Saji ni Jɛ Shiwoo Shikpɔŋ lɛ Nɔ

Nyɛnyaa! Bui lɛ Miiho kɛ Mu

GBALƆ Yoel ‘wo Zionbii lɛ hewalɛ ni amɛmli afili amɛ ni amɛnya yɛ Yehowa mli.’ Ekɛ mu tso tsu nii ni ekɛtsɔɔ amɛmiishɛɛ kɛ amɛ ninamɔ lɛ mli akɛ: “Ni ŋmaagbeemɔ hei lɛ aaayimɔ obɔbɔ kɛ ŋmaa, ni bui lɛ aaaho kɛ wein kɛ mu.”​—Yoel 2:​23, 24.

Eji ohi lsrael yɛ Biblia bei amli kulɛ, ebaaŋɔɔ onaa waa akɛ oooná mu tso, tamɔ nɔ ni yɔɔ yiteŋgbɛ lɛ eko yɛ oshia lɛ masɛi nɔŋŋ, aloo yɛ oŋmɔ mli.a Kulɛ ebaaha oshihilɛ afee mlɛo kwraa, ni ebaafee miishɛɛ waa hu. Mɛni hewɔ mu tso he hiaa waa nakai lɛ?​—Okɛto Kojolɔi 9:​8, 9 he.

Klɛŋklɛŋ lɛ, jee gbɛ okwɛ otso lɛ jogbaŋŋ. Mu tsei nyɛɔ amɛhiɔ shi afii ohai abɔ, ekomɛi po yeɔ fe afii akpe, no hewɔ lɛ, kɛ okwɛ tso lɛ, obaana akɛ ehe efee kpɔikpɔi, ni esu tamɔ lamlu. Ekolɛ otso lɛ kwɔlɛ aaafee ninetalɔi 20, shi eka shi faŋŋ akɛ ekwɔɔɔ tamɔ tseneduru tso, ni efɛo hu tamɔɔɔ tɛŋ nɔ. Enɔ baai ni yɔɔ eŋmɔŋ be fɛɛ be, kɛ ehiɛ ni kpɛlɛɔ fɛfɛo lɛ haa hɔ̃lɔ̃ afi muu lɛ fɛɛ. Ni kɛlɛ, jeee bɔ ni otso lɛ yɔɔ fɛo ha aloo hɔ̃lɔ̃ ni ehaa lɛ hewɔ titri ni obaabu lɛ akɛ ejara wa waa kɛha bo lɛ. Eka shi faŋŋ akɛ jeee no hewɔ kwraa.

Eyibii lɛ ji nɔ ni jara wa waa, nakai mu yibii akpei abɔ ni hiɛ baa ŋmɔŋ su loo amɛdiɔ̃ lɛ! No ji nɔ ni baaha mu tso lɛ afee nɔ titri ko yɛ gbɔmɛi lɛ ashihilɛ kɛ amɛnifeemɔ mli yɛ lsrael. Tso lɛ nɔ yiɔ obɔ kɛ fɔfɔii ni etsuuu tsɔ̃ yɛ May mli, kɛsaa ehe kɛhaa mu yibii lɛ woo. (Hiob 15:33) Beni yibii lɛ saa lɛ, belɛ amɛsu lɛ miitsake kɛmiijɛ eŋɔli kɛmiitsɔ asara su loo ediŋ.

Mu yibii lɛ kpamɔ yɛ October kɛ November mli lɛ ji nitsumɔ ni wa. Okɛ tsei baatswia mu tso lɛ diɛŋtsɛ koni mu yibii ni etsu lɛ atserɛ ashwie mamai ni akɛha tso lɛ shishi lɛ anɔ. (5 Mose 24:20) Abaafɔ́ mu yibii lɛ ahe dani abaabɔi he nitsumɔ, tamɔ ekolɛ ekɛ ŋoo nu mli woo nɛkɛ, koni ejie joomɔ ni yɔɔ mli lɛ kɛjɛ mli. No sɛɛ lɛ mɛni abaafee?

Edamɔ bɔ ni otaoɔ ni eŋɔɔ onaa eha, loo sɛɛnamɔ ni otaoɔ ona kɛjɛ onikpamɔ lɛ mli lɛ nɔ. Obaanyɛ oye mu yibii lɛ eŋmɔŋ, aloo obaanyɛ owo lɛ ŋoo ni okɛbaa yi koni oweku lɛ ana mu yibii ni ŋɔɔ nyɔji babaoo. Mu baanyɛ afee niyenii lɛ fã titri ko, niyenii ni ekolɛ akɛ mu ni jeɔ ŋma waa fee, kɛ akoko ni akɛshã akpaanɔɔ afata he.

