“Okɛ Mi Aaahi Paradeiso”
BENI etsotsoro sɛŋmɔtso nɔ, ni egboɔ yɛ piŋmɔ mli lɛ, efɔŋfeelɔ lɛ kpa nuu ni tsotsoro emasɛi lɛ fai akɛ: “Yesu, kaimɔ mi, beni ooobote omaŋtsɛyeli lɛ mli.” Eyɛ mli akɛ Yesu hu miigbo yɛ piŋmɔ ni naa wa mli moŋ, shi eha hetoo akɛ: “Lɛɛlɛŋ miikɛɛo ŋmɛnɛ akɛ, Okɛ mi aaahi Paradeiso.” (Luka 23:42, 43, NW) Mɛɛ hiɛnɔkamɔ ni haa mɔ naa miishɛɛ po akɛhaa nuu ni gboɔ lɛ nɛkɛ!
Shi ani okadi akɛ, New World Translation—ni atsɛ emli wiemɔ kɛjɛ kuku ni tsɔ hiɛ lɛ mli lɛ—kɛ niŋmaa mli kadimɔ nii baa wiemɔ “ŋmɛnɛ akɛ” lɛ sɛɛ kɛ eeŋmala nɛkɛ Yesu wiemɔi nɛɛ? Enɛ kɛ jwɛŋmɔ lɛ baa akɛ, yɛ gbi ni lɛ diɛŋtsɛ egbo lɛ nɔ po lɛ, Yesu nyɛ ekɛ Paradeiso mli shihilɛ he shiwoo ha nakai efɔŋfeelɔ lɛ. Shi yɛ gbɛ kroko nɔ lɛ, The New English Bible kɛ Ga Biblia lɛ kɛ kadimɔ nii lɛ woɔ Yesu wiemɔi lɛ amli yɛ nɛkɛ gbɛ nɔ: “Miikɛɛo akɛ: ŋmɛnɛ okɛ mi aaahi Paradeiso.” Shishitsɔɔmɔi krokomɛi pii kɛ The New English Bible kɛ Ga Biblia lɛ kpaa gbee, ni jwɛŋmɔ ni ekɛbaa ji akɛ, Yesu kɛ efɔŋfeelɔi ni gboɔ lɛ miiya Paradeiso nakai gbi lɛ nɔ nɔŋŋ. Mɛni hewɔ sɔrɔtofeemɔ yɔɔ mli lɛ? Ni mɛɛ niŋmaa kadimɔ nii ji nɔ ni ja?
Yɛ anɔkwale mli lɛ, niŋmaa kadimɔ nii bɛ shishijee Hela Biblia ni akɛ niji ŋmala lɛ mli. No hewɔ lɛ, beni akɛ niŋmaa kadimɔ nii bawo niŋmaa mli lɛ, ehe bahia ni mɛi ni kwɛɔ Biblia lɛ nɔ amɛŋmalaa ekomɛi lɛ kɛ shishitsɔɔlɔi lɛ kɛ enɛ awo mli yɛ bɔ ni amɛnuɔ Biblia mli anɔkwale lɛ shishi amɛhaa lɛ naa. No hewɔ lɛ, ani bɔ ni akɛwo mli kɛjɛ shishijee nɛɛ ja lo? Ani Yesu kɛ efɔŋfeelɔ lɛ tee Paradeiso gbi nɔ ni amɛgboi lɛ?
Dabi, taakɛ Biblia lɛ tsɔɔ lɛ, amɛtee he ko ni atsɛɔ lɛ yɛ Hela wiemɔ mli akɛ Ha’des kɛ Hebri wiemɔ mli hu akɛ She’ol, ni enyɔ lɛ fɛɛ tsɔɔ adesai akwamaŋ gbonyobu. (Luka 18:31-33; 24:46; Bɔfoi lɛ Asaji 2:31) Biblia lɛ wieɔ mɛi ni yɔɔ nɛkɛ he nɛɛ ahe akɛ: “Gbohii lɛ, amɛleee nɔ ko nɔ ko . . . Nitsumɔ loo yiŋshwiemɔ loo nilee loo ŋaa ko bɛ gbohiiaje [She‘ol, Hela, Ha’des], he ni oyaa lɛ.” Enyɛŋ efee paradeiso kɔkɔɔkɔ! —Jajelɔ 9:5, 10.
Gbii etɛ sɛɛ dani atee Yesu shi kɛjɛ Hades. Kɛkɛ ni ekɛ aaafee otsii ekpaa jie ehe kpo shii abɔ etsɔɔ esɛɛnyiɛlɔi lɛ yɛ Palestina shikpɔŋ lɛ nɔ. Yesu kɛɛ Maria yɛ nakai gbii lɛ eko mli akɛ: “Minako maya ŋwɛi yɛ mitsɛ ŋɔɔ.” (Yohane 20:17) No hewɔ lɛ, eshɛko he ko ni eeenyɛ etsɛ lɛ paradeiso, yɛ nakai belɛ mli po.—Kpojiemɔ 2:7.
