Nyɛsɔlea Nyɛhaa Nyɛhe
“Nyɛsɔlea nyɛhaa wɔ.”—2 TESALONIKABII 3:1.
1-3. Mɛni hewɔ Yehowa webii baanyɛ abɛŋkɛ lɛ yɛ sɔlemɔ kɛ hekɛnɔfɔɔ mli lɛ? (b) Mɛni hewɔ esa akɛ Yehowa Odasefoi afee gbɔmɛi ni sɔleɔ lɛ?
1 YEHOWA ji “sɔlemɔ Toibolɔ” kpeteŋkpele. (Lala 65:3, NW) No hewɔ lɛ etsuji anɔkwafoi lɛ baanyɛ abɛŋkɛ lɛ kɛ hekɛnɔfɔɔ kɛ amɛheshibaa nibimɔi kɛ shidaa wiemɔi lɛ. Yɛ anɔkwale mli lɛ, Yehowa Odasefoi yɛ nibii pii ni amɛbaanyɛ amɛdamɔ nɔ amɛfee gbɔmɛi ni sɔleɔ.
2 Nɔ kome ji akɛ, Yesu Kristo tsɔɔ ekaselɔi lɛ ni amɛsɔle. Ekɛɛ amɛ akɛ: “Kɛ nyɛmiisɔle lɛ, nyɛkɛa akɛ: Wɔtsɛ ni yɔɔ ŋwɛi; ogbɛi lɛ afee krɔŋkrɔŋ; omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ hu, taakɛ bɔ ni afeɔ yɛ Ŋwɛi lɛ; hawɔ daa nɛɛ wɔdaa ŋmaa, ni okɛ wɔhe eshai afa wɔ, ejaakɛ wɔ hu wɔkɛfaa mɔ fɛɛ mɔ ni tɔɔ wɔnɔ; ni okɛwɔ akaya kaa mli; shi moŋ jiemɔ wɔ yɛ mɔfɔŋ lɛ dɛŋ.” (Luka 11:2-4) Nakai sɔlemɔ lɛ kɛ Nyɔŋmɔ ye klɛŋklɛŋ gbɛhe yɛ gbɛ ni ja nɔ, ni mɔ diɛŋtsɛ teemɔŋ taomɔ nii hu fata he. Nɛkɛ Sɔlemɔ Nɔkwɛmɔ Nɔ nɛɛ tsɔɔ hu akɛ wɔsɔlemɔi akaku ehiɛ eshwie mɛi krokomɛi anɔ.
3 Yesu bɔfoi lɛ hu wo nanemɛi heyelilɔi lɛ hewalɛ ni amɛfee gbɔmɛi ni sɔleɔ. Akɛ nɔkwɛmɔ nɔ lɛ, bɔfo Paulo kɛɛ akɛ, “Nyɛhiɛa sɔlemɔ mli daa” kɛ, “Nyɛsɔlea ni nyɛkafɔa.” (Romabii 12:12; 1 Tesalonikabii 5:17) Ni bɔfo Petro jaje akɛ: “Shi nibii fɛɛ anaagbee lɛ eshɛ eta. Hewɔ lɛ nyɛjwɛŋmɔ mli atsea ni nyɛhiɛ akaa shi ahaa sɔlemɔi.” (1 Petro 4:7) Mɛɛ ŋaawoo ni nɔ bɛ nɛ!
