Shikpɔŋ Lɛ Yibaamɔ Kɛmiijɛ Fitemɔ Mli

NYƆŊMƆ ebaa shikpɔŋ lɛ yi kɛjɛ hiɛkpatamɔ ni adesai kɛbaa enɔ lɛ mli shikome da, yɛ adesa yinɔsane be mli. Efee enɛ kɛtsɔ nu afua ko ni ekɛba jeŋ fɛɛ yɛ Noa gbii lɛ amli lɛ nɔ. Wɔbɛ nɔ ko ni aŋma afɔ shi ni tsɔɔ akɛ no mli lɛ adesai miifite adebɔɔ mli nibii ni ebɔle amɛ lɛ yɛ nakai be mli. Shi afite shikpɔŋ lɛ yɛ gbɛ kroko nɔ aahu kɛyashɛ he ko ni no ha Nyɔŋmɔ nu he akɛ ehe miihia ni efee he nɔ ko ni mli wa diɛŋtsɛ.

Biblia lɛ bɔɔ amaniɛ akɛ: “Ni shikpɔŋ lɛ nɔ efite yɛ Nyɔŋmɔ hiɛ, ni awo shikpɔŋ lɛ nɔ obɔ kɛ yiwalɛ. Ni Nyɔŋmɔ kwɛ shikpɔŋ lɛ, ni naa, enɔ efite; ejaakɛ heloo fɛɛ efite egbɛ yɛ shikpɔŋ lɛ nɔ.” (1 Mose 6:​4, 11, 12) Hɛɛ, Nyɔŋmɔ bu shikpɔŋ lɛ akɛ enɔ efite yɛ Noa gbii lɛ amli yɛ adesai ayiwalɛ kɛ efɔŋfeemɔ lɛ hewɔ.

Nakai nɔŋŋ, beni blema Israel je shishi akɛ amɛmiiŋɔ Shiwoo Shikpɔŋ lɛ, Nyɔŋmɔ bɔ amɛ kɔkɔ akɛ: “Nyɛkabule[a] shikpɔŋ ni nyɛyɔɔ nɔ lɛ, ejaakɛ la buleɔ shikpɔŋ; . . . ni okabule shikpɔŋ . . . lɛ.” (4 Mose 35:​33, 34) No hewɔ lɛ, afite Kanaan yɛ la yi sɔ ni emlibii lɛ ye lɛ hewɔ. Nɔkwɛmɔ nɔ ko ni ehii kwraa ji gbekɛbii bibii ni amɛkɛshaa afɔle amɛhaa amɛnyɔŋmɔi lɛ.

Kanaanbii lɛ hu kɛ amɛhe woɔ jeŋba shara mli waa, ni enɛ hu sa bɔ ni Nyɔŋmɔ kwɛɔ shikpɔŋ lɛ ehaa lɛ he. Ebɔ Israel kɔkɔ akɛ: “Nyɛkɛ nɛkɛ nii nɛɛ [jeŋba shara mli nifeemɔi] akabulea nyɛhe; ejaakɛ nɛkɛ nii nɛɛ fɛɛ jeŋmaji ni mibashwie yɛ nyɛhiɛ lɛ kɛbule amɛhe lɛ, ni abule shikpɔŋ lɛ, no hewɔ lɛ . . . shikpɔŋ lɛ baashwe enɔ bii lɛ ashwie.” (3 Mose 18:​24, 25) Jeŋba shara kɛ lashishwiemɔ fite Kanaan aahu akɛ Nyɔŋmɔ kpata Kanaanbii amaji lɛ ahiɛ.

