“Ojekoo! Ani Ole Nyɔŋmɔ Gbɛi?”

YEHOWA Odasefoi anitsumɔ he nine ni yɔɔ Brazil lɛ nine shɛ wolo ni nyiɛ sɛɛ nɛɛ nɔ kɛjɛ gbekɛbii yei haaji ni amɛye afii 12, ni amɛyɔɔ Fortaleza maŋtiase lɛ mli lɛ adɛŋ:

“Beni wɔshɛ sɛii enumɔ nɔ yɛ afi 1990 mli lɛ, wɔ skul lɛ to jeŋ nilee, ninenaa nitsumɔi, kɛ shwɛmɔ nifeemɔ-kɛ-tsɔɔmɔ he gbɛjianɔ. Wɔgbala mli wɔtsɔɔ wɔtsɔɔlɔ lɛ akɛ wɔmiisumɔ ni wɔnɔ̃ lɛ afee sɔrɔto yɛ nɔ ni nikaselɔi krokomɛi toɔ gbɛjianɔ ni amɛkɛsaa amɛhe lɛ he. Akɛni enu ni wɔmiiwie Yehowa kɛ Biblia lɛ he pɛŋ hewɔ lɛ, ewo wɔ ŋaa akɛ: ‘No lɛ nyɛbaanyɛ nyɛŋma nɔ ko yɛ nyɛ-Nyɔŋmɔ lɛ he!’

“Wɔna enɛ akɛ hegbɛ ni wɔɔtsɔ nɔ wɔkɛye odase, hewɔ lɛ wɔkpɛ wɔyiŋ akɛ wɔkɛ Biblia he wolo ko ni wieɔ Yehowa gbɛi lɛ he baato nii ni wɔkɛbaatsɔɔ lɛ he gbɛjianɔ. Wɔŋmala wiemɔi ni yɔɔ Lala 83:19 lɛ agboi, ni wɔkɛkpɛtɛ Biblia ní agbele mli he mfoniri ko nɔ. Agbɛnɛ hu, wɔkɛ Biblia shishitsɔɔmɔi sɔrɔtoi ni gbɛi Yehowa lɛ yɔɔ mli shwie okpɔlɔ lɛ nɔ. Ni wɔkɛ Biblia he woji sɔrɔtoi babaoo hu shwie nakai okpɔlɔ lɛ nɔŋŋ nɔ. Wɔkɛ VCR kɛ TV ma okpɔlɔ lɛ naabu gbɛ, koni wɔkɛ he ni akɛ gbɛi Yehowa lɛ tsu nii yɛ, yɛ sini ko ni ale waa mli lɛ he nɔkwɛmɔ kome atsɔɔ mɛi ni bakwɛɔ wɔnibii lɛ.

“Beni akɛ nibii nɛɛ tsɔɔ lɛ, kɛ mɔ ko ba wɔ okpɔlɔ lɛ he lɛ, wɔkɛɔ lɛ akɛ: ‘Ojekoo! Ani ole Nyɔŋmɔ gbɛi?’ Be mli ni wɔha nikwɛlɔ lɛ hegbɛ koni ewie sɛɛ lɛ, wɔtsaa nɔ akɛ: ‘Kwɛmɔ biɛ! Biblia shishitsɔɔmɔi pii tsɔɔ akɛ egbɛi ji Yehowa,’ belɛ wɔkɛ wɔwao miitsɔɔ gbɛi lɛ yɛ Biblia sɔrɔtoi amli, tamɔ João Ferreira de Almeida nɔ̃ lɛ, The Jerusalem Bible, kɛ New World Translation lɛ nɛkɛ. Kɛkɛ lɛ wɔjie he ni sini lɛ mli nifeemɔ oti fe fɛɛ lɛ maa nɔ mi yɛ akɛ Nyɔŋmɔ gbɛi ji Yehowa lɛ wɔtsɔɔ lɛ. Kɛ́ mɛi lɛ jie miishɛɛ kpo lɛ, wɔhaa amɛ wolo tɛtrɛɛ loo dɛhiɛmɔ wolo ni saji babaoo yɔɔ mli.

“Obalaŋtai ni ba wɔ okpɔlɔ lɛ he lɛ ateŋ mɔ kome bi Questions Young People Ask​—Answers That Work wolo lɛ shi. Wɔtsɔɔlɔ lɛ kwɛ Making Your Family Life Happy wolo lɛ mli ni ekɛ miishɛɛ wie akɛ: ‘Kwɛmɔ! Wolo nɛɛ kanemɔ baaŋɔɔ waa!’ Beni agbeɔ nifeemɔ-kɛ-tsɔɔmɔ lɛ naa lɛ, no mli lɛ wɔha woji 7, dɛhiɛmɔ woji 18, kɛ woji tɛtrɛbii 67. Akɛ gbɛhe ni ji etɛ jwere wɔ yɛ nifeemɔ lɛ mli. Shi nɔ ni fe fɛɛ lɛ, eŋɔɔ wɔnaa waa akɛ wɔna hegbɛ ni wɔkɛha ale gbɛi krɔŋkrɔŋ, ni ji Yehowa lɛ.”