Nɔ Ni Sɔlemɔ Baanyɛ Afee Ahawɔ
4. Mɛni ataoɔ kɛ́ aaabo Nyɔŋmɔ tsuji ni amɛjɔɔ amɛhe nɔ amɛha lɛ lɛ asɔlemɔi atoi?
4 Lalafolɔ ni ehe gbɛi, Alfred Tennyson ŋma akɛ: “Sɔlemɔ feɔ nibii pii fe nɔ ni je nɛɛ laa yɛ he.” Kwɛ bɔ ni eji anɔkwale ha! Shi kɛ abaabo Nyɔŋmɔ tsuji ni amɛjɔɔ amɛhe nɔ lɛ atoi lɛ, belɛ esa akɛ amɛsɔle amɛha Yehowa kɛtsɔ Yesu Kristo nɔ yɛ hemɔkɛyeli mli, esa akɛ ekɛ ŋwɛi suɔmɔnaa nii akpa gbee, ni esa akɛ asɔle yɛ gbɛ ni ja lɛ nɔ. (Yohane 14:6; 1 Yohane 5:13-15) Miishɛɛ sane ko ji akɛ, akɛɛ akɛ: “Nyɔŋmɔ kwɛɛɛ bɔ ni onaa tse yɛ osɔlemɔ mli lɛ, bɔ ni owiemɔi ŋɔɔ ha lɛ; ni asaŋ ekwɛɛɛ bɔ ni otoɔ osɔlemɔi lɛ anaa ohaa, bɔ ni amɛkɛlɛmɔ yɔɔ lɛ; ekwɛɛɛ bɔ ni obu osɔlemɔi ahe akɔntaa oha, bɔ ni amɛji kakadaŋŋ ha lɛ; ekwɛɛɛ bɔ ni okɛtsɔɔ saji anaa ohaa, yɛ bɔ ni otsɛ̃rɛ̃ amɛ oha hewɔ lɛ; shi bɔ ni amɛji anɔkwale ha lɛ ekwɛɔ.”—Afii ohai 17 lɛ mli Ŋleshi Puritan osɔfo, Thomas Brooks.
5. (a) Mɛni sɔlemɔ baanyɛ afee ahawɔ? (b) Mɛɛ sanebimɔ wɔbaasusu he yɛ sɔlemɔ he?
5 Sɔlemɔ daa, kɛ anɔkwale ni jɛ tsui mli lɛ gbalaa wɔ kɛbɛŋkɛɔ Yehowa he. Heshibaa sɔlemɔ kɛ hekamɔ yeɔ ebuaa wɔ ni wɔtsuɔ wɔshiɛmɔ nitsumɔ lɛ he nii wɔgbeɔ naa. (Mateo 24:14; 28:19, 20; 2 Korintobii 2:17) Eyeɔ ebuaa wɔ ni wɔkpɛɔ wɔyiŋ bɔ ni saa wɔŋwɛi Tsɛ lɛ hiɛ. Sɔlemɔ yeɔ ebuaa wɔ ni wɔtoɔ wɔtsui shi hu yɛ yiwaa mli ni wɔhiɛɔ wɔ emuuyeli lɛ mli wɔhaa Nyɔŋmɔ (Lala 109:3, 4; 119:86) Ehaa wɔnaa hegbɛ ni wɔkɛ shidaa ni jɛ wɔtsuiŋ tɔ̃ɔ haa Yehowa. Agbɛnɛ sɔlemɔ kɛmiiha wɔhe wɔhe hu yɛ. Shi yɛ sɛɛkpee nɔ nɛɛ he lɛ, te aaafee tɛŋŋ ni sɔlemɔi ni tamɔ nɛkɛ he aaaba sɛɛnamɔ aha wɔ kɛ wɔnanemɛi heyelilɔi?
Mɛni Hewɔ Esa Akɛ Wɔsɔle Wɔha Wɔhe?
