Ani Nyɔŋmɔ Haa Osɔlemɔi Ahetoo?

Yoo ko ni yɔɔ Hokkaido yɛ Japan kɛɛ: “Minako henumɔ ni tsɔɔ akɛ aha misɔlemɔi lɛ ahetoo da.” Jeee ekome pɛ enuɔ he nakai yɛ enɛ gbɛfaŋ. Mɛi pii nuɔ he akɛ ahaaa amɛsɔlemɔi ahetoo. Yɛ anɔkwale mli lɛ, ekolɛ oosusu he kɛji Nyɔŋmɔ haa osɔlemɔi ahetoo loo ehaaa hetoo.

Gbɔmɛi akpekpei abɔ kɛ sɔlemɔi ni anyɛŋ akane fɔɔ nyɔŋmɔi ni aleee amɛyibɔ ahiɛ. Mɛni hewɔ etamɔ nɔ ni ahaaa sɔlemɔi pii ahetoo nakai lɛ? Bɔni afee ni wɔle enɛ lɛ, nyɛhaa klɛŋklɛŋ lɛ wɔpɛia sɔlemɔi sɔrɔtoi ni akɛhaa lɛ amli wɔkwɛa.

Mɛni Mɛi Komɛi Sɔleɔ Amɛbiɔ?

Kɛ eshɛ Afi Hee be mli lɛ, Japan gbɔmɛi ayifalɛ lɛ mlijaa etɛ mli enyɔ, aloo nɔ ni miihe ashɛ gbɔmɛi akpekpei 80 sɔleɔ yɛ Shinto gbatsui loo Buddhafoi asɔlemɔtsui amli. Amɛkɛ shika haa akɛ afɔleshaa nii ni amɛsɔleɔ amɛbiɔ shade kpakpa kɛ shweshweeshwe shihilɛ kɛha weku lɛ.

Yɛ January kɛ February mli​—dani skul nikaselɔi aaafee amɛkaai ni kɛ amɛ boteɔ kɔlegii amli lɛ​—nikaselɔi babaoo buaa amɛhe naa yɛ gbatsui ahe, tamɔ nɔ ni yɔɔ Tokyo ni ewoloŋlee nyɔŋmɔ lɛ ehe gbɛi lɛ nɛkɛ. Amɛŋmalaa nɔ ni amɛtaoɔ lɛ yɛ tsei taoi anɔ ni amɛkɛtsotsoroɔ tsei anɔ yɛ he ni gbatsu lɛ yɔɔ lɛ. Kɛ hoo lɛ, akɛ tsei taoi nɛɛ 100,000 wula gbatsu ko ni ale jogbaŋŋ yɛ Tokyo yɛ 1990 skul kaa be lɛ mli.

Sɔlemɔi pii kɔɔ gbɔmɔtsoŋ hewalɛnamɔ he. Gbɔmɛi pii sɔleɔ yɛ gbatsu ko ni yɔɔ Kawasaki, ni yɔɔ Japan lɛ he koni abu amɛhe kɛjɛ AIDS he. Gbatsu lɛ wulɔmɔ loo osɔfo lɛ tsɔɔ mli akɛ: “Nɔ ni sɔlemɔ ni asɔleɔ koni akana AIDS lɛ tsɔɔ ji akɛ, ebaaha gbɔmɛi lɛ kɛ nilee atsu nii yɛ amɛjeŋba mli.” Shi nɔ ni yɔɔ sɔlemɔ mli lɛ fɛɛ nɛ?

Yoo ko ni eda yɛ afii amli sɔle yɛ gbatsu kroko he akɛ eetao “trukaa gbele.” Mɛni hewɔ? Ejaakɛ eesumɔ ni ejo hela ni aaaha eka shi epiŋ babaoo lɛ naa foi ni esumɔɔɔ ni etsɔ jatsu kɛha eweku lɛ.

Bɔɔltswalɔi akuu ko hiɛnyiɛlɔ sɔle koni ekuu lɛ aye kunim ni abu amɛhe kɛjɛ pilamɔ he yɛ maŋ ko ni akɛɛ eji Kristofoi amaŋ lɛ mli. Katolekbii ni yɔɔ Poland lɛ sɔleɔ kɛhaa amɛ diɛŋtsɛ amɛhilɛ-kɛhamɔ ni amɛkɛ jwinei wulaa amɛ Madonna loo Maria amaga lɛ kɛ amɛnuɔ he akɛ aha amɛsɔlemɔi ahetoo lɛ. Mɛi pii hoɔ yuu kɛyaa sɔlemɔtsui amli tamɔ nɔ ni ehe gbɛi ni yɔɔ Guadalupe yɛ Mezico City lɛ mli lɛ, kɛ Lourdes, France, ni amɛmiikpa fai koni amɛna naakpɛɛ tsamɔ.

Gbɔmɛi ni yɔɔ Bokagbɛ kɛ Anaigbɛ fɛɛ sɔleɔ yɛ nibii sɔrɔtoi babaoo he yɛ amɛ diɛŋtsɛ amɛyiŋtoi komɛi ahewɔ. Eka shi faŋŋ akɛ amɛmiisumɔ ni anu amɛsɔlemɔi lɛ ni aha hetoo. Shi ani jwɛŋmɔ yɛ mli akɛ aaakpa gbɛ akɛ abaaha sɔlemɔi fɛɛ hetoo? Ni bo diɛŋtsɛ osɔlemɔi hu? Ani ahaa amɛ hetoo? Yɛ anɔkwale mli lɛ, ani Nyɔŋmɔ haa sɔlemɔi ahetoo kwraa po?