Sanebimɔi Ni Jɛ Kanelɔi Adɛŋ
Ani aawie Mose he yɛ Hebribii 11:26 akɛ “Kristo,” aloo eji mɔ ni feɔ Yesu Kristo he mfoniri loo ehenɔ moŋ?
Beni bɔfo Paulo wieɔ Mose hemɔkɛyeli he lɛ, eŋma akɛ Mose “buɔ Kristo hewɔ ahorabɔɔ lɛ akɛ nii babaoo fe Mizraim jwetrii lɛ, ejaakɛ nyɔmɔwoo lɛ ekwɛɔ.” (Hebribii 11:26) Etamɔ nɔ ni Paulo miiwie Mose he akɛ “Kristo” loo mɔ ni afɔ lɛ mu lɛ kɛ shishinumɔ ko.
Mose to akadi efɔ shi kɛha Mesia ni baa lɛ yɛ shihilɛi sɔrɔtoi amli. Eyɛ mli akɛ Mose diɛŋtsɛ lɛ gbalɔ ni moŋ, shi egba gbalɔ ko ni ‘tamɔ lɛ’ ni da fe lɛ lɛ he sane efɔ shi. Yudafoi pii nu he akɛ Yesu ji “Gbalɔ lɛ,” ni esɛɛnyiɛlɔi lɛ ma enɛ nɔ mi. (5 Mose 18:15-19; Yohane 1:21; 5:46; 6:14; 7:40; Bɔfoi lɛ Asaji 3:22, 23; 7:37) Mose ji Mla kpaŋmɔ lɛ teŋdamɔlɔ hu, shi Yesu nine shɛ “osɔfoyeli ni hi fe tsutsu nɔ lɛ” nɔ, akɛ “kpaŋmɔ ni hi fe tsutsu nɔ lɛ . . . mlidamɔlɔ,” nɔ ni ji anunyam kpaŋmɔ hee lɛ. (Hebribii 8:6; 9:15; 12:24; Galatabii 3:19; 1 Timoteo 2:5) No hewɔ lɛ, abaanyɛ awie Mose he akɛ eji Mesia ni baa lɛ henɔ.
Shi, etamɔ nɔ ni enɛ jeee Hebribii 11:26 shishinumɔ diɛŋtsɛ. Nɔ ko bɛ ni tsɔɔ akɛ Mose le nibii sɔrɔtoi ni kɔɔ Mesia lɛ he lɛ fɛɛ, ni akɛ eje gbɛ ebu nɔ ni etsɔ mli yɛ Mizraim lɛ akɛ eefee eha Mesia lɛ loo akɛ E-najiaŋdamɔlɔ.
Yɛ enɛ hewɔ lɛ, mɛi komɛi esusu akɛ Paulo wiemɔi ni yɔɔ Hebribii 11:26 lɛ shishinumɔ tamɔ nɔ ni ewie akɛ Kristofoi tsɔ “Kristo amanehului” lɛ amli lɛ. (2 Korintobii 1:5) Kristofoi ni afɔ amɛ mu lɛ le akɛ Yesu Kristo ena amanehulu, ni akɛ kɛji akɛ ‘amɛkɛ lɛ na amanehulu lɛ aaawo amɛkɛ lɛ fɛɛ hiɛ nyam hu’ yɛ ŋwɛi. Shi Mose leee nɔ amanehulu ni baaba Mesia ni baa lɛ nɔ yɛ egbii lɛ amli, ni asaŋ Mose bɛ ŋwɛi hiɛnɔkamɔ hu.—Romabii 8:17; Kolosebii 1:24.
Shi, shishinumɔ ni mli ka shi faŋŋ yɛ ni kɔɔ bɔ ni Mose “buɔ Kristo hewɔ ahorabɔɔ lɛ akɛ nii babaoo” lɛ he.
Beni Paulo ŋma “Kristo” ni yɔɔ Hebribii 11:26 lɛ, ekɛ Hela wiemɔ Khri·stouʹ, ni tamɔ Hebri wiemɔ Ma·shiʹach, loo Mesia lɛ tsu nii. “Mesia” kɛ “Kristo” lɛ fɛɛ shishinumɔ ji”mɔ ni afɔ lɛ mu.” No hewɔ lɛ Paulo miiŋma bɔ ni Mose ‘buɔ mɔ ní afɔ lɛ mu lɛ ahorabɔɔ lɛ’ he sane. Ani aaanyɛ atsɛ Mose diɛŋtsɛ akɛ “mɔ ni afɔ lɛ mu”?
Hɛɛ. Yɛ Biblia bei amli lɛ, abaanyɛ ama nitsumɔ krɛdɛɛ ko ni akɛwo mɔ ko dɛŋ lɛ nɔ mi kɛtsɔ mu ni aaafɔse ashwie eyiteŋ lɛ nɔ. “Kɛkɛ ni Samuel jie mu kɛ tɔ lɛ ni efɔse eshwie [Saul] yiteŋ.” “Kɛkɛ ni Samuel wo mu kɛ koŋ lɛ, ni eŋɔ-fɔ lɛ [David] yɛ enyɛmimɛi lɛ ateŋ. Ní Yehowa mumɔ yi David nɔ kɛjɛ nɛkɛ gbi nɛɛ nɔ kɛyaa nɛɛ fɛɛ.” (1 Samuel 10:1; 16:13; akɛto 2 Mose 30:25, 30; 3 Mose 8:12; 2 Samuel 22:51; Lala 133:2 he.) Ní kɛlɛ, awieɔ mɛi komɛi tamɔ gbalɔ Elisha kɛ Siria loo Aram maŋtsɛ Hazael he akɛ “afɔ amɛ mu” eyɛ mli akɛ odaseyeli ko bɛ ni tsɔɔ akɛ afɔse mu diɛŋtsɛ ashwie amɛyiteŋ. (1 Maŋtsɛmɛi 19:15, 16; Lala 105:14, 15; Yesaia 45:1) No hewɔ lɛ, abaanyɛ “afɔ” mɔ aŋkro ko “mu” kɛtsɔ ehalamɔ loo nitsumɔ ni akɛwoɔ edɛŋ yɛ gbɛ krɛdɛɛ ko nɔ lɛ nɔ.
Yɛ shishinumɔ nɛɛ naa lɛ belɛ Mose diɛŋtsɛ ji mɔ ni Nyɔŋmɔ efɔ lɛ mu, ni Bibliai komɛi tsɔɔ shishi tamɔ “Mɔ ni Nyɔŋmɔ Efɔ Lɛ Mu” loo “Mɔ Ni Afɔ Lɛ Mu” yɛ Hebribii 11:26. Akɛ nitsumɔ wo Mose dɛŋ akɛ Yehowa najiaŋdamɔlɔ kɛ mɔ ni baanyiɛ lsrael hiɛ kɛjɛ Mizraim. (2 Mose 3:2-12, 15-17) Eyɛ mli akɛ atsɔse Mose yɛ Mizraim ninamɔ kɛ anunyam mli moŋ, shi ebu enitsumɔ ni akɛwo edɛŋ lɛ babaoo, ni ekpɛlɛ nɔ, ni etsu he nii. No hewɔ lɛ, Paulo baanyɛ aŋma akɛ Mose “buɔ Kristo hewɔ ahorabɔɔ lɛ akɛ nii babaoo fe Mizraim jwetrii lɛ.”