6. Yesu sɔle eha namɔ, no hewɔ lɛ namɔ wɔbaasɔle wɔha?
6 Yesu, Mɔ ni wɔkaseɔ lɛ lɛ sɔle eha ekaselɔi lɛ. Ekɛ hekamɔ kpa Yehowa fai akɛ: “Mi lɛ, amɛ mibiɔ maha; jeee je lɛ mibiɔ maha, shi moŋ mɛi ni oŋɔha mi lɛ, ejaakɛ onii ji amɛ.” Eyɛ mli akɛ Yesu gbo kɛha adesai aje lɛ moŋ, shi esɔleee ehaaa “je” lɛ ni ji adesa weku ni amɛtsi amɛhe kɛjɛ Nyɔŋmɔ he lɛ. Shi Yesu sɔle eha mɛi ni jɛ nakai je lɛ mli ba ni ná emli hemɔkɛyeli lɛ. (Yohane 3:16, 17; 17:8, 9; okɛto 2 Petro 2:5, 3:6 he.) Yɛ Yesu nɔkwɛmɔ lɛ hewɔ lɛ, wɔsɔleɔ wɔhaa aŋkroaŋkroi ni sheɔ Nyɔŋmɔ gbeyei lɛ.
7. Mɛɛ bɔfoi lɛ anɔkwɛmɔ nɔ ko tsirɛɔ Yehowa webii koni amɛsɔle amɛha amɛhe?
7 Bɔfo Paulo sɔle eha nanemɛi heyelilɔi. Akɛ nɔkwɛmɔ nɔ lɛ, ekɛɛ Kristofoi ni yɔɔ Efeso lɛ akɛ: “Enɛ hewɔ lɛ mi hu, beni minu nyɛhemɔkɛyeli ni nyɛyɔɔ yɛ Nuŋtsɔ Yesu mli lɛ kɛ nyɛsuɔmɔ ni nyɛkɛsumɔɔ mɛi krɔŋkrɔŋi lɛ fɛɛ lɛ he lɛ, mifɔɔɔ nyɛhe shidaa, shi mikaiɔ nyɛ yɛ misɔlemɔi amli.” (Efesobii 1:15, 16) Agbɛnɛ Paulo shashaooo shi akɛ eeewo hewalɛ koni asɔle aha lɛ kɛ mɛi krokomɛi. Yɛ sɛɛ mli beni ewo Efesobii lɛ ekaa ni ‘amɛwo mumɔŋ tawuu nii lɛ fɛɛ’ ni ‘amɛhiɛ mumɔŋ klante ni ji Nyɔŋmɔ wiemɔ lɛ,’ ekɛ fata he akɛ: “Ni nyɛkɛ sɔlemɔ kɛ faikpamɔ fɛɛ asɔlea daa yɛ mumɔ mli, ni enɛ nɔŋŋ hewɔ lɛ nyɛsaraa, ni nyɛkaa he daa nyɛkpaa fai nyɛhaa krɔŋkrɔŋbii lɛ fɛɛ, kɛ mi hu, koni kɛ migbele minaa lɛ, aŋɔ wiemɔ awo minaa, ni mikɛ ekãa ajaje sanekpakpa lɛŋ teemɔŋ sane lɛ.” (Efesobii 6:11-19) Nɛkɛ bɔfoi anɔkwɛmɔ nɔ nɛɛ hu woɔ Yehowa webii ahewalɛ ni amɛsɔle amɛha amɛhe.
8. Mɛni hewɔ esa jogbaŋŋ akɛ Kristofoi ni afɔ amɛ mu lɛ kɛ “asafo babaoo” lɛ fɛɛ aaasɔle amɛha amɛhe lɛ?
8 Jeŋ fɛɛ nyɛmifeemɔ kuu ko ji Yehowa Odasefoi Kristo sɛɛnyiɛlɔi ni akɛ mumɔ efɔ́ amɛ ni yɔɔ amɛteŋ lɛ kɛ Nyɔŋmɔ, e-Bi lɛ kɛ nanemɛi Kristofoi ni afɔ amɛ mu lɛ ‘bɔɔ naanyo.’ (1 Yohane 1:3, 7; okɛto An American Translation lɛ he.) Shi Yesu tsɔɔ akɛ suɔmɔ baahi ekaselɔi lɛ fɛɛ ateŋ, ni bɔfo Petro kɛɛ akɛ: “Nyɛsumɔa nyɛmimɛi.” (1 Petro 2:17; Yohane 13:34, 35) Belɛ kwɛ bɔ ni esa akɛ Kristofoi ni afɔ amɛ mu lɛ kɛ amɛnanemɛi “asafo babaoo” lɛ asɔle aha amɛhe! (Kpojiemɔ 7:9) Shi mɛni baanyɛ afee nɔ ni yɔɔ nɛkɛ sɔlemɔi nɛɛ amli?