Shikpɔŋ lɛ Fitemɔ

Shi ŋmɛnɛ hu? Ani jeee yinɔ ni anyɛɛɛ yiwalɛ nifeemɔ, lashishwiemɔ, kɛ jeŋba shara naa atsi yɛ mli lɛ mli wɔ hu wɔyɔɔ nɛɛ? Ekɔɔɔ he eko, nɔ fɛɛ nɔ ni adesa feɔ ni ekɛbɔɔ mɔdɛŋ ni ekɛsaa bɔ ni efite shikpɔŋ nɛɛ diɛŋtsɛ eha lɛ, enyɛŋ esaa ekɛ gbɔmɛi ni kɛ abu naa lɛ, amɛyibɔ shɛɔ akpekpei oha ni egboi yɛ etai amli yɛ afii oha nɛɛ mli lɛ aba wala mli ekoŋŋ; ni nakai nɔŋŋ hu enyɛŋ ekɛ akpekpei abɔ ni awuiyelɔi egbe amɛ aloo mɛi babaoo ni nii yɔɔ mɔbɔ ni anyɛŋ amɛ akane ni gboiɔ kɛ hɔmɔ lɛ hu aba wala mli ekoŋŋ. Eka shi faŋŋ akɛ, enyɛŋ ekɛ abifabii ni afɔɔɔ amɛ ni kɛ abu naa lɛ amɛyibɔ shɛɔ akpekpei 40 kɛmiiya 60 ni akɛ musufitemɔ foɔ amɛwala sɛɛ daa afi lɛ aku sɛɛ aba wala mli. Ani wɔbaanyɛ wɔje he ŋwane akɛ akɛ nibii ni tamɔ enɛɛmɛi miifite shikpɔŋ lɛ yɛ Nyɔŋmɔ hiɛ​—kɛ wɔtsiii jeŋba shara ni egbɛ eshwa babaoo ŋmɛnɛ lɛ po ta lɛ?

Nii ahesusumɔ haa wɔleɔ akɛ esa akɛ Nyɔŋmɔ afee he nɔ ko amrɔ nɔŋŋ ni ekɛbaa shikpɔŋ lɛ yi kɛjɛ adesai anifeemɔi ni kpataa hiɛ lɛ mli, ni Biblia gbalɛ maa enɛ nɔ mi. Shi mɛni ebaafee? Biblia lɛ kɛɔ akɛ “[e]baafite mɛi ni fiteɔ shikpɔŋ lɛ.” (Kpojiemɔ 11:​18; okɛto Mateo 24:​3-14 he.) Bɔ ni shiatsɛ faa gbɔ ni fiteɔ eshia lɛ, nakai nɔŋŋ Nyɔŋmɔ “baafa” mɛi ni fiteɔ edebɔɔ fɛfɛo lɛ, shikpɔŋ lɛ.

Biblia lɛ kɛɔ akɛ: “Aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.” (Abɛi 2:22) Nɛkɛ nii ni Nyɔŋmɔ baafee nɛɛ ji nɔ ni Biblia lɛ tsɛɔ lɛ Harmagedon lɛ. (Kpojiemɔ 16:16) Yesu hu tsɛ lɛ akɛ “amanehulu babaoo . . . ni anako nɔ da kɛjɛ je leŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mateo 24:21) Ebaada kwraa fe Nu Afua lɛ po.

Ani enɛ ji tsabaa ni mli wa fe nine loo nɔ ni ejaaa gbɛ? Dabi, akɛ shikpɔŋ lɛ Bɔlɔ lɛ, Nyɔŋmɔ yɛ hegbɛ akɛ eeekpɛ eyiŋ yɛ mɔ ni baahi nɔ lɛ he. Eyɛ hegbɛ hu akɛ ebuɔ gbɔmɔ fɔ yɛ nibii ni efeɔ lɛ hewɔ. Ni nɔ ni fe fɛɛ lɛ, kɛ Nyɔŋmɔ ŋmɛ gbɔmɔ gbɛ ni eya nɔ yɛ gbɛ ni ekɔ nɛɛ mli ni ekuuu enaa lɛ, ebaafite shikpɔŋ lɛ aha mɔ fɛɛ mɔ, ni wala nyɛŋ nɔ ahi. Shi yɛ gbɛ kroko nɔ lɛ, kɛ Nyɔŋmɔ fite mɛi ni fiteɔ shikpɔŋ lɛ,’ ebaabaa shikpɔŋ ni ekɛha wɔ nɛɛ yi eha mɛi ni hiɛ sɔɔ nii lɛ. Biblia lɛ woɔ shi akɛ: “Ejaakɛ mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ.”​—Abɛi 2:⁠21.

Kɛtsɔ Nyɔŋmɔ yelikɛbuamɔ nɔ lɛ, mɛi akpekpei abɔ ena hewalɛ ni amɛkɛaatsɔɔ akɛ shwamɔ ko bɛ amɛhe ejaakɛ amɛmiitao ni amɛshwɛ yɛ nɔ ni amɛna Nyɔŋmɔ nibɔɔ lɛ mli ŋɔɔmɔ. Amɛnyiɛɔ jeŋba he tɛi ni nɔ kwɔlɔ ni Nyɔŋmɔ efolɔ eshwie shi lɛ asɛɛ ni amɛtsiɔ amɛhe kɛjɛɔ yiwalɛ nifeemɔi kɛ lashishwiemɔ ni afeee yɛ faŋŋ mli lɛ po he. No hewɔ lɛ, amɛjeee mɛi ni fiteɔ shikpɔŋ lɛ yɛ shishinumɔ ni he hiaa nɛɛ naa.

