Sɔlemɔi ni Abaabo Toi Kɛ̃
SƆLEMƆI yɛ ni abaaha hetoo kɛ̃. Atsɔɔ emli otii lɛ yɛ sɔlemɔ nɔkwɛmɔ nɔ ni Yesu Kristo kɛba ekaselɔi lɛ mli beni ekɛɛ: “No hewɔ lɛ nyɛsɔlea nɛkɛ: ‘Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.’”—Mateo 6:9-13, NW.
Ati nakai Yesu sɔlemɔ nɔkwɛmɔ nɔ lɛ mli wiemɔi lɛ amli shii akpekpei abɔ. Eyɛ mli akɛ Kristo kpaaa gbɛ akɛ esɛɛnyiɛlɔi anɔkwafoi lɛ baati sɔlemɔ ni tamɔ nɛkɛ lɛ mli kɛkɛ moŋ, shi abaaha amɛ faikpamɔi ni tsɔɔ henumɔi ni tamɔ nɛkɛ lɛ ahetoo kɛ̃. (Mateo 6:7, 8) No hewɔ lɛ akɛ aaaha Nyɔŋmɔ gbɛi lɛ he atse lɛ tsɔɔ mɛni? Mɛni hewɔ esa akɛ asɔle ni e-Maŋtsɛyeli lɛ aba? Ni mɛni hewɔ esa akɛ abi ni afee Nyɔŋmɔ suɔmɔnaa nii?
“Ha Ogbɛi lɛ He Atse”
Yehowa, “Mɔ ni Kwɔ Fe Fɛɛ yɛ shikpɔŋ lɛ nɔ fɛɛ” lɛ ji Mɔ ni Yesu wieɔ ehe akɛ “wɔtsɛ ni yɔɔ ŋwɛi” lɛ. (Lala 83:19) Nyɔŋmɔ tsɔ “tsɛ” kɛha Israelbii lɛ kɛtsɔ jiemɔ ni ejie amɛ kɛjɛ Mizraim nyɔŋyeli kɛ agbɛnɛ kɛtsɔ kpaŋmɔ wekukpaa ni ekɛ amɛ bote mli lɛ nɔ. (5 Mose 32:6, 18; 2 Mose 4:22; Yesaia 63:16) Ŋmɛnɛ, Kristofoi ni afɔ amɛ mu lɛ yɛ suɔmɔ kɛ bulɛ kɛha Yehowa akɛ amɛ-Tsɛ. (Romabii 8:15) Ni amɛhefatalɔi ni yɔɔ shikpɔŋ nɔ hiɛnɔkamɔ lɛ hu sɔleɔ amɛhaa Yehowa Nyɔŋmɔ akɛ amɛ-Tsɛ.—Yohane 10:16; Kpojiemɔ 7:1-9.
Shi mɛni hewɔ esa akɛ asɔle ni Nyɔŋmɔ gbɛi lɛ he atse? Ojogbaŋŋ, kɛjɛ be mli ni klɛŋklɛŋ adesai enyɔ lɛ tse atua yɛ Eden trom lɛ mli kɛbaa nɛɛ, akɛ ahorabɔɔ eba gbɛi krɔŋkrɔŋ lɛ nɔ. Yehowa baajie ahorabɔɔ fɛɛ ni akɛba enaanɔ gbɛi lɛ nɔ lɛ kɛya, yɛ sɔlemɔ ni tamɔ nɛkɛ lɛ hetoo-hamɔ mli. (Lala 135:13) Ebaafee enɛ kɛtsɔ yiwalɛ ni eeejie kɛaajɛ shikpɔŋ lɛ nɔ lɛ nɔ. Nyɔŋmɔ wie kɛtsɔ gbalɔ Ezekiel nɔ yɛ nakai be lɛ he akɛ: “Ni mafee mihe agbo, ni mafee mihe krɔŋkrɔŋ, ni maha ale mi yɛ jeŋmaji pii ahiɛ, ni amɛaana amɛle akɛ miji Yehowa lɛ.”—Ezekiel 38:23.