Kɛha Ekomefeemɔ, Gbɛtsɔɔmɔ Kɛ Nilee
9. Mɛni hewɔ esa akɛ wɔsɔle wɔha ekomefeemɔ ni aaahi wɔ Kristofoia nyɛmifeemɔ lɛ mli lɛ?
9 Esa akɛ wɔsɔle kɛha suɔmɔ ni ekomefeemɔ yɔɔ mli yɛ wɔ Kristofoia nyɛmifeemɔ lɛ mli. Yesu sɔle koni esɛɛnyiɛlɔi lɛ kɛ lɛ kɛ e-Tsɛ afee ekome, ni Paulo wo nanemɛi Yehowa jalɔi lɛ ŋaa ni ‘amɛ fɛɛ amɛjwɛŋmɔ kɛ amɛyitsoŋ sane afee ekome.’ (1 Korintobii 1:10; Yohane 17:20, 21) Nyɛmifeemɔ mumɔ diɛŋtsɛ etee nɔ efee mɛi ni amɛtu amɛhe amɛha Yehowa lɛ kadimɔ nii yɛ be fɛɛ mli, ‘Kwɛ bɔ ni ehi akɛ nyɛmimɛi aaahi shi yɛ ekomefeemɔ mli!’ (Lala 133:1-3) Ni gbɛ kome ni atsɔɔ nɔ ayeɔ abuaa nakai ekomefeemɔ lɛ ji kɛtsɔ sɔlemɔ nɔ koni nine ashɛ nɔ.
10. Mɛni hewɔ esa akɛ wɔsɔle koni mumɔ krɔŋkrɔŋ lɛ akudɔ wɔ ni efi wɔ sɛɛ?
10 Esa akɛ wɔsɔle koni Yehowa atsɔ emumɔ lɛ nɔ ekudɔ ewebii ni efi amɛnitsumɔi lɛ asɛɛ. Mɛi komɛi anitsumɔi yɛ Yehowa sɔɔmɔ mli lɛ wa naakpa—nii ni anyɛŋ atsɔ adesa hewalɛ nɔ kɛkɛ atsu. No hewɔ lɛ, Yehowa yelikɛbuamɔ kɛtsɔ emumɔ krɔŋkrɔŋ lɛ nɔ lɛ he miihia nɛkɛ Kristofoi anɔkwafoi nɛɛ kɛ wɔ diɛŋtsɛ hu.—Zakaria 4:6; okɛto Luka 11:13; Bɔfɔi lɛ Asaji 8:14, 15 he.
11. Te wɔɔfee tɛŋŋ wɔsɔle yɛ gbɛ ni ja nɔ yɛ nilee he?
11 Wɔbaanyɛ wɔsɔle ni wɔnyɛmimɛi lɛ ana nilee ni jɛ Nyɔŋmɔ ŋɔɔ. Paulo sɔle eha Kristofoi ni yɔɔ Kolose lɛ, “koni nyɛyimɔ obɔbɔ kɛ [Nyɔŋmɔ] esuɔmɔnaa nii alee yɛ mumɔŋ nilee kɛ shishinamɔ fɛɛ mli; koni nyɛnyiɛ bɔ ni sa Nuŋtsɔ lɛ, ni asa ehiɛ kwraa.” (Kolosebii 1:9, 10) Esa hu akɛ wɔɔsɔle koni mɛi ni kudɔɔ shiɛmɔ nitsumɔ lɛ ni amɛtoɔ wɔwoji ahe gbɛjianɔ lɛ ana “nilee mumɔ.” (Efesobii 1:15-17, NW) Ani osɔleɔ ohaa mɛi ni kwɛɔ Maŋtsɛyeli-shiɛmɔ nitsumɔ lɛ kɛ woji aŋmalamɔ lɛ nɔ lɛ ni kɛ mumɔŋ niyenii haa wɔ “yɛ be ni sa mli” lɛ?—Mateo 24:45-47.
