Yesu Shihilɛ kɛ Esɔɔmɔ Nitsumɔ

Obalayei Nilelɔi lɛ kɛ Kwashiai Lɛ

YESU miiha sane ni ebɔfoi lɛ bi lɛ akɛ etsɔɔ amɛ ba ni eba yɛ Maŋtsɛyeli hewalɛ amli lɛ he okadi lɛ hetoo. Agbɛnɛ atsɔɔ amɛ ekadi lɛ he nibii krokomɛi hu yɛ abɛbuai loo mfonirifeemɔi etɛ mli.

Mɛi ni yɔɔ wala mli yɛ be mli ni eba lɛ baana nɛkɛ mfonirifeemɔi nɛɛ eko fɛɛ eko mlibaa. Ekɛ wiemɔi nɛɛ kpa klɛŋklɛŋ nɔ lɛ hiɛ akɛ: “No mli lɛ ŋwɛi maŋtsɛyeli lɛ aaatamɔ obalayei nyɔŋma ni kɔlɔ amɛkanei akɛ amɛyaakpee ayemforo wu. Shi amɛteŋ mɛi enumɔ lɛ nilelɔi ji amɛ, ni mɛi enumɔ lɛ kwashiai ni.”

Wiemɔ ni Yesu wie akɛ “maŋtsɛyeli lɛ aaatamɔ obalayei nyɔŋma” lɛ etsɔɔɔ akɛ mɛi ni baana ŋwɛi Maŋtsɛyeli lɛ mli gbɛfaŋnɔ lɛ ateŋ mɛi fa lɛ kwashiai ji amɛ ni fa kroko lɛ nilelɔi ni! Dabi, shi eetsɔɔ akɛ, nɔ ko tamɔ nɛkɛ loo nakai yɛ ni kɔɔ ŋwɛi Maŋtsɛyeli lɛ he, aloo nibii ni baakɔ Maŋtsɛyeli lɛ he lɛ baatamɔ nɛkɛ kɛ nɛkɛ.

Obalayei nyɔŋma lɛ feɔ Kristofoi fɛɛ ni baana gbɛfaŋnɔ aloo mɛi ni kɛɔ akɛ amɛyɔɔ gbɛfaŋnɔ yɛ ŋwɛi Maŋtsɛyeli lɛ mli lɛ ahe mfoniri. Pentekoste afi 33 Ŋ.B. ji be mli ni awo Kristofoi asafo lɛ shi akɛ abaakpee amɛ ayemforo aha Ayemforo Wu ni atee lɛ shi ni awo ehiɛ nyam lɛ, Yesu Kristo. Shi yookpeemɔ lɛ baaba nɔ yɛ ŋwɛi yɛ wɔsɛɛ be ko ni atsɔko mli.

Yɛ abɛbua lɛ mli lɛ, obalayei lɛ je kpo kɛtee kɛ yiŋtoo akɛ amɛyaakpa ayemforo wu lɛ gbɛ koni amɛfata mɛi ni eba yookpeemɔ lɛ shishi lɛ ahe kɛya. Kɛji ebashɛ shi lɛ, amɛbaasu amɛkanei lɛ koni ekpɛ gbɛ ni abaanyiɛ nɔ lɛ nɔ, koni amɛkɛwo ehiɛ nyam yɛ be mli ni ekɛ ayemforo lɛ baa shia ni esaa ato lɛ lɛ mli lɛ. Shi kɛlɛ, Yesu tsɔɔ mli akɛ: “Mɛi ni ji kwashiai lɛ hole amɛkanei lɛ, shi amɛŋɔɔɔ mu amɛfataaa he. Shi nilelɔi lɛ ŋɔ mu wo amɛtɔi lɛ amli amɛfata amɛkanei lɛ ahe. Ni beni ayemforo wu lɛ tsɛ lɛ wɔ ye amɛ fɛɛ ni amɛwɔwɔi.”

Bɔ ni ayemforo wu lɛ baa lɛ sɛɛ tsɛ ha lɛ tsɔɔ akɛ ba ni Kristo eba akɛ Maŋtsɛ ni miiye nɔ lɛ baaba yɛ wɔsɛɛ be kakadaŋŋ ko sɛɛ. Yɛ naagbee lɛ ebata emaŋtsɛsɛi lɛ no yɛ afi 1914. Obalayei lɛ fɛɛ wɔ yɛ nyɔɔŋ teŋ be kakadaŋŋ ni tsɔ hiɛ lɛ mli. Shi abuuu amɛ fɔ yɛ enɛ hewɔ. Abu obalayei kwashiai lɛ fɔ yɛ mu ni amɛkɛwooo amɛtɔi lɛ amli lɛ hewɔ. Yesu tsɔɔ bɔ ni obalayei lɛ fee beni amɛhiɛ tsɛ dani ayemforo wu lɛ ba lɛ mli akɛ:

