Kpeei Wuji ni Yɔɔ Miishɛɛ Haa Ŋwɛi Nitsɔɔmɔ Shwereɔ
JE LƐ kɛ adafitswai sɔrɔtoi ni gbɛɔ shwaa oyayaayai lɛ miikpe ŋmɛnɛ. Atsɔɔ tɛlivishin kɛ redio, woji amli loo kompiutai anɔ akɛ nɔ fɛɛ nɔ ni yaa nɔ ni aleɔ lɛ he nilee babaoo haa. Fɛɛ sɛɛ lɛ, gbɔmɛi ahe yeɔ ni amɛgboiɔ. Awuiyeli, hɔmɔ, kɛ ohia fɛɛ yɛ shikpɔŋ nɔ he fɛɛ he, ni mɛi babaoo miina henumɔ mli naagbai fe be fɛɛ ni eho pɛŋ. Nilee sɔrɔtoi fɛɛ ni ana lɛ nyɛɛɛ ajaje saji. Mɛni hewɔ? Ejaakɛ adesai eku amɛhiɛ amɛshwie Nyɔŋmɔ nilee nɔ.
Belɛ, kwɛ bɔ ni esa jogbaŋŋ ha akɛ “Ŋwɛi Nitsɔɔmɔ” ji saneyitso ni ahala aha Yehowa Odasefoi akpeei wuji ni afee nyɛsɛɛ nɛɛ lɛ! Wiemɔi ahe gbɛjianɔ ni ato lɛ kai mɛi ni eba kpee lɛ akɛ nitsɔɔmɔ ni yɔɔ Nyɔŋmɔ Wiemɔ, ni ji Biblia lɛ mli lɛ pɛ hiɛ nɔ ko kpakpa diɛŋtsɛ ni baanyɛ ahere mɔ yiwala.
Klɛŋklɛŋ kpee lɛ je shishi Soo, June 3, yɛ Uniondale maŋ lɛ mli, New York, U.S.A. Kɛjɛ nakai beaŋ kɛyaa lɛ, aha wiemɔ lɛ yɛ maŋtiasei sɔrɔtoi amli kɛjɛ maŋ wulu kome mli kɛtee ekroko mli, kɛyashi be mli ni agbe naa yɛ Afrika kɛ South America shikpɔji wuji lɛ anɔ.
Klɛŋklɛŋ Gbi lɛ Shwane
Gbi lɛ fɛɛ eko hiɛ saneyitso ni maa ŋwɛi nitsɔɔmɔ lɛ fa ko nɔ mi. Akɛ nɔkwɛmɔ nɔ lɛ, wiemɔ ni ato he gbɛjianɔ kɛha klɛŋklɛŋ gbi lɛ damɔ saneyitso, “Nitsɔɔmɔ ni Jɛɔ Nyɔŋmɔ Dɛŋ Baa lɛ Ni Aaale” nɔ. (Yohane 7:17) Atee nɔ atsɔɔ sane ni asusuɔ he nɛɛ mli jogbaŋŋ beni gbi lɛ baa naagbee lɛ.
Beni ala ni asɔle agbe naa lɛ, kpee lɛ nɔ sɛinɔtalɔ lɛ kɛ wiemɔ ni yitso ji “Ŋwɛi Nitsɔɔmɔ Feɔ Wɔ Fɛɛ Ekome” lɛ gbele nifeemɔ lɛ naa. Etsɔɔ mli akɛ afee Yehowa webii fɛɛ ekome kɛtsɔ E-gbɛ̀i ahe nii ni akaseɔ kɛ E-tempɔŋi anɔ ni anyiɛɔ lɛ nɔ. (Mika 4:1-5) Ŋwɛi nitsɔɔmɔ lɛ waje amɛ ekomefeemɔ lɛ. Awo mɛi ni ba kpee lɛ fɛɛ hewalɛ ni amɛnyã yɛ amɛ naanyobɔɔ kɛ ekomefeemɔ lɛ mli.—Lala 133:1-3.