Kɛha Shiɛmɔ Yɛ Omaŋtsɛyeli Mli Yɛ Eshitee Kɛ Woo Fɛɛ Sɛɛ
12. Te 2 Tesalonikabii 3:1 kɔɔ sɔlemɔ ni wɔɔsɔle wɔha mɛi krokomɛi ahe lɛ he ehaa tɛŋŋ?
12 Esa akɛ wɔsɔle koni nanemɛi heyelilɔi aye omanye yɛ Maŋtsɛyeli lɛ he sane lɛ gbɛɛ kɛ shwamɔ mli. Paulo wo hewalɛ akɛ: “Anyɛmimɛi, nyɛsɔlea nyɛhaa wɔ, koni Nuŋtsɔ [Yehowa] wiemɔ lɛ ahiɛ foi kɛya nɔ, ni awo ehiɛ nyam, taakɛ bɔ ni eyɔɔ nyɛŋɔɔ hu lɛ.” (2 Tesalonikabii 3:1; okɛto Efesobii 6:18, 19 he.) Hɛɛ Paulo bi nanemɛi heyelilɔi lɛ ni amɛsɔle koni lɛ kɛ ehefatalɔi lɛ aye omanye yɛ “Nuŋtsɔ lɛ [Yehowa] wiemɔi” lɛ jajemɔ mli. Esa akɛ wɔ hu wɔsɔle koni Nyɔŋmɔ Wiemɔ lɛ agbɛ ashwa oya ni Maŋtsɛyeli lɛ he nibii lɛ ashwere. Shi nɛkɛ sɔlemɔi nɛɛ kɔɔ mɛi krokomɛi ahe—mɛi fɛɛ ni kɛ ekãa feɔ Yehowa suɔmɔnaa nii yɛ nɛkɛ “naagbee gbii” nɛɛ amli lɛ.—2 Timoteo 3:1-5.
13. (a) Mɛni 1 Timoteo 2:1, 2, tsɔɔ yɛ sɔlemɔ ni wɔɔsɔle wɔha je lɛŋ onukpai lɛ he? (b) Mɛni wɔbaasɔle wɔbi kɛ aawa wɔyi ákɛ Maŋtsɛyeli shiɛlɔi?
13 Yehowa webii baanyɛ asɔle aha je lɛŋ onukpai yɛ gbɛ ni ja nɔ. Paulo kɛɛ: “Agbɛnɛ nɔ klɛŋklɛŋ ni miwoɔ he ŋaa ji akɛ ahiɛ faikpamɔi, sɔlemɔ, mlidaamɔi, shidaai amli aha gbɔmɛi fɛɛ, aha maŋtsɛmɛi kɛ mɛi fɛɛ ni yeɔ onukpai lɛ.” Paulo wiemɔi ni tee nɔ lɛ tsɔɔ akɛ yɛ naagbee lɛ nɛkɛ sɔlemɔi nɛɛ ahe baa sɛɛnamɔ kɛhaa Nyɔŋmɔ webii, ni ji akɛ, “koni wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli.” (1 Timoteo 2:1, 2) Nɔ ni yɔɔ miishɛɛ lɛ, akɛɛ Yuda nomi ni yɔɔ Babilon lɛ ni amɛsɔle amɛha nakai maŋ lɛ hejɔlɛnamɔ, ejaakɛ ‘kɛ toiŋjɔlɛ yɛ mli lɛ, no amɛ hu amɛtoiŋ aaajɔ amɛ.’ (Yeremia 29:7) No hewɔ lɛ ákɛ Yehowa Odasefoi lɛ, wɔsɔleɔ wɔhaa je lɛ mli onukpai lɛ, koni wɔ, kɛ wɔmumɔŋ nyɛmimɛi lɛ ahi shi kpoo kɛ diŋŋ bɔ ni no aaaha wɔnyɛ wɔtsu wɔnitsumɔ akɛ Maŋtsɛyeli shiɛlɔi lɛ he nii. Shi kɛji akɛ awaa wɔyi lɛ, wɔbaanyɛ wɔsɔle kɛ hekɛnɔfɔɔ koni aha wɔ kɛ wɔnanemɛi Odasefoi lɛ ŋwɛi yelikɛbuamɔ ni he hiaa koni wɔkɛ ekãa ashiɛ Nyɔŋmɔ wiemɔ lɛ yɛ shihilɛi ni tamɔ nɛkɛ shishi. Ni wɔbaanyɛ wɔhe wɔye akɛ abaaha nakai sɔlemɔi lɛ ahetoo.—Bɔfoi lɛ Asaji 4:29-31; 5:29.
