Obaanyɛ Ona Jwetrii Ni Hi Kwraa Fe Shika Tsuru!
ABAANYƐ akɛ anɔkwalei ni yɔɔ Biblia lɛ mli lɛ ato shika tsuru, jwiɛtɛi loo jwetrii ni aŋɔtee lɛ ekomɛi ahe. Eyɛ mli akɛ ekolɛ otsako shikpɔŋ ni ootao shika tsuru loo jwiɛtɛi diɛŋtsɛ da moŋ, shi eka shi faŋŋ akɛ oyɔseɔ akɛ ebiɔ nitsumɔ ni wa kɛ hekamɔ. Ni yɛ be babaoo mli lɛ, mɔ ni tsaa shi etaoɔ enɛɛmɛi lɛ kɛ nijiaŋwujee kpeɔ.
Shi nijiaŋwujee ni tamɔ nɛkɛ baaa yɛ be mli ni ootao jwetrii ni aŋɔtee yɛ Biblia lɛ mli lɛ. Kadimɔ nɔmimaa ni woɔ mɔ hewalɛ nɛɛ: “Kɛji otao esɛɛgbɛ tamɔ jwiɛtɛi, ni otao tamɔ jwetrii ni aŋɔtee lɛ: No dani ooonu Yehowa gbeyeishemɔ shishi, ni ooona Nyɔŋmɔ he nilee.” (Abɛi 2:4, 5) Shi esa akɛ oya nɔ otao.
“Taomɔ Mli Okwɛ”
“Taomɔ mli okwɛ, shi gbalɔ ko eteko shi kɛjɛko Galilea pɛŋ.” Enɛ ji ŋaawoo ni klɛŋklɛŋ afii oha lɛ mli Farisifoi Yudafoi lɛ ateŋ mɛi komɛi kɛha Nikodemo, ni lɛ hu eji Farisinyo lɛ. “Taomɔ mli okwɛ.” Ŋaawoo kpakpa lɛlɛŋ nɛ. Anyɛɔ ataoɔ mli ni anaa anɔkwale lɛ—nɔ ko ni jara wa kwraa fe shika tsuru.
Shi yɛ nɛkɛ sane krɛdɛɛ nɛɛ mli lɛ, mɛi ni kɛ ŋaawoo ha akɛ “taomɔ mli okwɛ” lɛ nyɛɛɛ afee nakai. Yɛ mɛɛ gbɛ nɔ?
Osɔfonukpai lɛ kɛ Farisifoi lɛ etsu tsuji koni ayamɔ Yesu Kristo. Bɔ ni enitsɔɔmɔ lɛ ha amɛnaa kpɛ amɛhe ha sɔŋŋ hewɔ lɛ, tsuji lɛ ku amɛsɛɛ ni amɛkɛ lɛ baaa. No hewɔ lɛ Farisifoi lɛ bi amɛ akɛ: “Ani nyɛ hu alaka nyɛ?” Kɛkɛ ni Nikodemo fa egbeeaŋ ni ekɛɛ: “Kɛ anuko mɔ ko daaŋ gbee ni ale nɔ ni efee lɛ, wɔ mla lɛ buɔ lɛ fɔ lo?” Nɛkɛ wiemɔi nɛɛ ji nɔ ni tee ŋaawoo “taomɔ mli okwɛ” lɛ shi.—Yohane 7:32, 45-52.
