Gbɛ Ni Oootsɔ Nɔ Oyɔse Nyɔŋmɔ Anɔkwa Sɔɔlɔi
EBA mli yɛ 1948. Sɔɔlɔi enyɔ, Yehowa Odasefoi, miifa gbɛ yɛ bɔs momo ko mli yɛ gbɛjegbɛ ni nɔ etsara bui nɔ, kɛmiijɛ Spain kooyigbɛ maŋ ko mli kɛmiiya Pyrenees Gɔji lɛ anɔ. Amɛmiiya ni amɛyasara sɔɔlɔ ko ni yɔɔ he ko banee. Beni bɔs lɛ wa yɛ he ko ni bɛŋkɛ akrowa ni sɔɔlɔ lɛ yɔɔ jɛmɛ lɛ, amɛna ni eemɛ amɛ kɛ eteji. Shi amɛyɔse kuu ko ni ekaaa yɛ emasɛi gbɛ—Maŋ Bulɔi kɛ osɔfo ko ni amɛkɛ tawuu nii ewula amɛhe jogbaŋŋ! Beni sɔɔlɔi lɛ kwɔ gbɛ fintɔŋŋ ko ni yaa akrowa lɛ shishi lɛ, Bulɔi lɛ ateŋ mɔ kome gbala tu bibioo ko ni ehiɛ lɛ ni ebo akɛ, “Manos arriba!” (Nyɛholea nyɛniji anɔ!) Amɛmɔmɔ gbɔi lɛ. Mɛni hewɔ? Osɔfo lɛ ekɛɛ Bulɔi lɛ akɛ gbɔi lɛ ji maŋ hiɛ atuatselɔi ni woɔ mɛi ahe gbeyei—amale diɛŋtsɛ nɛ! Nɔ ni jɛ mli ba ji akɛ, akɛ sɔɔlɔi etɛ lɛ fɛɛ wo tsuŋ.
Mɛni ji nɔ ni enɛ tsɔɔ? Akɛ, jeee mɛi fɛɛ ni kɛɔ akɛ amɛji osɔfoi loo sɔɔlɔi lɛ ji Nyɔŋmɔ anɔkwa sɔɔlɔi. Yɛ anɔkwale mli lɛ, yɛ bei babaoo mli lɛ, sɔrɔto agbo ka sɔɔlɔi anɔkwafoi kɛ amalelɔi lɛ ateŋ. Mɛni ji shishijee taomɔ nii kɛha anɔkwa sɔɔlɔi?
Taomɔ Nii Kɛha Anɔkwa Sɔɔlɔi
Shishijee shishinumɔ kɛha “asɔmɔ” ji “akɛ yelikɛbuamɔ loo sɔɔmɔ aha.” Esa akɛ anɔkwa sɔɔlɔi ni ji Kristofoi ana hemɔkɛyeli ni ma shi shiŋŋ akɛ Biblia lɛ ji Nyɔŋmɔ Wiemɔ ni jɛ mumɔŋ. (Yohane 17:17) Shi, nakai shishijee taomɔ nii lɛ pɛ faaa. Esa akɛ amɛna Biblia lɛ he nilee kɛ shishinumɔ ni hi. Ni esaaa akɛ amɛkɛ nakai nilee lɛ tsuɔ nii yɛ pɛsɛmkunya gbɛ nɔ—kɛha amɛ diɛŋtsɛ amɛ sɛɛnamɔ pɛ. Esa akɛ amɛfee Sanekpakpa lɛ shiɛlɔi ni yɔɔ ekaa—sanekpakpa ni kɔɔ Nyɔŋmɔ Maŋtsɛyeli lɛ kɛ naanɔ wala yɛ shikpɔŋ nɔ paradeiso he hiɛnɔkamɔ lɛ he lɛ.—Yohane 17:3; Lala 37:11, 29.
Shi, yɛ anɔkwale ni eji akɛ Yehowa Odasefoi miishiɛ Maŋtsɛyeli lɛ he sanekpakpa lɛ yɛ jeŋ fɛɛ shi jeee yɛ Spain pɛ lɛ ji Yesu gbalɛ kɛha yiwalɛ nibii agbɛjianɔtoo momo nɛɛ naagbee lɛ mlibaa. Ekɛɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14,33,34.
Shishijee taomɔ nii kroko kɛha anɔkwa sɔɔlɔi ji akɛ, ‘esaaa akɛ amɛfeɔ je lɛ fa’; no hewɔ lɛ, esa akɛ amɛtsi amɛhe kɛjɛ maŋkwramɔ he. (Yohane 15:19) Agbɛnɛ esa akɛ amɛfee mɛi ni he jɔ, mɛi ni yɔɔ suɔmɔ, kɛ mɛi ni mli hi, ni amɛfee klalo akɛ amɛaaye amɛbua mɛi fɛɛ ni sa ni nɔ ko he hiaa amɛ lɛ.—1 Korintobii 13:1, 4; 1 Petro 5:6.
Enɛ ji hiɛdɔɔ sane ko. Ni aaale sɔrɔto ni ka anɔkwa kɛ apasa sɔɔlɔi ateŋ lɛ ji wala kɛ gbele sane. Eji hiɛdɔɔ sane diɛŋtsɛ! Yesu bɔ kɔkɔ yɛ e-Gɔŋ nɔ Shiɛmɔ ni ehe gbɛi lɛ mli akɛ: “Shi nyɛhiɛ ahia nyɛhe nɔ yɛ osato gbalɔi lɛ ahe, ejaakɛ amɛŋɔɔ too wolo amɛhaa amɛhe kɛbaa nyɛŋɔɔ, shi amɛmli gbɛ lɛ klaji fulɔi ji amɛ.”—Mateo 7:15.
Shi, jeee nitsumɔi kɛ taomɔ nii pɛ Nyɔŋmɔ anɔkwa sɔɔlɔi yɔɔ, shi moŋ amɛyɛ hegbɛ babaoo. Yɛ anɔkwale mli lɛ, akɛ kuu lɛ, amɛji mɛi ni ena hegbɛ ni fe fɛɛ, amɛye omanye fe fɛɛ, agbɛnɛ amɛji shikpɔŋ nɛɛ nɔ kuu ni yɔɔ miishɛɛ fe fɛɛ ŋmɛnɛ, taakɛ obaana yɛ sane ni nyiɛ enɛ sɛɛ lɛ mli lɛ.