14. Mɛɛ Ŋmalɛ mli sane wɔyɔɔ ni no nɔ wɔdamɔɔ wɔsɔleɔ koni wɔnyɛmimɛi ni awaa amɛyi lɛ nine ashɛ Nyɔŋmɔ yelikɛbuamɔ kɛ miishɛjemɔ nɔ?
14 Esa diɛŋtsɛ akɛ wɔɔsɔle koni wɔnyɛmimɛi ni naa yiwaa mli amanehulu lɛ nine ashɛ Yehowa dɛŋ miishɛjemɔ kɛ yelikɛbuamɔ nɔ. ‘Abanyɛ’ bɔfo Paulo ‘nɔ waa ni ehiɛ kaaa ewala nɔ’ po, yɛ Asia niiaŋ, he ni Efeso maŋ lɛ yɔɔ lɛ. Ekolɛ ekɛ awuyelɔi nɔ yɛ shwɛmɔ he ko yɛ Efeso! Shi yɛ fɛɛ sɛɛ lɛ, Paulo kɛɛ Kristofoi ni yɔɔ Korinto lɛ akɛ: “Nyɛ hu nyɛfataa wɔhe kɛkpaa fai, koni mɛi pii ada shi aha wɔ yɛ duromɔ-kee-nii ni aŋɔha wɔ yɛ mɛi pii ahewɔ lɛ hewɔ.” (2 Korintobii 1:8-11; Bɔfoi lɛ Asaji 19:28-41; 1 Korintobii 15:32) Belɛ sanebimɔ ko bɛ he akɛ esa akɛ wɔsɔle koni wɔnyɛmimɛi hii kɛ yei ni naa amanehulu lɛ nine ashɛ Yehowa dɛŋ yelikɛbuamɔ kɛ miishɛjemɔ nɔ ŋmɛnɛ.—2 Korintobii 1:3-7.
15. Mɛni wɔbaanyɛ wɔfee wɔha wɔnanemɛi heyelilɔi ni awaa amɛyi lɛ, kɛ̃ wɔ diɛntsɛ lɛ áwo wɔ tsuŋ po?
15 Yɛ anɔkwale mli lɛ, wɔsɔlemɔi ahe miihia wɔnanemɛi Yehowa tsuji lɛ, yɛ be mli ni amɛkɛ yiwaa, haomɔ kɛ osharai kpeɔ lɛ. Wɔbɛ amɛmasɛi yɛ bei ni tamɔ nɛkɛ mli, ni wɔnyɛɛɛ wɔye wɔbua amɛ hu yɛ gbɛ ko nɔ. Ekolɛ, no mli lɛ áwo wɔ tsuŋ po! Shi kɛlɛ, wɔbaanyɛ wɔfee ejurɔ babaoo kɛtsɔ wɔnanemɛi heyelilɔi lɛ ni wɔɔsɔle wɔha amɛ lɛ nɔ. Bei abɔ ni wɔyɔɔ wala mli nɛɛ, wɔhenyɛlɔi lɛ nyɛŋ atsi sɔlemɔ ni tamɔ nɛkɛ naa. Ebaanyɛ efee nɔ ni yɔɔ dioo, shi enyɛɔ nii etsuɔ kɛ̃.—Okɛto Nehemia 2:4-6 he.
