Ba “La Hiɛlɔi” Kpokpaa Wulu nɔ Kpee Lɛ
“NAA! duŋ ha shikpɔŋ lɛ nɔ, ni duŋ kpii ha majimaji lɛ anɔ.” (Yesaia 60:2) Kwɛ bɔ ni nakai wiemɔi lɛ ji anɔkwale ŋmɛnɛ! Ŋwanejee ko kwraa bɛ he akɛ apasa jamɔ miitsi gbɔmɛi anaa eewo duŋ shihilɛ mli koni amɛkale jamɔ ni saa Nyɔŋmɔ hiɛ. Mɛni hewɔ? Ejaakɛ Satan, ni ji nibii agbɛjianɔtoo nɛɛ nyɔŋmɔ lɛ “eshwila mɛi ni heee yeee lɛ ajwɛŋmɔi.”—2 Korintobii 4:4.
Esoro Yehowa Odasefoi kwraa yɛ mɛi ni Satan eshwila amɛ lɛ ahe. Amɛji mɛi ni abaanyɛ akɛ gbalɔ Yesaia wiemɔi nɛɛ ato amɛhe: “Shi bo lɛ Yehowa miikpɛ yɛ onɔ, ni enunyam lɛ epue yɛ onɔ.” (Yesaia 60:2) Kwɛ bɔ ni amɛdaa shi amɛhaa akɛ amɛje kpo kɛjɛ duŋ lɛ mli kɛba Nyɔŋmɔ naakpɛɛ la lɛ mli! Eji mumɔŋ la, Nyɔŋmɔ Wiemɔ lɛ mli anɔkwale ni haa jwɛŋmɔ naa nilee, ni no hewɔ lɛ mɛi ni eshwila diɛŋtsɛ po lɛ nyɛɔ amɛnaa anɔkwale lɛ.
Shi kɛlɛ, yelikɛbuamɔ he miihia. Enyɛŋ ebalɛ akɛ mɔ ko ni kaneɔ Biblia lɛ kɛkɛ ni eŋɔɔɔ ŋwɛi yelikɛbuamɔ ni akɛhaa lɛ he hegbɛ lɛ aaanyɛ ayoo la lɛ. No hewɔ ni Yehowa Nyɔŋmɔ kɛ “tsulɔ anɔkwafo kɛ nilelɔ,” ni agba yɛ ehe afɔ shi yɛ Mateo 24:45-47 lɛ ha lɛ. Ŋmɛnɛ, nakai “tsulɔ” lɛ najiaŋdamɔlɔ ji Yehowa Odasefoi a-Nɔyeli Kuu lɛ. Nɛkɛ kuu nɛɛ gbɛtsɔɔmɔ nɔ atsɔ ni ato “La Hiɛlɔi” Kpokpaa Wulu nɔ Kpee ni abaafee lɛ he gbɛjianɔ.
Kpee nɛɛ yiŋtoo ji ni eye ebua Yehowa webii fɛɛ ni amɛfee la hiɛlɔi kpakpai, yɛ Paulo wiemɔi ni yɔɔ Filipibii 2:15 lɛ kɛ nitsumɔ naa. Jɛmɛ awoɔ Kristofoi aŋaa yɛ koni amɛkpɛ tamɔ “kanei yɛ je nɛŋ.”—Mateo 5:14, 16.
Yɛ United States Amerika lɛ, “La Hiɛlɔi” Kpokpaa Wulu nɔ Kpeei ni ato gbɛjianɔ ni abaafee lɛ baaje shishi Sohaa, June 5. Leebi 10:20 mli lɛ, lala gbɛjianɔtoo lɛ baaye abua mɛi fɛɛ koni amɛsaa amɛtsui kɛ amɛjwɛŋmɔ, ni amɛfee lɛ klalo kɛha mumɔŋ gbɛjianɔtoo ni ka amɛhiɛ lɛ. Gbi fɛɛ gbi yɛ esaneyitso ni ahala, ni saneyitso kɛha Sohaa ji: “Ha Ola kɛ Onɔkwale lɛ Aba.”—Lala 43:3.