“Shi nyɔɔŋ teŋ lɛ anu bolɔmɔ akɛ: Naa ayemforo wu lɛ miiba ee ei! Nyɛjea kpo, nyɛyakpea lɛ! Kɛkɛ ni nakai obalayei lɛ fɛɛ te shi ni amɛsaa amɛkanei lɛ. Ni kwashiai lɛ kɛɛ nilelɔi lɛ akɛ: Nyɛhaa wɔ nyɛmu lɛ eko, ejaakɛ wɔkanei lɛ miigboi. Shi nilelɔi lɛ, here nɔ amɛkɛɛ: Ekolɛ ebashɛŋ wɔkɛ nyɛfɛɛ; shi moŋ nyɛyaa mɛi ni hɔɔ lɛ aŋɔɔ nyɛyahea eko nyɛhaa nyɛhe.”

Mu lɛ feɔ nɔ ni haa anɔkwa Kristofoi yaa nɔ amɛkpɛɔ tamɔ kanei lɛ he mfoniri, ni ji Nyɔŋmɔ Wiemɔ ni jɛ mumɔŋ, ni amɛ yaa nɔ amɛmɔɔ mli waa lɛ, kɛ agbɛnɛ mumɔ krɔŋkrɔŋ, ni yeɔ ebuaa amɛ ni amɛnuɔ nakai Wiemɔ lɛ shishi lɛ. Mumɔŋ mu lɛ yeɔ ebuaa obalayei nilelɔi lɛ koni amɛkanei lɛ akpɛ kɛkpa ayemforo wu lɛ gbɛ yɛ be mli ni amɛyaa yookpeemɔ okpɔlɔŋmɛɛ lɛ shishi lɛ. Shi obalayei kwashiai akuu lɛ bɛ mumɔŋ mu ni he hiaa lɛ eko yɛ amɛmli ni ji amɛtɔi lɛ amli. No hewɔ lɛ Yesu tsɔɔ nɔ ni ba lɛ mli akɛ:

“Shi beni [obalayei kwashiai lɛ] amɛtee [mu] hemɔ lɛ, ayemforo wu lɛ ba, ni mɛi ni esaa amɛhe eto Iɛ kɛ lɛ tee yookpeemɔ he lɛ, ni aŋa shinaa lɛ. No sɛɛ Iɛ obalayei krokomɛi Iɛ hu ba ni amɛbakɛɛ: Nuŋtsɔ, Nuŋtsɔ, gbelemɔ wɔ! Shi ehere nɔ ekɛɛ: Lɛlɛŋ, miikɛɛ nyɛ akɛ mileee nyɛ.”

Yɛ be mli ni Kristo eba yɛ eŋwɛi Maŋtsɛyeli lɛ mli sɛɛ Iɛ, obalayei nilelɔi akuu ni ji Kristofoi ni afɔ amɛ mu lɛ ahiɛ tsɛ kɛha hegbɛ ni amɛna akɛ amɛaakpɛ tamɔ kanei yɛ nɛkɛ jeŋ duŋ nɛɛ mli lɛ ni amɛkɛjie Ayemforo Wu ni eku esɛɛ eba lɛ yi. Shi mɛi ni obalayei kwashiai lɛ feɔ amɛhe mfoniri lɛ efeko klalo akɛ amɛkɛ nɛkɛ yijiemɔ nɛɛ aaakpee lɛ. No hewɔ lɛ beni be lɛ shɛ lɛ, Kristo gbeleee yookpeemɔ he ni yɔɔ ŋwɛi lɛ naa shinaa lɛ ehaaa amɛ. Eshi amɛ yɛ sɛɛ yɛ je lɛŋ nyɔɔŋ teŋ duŋ kpii Iɛ mli, koni amɛkɛ mɛi krokomɛi fɛɛ ni tsuɔ nii ni ejaaa gbɛ lɛ ahiɛ akpata yɛ jɛmɛ. Yesu mu naa akɛ: “No hewɔ Iɛ, nyɛsaraa, ejaakɛ nyɛleee nɔ gbi loo ŋmɛlɛtswaa nɔ [ni gbɔmɔ bi lɛ baa].” Mateo 25:​1-13.

◆ Namɛi obalayei nyɔŋma lɛ feɔ amɛhe mfoniri?

◆ Mɛɛ be awo shi akɛ akɛ ayemforo wu Iɛ baabote gbalashihilɛ mli lɛ, shi mɛɛ be mli eba koni ebaŋɔ eyemforo lɛ kɛya yookpeemɔ lɛ shishi?

◆ Mɛni mu lɛ damɔ shi kɛha, ni eko ni obalayei nilelɔi lɛ yɔɔ Iɛ ye ebua amɛ koni amɛfee mɛni?

◆ Nɛgbɛ yookpeemɔ okpɔlɔŋmɛɛ lɛ ba nɔ yɛ?

◆ Mɛɛ nyɔmɔwoo ni yɔɔ nyam obalayei kwashiai lɛ anine shɛɛɛ nɔ, ni mɛni baaba amɛnɔ?