1914 Be ni Agbalaa Jwɛŋmɔ Kɛyaa Nɔ

“WƆLEEE nɔ ni baaba yɛ 1914 diɛŋtsɛ yɛ nakai be lɛ mli moŋ, shi nɔ kome ji nɔ ni wɔyɔɔ nɔmimaa yɛ he: 1914 ji be mli ni wɔbaaje shishi wɔna naagbai ni ehiii fe fɛɛ ni shikpɔŋ Iɛ ena pɛŋ lɛ shishijee; ejaakɛ Biblia mli gbalɛi babaoo tsɔɔ nakai. Wɔhemɔkɛyeli mli wa, ni nɔ ni wɔhiɛnɔkamɔi damɔ nɔ lɛ fe adesai ayiŋsusumɔ.”

Wiemɔi nɛɛ A. H. Macmillan, ni ŋma wolo ni aheɔ fe fɛɛ, Faith on the March, yɛ 1957 mli lɛ kɛtsɔɔ bɔ ni ehe eye mra mli akɛ 1914 baafee Biblia gbalɛ mli be ni agbalaa jwɛŋmɔ kɛyaa nɔ. Ehemɔkɛyeli lɛ hosooo yɛ nɔ ni fe afii 40 yɛ 1914 sɛɛ fɛɛ.

Kɛ Saji Ni Baa Bua Amɛhe Naa Lɛ

Atsɔɔ “be ni agbalaa jwɛŋmɔ kɛyaa nɔ mli akɛ eji “nifeemɔ loo nibii ni anaa he miishɛɛ lɛ ajɛɛhe: he ni nifeemɔ nii fɛɛ buaa amɛhe naa yɛ.” Ani 1914 ji be ni agbalaa jwɛŋmɔ kɛyaa nɔ yɛ nakai shishinumɔ mli? Hɛɛ. Susumɔ nɔ ni Macmillan kɛ Biblia Kaselɔi krokomɛi kpaa gbɛ yɛ nakai afi lɛ mli lɛ he okwɛ.

March 1880 Zion’s Watch Tower and Herald of Christ’s Presence lɛ tsɔɔ saji enyɔ ni he hiaa ni baahoso shikpɔŋ muu lɛ fɛɛ ni akpa gbɛ akɛ ebaaba yɛ 1914 lɛ mli: “‘Jeŋmaji Abei lɛ tee nɔ aahu kɛyashi 1914, ni ŋwɛi maŋtsɛyeli lɛ yeŋ nɔ kwraa aahu kɛyashi nakai be lɛ aaaba.” No hewɔ lɛ Biblia Kaselɔi babaoo kpa gbɛ akɛ abaato Nyɔŋmɔ Maŋtsɛyeli lɛ ama shi kwraa yɛ nakai afi lɛ mli. Enɛ baafee be ni Kristo baaje shishi ‘aye lumɔ yɛ ehenyɛlɔi ateŋ.’ Nɔ ni he hiaa ni ebaatsɔɔ hu ji “[yiwalɛ] nibii agbɛjianɔtoo lɛ naagbee.”​—Lala 110:​1, 2; Mateo 24:3; Kpojiemɔ 12:​10, 12.

Nɛkɛ Biblia Kaselɔi anɔkwafoi nɛɛ mu sane naa nɛkɛ yɛ be mli ni amɛku sɛɛ amɛpɛi Biblia be he akɔntaabuu mli ekoŋŋ lɛ.a Shi Biblia be he akɔntaabuu ji odaseyeli kome pɛ​—taakɛ eji lɛ, odasefonyo kome. Taakɛ Biblia lɛ tsɔɔ lɛ, Nyɔŋmɔ Maŋtsɛyeli lɛ baafee ŋwɛi nɔ, no hewɔ lɛ anaŋ kɛ hiŋmɛi. No hewɔ lɛ te Biblia kaselɔi aaafee tɛŋŋ amɛle akɛ amɛhiɛnɔkamɔi lɛ eba mli aloo ebaaa mli? Odaseyeli loo okadi ko ni anaa he baahia amɛ.

Yesu kaselɔi lɛ bi okadi ko ni tamɔ nɛkɛ beni amɛkɛɛ akɛ: “Mɛni ji ba ni oba lɛ kɛ nibii agbɛjianɔtoo lɛ naagbee lɛ he okadi?” (Mateo 24:​3, NW) Yesu kɛ okadi ni tamɔ nɛkɛ ha ni ekɛ odasefonyo odaseyeli ni ji enyɔ ha kɛma 1914 nɔ mi. Enɛ kɛ Biblia shishitoo mla “odasefoi enyɔ loo etɛ naa lɛ sane ama shi” lɛ kpaa gbee.​—Mateo 18:⁠16.

Yɛ be mli ni be he akɔntaabuu kɛ enine tsɔɔ hiɛgbɛ kɛyaa 1914 nɔ lɛ, ato okadi ni Yesu kɛha ni nibii pii yɔɔ mli lɛ he gbɛjianɔ koni ekɛ enine atsɔɔ 1914 nɔ kɛya sɛɛgbɛ akɛ be hee ko shishijee. No hewɔ lɛ esa akɛ 1914 afee ‘he ni nifeemɔ nii fɛɛ buaa amɛhe naa yɛ.”

Ani nakai eji? Ani abaanyɛ ayoo okadii ni Yesu kɛha lɛ yɛ saji ni eba kɛjɛ 1914 lɛ amli? Wɔmiifɔ bo nine ni otao sane lɛ mli ni oha hetoo oha bo diɛŋtsɛ ohe.

[Shishigbɛ niŋmai]