Sohaa leebi gbɛjianɔtoo lɛ baatsu wiemɔ krɛdɛɛ ni ji, “La Hiɛlɔi—Kɛha Mɛɛ Yiŋtoo?” lɛ he nii. Eka shi faŋŋ akɛ Kristofoi jeee la hiɛlɔi yɛ amɛ diɛŋtsɛ amɛ hiɛjoomɔ jwɛŋmɔ ko hewɔ. Shi moŋ, yiŋtoi ahewɔ ni Yesu Kristo, La Hiɛlɔ Nukpa lɛ ba shikpɔŋ nɔ, ni ji, ni ebaye anɔkwale lɛ he odase, ni ewo Bɔlɔ lɛ gbɛi hiɛ nyam lɛ hewɔ nɔŋŋ amɛ hu amɛsɔmɔɔ lɛ. Eja jogbaŋŋ akɛ Yesu wie lɛ diɛŋtsɛ ehe akɛ: “Gbii abɔ ni miyɔɔ je lɛ mli nɛɛ, je lɛŋ la ji mi.” (Yohane 9:5) No hewɔ lɛ, eto okadi efɔ shi eha wɔ koni wɔnyiɛ enanemaa hei lɛ asɛɛ kpaakpa. (1 Petro 2:21) Nakai klɛŋklɛŋ gbi lɛ shwane gbɛjianɔtoo lɛ baama wiemɔ kɛ Biblia mli drama ni kɔɔ Maŋtsɛ Yosia he, ni obalaŋtai baana he miishɛɛ waa diɛŋtsɛ lɛ nɔ mi.
Hɔɔ gbi lɛ yitso ji “Nyɛji Je Lɛŋ La Lɛ . . . Nyɛhaa Nyɛla Atsoa.” (Mateo 5:14, 16) Leebi gbɛjianɔtoo lɛ baatsu wiemɔi ni tsaraa nɔ ni yitso ji “Ni Oooha Ola lɛ Atso” lɛ he nii. Abaaha mɛi ni ejɔɔ amɛhe nɔ amɛha Yehowa lɛ ana hegbɛ koni amɛkɛna baptisimɔ. Shwane gbɛjianɔtoo lɛ baatsu wiemɔi ni tsaraa nɔ ni woɔ mɔ hewalɛ ni yitso ji “Ni Wɔɔha La Akpɛ Ashwie Ba ni Kristo Eba lɛ kɛ Kpojiemɔ Nɔ” lɛ he nii.
Yitso ni ahala kɛha Hɔgbaa, ni ji kpee gbi ni ji etɛ kɛ naagbee gbi lɛ ji “Nyɛyaa nɔ Nyɛnyiɛa Akɛ La Bii.” (Efesobii 5:8) Leebi gbɛjianɔtoo lɛ baatsu wiemɔi ni tsara nɔ ni yitso ji “Ni Wɔɔjwɛŋ Wɔnyɛmimɛi Ahe yɛ Kristofoi Aweku lɛ Mli” lɛ he nii, ni ebaatsu weku mli gbɛnaa nii ni wɔyɔɔ lɛ ahe nii. Abaaha wiemɔ hu ni akɛbaatsɔɔ nɔ ni wɔhe shi ni wɔɔba wɔha Nyɔŋmɔ kɛ Kristo lɛ tsɔɔ lɛ mli jogbaŋŋ.
Kpee lɛ baashɛ enaagbee kwraa yɛ Hɔgbaa shwane kɛ maŋshiɛmɔ ni yitso ji “Nyiɛmɔ Je Lɛŋ La lɛ Sɛɛ.” Abaatsu Yohane 1:1-16 lɛ hesusumɔ he nii yɛ nɛkɛ wiemɔ nɛɛ mli, ni ebaatsɔɔ nɔ hewɔ ni Biblia mli nilee he hiaa lɛ, ni ebaama nɔ mi akɛ Yesu Kristo ji je lɛŋ la lɛ. Kpee lɛ baaba naagbee kɛ ŋaawoo wiemɔi ni ekaa yɔɔ mli ni ji “Nyɛyaa Nɔ Nyɛnyiɛa yɛ La lɛ Mli.”
Tsɔɔmɔ hiɛsɔɔ ni oyɔɔ kɛha nɛkɛ mumɔŋ okpɔlɔŋmɛɛ ni Yehowa eto he gbɛjianɔ eha wɔ kɛtsɔ egbɛjianɔtoo ni anaa nɛɛ nɔ lɛ. Hii kpee lɛ shishi kɛjɛ lala ni akɛbaagbele yɛ Sohaa leebi lɛ nɔ aahu kɛyashi sɔlemɔ ni akɛbaakpa yɛ Hɔgbaa shwane lɛ nɔ tɔŋŋ. Bo wiemɔi fɛɛ ni abaaha kɛjɛ wielɔi akpoku lɛ nɔ lɛ toi jogbaŋŋ. Ŋmalamɔ otii lɛ yɛ wolo ko mli koni eye ebua bo ni ojwɛŋmɔ anyiɛ sɛɛ, ni onyɛ okɛti mli hu yɛ sɛɛ mli. Yɛ naagbee lɛ, too gbɛjianɔ hu akɛ obaana mɛi ni kɛ amɛhe haa kɛhaa kpee shishi sɔɔmɔ lɛ mli gbɛfaŋnɔ. Kɛkɛ lɛ, jeee nihemɔ mli jɔɔmɔ kɛkɛ obaana, shi moŋ jɔɔmɔ kpele ni jɛɔ nihamɔ mli baa lɛ hu eko.—Bɔfoi lɛ Asaji 20:35.