Yehowa Nyɔŋmɔ yɛ krɔŋkrɔŋ ni ehe tse. No hewɔ lɛ esa akɛ atse egbɛi lɛ he, loo atuu ama afa akɛ nɔ ko ni yɔɔ krɔŋkrɔŋ. Ebaafee ekrɔŋkrɔŋ-feemɔ lɛ he nɔkwɛmɔ nɔ kɛtsɔ nii ni ebaatsu ni ekɛtsuu ehe yɛ bɔɔnii fee hiɛ lɛ nɔ. (Ezekiel 36:23) Esa akɛ mɛi ni taoɔ ehiɛ duromɔ kɛ naanɔ wala lɛ kɛ bulɛ kɛ gbeyeishemɔ aha Yehowa ni amɛtse egbɛi lɛ he kɛtsɔ hiɛmɔ ni amɛaahiɛ enɛ akɛ nɔ ko ni yɔɔ sɔrɔto ni nɔ kwɔ fe ekrokomɛi fɛɛ lɛ nɔ. (3 Mose 22:32; Yesaia 8:13; 29:23) No hewɔ lɛ, Yesu kɛɛ esɛɛnyiɛlɔi lɛ ni amɛsɔle akɛ: “Ha ogbɛi lɛ he atse” loo “ahiɛ mli akɛ nɔ ko ni he tse; abu lɛ nɔ krɔŋkrɔŋ.” Wɔbaanyɛ wɔna nɔmimaa akɛ Nyɔŋmɔ baaha Yesu sɔlemɔ nɔkwɛmɔ nɔ lɛ fa nɛɛ hetoo.
“Ha Omaŋtsɛyeli lɛ Aba”
Yesu kɛɛ esɛɛnyiɛlɔi lɛ ni amɛsɔle hu akɛ: “Ha omaŋtsɛyeli lɛ aba.” Abaaha sɔlemɔi akɛ Nyɔŋmɔ Maŋtsɛyeli lɛ aba lɛ hetoo kɛ̃. Maŋtsɛyeli lɛ ji Yehowa jeŋ muu fɛɛ nɔyeli ni ajieɔ lɛ kpo kɛtsɔɔ ŋwɛi Mesia nɔyeli ni yɔɔ e-Bi, Yesu Kristo, kɛ ehefatalɔi “mɛi krɔŋkrɔŋi lɛ” adɛŋ lɛ nɔ lɛ. (Daniel 7:13, 14, 18, 22, 27; Yesaia 9:6, 7) Yehowa Odasefoi ejɛ jeeŋmɔ beebe amɛtsɔɔ kɛjɛ Ŋmalɛi lɛ amli akɛ awo Yesu akɛ ŋwɛi Maŋtsɛ yɛ afi 1914. Belɛ mɛni hewɔ esa akɛ mɔ ko asɔle ni Maŋtsɛyeli lɛ “aba”?
Sɔlemɔ akɛ Maŋtsɛyeli lɛ aba lɛ tsɔɔ diɛŋtsɛ akɛ aabi ni ebate shi ewo mɛi fɛɛ ni teɔ shi woɔ ŋwɛi nɔyeli yɛ shikpɔŋ nɔ lɛ. Etsɛŋ ni “[Nyɔŋmɔ] Maŋtsɛyeli nɛɛ . . . eeejwara [shikpɔŋ nɔ] maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ, eeedamɔ shi kɛaatee naanɔ.” (Daniel 2:44) Nifeemɔ ni tamɔ nɛkɛ baaha Yehowa gbɛi krɔŋkrɔŋ lɛ he atse.