Kɛha Mumɔŋ Hewalɛnamɔ Kpakpa
16. Te wɔɔfee tɛŋŋ wɔsɔle wɔha nanemɛi Kristofoi, yɛ 2 Korintobii 13:7 kɛ gbeekpamɔ naa?
16 Wɔbaanyɛ wɔsɔle yɛ gbɛ ni ja nɔ hu akɛ, nanemɛi Kristofoi ‘akafee nɔ ko fɔŋ, shi amɛfee nɔ ni ja.’ (2 Korintobii 13:7) Sɔlemɔ ni jeee pɛsɛmkunya nɔ̃ ni suɔmɔ yɔɔ mli nɛɛ tsɔɔ akɛ wɔmiisumɔ diɛŋtsɛ ni amɛya nɔ amɛhi Nyɔŋmɔ duromɔ mli. Bɔfo Paulo ŋma akɛ: “Wɔsɔleɔ daa wɔhaa nyɛ, koni wɔ-Nyɔŋmɔ lɛ aha nyɛsa tsɛmɔ lɛ, ni eha emlihilɛ taomɔ nii lɛ fɛɛ kɛ hemɔkɛyeli nitsumɔ lɛ ayi obɔ yɛ hewalɛ mli.” (2 Tesalonikabii 1:11) Epafra sɔle koni Kolose Kristofoi lɛ ‘adamɔ shi ni amɛye emuu ni amɛyimɔ obɔbɔ yɛ Nyɔŋmɔ suɔmɔnaa nii fɛɛ mli.’ (Kolosebii 4:12) Eyɛ mli akɛ wiemɔi nɛɛ kɔɔ Kristofoi ni afɔ amɛ mu lɛ ahe moŋ, shi wɔsɔlemɔi ŋmɛnɛ lɛ baanyɛ ajie nakai henumɔi lɛ nɔŋŋ kpo yɛ gbɛ ni ja nɔ yɛ mɛi fɛɛ ni amɛtu amɛhe amɛha Yehowa lɛ ahe.
17. Mɛɛ sɔlemɔi sa yɛ wɔnyɛmimɛi amumɔŋ hewalɛnamɔ he?
17 Wɔbaanyɛ wɔsɔle ni wɔnanemɛi jálɔi lɛ ahe awa yɛ mumɔŋ. Kɛ mɛi komɛi he baye yɛ mumɔŋ lɛ, onukpai ni ahala amɛ lɛ kɛ amɛsɔleɔ aloo amɛsɔleɔ amɛhaa amɛ, ni amɛmiibɔ mɔdɛŋ ni amɛhe awa amɛ. Kaselɔ Yakobo ŋma akɛ: “Hemɔkɛyeli sɔlemɔ lɛ aaahere helatsɛ lɛ yiwala, ni Nuŋtsɔ lɛ [Yehowa] aaatee lɛ shi.” (Yakobo 5:13-16; 1 Samuel 12:18-25) Wɔbaanyɛ wɔtsi wɔnanemɛi heyelilɔi lɛ agbɛi atã yɛ wɔteemɔŋ sɔlemɔi amli ni wɔtsɔɔ bɔ ni wɔsumɔɔ akɛ “amɛhe awa yɛ hemɔkɛyeli lɛ mli” lɛ. (Tito 1:13; 2:1, 2) Shi ejaaa akɛ wɔɔsɔle wɔha mɛi ni jɛɔ amɛsuɔmɔ mli amɛkpooɔ Nyɔŋmɔ kpatamɔ he gbɛjianɔtoo lɛ.—Hebribii 10:26-29.