Yɛ shwane mli fioo lɛ, asusu asafoŋ kpeei ni afeɔ daa lɛ ahe yɛ wiemɔ ni aha kɛtsara nɔ ni hiɛ yitso akɛ “Kpeei Sɔrɔtoi ni Tsɔɔ Wɔ Yehowa Gbɛ̀i lɛ Ahe Nii” lɛ mli. Klɛŋklɛŋ wielɔ lɛ kai mɛi ni ba kpee lɛ akɛ, kɛji wɔkpe kutuu lɛ, belɛ wɔkɛ woo miiha Yehowa ni akɛ wɔnine shɛɔ E-jɔɔmɔ nɔ. Wielɔ ni nyiɛ sɛɛ lɛ ma bɔ ni ehe hiaa akɛ wɔkɛ wɔhe awo kpeei sɔrɔtoi amli lɛ nɔ mi. Yɛ nakai feemɔ mli lɛ, wɔmiijie Yehowa yi yɛ faŋŋ mli, ni wɔjieɔ wɔhemɔkɛyeli kpo, ni wɔkɛwajeɔ mɛi krokomɛi ahemɔkɛyeli. Wielɔ ni ji etɛ ni yɔɔ wiemɔ ni ahaa kɛtsaraa nɔ lɛ mli lɛ tsɔɔ bɔ ni ehe hiaa akɛ wɔkɛ nɔ ni wɔkaseɔ yɛ kpeei ashishi lɛ atsu nii. Esa akɛ wɔtsɔmɔ “wiemɔ lɛ nɔyelɔi, ni jeee wiemɔ lɛ nulɔi kɛkɛ.”—Yakobo 1:22.
No sɛɛ lɛ asusu sane ni ŋɔɔ ni kɔɔ Yehowa ni aaala ajie eyi lɛ he. Lala ni ajɛɔ tsuiŋ alaa lɛ ji wɔ jamɔ lɛ fa ko ni sa kadimɔ. Nɔ ni nyiɛ wiemɔ nɛɛ sɛɛ ji wiemɔ titri lɛ ni yitso ji, “Ŋwɛi Nitsɔɔmɔ Yeɔ Kunim.” Mɛɛ saneyitso ni sa jogbaŋŋ enɛ ji nɛkɛ! Wielɔ lɛ kɛɛ akɛ, “Yehowa ji nitsɔɔmɔ ni hi fe fɛɛ ni mɔ ko baanyɛ ana lɛ Jɛɛhe.” No sɛɛ beni ewie sane kuku ko ni kɔɔ bɔ ni adesa aŋsɔ lɛ tsuɔ nii yɛ naakpɛɛ gbɛ nɔ ehaa lɛ he egbe naa lɛ, ekɛɛ akɛ: “Esa akɛ wɔkɛ wɔjwɛŋmɔŋ nyɛmɔi lɛ atsu nii titri ni wɔkɛna ŋwɛi nitsɔɔmɔ. No pɛ haa anaa anɔkwa nilee.” Kwɛ bɔ ni eji anɔkwale ha!
Leebi ni ji Enyɔ Lɛ
Kpee lɛ nɔ gbi ni ji enyɔ lɛ nɔ saneyitso ji “Nyɛyaa nɔ Nyɛwulaa Nyɔŋmɔ ni ji Wɔyiwalaherelɔ lɛ Tsɔɔmɔ Lɛ.” (Tito 2:10) Atsɔ hiɛ asusu shishitoo mla nɛɛ he yɛ wiemɔ ni yitso ji, “Ŋwɛi Nitsɔɔmɔ Kɛ Daimonioi Atsɔɔmɔ” lɛ mli. Hɛɛ, daimonioi lɛ hu yɛ amɛtsɔɔmɔi. (1 Timoteo 4:1) Taakɛ wielɔ lɛ tsɔɔ mli lɛ, ŋwɛi nitsɔɔmɔ yeɔ Satan “nilee” lɛ nɔ kunim kɛtsɔɔ apasa tsɔɔmɔi kɛ Abonsam lakamɔ gbɛi lɛ ahe mama ni ekpaa lɛ nɔ. Yɛ enɛ hewɔ lɛ, Kristofoi komɛi ni hiɛ tsui kpakpa ni amɛyifalɛ shɛɔ 4,500,000 lɛ jeee nyɔji dɔŋŋ yɛ Satan duŋ lɛ shishi.—Yohane 8:32.