Shikpɔŋ ni Abaa Yi Kɛjɛ Fitemɔ Mli

Nɛkɛ gbɔmɛi nɛɛ yɛ hiɛnɔkamɔ ni yɔɔ miishɛɛ agbɛnɛ akɛ amɛaana ni atsake shikpɔŋ lɛ kɛjɛ amrɔ nɛɛ shihilɛ ni eyɔɔ mli ni akpata ehiɛ nɛɛ mli kɛya paradeiso ni yɔɔ hewalɛ mli. Ni agbɛnɛ hu, abaatsuu amɛgbɔmɔtsei ahe, ni abaaha ehe atse kɛjɛ esha hewalɛ hu mli. Shi Biblia lɛ mli naagbee wolo lɛ tsɛɔ gbɛjianɔ ni Nyɔŋmɔ eto ni baaha enɛɛmɛi fɛɛ aba mli lɛ akɛ “wala nu faa.” Yɛ faa lɛ toi biɛ kɛ biɛ lɛ, “wala tsei lɛ mamɔ shi, ni ewoɔ yibii shii nyɔŋma-kɛ-enyɔ, ni nyɔŋ fɛɛ nyɔŋ nɔ lɛ ewoɔ yibii, ni tso lɛ yibai lɛ akatsaa jeŋmaji lɛ.”​—Kpojiemɔ 22:​1, 2.

Nɛkɛ ninaa ni ajɛ mumɔ mli akɛha nɛɛ maa nɔ mi akɛ Nyɔŋmɔ baabaa shikpɔŋ lɛ kɛ adesa ni yɔɔ nɔ lɛ yi kɛjɛ fitemɔ mli. Gbalɛi krokomɛi tsɔɔ hiɛ ehaa aleɔ nakai shikpɔŋ ni asaa lɛ ekoŋŋ lɛ he sane. Akɛ nɔkwɛmɔ nɔ lɛ, susumɔ nɔ ni Yesaia na kɛtsɔ hiɛ ni eŋma kɛ lalafoo wiemɔi nɛɛ he okwɛ: “Ŋa kpataa kɛ shikpɔŋ gbiŋ aaanya, ŋa kplanaa lɛ hu mli aaafili lɛ, ni eeegba afoforo tamɔ fɔfɔi. Eeegba afoforo babaoo ni emli aaafili lɛ, ni emli aaafili lɛ kɛ miishɛɛ kɛ nyamɔ sɔŋŋ.” (Yesaia 35:​1, 2) Yɛ nakai beaŋ lɛ, ŋshɔi, shikpɔŋ ni akɛduɔ nii, aloo kɔɔyɔɔ ni tsofai ni ebɔɔ yɔɔ mli ewo mli muji ehiŋ shi.

Nɔ ni he hiaa fe fɛɛ lɛ, akɛ yiwalɛ, lashishwiemɔ aloo jeŋba shara fiteŋ shikpɔŋ lɛ dɔŋŋ. Mɛi ni buɔ Nyɔŋmɔ, kɛ tɛi ni efolɔ eshwie shi lɛ kɛ enibɔɔ nii lɛ pɛ baahi jɛmɛ. (Kpojiemɔ 21:​7, 8) Agbɛnɛ bo nibii ni yɔɔ nyam ni baajɛ enɛɛmɛi fɛɛ mli aba lɛ, toi: “Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee. . . . ’Naa, miifee nii fɛɛ ehee.’”​—Kpojiemɔ 21:​4, 5.

Mɛɛ emlibaa ni yɔɔ miishɛɛ nɛ! Kwɛ bɔ ni wɔmii shɛɔ wɔhe akɛ etsɛŋ ni Nyɔŋmɔ “baafite mɛi ni fiteɔ shikpɔŋ lɛ”! Kwɛ bɔ ni nɛkɛ shiwoi ni ajɛ mumɔ mli akɛha nɛɛ tsirɛɔ wɔ koni wɔsɔmɔ Nyɔŋmɔ, mɔ ni baahere shikpɔŋ lɛ yiwala kɛjɛ fitemɔ mli ni efee lɛ paradeiso shia eha adesai ni hiɛ tsui ni ja lɛ!

[Wiemɔ ni akɔ ni akɛmiitsu nii ni yɔɔ baafa 6]

Bliblia lɛ kɛɔ akɛ Nyɔŋmɔ “baafite mɛi ni fiteɔ shikpɔŋ lɛ.”​—Kpojiemɔ 11:⁠18