Yaa Nɔ Kɛyashɛ Oti Lɛ He!
Saji Otii ni Jɛ Filipiibii Awolo lɛ Mli
BƆFO Paulo miisumɔ ni Kristofoi ni yɔɔ Filipi lɛ aya nɔ kɛyashɛ oti ni ji naanɔ wala jweremɔ nɔ lɛ he. No hewɔ lɛ eŋma wolo eyaha amɛ aaafee afi 60 loo 61 Ŋ.B. lɛ mli, yɛ be mli ni awo lɛ tsuŋ yɛ Roma klɛŋklɛŋ kwraa lɛ. Akɛ ewolo lɛ yaha asafo ko ni etsɔ hiɛ eto aaafee afi nyɔŋma yɛ Filipi, maŋ ko ni Filip ni jɛ Makedon (Aleksanda Kpeteŋkpele lɛ tsɛ) to lɛ mli. Beni shɛɔ Ŋ.B. klɛŋklɛŋ afii oha lɛ mli lɛ, ebatsɔ “Makedonia shikpɔŋ lɛ nɔ maŋ wulu,” ni amrɔ nɛɛ eji Greece kooyigbɛ kɛ Yugoslavia wuoyigbɛ lɛ fa.—Bɔfoi lɛ Asaji 16:11, 12.
Filipi heyelilɔi lɛ ji ohiafoi moŋ, shi amɛmli hi. Amɛkɛ nibii ni he hiaa Paulo lɛ maje lɛ fe shikome. (Filipibii 4:14-17) Shi ewolo ni eŋma lɛ fe shidaa he wolo ko kɛkɛ. Ekɛ hewalɛwoo ha, etsɔɔ suɔmɔ yɛ mli, ni ekɛ ŋaawoo hu ha.
Kristofoi Asui Kpakpai Jeɔ Kpo
Paulo je ewolo lɛ shishi kɛ suɔmɔ ni eyɔɔ kɛha Filipibii lɛ he odaseyeli. (1:1-30) Eda Yehowa shi yɛ yelikɛbuamɔ ni amɛkɛha koni akɛlɛɛ sanekpakpa lɛ mli lɛ hewɔ ni esɔle koni amɛsuɔmɔ lɛ aya nɔ afa. Paulo na miishɛɛ akɛ etsuŋwoo lɛ ha amɛjie ‘ekaa babaoo kpo koni amɛshiɛ Nyɔŋmɔ wiemɔ lɛ ni gbeyeishemɔ bɛ mli.’ Eesumɔ ni ekɛ Kristo ahi shi, shi enu he akɛ ebaanyɛ esɔmɔ amɛ. Paulo miisumɔ hu ni amɛya nɔ ‘amɛpele hemɔkɛyeli lɛ he sanekpakpa lɛ he.’
Nɔ ni nyiɛ sɛɛ ba ji ŋaawoo yɛ subaŋ kɛ jeŋba he. (2:1-30) Awo Filipibii lɛ hewalɛ ni amɛtsɔɔ akɛ amɛsusuɔ mɛi krokomɛi ahe ni amɛjie heshibaa kpo tamɔ Kristo. ‘Amɛmiitso tamɔ kanei yɛ je lɛŋ’ ni awo amɛ hewalɛ ni ‘amɛmɔ wala wiemɔ lɛ mli kpɛŋŋ.’ Paulo hiɛ ka nɔ akɛ ebaaatsu Timoteo kɛya amɛŋɔɔ, ni eyɛ hekɛnɔfɔɔ akɛ lɛ diɛŋtsɛ hu etsɛŋ ni ebaaba. Bɔni afee ni ema nɔ mi eha amɛ akɛ Epafrodito ni he ye lɛ yɛ jogbaŋŋ lɛ, eetsu nɛkɛ tsulɔ anɔkwafo nɛɛ kɛmiiya amɛŋɔɔ.