Shi kɛlɛ, ekolɛ obaaha mu yibii lɛ saŋŋ atsɔmɔ gbɛi sɔrɔtoi ni he hiaa lɛ fɛɛ mli koni onine ashɛ emli nii ni he yɔɔ sɛɛnamɔ waa, ni ejara wa hu lɛ nɔ​—mu. Obaanyɛ ona mui sɔrɔtoi, ni okɛbaatsu nii yɛ gbɛi babaoo nɔ. Klɛŋklɛŋ lɛ, obaanyɛ otswia aloo oshimɔ mu yibii ni etsu lɛ anɔ blɛoo yɛ nishimɔ tso mli, aloo obaanyɛ okɛ onaji po anaanaa nɔ. (Mika 6:15) No haa mu ni yɔɔ fɛo fe fɛɛ) ní amrɔ nɛɛ atsɛɔ lɛ extra-virgin lɛ, ni ehi jogbaŋŋ kɛha kanei ni kpɛɔ yɛ kpeebuu lɛ mli lɛ suu. (2 Mose 25:​37; 27:​20, 21) Feemɔ bɔ ni obaana mu kpakpa ni yɔɔ fɛo fe fɛɛ nɛɛ he miishɛɛ kɛha nihoomɔ yɛ bei krɛdɛɛi komɛi amli lɛ he mfoniri okwɛ!

Kɛ mu yibii lɛ jeee ekpakpa po lɛ, abaanyɛ akɛwo tsɔne mli ni aŋa mu babaoo kɛjɛ eheloo loo totoi ni yɔɔ wui lɛ ahe lɛ mli, eyɛ mli akɛ mu lɛ efeŋ fɛo tsɔ. Wui lɛ ahe totoi lɛ feɔ mu lɛ fã kpotoo. Anyɛɔ akɛ tsɔnei ni akɛŋaa mu lɛ sɔrɔtoi tsuɔ nii, shi áfee ekome he mfoniri yɛ biɛ. Akɛ mu yibii ni ajwarako loo nɔ ni ajwara mli fioo lɛ woɔ shishigbɛ ni tamɔ tsɛŋsi lɛ mli. Wiɛ tɛ, ni teji loo gbɔmɔ tsɔmɔɔ lɛ nyiɛɔ yibii lɛ anɔ ni ejwaraa amɛ, ni ejieɔ mu lɛ kɛjɛɔ mli, ni ehoɔ ni asɔoɔ awoɔ gbɛ mli.​—Mateo 18:⁠6.

Abaanyɛ akɛ mu ato shika tsuru ni esere he​—abuɔ lɛ waa diɛŋtsɛ ni akɛtsuɔ nii yɛ gbɛi babaoo nɔ. Tso kome baanyɛ aha mu ni baashɛ afi muu fɛɛ nihoomɔ kɛha weku ni mɛi enumɔ loo ekpaa yɔɔ mli. No baafee amɛniyenii lɛ fa titri ko, ejaakɛ eniyenii gbɛlɛmɔ waaa yɛ musuŋ, ni hewalɛ yɛ mli waa hu. (Okɛto Yeremia 41:8; Ezekiel 16:13 he.) Obaanyɛ okɛ anuatrɛ awo mu lɛ eko mli ni okɛfee hesaamɔ nii, aloo ofɔse eko oshwie gbɔ yiteŋ akɛ gbɔfeemɔ he okadi. (2 Samuel 12:​20; Lala 45:8; Luka 7:46) Obaanyɛ okɛtsu nii hu akɛ tsofa ni jɔɔ hewaa he, ni okɛto fala nɔ.​—Yesaia 1:6; Marko 6:​13; Luka 10:⁠34.

Jeee enɛɛmɛi ji gbɛi anɔ pɛ ni obaanyɛ okɛ mu babaoo ni ona lɛ atsu nii yɛ. Obaanyɛ okɛsũ kane yɛ oshia, ni okɛfee afɔleshaa ni okɛhaa Nyɔŋmɔ lɛ fã, aloo okɛfee jarayeli nii ni sɛɛnamɔ yɔɔ he. Hɛɛ, mu tso ji tso ni jara wa waa fe fɛɛ yɛ Biblia bei amli, no hewɔ lɛ Yoel baanyɛ ekɛtsu nii yɛ gbɛ ni ja nɔ ni ekɛfee ninamɔ kɛ miishɛɛnamɔ he mfoniri.​—5 Mose 6:​11; Lala 52:​10; Yeremia 11:​16; Mateo 25:​3-8.

[Shishigbɛ niŋmai]

[He ni Mfoniri ni yɔɔ baafa 24 lɛ Jɛ]

Pictorial Archive (Near Eastern History) Est.