wɔle akɛ Satan miisumɔ ni efite wekukpaa ni ka wɔkɛ Nyɔŋmɔ Ofe lɛ teŋ lɛ. Shi yɛ Nyɔŋmɔ duromɔ naa Iɛ, wɔŋmɛŋ wɔhemɔkɛyeli lɛ he ni wɔkɛsaa. Shi moŋ, wɔbaaha sane kpele ni ka shi lɛ ahi wɔjwɛŋmɔ mli ni wɔtao gbɛ fɛɛ gbɛ ni wɔɔtsɔ nɔ wɔfi Yehowa je muu fɛɛ nɔyeli lɛ sɛɛ. Akɛni wɔyɔɔ hekɛnɔfɔɔ yɛ Maŋtsɛyeli hiɛnɔkamɔ lɛ mli hewɔ lɛ, wɔmii baanyɛ ashɛ wɔhe, tsɛ awaa wɔ yi. Wɔsaa wɔhe akɛ wɔbaaŋmɛ wɔtsui shi yɛ yiwaa mli, ejaakɛ wɔkɛ wɔhe efɔ “mɔ ni nyɛɔ efeɔ kɛtekeɔ nɔ babaoo fe nii fɛɛ ni wɔkpaa he fai loo wɔjwɛŋɔ” lɛ nɔ.——Efesobii 3:20, 21.
20. Mɛɛ hekɛnɔfɔɔ wɔbaanyɛ wɔna yɛ wɔ “Bɔlɔ anɔkwafo” lɛ mli?
20 No hewɔ lɛ, nyɛhaa wɔfea wɔhe mɛi ni sheee henyɛlɔ lɛ gbeyei, kɛwo Nyɔŋmɔ hiɛ nyam kɛ agbɛnɛ kɛha wɔ diɛŋtsɛ wɔyiwalaheremɔ. Eba akɛ wɔɔkwɛ “Yehowa gbɛ ni wɔnyiɛ egbɛ lɛ nɔ.” (Lala 37:34, NW) Yɛ be mli ni wɔtoɔ wɔtsui shi yɛ yiwaa mli Iɛ, eba akɛ wɔɔjie su ni yɔɔ bɔfo Petro wiemɔi nɛɛ amli lɛ kpo wɔtsɔɔ: “No hewɔ lɛ mɛi ni naa amanehulu yɛ Nyɔŋmɔ suɔmɔ lɛ naa lɛ hu atuu amɛsusumai awo bɔlɔ anɔkwafo lɛ dɛŋ yɛ ekpakpafeemɔ mli.” (1 Petro 4:19) Wɔ “Bɔlɔ anɔkwafo” lɛ haŋ wɔnine anyɛ shi. Wɔmii baanyɛ ashɛ wɔhe yɛ ehewalɛ lɛ mli eyɛ mli akɛ awaa wɔ yi, ni wɔbaanyɛ wɔŋmɛ wɔtsui shi yɛ yiwaa mli.a
[Shishigbɛ niŋmai]
a Ajie kɛjɛ May 1, 1983 Blɔfo Buu-Mɔɔ lɛ mli.
[Mfoniri ni yɔɔ baafa 14]
Stefano enyɛɛɛ mɛi ni waa lɛ yi lɛ, ni ŋmɛnɛŋmɛnɛ beaŋ Yehowa odasefoi hu enyɛɛɛ mɛi ni feɔ amɛ nakai lɛ. Yiwalɔi nɛɛ ateŋ mɛi komɛi batsɔmɔɔ Odasefoi yɛ sɛɛ mli