Maŋtsɛyeli Jajelɔi Bɔ Amaniɛ
Anɔkwayeli Jieɔ Wɔ Sɔɔmɔ Nitsumɔ lɛ Yi
ANƆKWAYELI ji shishijee taomɔ nii kɛha Kristofoi. Bɔfo Paulo ŋma yɛ Hebribii 13:18 akɛ: “Wɔhiɛ ka nɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli.” Anɔkwayeli ni wɔkɛaatsu nii lɛ ‘wulaa Nyɔŋmɔ ni ji wɔ-Yiwalaherelɔ lɛ tsɔɔmɔ lɛ yɛ nibii fɛɛ mli.’ (Tito 2:10) Kristofoi enyɔ komɛi ni yɔɔ Pasifik Wuoyigbɛ maŋtsɛyeli ni ji Tonga lɛ mli lɛ anɔkwayeli, kɛ agbɛnɛ Maŋtsɛyeli shiɛmɔ nitsumɔ lɛ kɛ odaseyeli ni mli wa waa miiha. Buu Mɔɔ Asafo lɛ nitsumɔ he nine ni yɔɔ Western Samoa lɛ gba akɛ:
“Gbalashihilɛ mli hefatalɔi komɛi kɛ afii babaoo wie Nyɔŋmɔ Maŋtsɛyeli lɛ he amɛtsɔɔ gbɔmɛi ni yɔɔ amɛ ŋshɔkpɔ lɛ nɔ akrowai ejwɛ lɛ amli lɛ, shi nɔ ko jɛɛɛ mli baaa yɛ faŋŋ mli. Kɛkɛ ni beni yoo lɛ wu he yeɔ Iɛ, ebabi ni ŋa lɛ akwɛ ŋmɔ agbo ni amɛyɔɔ lɛ, ni etse akokooshi gbiŋ, ni no pɛ nɔ amɛtsɔɔ amɛnaa shika lɛ, ni eka. Beni be shɛ ni ebalɛ akɛ mɛi ni baheɔ lɛ ba koni amɛkwɛ bɔ ni akokooshi gbiŋ lɛ yɔɔ lɛ, amɛna akɛ mɔ kroko baagi ebafutu ebaagii enumɔ lɛ mli. Akrowa lɛ mli bii lɛ wo lɛ hewalɛ ni ewo baagi kome lɛ efata enɔ lɛ he, ni ebu lɛ akɛ eji Nyɔŋmɔ jɔɔmɔ. Shi, nyɛmiyoo lɛ ekpɛlɛɛɛ nɔ, ni beni awo lɛ baagii ekpaa naa nyɔmɔ lɛ, ekpɛlɛɛɛ nɔ, shi nɔ ni ji enɔ lɛ pɛ naa shika ehe. Akadi anɔkwayeli ni ejie lɛ kpo lɛ waa.
“Yɛ sɛɛ mli, beni ehe bahia ni ewu afa gbɛ kɛya ŋshɔkpɔ kroko nɔ lɛ, shwapotsɛ lɛ bi lɛ ni ehe nibii komɛi ebaha lɛ. Odasefonyo lɛ fee bɔ ni etaoɔ lɛ, ni ekɛ sɛɛdaimɔ ni shwɛ lɛ ku sɛɛ kɛbaha nuu lɛ. Nuu lɛ naa kpɛ ehe. Ekɛɛ no ji klɛŋklɛŋ kwraa ni mɔ ko kɛ sɛɛdaimɔ eku sɛɛ ekɛbaha lɛ. Mɛi krokomɛi ni ekɛɔ amɛ ni amɛheɔ nii amɛbahaa lɛ lɛ kɔɔ sɛɛdaimɔ lɛ. Be kroko hu ni Odasefonyo lɛ miitao nɔ ko yɛ nuu nɛɛ shwapo mli lɛ, nuu lɛ kɛ shwapo lɛ naa samfele ha Iɛ, ni ekɛɛ lɛ akɛ eyakɔ nɔ ni he hiaa lɛ lɛ ni eshi shika lɛ yɛ shwapo lɛ mli. Mɛi krokomɛi ni yɔɔ jɛmɛ lɛ bi shwapotsɛ lɛ nɔ hewɔ ni ekɛ samfele lɛ ha Odasefonyo lɛ, shi ekɛhaaa amɛ lɛ. Shwapotsɛ lɛ tsɔɔ mli akɛ Odasefonyo lɛ pɛ ji mɔ ni ebaanyɛ ehe lɛ eye yɛ akrowa lɛ mli bii fɛɛ ateŋ.
“Awieɔ gbalashihilɛ mli hefatalɔi nɛɛ asubaŋ kpakpa lɛ he yɛ akrowa lɛ mli bii lɛ ateŋ. Ale Odasefoi lɛ waa yɛ amɛ anɔkwayeli, amɛhe ni amɛkɛwooo maŋkwramɔ saji amli, kɛ Nyɔŋmɔ Maŋtsɛyeli lɛ he odase ni amɛyeɔ, ni tsɔɔ sɔrɔto-feemɔ ni yɔɔ akrowa lɛ mli bii ahemɔkɛyeli kɛ Biblia lɛ tsɔɔmɔi amli lɛ hewɔ. Agbɛnɛ kɛ sanebimɔi te shi yɛ Biblia lɛ he lɛ, bei pii lɛ, gbɔmɛi lɛ yaa Odasefoi lɛ aŋɔɔ kɛha hetooi. Wu lɛ ete shi maŋkɛ̃, etee akrowa lɛ kpee ko shishi, ni eyaha sanebimɔi ni tetee shi yɛ Biblia mli saji ahe lɛ hetoo dã. Kɛji etee yara nɔ yɛ akrowa lɛ, bei pii lɛ, amɛbiɔ lɛ ni etsɔɔ amɛ nɔ ni Biblia lɛ kɛɔ lɛ gbele he, ni amɛkpɛlɛɔ nibii ni ewieɔ etsɔɔ amɛ lɛ fɛɛ nɔ.”
No hewɔ lɛ nɛkɛ Odasefoi gbalashihilɛ mli hefatalɔi nɛɛ anɔkwayeli kɛ amɛ Maŋtsɛyeli shiɛmɔ lɛ miiye odase babaoo yɛ nɛkɛ Pasifik Wuoyigbɛ ŋshɔkpɔ fɛfɛo nɛɛ nɔ. Amɛhiɛ ka nɔ akɛ mɛi krokomɛi hu baakase Biblia lɛ ni amɛkɔ amɛshidaamɔ yɛ anɔkwale lɛ gbɛfaŋ. Kɛ amɛfee nakai lɛ, eka shi faŋŋ akɛ Yehowa Nyɔŋmɔ hu baajɔɔ amɛ.—Yohane 8:32.