Kɛlɛ, esa akɛ wɔya nɔ wɔte shi wɔwo Satan daa. Wiemɔ ni yitso ji, “Ani Nyɛmiite Shi Kɛmiiwo Je lɛ Mumɔ Lɛ?” bama enɛ nɔ mi. Je nɛŋ mumɔ lɛ gbeɔ mɔ. Ewoɔ jeŋba shara, hegbɛ ni yeɔ nɔ lɛ hiɛ atua ni atseɔ, kɛ bɔ ni atsɔɔ hiɛkɔɔ nɔ akɛdiɔ heloonaa nibii asɛɛ lɛ he hewalɛ. Esa akɛ Kristofonyo lɛ apɛi emli ekwɛ daa. Ani eka he ehiɛ jeŋba mli tɛi ni nɔ kwɔlɔ ni kɔɔ nɔ ni ekwɛɔ, eboɔ toi, loo ekaneɔ lɛ he? Wielɔ lɛ wo hewalɛ akɛ: “Wɔmiijie nyɛyi, nyɛmimɛi hii kɛ yei, kɛ gbekɛbii fɛɛ yɛ mɔdɛŋ sɔŋŋ ni nyɛmiibɔ yɛ enɛ gbɛfaŋ lɛ hewɔ.”—1 Yohane 2:15-17.
Nɔ ko yɛ ni haa ewaa kɛhaa mɔ akɛ eeete shi ewo je lɛ mumɔ lɛ. Mɛni ji no? No ji akɛ wɔ fɛɛ wɔyeee emuu. Lɛlɛŋ, Yesu gbo yɛ wɔhe eshai ahewɔ moŋ, shi esa akɛ wɔya nɔ wɔwuu wɔshi eshafeemɔ he akɔnɔ lɛ lolo. Asusu enɛ he yɛ wiemɔ ni yitso ji, “Ni Wɔɔwuu Wɔshi Hewalɛ ni Nɔshafeemɔ Naa yɛ Heloo ni Egbee Shi lɛ nɔ Lɛ” mli. Wielɔ lɛ kɛɛ kɛfata nibii krokomɛi ahe akɛ wɔbaanyɛ wɔye ta ni wɔwuɔ wɔshiɔ esha lɛ mli kunim kɛji wɔwo gbɔmɔ hee lɛ ni wɔkpoo nɔ fɛɛ nɔ ni teeɔ wɔ akɔnɔi gbohii lɛ ashi lɛ.
Wiemɔ ni nyiɛ sɛɛ lɛ yitso ji, “Nyɛhaa Tsamɔ Tsɔɔmɔ lɛ Afea Nyɛshihilɛ Gbɛ.” Mɛi komɛi yɛ ni susuɔ amɛ gbɔmɔtsoŋ hewalɛnamɔ he waa fe nine. Shi kɛlɛ, yɛ anɔkwale mli lɛ mumɔŋ hewalɛnamɔ he miihia kwraa fe no. Wielɔ lɛ ma bɔ ni ehe hiaa ni wɔkɛ hiɛdɔɔ atere sɔ̃ ni jɛɔ enɛɛmɛi amli baa lɛ nɔ mi, ni ekɛ hewalɛwoo wiemɔ titri ko ha Kristofoi yei. Ekɛɛ akɛ: “Wɔhiɛ sɔɔ nyɛmimɛi yei onukpai kɛ nyɛmimɛi yei obalayei lɛ fɛɛ ni ŋmɛɔ pɛpɛɛpɛ jogbaŋŋ lɛ yɛ ekãa ni amɛyɔɔ yɛ sɔɔmɔ nitsumɔ lɛ mli lɛ kɛ bɔ ni amɛtsuɔ amɛgbɛnaa nii ahe nii amɛhaa lɛ jogbaŋŋ.” Hɛɛ, ni wɔ fɛɛ wɔmiida Yehowa shi yɛ tsamɔ tsɔɔmɔ ni ekɛha ni haa esoroɔ wɔ yɛ je lɛ he lɛ hewɔ.
