Maŋtsɛyeli Jajelɔi Bɔ Amaniɛ
Suɔmɔ Feɔ Wekui Ekome
ABAANYƐ ana weku ekomefeemɔ kɛ́ gbalashihilɛ lɛ damɔ suɔmɔ nɔ ni agbɛnɛ kɛ́ jeee pɛsɛmkunya hu kudɔɔ lɛ. Suɔmɔ ni tamɔ nɛkɛ baa kɛjɛɔ Yehowa, Nyɔŋmɔ ni yɔɔ suɔmɔ lɛ ŋɔɔ, no hewɔ lɛ eji Nyɔŋmɔ mumɔ lɛ yibii lɛ eko. (Galatabii 5:22, 23; 1 Yohane 4:8) Niiashikpamɔi ni nyiɛ sɛɛ nɛɛ feɔ bɔ ni suɔmɔ ni damɔ Biblia mli nilee nɔ lɛ efee wekui ekome eha lɛ he nɔkwɛmɔ nɔ.
Hong Kong
◻ Gbɛgbalɔ ko kɛ yoo ko kɛ ebiyei enyɔ je shia Biblia mli nikasemɔ shishi. Ewu lɛ wie akɛ benɛ eehe ni ekɛ ehe awo jamɔ kuu ko ni yɔɔ keketee mli. Kɛkɛ ni gbɛgbalɔ lɛ wo eŋa Iɛ ŋaa akɛ efɔ nine etsɛ ewu lɛ ni ebata nikasemɔ lɛ mli koni ekpɛ eyiŋ eha lɛ diɛŋtsɛ ehe, ni nuu lɛ fee nakai. Beni be shwieɔ mli lɛ, eŋa lɛ je shishi ebɔi kpee yaa, shi ebii lɛ atsɔsemɔ bawa kɛha yoo lɛ. Ejɛɔ onukpa lɛ ni efiteɔ mɔ ni ji gbekɛ lɛ. Kɛkɛ ni ana ale akɛ naagbai eba ekɛ ewu teŋ. Amɛ naataomɔi lɛ batsɔ bei ni mli wa, ni yɛ bei babaoo mli lɛ atsɛɔ polisifoi kɛbaa mli. Gbɛgbalɔ lɛ kɛ Nyɔŋmɔ Wiemɔ ni yɔɔ hewalɛ lɛ tsu nii ni ekɛtsɔɔ amɛ gbɛ ni amɛaatsɔ nɔ ni amɛjie suɔmɔ ni Nyɔŋmɔ gbeyeishemɔ yɔɔ mli kpo yɛ amɛ gbalashishilɛ mli. Etsɛɛɛ kɛkɛ ni sui kɛ gbɛi gbohii lɛ bɔi tsakemɔ. Amɛyi enyɔ lɛ fɛɛ amɛbatsɔmɔ mɛi ni yaa kpee daa, ni miishɛɛ shihilɛ ba shia lɛ mli. Ewu Iɛ kpa zigarɛt shɛremɔ ni amrɔ nɛɛ ekɛ ehe ewo Teokrase Sɔɔmɔ Skul lɛ mli. Eŋa lɛ etsɔ shiɛlɔ ni abaptisi lɛ.
Nine shɛ weku ekomefeemɔ nɔ kɛtsɔ suɔmɔ, Nyɔŋmɔ mumɔ Iɛ yibii lɛ kpojiemɔ nɔ.