Osɔfoi lɛ kɛ Farisifoi lɛ nyɛɛɛ afee nakai yɛ mɛɛ gbɛ nɔ? Amɛleee aloo amɛkpɛlɛɛɛ nɔ akɛ eyɛ mli akɛ ale Yesu yɛ Galilea moŋ, shi afɔ lɛ yɛ Betlehem. No mli lɛ gbalɔ Mika egba enɛ efɔ shi: “Bo [Betlehem] kɛ̃ omli mɔ ko aaajɛ aba aha mi, ni ebatsɔ Israel nɔyelɔ.” (Mika 5:1) No hewɔ lɛ nɛkɛ hiɛnyiɛlɔi nɛɛ nyɛɛɛ atao mli amɛkwɛ ni amɛna nibii ni tsɔɔ akɛ Yesu ji gbalɔ lɛ, mɔ ni baatsɔ nɔyelɔ yɛ Israel lɛ. Nɔ ni jɛ enɛ mli ba lɛ fee oshara, ni efeɔ bɔ ni ehe hiaa akɛ aaatao ni ana anɔkwalei fɛɛ ni kɔɔ saji ahe lɛ mli lɛ he nɔkwɛmɔ nɔ. Shi yɛ be babaoo mli lɛ te abuɔ anɔkwale ahaa tɛŋŋ?
Afutu Anɔkwale Mli
Afii ohai 19 lɛ mli niŋmalɔ ko kɛɛ: “Anɔkwale ni yɔɔ krɔŋŋ tamɔ shika krɔŋŋ lɛ efee nɔ ni anyɛɛɛ aja, ejaakɛ gbɔmɛi eyoo akɛ ehi jogbaŋŋ moŋ akɛ aaafutu anɔkwale lɛ mli moŋ fe ni amɛaatsuu amɛ diɛŋtsɛ amɛhe.” Kwɛ bɔ ni nɛkɛ wiemɔi nɛɛ sa jogbaŋŋ lolo ha yɛ je lɛŋ Nyɔŋmɔjamɔ shihilɛ lɛ hewɔ! Mɔ ni hɔ anɔkwalɛ ni afutuɔ mli nɛɛ sɛɛ ji “malɛmɔtsɛ,” Satan Abonsam. (Yohane 8:44; Kpojiemɔ 12:9) Ekɛ apasa jamɔ tsuɔ nii ni ekɛfutuɔ anɔkwa tsɔɔmɔi ni kɔɔ sanebimɔi ni he hiaa tamɔ enɛɛmɛi ahe lɛ mli: Namɔ ji Nyɔŋmɔ? Mɛni ji wekukpaa ni ka ekɛ Yesu teŋ? Mɛni ji shikpɔŋ lɛ kɛ adesai awɔsɛɛ be?
Kulɛ osɔfoi lɛ kɛ Farisifoi lɛ baanyɛ atao mli ni amɛna anɔkwale lɛ. Kulɛ amɛbaana jwetrii ni sɛɛnamɔ yɔɔ he kwraa fe shik22a tsuru. Hɛɛ, kulɛ amɛbaanyɛ amɛna anɔkwale muu lɛ fɛɛ ni kɔɔ Yesu he lɛ kɛtsɔ ‘ewiemɔi atoi ni amɛaabo kɛ nɔ ni efeɔ lɛ ni amɛaanu shishi’ lɛ nɔ, taakɛ Nikodemo wo ŋaa lɛ. Eji amɛye anɔkwa yɛ enɛ feemɔ mli kulɛ, ŋwanejee ko bɛ he akɛ kulɛ Yesu baagbala nibii amli eha amɛ, taakɛ bɔ ni efee eha ekaselɔi lɛ. (Marko 4:34) Shi nɛgbɛ ji he ni wɔbaana anɔkwale ni yɔɔ krɔŋŋ lɛ yɛ ŋmɛnɛ? Yɛ anɔkwalɛ mli lɛ, ani nɔmimaa ko yɛ akɛ wɔbaanyɛ wɔye omanye yɛ anɔkwale muu lɛ fɛɛ taomɔ mli ni wɔnine ashɛ nɔ?
[Mfoniri ni yɔɔ baafa 4]
Kulɛ jamɔ mli hiɛnyiɛlɔi Iɛ baanyɛ ele anɔkwalɛ muu Iɛ fɛɛ ni kɔɔ Yesu he lɛ kɛtsɔ ‘nu ni amɛaanu kɛaajɛ eŋɔɔ’ Iɛ nɔ