Nyɔnmɔ Wiemɔ Lɛ Hiɛ Kã
NUU HENƆWOLƆ KO BA EHE SHI
SIRIA loo Aram tsatsɛ nukpa Naeman kɛ etsuji lɛ nyiɛ gbɛ kɛmiiya Israel he ni Naeman heɔ yeɔ akɛ abaatsa ekpiti lɛ aha lɛ yɛ lɛ. Naeman nu kɛjɛ eŋa lɛ tsulɔyoo, Israel gbekɛyoo fioo lɛ naa akɛ Yehowa gbalɔ ni yɔɔ Israel lɛ efee naakpɛɛ nibii babaoo.
Naeman hiɛ wolo ko kɛjɛ Siria loo Aram Maŋtsɛ ŋɔɔ ni ekɛyaaha Israel Maŋtsɛ lɛ. Wolo lɛ mli sane lɛ miibi ni atsa Naeman kpiti lɛ. Beni Naeman yashɛ Israel lɛ, ekɛ wolo lɛ yaha Maŋtsɛ Yehoram, ni sane lɛ gba Maŋtsɛ lɛ naa waa ejaakɛ enyɛŋ etsa nɛkɛ nuu nɛɛ. Yehoram bolɔ akɛ, ‘Siria maŋtsɛ lɛ miitao ni ekɛmi abe kɛkɛ.’ Beni Yehowa gbalɔ Elisha nu enɛ he lɛ, ebi ni ayatsɛ Naeman kɛba eŋɔɔ.
No hewɔ lɛ Naeman kɛ ekpɔŋɔi kɛ eta-shwiilii lɛ tee Elisha shia. Shi Elisha ejeee kpo po ni eba na lɛ. Etsu tsulɔ ko koni ekɛ shɛɛ sane nɛɛ ayaha Naeman: “Bɔni afee ni ohe atse lɛ, yaa ni oyaju ohe shii kpawo yɛ Yordan Faa lɛ mli.” Naeman henɔwolɔ lɛ mli fu ni ekɛ mlifu shi akɛ eeya emaŋ. No ni ekɛɛ ji akɛ, ‘Misusu akɛ kɛ hoo lɛ ebaaba ni ebana mi ni esɔle eha Yehowa ni ekɛ enine atsɔɔ hela lɛ. Kulɛ bɛ manyɛ maju mihe yɛ Siria faai lɛ amli.’ Shi Naeman tsuji lɛ ateŋ mɔ kome wie tsɔɔ lɛ ni ekɛ lɛ susu sane lɛ he akɛ: ‘Mi-Nuŋtsɔ, eji gbalɔ lɛ kɛɛ bo akɛ oyafee no ko ni wa kulɛ, obaafee. Mɛni hewɔ ni ojuuu ohe kɛkɛ taakɛ efa akɛ ofee lɛ?
Naeman bo etsulɔ lɛ toi. Etee Yordan Faa lɛ he ni ebote mli. Ni yɛ naakpɛɛ gbɛ nɔ lɛ, yɛ be mli ni eju ehe shii kpawo lɛ, ekpiti lɛ laaje! Naeman hiɛ sɔ enɛ jogbaŋŋ ni efa gbɛ kakadaŋŋ kɛtee Elisha ŋɔɔ ekoŋŋ ekoni eyada lɛ shi, gbɛfaa ni he aaafee shitooi 30.
Naeman kɛ nibii ni jara wa ke Elisha ni ekɛɛ akɛ: ‘Ha maloo sũ ni tejii enyɔ baanyɛ atere ni mikɛya shia.’ Kɛha mɛɛ yiŋtoo? Koni eshã afɔlei yɛ jɛmɛ eha Yehowa yɛ Israel shikpɔŋ sũ nɔ. Yɛ anɔkwale mli lɛ, Naeman wo shi akɛ jɛkɛ nakai be lɛ nɔ kɛyaa lɛ, eshaŋ afɔle ko ehaŋ nyɔŋmɔi krokomɛi ákɛ ja Yehowa.—2 Maŋtsɛmɛi 5:5-17.
Mɛɛ tsakemɔ kpele ba Naeman shihilɛ mli nɛkɛ! Eji nɔkwɛmɔ nɔ kpakpa kɛha wɔ akɛ wɔsusu he. Shi wɔbaanyɛ wɔkase nɔ kroko hu kɛjɛ sane ni ba nɛɛ mli, wɔbaasusu enɛ he yɛ wolo tɛtrɛɛ nɛɛ ekroko ni baaba lɛ mli.