Wiemɔ yitso ni akɛgbe leebi kpee lɛ naa ji, “Ŋwɛi Nitsɔɔmɔ Jieɔ Yiŋtoo ni Yɔɔ Shihilɛ Mli lɛ Kpo.” Wielɔ lɛ kɛɛ akɛ, “Be ko baaba ni mɔ fɛɛ mɔ aaanyɛ abi akɛ, ‘Mɛni ji yiŋtoo ni yɔɔ wala sɛɛ?’” Ekɛ naataamɔ saji ni mli wa tsɔɔ mli akɛ Biblia lɛ pɛ kɛ nakai sanebimɔ lɛ hetoo ni ja diɛŋtsɛ haa. Kɛkɛ ni wielɔ lɛ tsɔɔ mli akɛ Nyɔŋmɔ naakpɛɛ shiwoi lɛ haa wɔnaa yiŋtoo yɛ wala shihilɛ mli yɛ gbɛ ni mɔɔ shi nɔ. Ekolɛ, toibolɔi lɛ ateŋ mɛi babaoo miisusu akɛ, ‘Enɛ pɛpɛɛpɛ ji nɔ ni esa akɛ mɛi ni yɔɔ mishikpɔŋkuku lɛ mli lɛ anu.’ Nakai pɛpɛɛpɛ ji bɔ ni Nɔyeli Kuu lɛ susuɔ yɛ he. Ajie wolo hee bibioo ko, ni hiɛ yitso akɛ, Mɛni Ji Yiŋtoo ni Yɔɔ Wala Sɛɛ? lɛ kpo yɛ wiemɔ nɛɛ naagbee mli. Kwɛ bɔ ni mɔ fɛɛ mɔ mii shɛ ehe ha! Beni akpa shwane lɛ mɛi na hegbɛ amɛkwɛ wolo hee lɛ mli.
Shwane ni ji Enyɔ Lɛ
Wiemɔ ni aha klɛŋklɛŋ yɛ shwane mli lɛ hiɛ saneyitso ni shɛjeɔ mɔ mii akɛ, “Nyɛŋɔa Nyɛhaomɔi Fɛɛ Nyɛfɔa Yehowa Nɔ.” Nibii babaoo yɛ ni haoɔ wɔ moŋ; shi kɛlɛ, Nyɔŋmɔ Wiemɔ lɛ kɛɔ akɛ esa akɛ wɔshɛrɛ wɔhaomɔi fɛɛ wɔshwie enɔ. (1 Petro 5:6, 7) Lɛlɛŋ, naagbai komɛi yɛ ni baaa naagbee, ni wielɔ lɛ kɛ ŋaawoo ni nilee yɔɔ mli ni kɔɔ enɛ he nɛɛ ha akɛ: ‘Nyɛnaa tsui. Nyɛmɛa Yehowa. Nyɛhea nyɛyea kɛ nɔmimaa akɛ Biblia lɛ sɛɛnyiɛmɔ ji nɔ ni hi fe fɛɛ. Kɛ wɔŋɔ wɔtsuii wɔfɔ Yehowa nɔ lɛ, wɔbaana “Nyɔŋmɔ hejɔlɛ” ni fe jwɛŋmɔi fɛɛ lɛ mli ŋɔɔmɔ.’—Filipibii 4:6, 7.
Wiemɔi sɔrɔtoi ejwɛ ni nyiɛ sɛɛ lɛ tsɔɔ akɛ ŋwɛi nitsɔɔmɔ lɛ kɔɔ weku shihilɛ he. Klɛŋklɛŋ nɔ ni aha ni ji, “Gbalashihilɛ ni Aaaha Etsɔ Ekomefeemɔ ni Hiɔ Shi Daa” lɛ kai mɛi ni eba kpee lɛ akɛ yɛ Yehowa hiɛ lɛ gbalashihilɛ jeee gbɛjianɔtoo ni abaanyɛ ashɛ afɔ, taakɛ je lɛŋ bii pii susuɔ lɛ. Shi kɛlɛ, kɛ wɔɔye omanye yɛ gbalashihilɛ mli lɛ, belɛ esa akɛ wɔnyiɛ Yehowa gbɛtsɔɔmɔ sɛɛ. Lɛ efee wɔ. No hewɔ lɛ, anaa gbalashihilɛ mli ŋaawoo ni hi fe fɛɛ lɛ yɛ e-Wiemɔ ni jɛ mumɔŋ lɛ mli.