Yɛ Ŋ.B. afii ohai etɛ lɛ mli—yɛ be mli ni Kristofoi atsɔɔmɔ ni akɛfutuɔ Hela jeŋ nilee lɛ yaa nɔ kɛ foi lɛ—Origen tsɛ Yesu wiemɔ ko sɛɛ akɛ: “Ŋmɛnɛ okɛ mi aaahi Nyɔŋmɔ Paradeiso lɛ mli.” Yɛ Ŋ.B. afi ohai ejwɛ lɛ mli lɛ, sɔlemɔ niŋmalɔi wie shi niŋmaa kadimɔ nii ni akɛaawo “ŋmɛnɛ” lɛ sɛɛ lɛ. Enɛ tsɔɔ akɛ blema gbɛ ni atsɔɔ nɔ akaneɔ Yesu wiemɔi nɛɛ hiɛ yinɔsane kakadaŋŋ ko. Shi etsɔɔ hu akɛ yɛ Ŋ.B. afii ohai ejwɛ lɛ mli po lɛ, mɛi komɛi kane Yesu wiemɔi lɛ yɛ gbɛ ni atsɔɔ shishi yɛ New World Translation lɛ mli lɛ naa.
Ŋmɛnɛ hu, eyɛ mli akɛ shishitsɔɔlɔi pii kɛ niŋmaa okadi woɔ Luka 23:43 mli yɛ sɔlemɔ lɛ blema saji anaa moŋ, shi mɛi komɛi hu kɛ niŋmaa okadi woɔ mli taakɛ New World Translation lɛ fee lɛ lɛ. Akɛ nɔkwɛmɔ nɔ lɛ, Yesu wiemɔi lɛ kaneɔ yɛ German shishitsɔɔmɔ ni Nilelɔ Wilhelm Michaelis fee lɛ mli akɛ: “Lɛɛlɛŋ, miima nɔ mi miihao ŋmɛnɛ po: (Gbi ko lɛ) okɛ mi fɛɛ baahi Paradeiso.”
Belɛ mɛni Yesu wiemɔi lɛ tsɔɔ kɛhaa efɔŋfeelɔ lɛ? Ekolɛ enu nɔ ni akɛɔ akɛ Yesu ji shiwoo Maŋtsɛ lɛ. Ŋwanejee ko bɛ he akɛ ele sabala “Yudafoi amaŋtsɛ lɛ” ni Pilato ha aŋma akɛtsotsoro Yesu yiteŋgbɛ lɛ. (Luka 23:35-38) Eyɛ mli akɛ jamɔ mli hiɛnyiɛlɔi lɛ kɛ kuɛŋtimɔ kpoo Yesu moŋ, shi efɔŋfeelɔ ni etsake etsui lɛ jie ehemɔkɛyeli kpo, ni ekɛɛ: “Yesu, kaimɔ mi, beni ooobote omaŋtsɛyeli lɛ mli lɛ.” Ekpaaa gbɛ akɛ ekɛ Yesu baaye maŋtsɛ, shi eesumɔ ni Yesu nɔyeli lɛ he aba sɛɛnamɔ aha lɛ. No hewɔ lɛ, Yesu hu wo shi yɛ nakai gbi ni mli wa fe fɛɛ lɛ po mli akɛ, efɔŋfeelɔ lɛ baafata ehe yɛ Paradeiso.
Mɛɛ paradeiso mli ni? Yɛ Biblia mli lɛ, shishijee Paradeiso lɛ ji Eden trom ni tamɔ abɔɔ ni wɔ klɛŋklɛŋ fɔlɔi lɛ laaje lɛ lɛ. Biblia lɛ woɔ shi akɛ akɛ nakai shikpɔŋ nɔ Paradeiso lɛ baaba ekoŋŋ yɛ Nyɔŋmɔ Maŋtsɛyeli, ni Yesu ji Maŋtsɛ yɛ mli lɛ shishi. (Lala 37:9-11; Mika 4:3, 4) No hewɔ lɛ Yesu kɛ nakai efɔŋfeelɔ lɛ kɛ mɛi krokomɛi babaoo ni amɛgboi baahi shi, beni eteeɔ amɛ shi kɛjɛɔ gbonyobu mli kɛbaa wala mli yɛ paradeiso shikpɔŋ nɔ, kɛbaa hegbɛ ni amɛaana ni amɛkɛkase Nyɔŋmɔ suɔmɔnaa nifeemɔ he nii ekoŋŋ ni amɛhi shi kɛya naanɔ lɛ.—Yohane 5:28, 29; Kpojiemɔ 20:11-13; 21:3, 4.