Sɛɛnamɔ ni Jɛɔ Sɔlemɔ ni Wɔsɔleo Wɔhaa Wɔhe lɛ mli Baa
18, 19. Mɛni ji sɛɛnamɔi ni wɔ diɛŋtsɛ lɛ wɔnine shɛɔ nɔ yɛ mɛi krokomɛi ni wɔsɔleɔ wɔhaa amɛ lɛ hewɔ?
18 Wɔbaanyɛ wɔna nɔmimaa akɛ kɛ wɔsɔle wɔha wɔhe lɛ sɛɛnamɔi pii baajɛ mli aba. Akɛ nɔkwɛmɔ nɔ lɛ, wɔsɔlemɔi lɛ baafee nɔ ni tsii. Ŋwanejee ko bɛ he akɛ wɔnanemɛi heyelilɔi ni wɔsɔleɔ wɔhaa amɛ Iɛ baaha wɔná amɛhe jwɛŋmɔ kpakpa. Yɛ anɔkwale mli lɛ, nɛkɛ sɔlemɔi nɛɛ baaha wɔto wɔtsui shi babaoo wɔha mɛi krokomɛi, wɔfee mɛi ni ediii amɛ pɛ amɛ nibii asɛɛ, mɛi ni yɔɔ suɔmɔ babaoo, mɛi ni susuɔ mɛi krokomɛi ahe babaoo. Agbɛnɛ sɔlemɔ kɛha wɔmumɔŋ nyɛmimɛi hii kɛ yei lɛ baaha Yehowa ale akɛ wɔyɛ egbɛjianɔtoo lɛ kɛ enitsumɔi kɛ ehilɛ-kɛhamɔ he miishɛɛ.
19 Miishɛjemɔ kpele yɛ le ni wɔleɔ akɛ wɔmumɔŋ nyɛmimɛi hii kɛ yei lɛ miisɔle kɛmiiha wɔ lɛ mli, taakɛ bɔ ni wɔ hu wɔsɔleɔ wɔhaa amɛ lɛ. Kwɛ miishɛɛ ni eji akɛ wɔɔle akɛ, Yehowa, “sɔlemɔ Toibolɔ” lɛ boɔ wɔsɔlemɔi kɛha wɔnanemɛi Yehowa Odasefoi lɛ atoi! No hewɔ lɛ, bɔni afee ni wɔha Maŋtsɛyeli lɛ he nibii aya hiɛ yɛ be mli ni wɔhaa suɔmɔ kɛ ekomefeemɔ hiɔ wɔteŋ lɛ, nyɛhaa wɔsɔlea wɔhaa wɔhe.a
[Shishigbɛ niŋmai]
a Ajie kɛjɛ May 1, 1984 Watchtower lɛ mli.
Mɛni ji ohetoo?
□ Mɛni hewɔ esa akɛ Yehowa Odasefoi afee gbɔmɛi ni sɔleɔ?
□ Mɛni sɔlemɔ baanyɛ afee aha wɔ?
□ Mɛni hewɔ esa akɛ wɔsɔle wɔha wɔhe?
□ Mɛni nɛkɛ wɔbaanyɛ wɔsɔle yɛ he wɔha wɔnanemɛi heyelilɔi?
□ Mɛni ji sɛɛnamɔi ni jɛɔ wɔhe ni wɔsɔleɔ wɔhaa lɛ mli baa lɛ ekomɛi?
[Mfoniri ni yɔɔ baafa 24]
Ani osɔleɔ koni nanemɛi Yehowa odasefoi aye omanye yɛ Maŋtsɛyeli sane lɛ gbɛɛ kɛ shwamɔ mli?
[Picture page 25]
Shii enyiɛ osɔleɔ ohaa Kristofoi ni awaa amɛyi lɛ?