Ato Ni Kulɛ Ohi Paradeiso
WƆ suɔmɔ Bɔlɔ lɛ miisumɔ ni ona miishɛɛ Paradeiso ko mli ŋɔɔmɔ. Ebɔ shia ni tamɔ nɛkɛ eha wɔ klɛŋklɛŋ fɔlɔi lɛ. Biblia lɛ kɛɔ akɛ: “Ni Yehowa Nyɔŋmɔ fee trom yɛ Eden yɛ bokagbɛ, ni eŋɔ gbɔmɔ ni eshɔ̃ lɛ eto jɛi. Ni Yehowa Nyɔŋmɔ ha tsei fɛɛ ni kɛ akwɛ ni aaaba mɔ tsine ni amɛhi ha yeli hu kwɛ̃ kɛjɛ shikpɔŋ su lɛŋ.”—1 Mose 2:8, 9, 16.
Nakai shishijee shia lɛ ji Paradeiso diɛŋtsɛ, ni wiemɔ “paradeiso” lɛ shishi ji “trom” loo abɔɔ. “Miishɛɛ Paradeiso” ni, ni eji gbɛi kroko hu kɛha “Eden trom” lɛ. Te ofeɔ shia ni tamɔ nɛkɛ he mfoniri yɛ ojwɛŋmɔ mli ohaa tɛŋŋ? Ani nɔ ni onaa kɛtsɔɔ ojwɛŋmɔŋ ji fɔfɔii ni hiɛ sui sɔrɔtoi babaoo, kwɛ̃ɛnii sɔrɔtoi, tsei ni woɔ aduawai, shikpɔŋ lɛ nɔ ni asaa fɛfɛo, nuhiŋmɛii kɛ kpaakpoi ni yɔɔ kpoo ni mli tse keŋkeŋ? Ani ofeɔ jwɛi fɔ ni tsei kakadaji ebɔle lɛ, ni kɔɔyɔɔ kpakpa ni mli jeɔ ŋma kɛ loofɔji alalai eyi mli obɔ he mfoniri yɛ ojwɛŋmɔ mli?
Obaaha hetoo akɛ, “Enɛ kɛ babaoo hu, ni toiŋjɔlɛ kɛ shweshweeshwe shihilɛ hu yɛ.” Ni enɛɛmɛi fɛɛ yɛ Eden trom lɛ mli! Kooloi lɛ po kɛ amɛhe hiɔ shi yɛ toiŋjɔlɛ mli kɛ wɔklɛŋklɛŋ fɔlɔi lɛ hu. Ni Nyɔŋmɔ kɛɛ: “Nibii fɛɛ ni wamɔɔ yɛ shikpɔŋ lɛ nɔ, ni wala susuma yɔɔ amɛmli lɛ, aŋɔ jwɛi fɔ aha amɛ ni amɛye.” “Ni [Nyɔŋmɔ] ekɛ amɛ ba gbɔmɔ lɛ ŋɔɔ, koni ekwɛ bɔ ni eeetsɛ amɛ eha . . . Ni Adam wo shia kooloi fɛɛ kɛ ŋwɛi loofɔji kɛ ŋa nɔ kooloi fɛɛ gbɛii.”—1 Mose 1:30; 2:19, 20.
Mɛɛ shia ni miishɛɛ yɔɔ mli nɛ! Ni akɛni toiŋjɔlɛ yɔɔ gbɔmɔ kɛ kooloi lɛ ateŋ, kɛ amɛ ŋwɛi Bɔlɔ lɛ teŋ hu hewɔ lɛ, nɔ fɛɛ nɔ yeɔ emuu. Yɛ anɔkwale mli lɛ ebaaŋɔɔ onaa akɛ ooohi miishɛɛ Paradeiso ni tamɔ nɛkɛ mli!
Nɛgbɛ nakai klɛŋklɛŋ Paradeiso lɛ yɔɔ? Biblia lɛ kɛɛ shikpɔŋ nɔ eyɔɔ, ni etsi emli faai ejwɛ po ta, ni Eufrate ni hoɔ amrɔ nɛɛ po fata he. Shi jamɔ wolo ko ni ji ensaiklopedia wieɔ susumɔ ko ni akɛba nyɛsɛɛ nɛɛ, “ákɛ shishijee Eden lɛ ŋwɛi eyɔɔ” lɛ he. Jeee akɛ susumɔ ni tamɔ nɛkɛ teɔ shi ewoɔ nɔ ni aŋmɛ afɔ shi yɛ Biblia lɛ mli lɛ pɛ, shi moŋ kɛ Yesu wiemɔ akɛ nuu kɛ yoo ni afee amɛ ekome yɛ Eden lɛ ha amɛtsɔ “heloo kome” lɛ hu.—Mateo 19:4-6; 1 Mose 2:21-24; 1 Korintobii 15:50.
Eyɛ mli akɛ Nyɔŋmɔ bɔ gbɔmɛi koni amɛhi shikpɔŋ nɔ Paradeiso ko mli moŋ, shi sɔlemɔyalɔi babaoo heɔ yeɔ ŋmɛnɛ akɛ paradeiso pɛ ni yɔɔ ni amɛbaana mli ŋɔɔmɔ lɛ yɛ ŋwɛi. Shi nɔ ni yɔɔ miishɛɛ ji akɛ Biblia he esaiklopedia ko wieɔ nɛkɛ yɛ he: “Gbɔmɔ susuɔ ŋwɛi miishɛɛnamɔ he ákɛ kɛ́ hoo lɛ etamɔ je nɛŋ miishɛɛnamɔ nɔŋŋ; ni mɔ fɛɛ mɔ hiɛ ka nɔ akɛ, ebaaná nɔ ni esusuɔ akɛ ejara wa waa kɛha lɛ yɛ shikpɔŋ nɔ lɛ, yɛ gbele sɛɛ.”
Adesai susuɔ Paradeiso he akɛ nɔ ni yɔɔ diɛŋtsɛ ejaakɛ Nyɔŋmɔ bɔ gbɔmɔ ni ehi shikpɔŋ nɔ ni ena shikpɔŋ nɔ nibii amli ŋɔɔmɔ. (Lala 115:16) Enɛ teeɔ sanebimɔi ashi. Akɛ nɔkwɛmɔ nɔ lɛ, beni Yesu wo efɔŋfeelɔ lɛ ni gbo yɛ emasɛi lɛ shi akɛ, “Obaafata mihe yɛ Paradeiso” lɛ, nɛgbɛ nakai Paradeiso lɛ baahi?—Luka 23:43, NW.