Yaa nɔ oya Ohiɛ Kɛyashɛ Oti lɛ He
Yɛ no sɛɛ lɛ bɔfo lɛ tsɔɔ Filipibii lɛ he ni esa akɛ amɛkɛ amɛhekɛnɔfɔɔ afɔ yɛ be mli ni amɛyaa amɛhiɛ kɛyaa oti lɛ he lɛ. (3:1-21) Esa akɛ amɛkɛfɔ Yesu Kristo mli, jeee yɛ heloo loo ketiafoo mli taakɛ mɛi komɛi feɔ lɛ. Paulo buɔ heloo mli nibii ni ena lɛ akɛ tumu nɔ nii yɛ “Kristo Yesu . . . he nilee ni fe fɛɛ lɛ hewɔ.” Bɔfo lɛ “miitiu oti lɛ he kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he jweremɔ nɔ lɛ he” ni ewo Filipibii lɛ hewalɛ ni amɛna jwɛŋmɔ ni tamɔ nakai nɔŋŋ.
Paulo naagbee ŋaawoo ni ekɛha lɛ kɛ nitsumɔ baaye abua Filipibii lɛ koni amɛha oti lɛ kɛ jweremɔ nɔ lɛ ahi amɛhiɛ. (4:1-23) Ewo amɛ hewalɛ ni amɛkɛ amɛhaomɔi lɛ afɔ Nyɔŋmɔ nɔ yɛ sɔlemɔ mli ni amɛkɛ nibii kpakpai awo amɛjwɛŋmɔi amli obɔbɔ. Paulo jie amɛyi ekoŋŋ yɛ amɛ ejurɔfeemɔi lɛ ahewɔ ni ekɛba naagbee kɛ ŋamɔi kɛ bɔ ni esumɔɔ akɛ Nuŋtsɔ Yesu Kristo duromɔ lɛ kɛ mumɔ ni amɛjieɔ lɛ kpo lɛ ahi shi.
Paulo wolo ni eŋma eyaha Filipibii lɛ haa ejurɔfeemɔ, suɔmɔ, kɛ heshibaa yaa hiɛ. Ewoɔ hewalɛ ni ana hekɛnɔfɔɔ yɛ Kristo mli kɛ tsuiŋ sɔlemɔ kɛha Nyɔŋmɔ. Ni yɛ anɔkwale mli lɛ Paulo wiemɔi lɛ yeɔ ebuaa Yehowa Odasefoi ni amɛpele kɛyashɛ oti lɛ he ni amɛnine ashɛ naanɔ wala jweremɔ nɔ lɛ nɔ.
[Akrabatsa/Mfoniri ni yɔɔ baafa 25]
Kɛyashɛ Oti lɛ He: Paulo ŋma akɛ “Nii ni yɔɔ sɛɛgbɛ lɛ miijie mihiɛ yɛ nɔ, shi nii ni yɔɔ hiɛgbɛ lɛ ahe moŋ mipeleɔ, ni miitiu oti lɛ kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he jweremɔ nɔ lɛ he.” (Filipibii 3:13, 14) Bɔfo lɛ miimia ehiɛ tamɔ mɔ ko ni yɔɔ foidamɔ he akaŋshii mli. Efiteee be kɛ enyɔmɔ ni ekɛaakwɛ esɛɛ, shi moŋ eyaa ehiɛ koni eyashɛ oti lɛ he—tamɔ foidalɔ ni miipele ni efoŋ kɛtsɔ naagbee liamɔ lɛ mli. Kɛha Paulo kɛ Kristofoi ni afɔ amɛ mu lɛ, nyɔŋmɔwoo lɛ ji ŋwɛi wala kɛtsɔ gbohiashitee nɔ yɛ be mli ni amɛgbe amɛshikpɔŋ nɔ shihilɛ naa yɛ anɔkwayeli mli kɛha Nyɔŋmɔ lɛ. Kɛ wɔhiɛnɔkamɔ lɛ ji ŋwɛi loo shikpɔŋ nɔ nɔ̃ hu lɛ, nyɛhaa wɔhiɛa wɔ emuuyeli mli wɔhaa Yehowa ni wɔpele kɛyashɛ oti lɛ he akɛ e-Dasefoi.—2 Timoteo 4:7.