Biblia Shishitsɔɔmɔi Yɛ Afrika Wiemɔi Amli

Atsu Biblia muu lɛ fɛɛ ni atsɔɔ shishi kɛba Afrika wiemɔ mli lɛ mli nɔ ni etsɛ fe fɛɛ lɛ he nii yɛ Mizraim. Atsɛɔ amɛ Koptik shishitsɔɔmɔi lɛ, ni aheɔ ayeɔ akɛ amɛyɛ kɛjɛ Ŋ.B. afii ohai etɛ loo ejwɛ lɛ mli tɔŋŋ. Aaafee ofii ohai etɛ sɛɛ lɛ, atsɔɔ Biblia lɛ shishi kɛba Ethiopia bii awiemɔ mli.

Ehe bahia ni wiemɔi ohai abɔ ni awieɔ yɛ Ethiopia kɛ Sahara shia ŋa lɛ wuoyigbɛ ni aŋmaaa lɛ amɛ aahu kɛyashi be mli ni maŋsɛɛ sanekpakpa shiɛlɔi lɛ aaaba yɛ afii ohai 19 lɛ mli da. Ashɛ oti ko ni sa kadimɔ waa he yɛ 1857 beni Robert Moffat gbe Biblia lɛ shishitsɔɔmɔ naa yɛ Tswana wiemɔ, ni awieɔ yɛ Afrika wuoyigbɛ lɛ mli lɛ. Ekala lɛ fiofio hu yɛ nikalamɔ tsɔne ni akɛ niji tsuɔ he nii nɔ. No ji klɛŋklɛŋ Biblia muu ni akala yɛ Afrika, ni no nɔŋŋ bafee klɛŋklɛŋ shishitsɔɔmɔ muu ni je kpo yɛ Afrika wiemɔ ko ni tsutsu lɛ aŋmaaa mli. Nɔ ni yɔɔ miishɛɛ ji akɛ, Moffat kɛ Nyɔŋmɔ gbɛi Yehova tsu nii yɛ eshishitsɔɔmɔ lɛ mli. Ni yɛ nɔ ni atsɔɔ shishi yɛ 1872 mli, ni Britain kɛ Maŋsɛɛ Biblia Asafo lɛ kala lɛ, mli hu lɛ, akɛ gbɛi Yehova lɛ tsu nii yɛ wiemɔi titrii ni Yesu wie ni aŋmala yɛ Mateo 4:10 kɛ Marko 12:​29, 30 lɛ amli.

Beni shɛɔ 1990 lɛ, no mli lɛ atsɔɔ Biblia muu lɛ fɛɛ shishi kɛtee Afrika wiemɔi 119 mli, ni efai komɛi hu yɛ wiemɔi krokomɛi 434 mli kɛfata he.