Britania
◻ Niiashikpamɔ ni jɛ Britania nɛɛ feɔ bɔ ni Yehowa jɔɔ wu ni jieɔ suɔmɔ, tsuishitoo, kɛ tsuishiŋmɛɛ kpo yɛ ekɛ eŋa saneyeli mli lɛ he nɔkwɛmɔ nɔ. Beni wu lɛ baa anɔkwale Iɛ mli afii 12 ni eho nɛ lɛ, bɔ ni eŋa lɛ teɔ shi woɔ lɛ sɔŋŋ hewɔ lɛ yoo nɛɛ tee eyafo gbala lɛ mli yɛ mla naa. Shi, wu lɛ tee nɔ ejie mlihilɛ kpo etsɔɔ lɛ, ekwɛ koni yoo lɛ nine ashɛ nɔ ni he hiaa lɛ yɛ shika gbɛfaŋ lɛ fɛɛ nɔ, ni yɛ bei komɛi amli lɛ etsuɔ nibii bibii yɛ shia po ehaa lɛ. Yɛ afii ejwɛ sɛɛ, yɛ etsutsu shitee-kɛ-woo lɛ fɛɛ sɛɛ lɛ, etsutsu wu nɛɛ kpɛ eyiŋ akɛ ebaatsi anɔkwale lɛ ta etsɔɔ lɛ shikome ekoŋŋ. Beni ewo ŋaa akɛ nyɛmiyoo ko kɛ yoo nɛɛ abakase Biblia lɛ, yoo lɛ kpɛlɛ nɔ, ni enɛ ha enaa kpɛ ehe. Yɛ naagbee lɛ, yoo nɛɛ mɔ anɔkwale Iɛ mli ni abaptisi lɛ. Ewu Iɛ elajeko suɔmɔ ni eyɔɔ kɛha lɛ lɛ, ni beni yoo nɛɛ jie ehe kpo akɛ anɔkwale lɛ etsɔ enɔ lɛlɛŋ lɛ, ebi yoo lɛ koni ekɛ lɛ abote gbalashihilɛ mli ekoŋŋ. Yoo nɛɛ kɛ miishɛɛ kpɛlɛ nɔ, ejaakɛ ekpaaa gbɛ akɛ nuu nɛɛ baafee nakai yɛ subaŋ gbonyo ni ejie lɛ kpo etsɔɔ lɛ yɛ tsutsu lɛ hewɔ. Amɛku sɛɛ amɛbote gbalashihilɛ mli ekoŋŋ aaafee afii kpaanyɔ nɛ, ni amɛyi enyɔ lɛ fɛɛ miibɔ mɔdɛŋ yɛ anɔkwale lɛ mli.
South Pacific
◻ Nɔ ni fe afii 20 ni eho nɛ, ni obalanyo ko ni jɛ Tuvalu ŋshɔkpɔ ko nɔ yɛ South Pacific lɛ ŋma wolo ebaha Buu Mɔɔ Asafo lɛ ni ekɛmiibi ni amaje lɛ woji. No mli Iɛ Odasefoi bɛ ŋshɔkpɔ lɛ nɔ yɛ nakai beaŋ. Shi kɛlɛ, Iɛ diɛŋtsɛ ekane woji lɛ ni ena akɛ anɔkwale lɛ ni. Shi eŋa te shi ewo ehemɔkɛyeli hee nɛɛ waa, no hewɔ lɛ eŋmɛɛ he.
Nyɛsɛɛ nɛɛ, beni abɔi woji lɛ akalamɔ yɛ Tuvalu wiemɔ mli lɛ, eŋa lɛ nine shɛ woji komɛi anɔ ni lɛ diɛŋtsɛ enyɛ ekane eha ehe. Agbɛnɛ ebayoo anɔkwale lɛ ni eyakɛɛ ewu lɛ akɛ: “Afii babaoo nɛɛ fɛɛ lɛ no mli lɛ ohiɛ la lɛ, shi owooo nɔ kɛyaaa ŋwɛi waa. Mɛni hewɔ beni ohe oye akɛ Odasefoi lɛ ja lɛ, ogbalaaa mli fioo otsɔɔɔ mi Iɛ?” Amrɔ nɛɛ amɛfee ekome yɛ Biblia mli anɔkwale lɛ mli, ni gbalashihilɛ mli hefatalɔi nɛɛ eje shishi amɛkɛ amɛhe ebɔ Odasefoi lɛ ahe.
Beni amɛbiyei enyɔ, ni yaa skul yɛ Fiji lɛ ku amɛsɛɛ amɛba shia lɛ, amɛfɔlɔi lɛ bɔ amɛ amɛyiŋtoo akɛ amɛbaafee Yehowa Odasefoi lɛ he amaniɛ. Amɛwo amɛbii lɛ hewalɛ ni amɛbafata amɛhe yɛ Biblia nikasemɔ mli, shi amɛnaa kpɛ amɛhe waa, beni amɛna akɛ gbekɛbii yei lɛ eje shishi amɛmiiya kpeei yɛ Fiji lɛ. Weku lɛ kɛ miishɛɛ kpɛlɛ anɔkwale Iɛ nɔ yɛ ekomefeemɔ mli, ni tsɛ lɛ, nyɛ lɛ, kɛ amɛbiyei Iɛ ateŋ mɔ kome ebatsɔmɔ Maŋtsɛyeli shiɛlɔi.
Mɛɛ miishɛɛ eji nɛkɛ akɛ aaana bɔ ni Biblia mli anɔkwale lɛ kɛ suɔmɔ feɔ wekui ekome yɛ je lɛŋ he fɛɛ he.