Yesu Shihilɛ Kɛ Esɔɔmɔ Nitsumɔ

Yesu Fɔmɔ​—Yɛ Nɛgbɛ Ni Mɛɛ Be?

Akɛni be lɛ miibɛŋkɛ ni Maria baafɔ hewɔ lɛ, mɛni hewɔ esa akɛ Yosef afa gbɛ kakadaŋŋ nakai? Ojogbaŋŋ, Roma Maŋtsɛyeli lɛ nɔ maŋtsɛ, Kaisare Augusto ewo mla akɛ esa akɛ mɔ fɛɛ mɔ aku esɛɛ aya emaŋ heni afɔ lɛ yɛ lɛ koni akane lɛ. No hewɔ lɛ, Yosef miiya he ni afɔ lɛ yɛ lɛ, Betlehem maŋtiase lɛ mli.

Gbɔmɛi pii eba Betlehem momo, koni akane amɛ, ni he ni Yosef kɛ Maria baana wɔɔhe yɛ ji kooloi atsu mli. Biɛ, ni tejii kɛ kooloi krokomɛi wɔɔ lɛ afɔ Yesu yɛ. Maria kɛ mama bala ehe ni ekɛlɛ fɔ kooloi aniyenii anɔ mli.

Yɛ anɔkwale mli lɛ, Nyɔŋmɔ gbɛtsɔɔmɔ nɔ Kaisare Augusto tsɔ ni efee nɛkɛ mɛi akanemɔ mla nɛɛ. Enɛ ŋmɛ gbɛ ni anyɛ afɔ Yesu yɛ Betlehem, maŋ ni Ŋmalɛ lɛ etsɔ hiɛ egba efɔ shi akɛ ebaafee shiwoo nɔyelɔ lɛ fɔmɔ he lɛ.

Mɛɛ gbɛkɛ ni he hiaa nɛ? La ko kpɛ kɛbɔle tookwɛlɔi akuu ko yɛ ŋa nɔ. Yehowa anunyam ni! Ni Yehowa bɔfo kɛɛ amɛ akɛ: ‘Ŋmɛnɛ afɔ Yiwalaherelɔ aha nyɛ yɛ Betlehem maŋ lɛŋ, lɛ ji Kristo Nuŋtsɔ lɛ. Nyɛbaana lɛ ni eka kooloi aniyeniianɔ mli.’ Trukaa kɛkɛ ni ŋwɛibɔfoi babaoo pue kɛ lala akɛ: “Anunyam aha Nyɔŋmɔ yɛ ŋwɛi flooflo, ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ.”

Ŋwɛibɔfoi lɛ shi amɛ, ni tookwɛlɔi lɛ kɛɛkɛɛ amɛhe akɛ: ‘Nyɛhaa wɔyaa Betlehem ni wɔyakwɛ nɛkɛ nii nɛɛ ni Yehowa ejie etsɔɔ wɔ lɛ.’ Amɛkɛ oyaiyeli tee ni amɛyana Yesu yɛ he ni bɔfo lɛ kɛɛ amɛ akɛ amɛbaana lɛ yɛ lɛ. Beni tookwɛlɔi lɛ gba nɔ ni bɔfo lɛ kɛɛ amɛ lɛ, mɛi ni le lɛ fɛɛ anaa kpɛ amɛhe. Maria kɛ nɛkɛ wiemɔi nɛɛ fɛɛ to etsui mli.

Ŋmɛnɛ mɛi pii heɔ yeɔ akɛ afɔ Yesu yɛ December 25. December ji nyɔŋmɔnɛmɔ be, fɛi be yɛ Betlehem. Tookwɛlɔi ehiŋ ŋanɔ gbɛkɛ ni amɛmiikwɛ amɛtoi yɛ nakai be lɛ mli yɛ afi lɛ mli. Agbɛnɛ hu, Roma Kaisare lɛ biŋ ni gbɔmɛi ni miitao atse atua momo ashi lɛ Iɛ afã gbɛ yɛ fɛi be nɛɛ mli kɛya amɛmaji amli ni ayakane amɛ. Eka shi faŋŋ akɛ afɔ Yesu yɛ gboŋ mra be mli yɛ afi lɛ mli. Luka 2:​1-20; Mika 5:⁠2.

◆ Mɛni hewɔ Yesu kɛ Maria fa gbɛ kɛtee Betlehem?

◆ Mɛɛ naakpɛɛ nii ba gbɛkɛ ni afɔ Yesu lɛ?

◆ Te wɔfeɔ tɛŋŋ wɔleɔ akɛ afɔɔɔ Yesu yɛ December 25?

[Baafa muu mfoniri ni yɔɔ baafa 9]