“Ha Afee Osuɔmɔnaa Nii”
Yesu tee nɔ efa ekaselɔi lɛ ni amɛsɔle akɛ: “Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.” Enɛ ji nibimɔ akɛ Yehowa afee nii ni eha esuɔmɔnaa nii kɛha shikpɔŋ lɛ akpa gbee. Etamɔ lalatsɛ lɛ sanejajemɔ lɛ pɛpɛɛpɛ: “Nɔ fɛɛ nɔ ni sa Yehowa hiɛ lɛ, no efeɔ yɛ ŋwɛi kɛ shikpɔŋ lɛ nɔ, yɛ ŋshɔi kɛ bui ni kwɔlɔ lɛ fɛɛ mli. Mɔ ni haa afuai teɔ shi kɛjɛɔ shikpɔŋ lɛ naagbee he lɛ, efeɔ sarawai efataa nugbɔnɛmɔ he, efaa kɔɔyɔɔ kpo kɛjɛɔ etoohei lɛ; mɔ ni tswia Mizraim kromɔbii lɛ nii kɛjɛ gbɔmɔ nɔ kɛyashi shia kooloo nɔ lɛ; etsu okadii kɛ naakpɛɛ nii kɛba bo, Mizraim, oteŋ, kɛba Farao kɛ etsuji lɛ fɛɛ nɔ; mɔ ni tswia jeŋmaji pii anii, ni egbe maŋtsɛmɛi agboi lɛ.”—Lala 135:6-10.
Ni aaasɔle akɛ afee Yehowa suɔmɔnaa nii yɛ shikpɔŋ nɔ lɛ ji nibimɔ akɛ etsu eyiŋtoi ni kɔɔ jeŋ kutruku nɛɛ he lɛ he nii. Nɔ ni fata enɛ he ji mɛi ni teɔ shi woɔ lɛ lɛ ni eeejie amɛ kɛya kwraa, taakɛ ejie amɛ kɛtee yɛ gbɛ bibioo nɔ yɛ blema bei, lɛ amli lɛ. (Lala 83:10-19; Kpojiemɔ 19:19-21) Abaaha sɔlemɔi akɛ afee Yehowa suɔmɔnaa nii yɛ shikpɔŋ muu lɛ fɛɛ nɔ kɛ jeŋ muu fɛɛ lɛ hetoo kɛ̃.
Beni Maŋtsɛyeli lɛ Yeɔ Nɔ Lɛ
Mɛni abaanyɛ akpa gbɛ, beni Nyɔŋmɔ Maŋtsɛyeli lɛ yeɔ nɔ, ni afee ŋwɛi suɔmɔnaa nii lɛ yɛ shikpɔŋ nɔ taakɛ afeɔ yɛ ŋwɛi lɛ, fe efɔŋfeemɔ ni egbɛ eshwa adesai aweku lɛ mli fɛɛ bianɛ lɛ? Taakɛ bɔfo Petro tsɔɔ lɛ, “yɛ [Nyɔŋmɔ] eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) “Ŋwɛi hee” lɛ ji mumɔŋ nɔyeli hewalɛi ni ja—Yesu Kristo kɛ ehefatalɔi niyelɔi 144,000 yɛ ŋwɛi Maŋtsɛyeli lɛ mli lɛ. (Romabii 8:16, 17; Kpojiemɔ 14:1-5; 20:4-6) “Shikpɔŋ hee” lɛ jeee shikpɔŋ kutruku kroko. Shi moŋ eji adesai ni ja ni hiɔ shikpɔŋ lɛ nɔ.—Okɛto Lala 96:1 he.
Abaatsake shikpɔŋ lɛ afee lɛ jeŋ muu fɛɛ paradeiso yɛ Maŋtsɛyeli nɔyeli lɛ shishi. (Luka 23:43) Kɛkɛ lɛ adesai toibolɔi fɛɛ baana anɔkwa toiŋjɔlɛ kɛ shweremɔ mli ŋɔɔmɔ. (Lala 72:1-15; Kpojiemɔ 21:1-5) Obaanyɛ ofata nakai gbɔmɛi babaoo ni yɔɔ miishɛɛ lɛ ahe kɛ oji Mesia nɔyeli ni yeɔ adesai ni feɔ toiboo yɛ shikpɔŋ nɔ lɛ anɔ lɛ sɛɛfilɔ anɔkwafo. Mɛi ni fiɔ nɔyeli ni tamɔ nɛkɛ sɛɛ lɛ kɛ hiɛdɔɔ sɔleɔ kɛhaa Yehowa gbɛi lɛ hetsemɔ, koni e-Maŋtsɛyeli lɛ aba, koni afee esuɔmɔnaa nii. Abaaha amɛtsuiŋ sɔlemɔi lɛ ahetoo kɛ̃.