Wiemɔ ni yitso ji, “Nyɛtsua Nyɛ Shiabii Ayiwalaremɔ He Nii Jogbaŋŋ Kɛmɔ Shi” lɛ ha asusu kaai ni jɛɔ weku-kwɛmɔ mli baa yɛ jaramɔ bei nɛɛ amli lɛ ahe. (2 Timoteo 3:1) Fɔlɔi tsɔɔ amɛbii ni amɛhiɛ amɛhe kɛ amɛshihilɛ hei fɛɛ falefale, subaŋi kpakpai ni amɛaahiɛ, bɔ ni atsuɔ nii, kɛ bɔ ni akeɔ nii ni asusuɔ mɛi ahe. Nɔ ni fe fɛɛ lɛ, esa akɛ amɛtsɔɔ amɛbii ni amɛtsɔmɔ sɔɔlɔi ni amɛtuu amɛhe amɛha Yehowa.—Abɛi 22:6.
Yɛ sane ni nyiɛ sɛɛ ni asusuɔ he ni yitso ji, “Fɔlɔi, Ehe Miihia ni Nyɛjwɛŋ Nyɛbii Ahe Yɛ Gbɛ Titri ko Nɔ” lɛ mli lɛ, wielɔ lɛ kai mɛi ni eba kpee lɛ bɔ ni ehe hiaa ni ajie gbekɛbii ayi, yɛ be mli ni akuuu hiɛ ashwieee amɛ fatɔɔi anɔ. Esa akɛ fɔlɔi ahiɛ ahi amɛhe nɔ jogbaŋŋ yɛ subaŋi sɔrɔtoi ni anaa yɛ anɔkwa ni ayeee, heloonaa nii asɛɛdii, loo pɛsɛmkunya mli lɛ he.
Obalaŋtai ni ba kpee lɛ titri ji mɛi ni bo wiemɔ ni yitso ji “Obalaŋtai—Namɔ Tsɔɔmɔi Atoi Nyɛboɔ?” lɛ toi jogbaŋŋ. Nibii amli wa kɛha Kristofoi obalaŋtai ŋmɛnɛ. Je lɛ ni akɛ aaatsu nii kɛmɔ shi lɛ waaa moŋ, shi enɛ kɛ mɔ boteɔ gbele mli. Eyɛ mli akɛ ebiɔ ekãa yɛ obalaŋta gbɛfaŋ dani enyɛ ehala akɛ eeekpɛtɛ ŋwɛi nitsɔɔmɔ he moŋ, shi jɔɔmɔi wuji jɛɔ mli baa amrɔ nɛɛ kɛ naanɔ wala ni baajɛ mli aba wɔsɛɛ ko.—1 Timoteo 4:8.
Gbi ni ji enyɔ lɛ ba naagbee kɛ drama ni taa mɔ tsuiŋ ni yitso ji, “Obalaŋtai ni Kaiɔ Amɛbɔlɔ lɛ Ŋmɛnɛ.” Mɔ ni kwɛɔ nɔ lɛ tsɛ obalaŋtai ni yɔɔ Nyɔŋmɔ gbɛjianɔtoo lɛ mli yɛ ehiɛkpamɔ wiemɔ lɛ mli akɛ “teokrase kuu ni kɛ anɔkwayeli etuu amɛhe amɛha Yehowa Nyɔŋmɔ sɔɔmɔ kɛ eŋwɛi Maŋtsɛ, Yesu Kristo ni ehala lɛ lɛ sɔɔmɔ.” Ekɛfata he akɛ: “Eka shi faŋŋ akɛ wɔ obalaŋtai lɛ miitsu nɔ ko kpakpa he nii!” Drama lɛ fee he mfoniri akɛ kɛji fɔlɔ ko tsɔse gbekɛ jogbaŋŋ lɛ, ebaana he sɛɛ kɛ eda ni lɛ diɛŋtsɛ ejɛ esuɔmɔ mli eesɔmɔ Yehowa.
Gbi ni ji Etɛ lɛ Leebi
Gbi ni ji etɛ lɛ yitso ji, “Nyɛyaa nɔ Nyɛtsɔɔa Mɛi ni Jɛ Jeŋmaji Fɛɛ Mli lɛ Anii.” (Mateo 28:19, 20) Ŋwanejee ko bɛ he akɛ mɛi ni ba kpee lɛ miikpa gbɛ akɛ amɛaana ŋaawoo ko ni eba yɛ ebe naa pɛpɛɛpɛ yɛ shiɛmɔ nitsumɔ lɛ he, ni amɛnine enyɛɛɛ shi hu. Wiemɔ ni aha kɛtsara nɔ ni hiɛ yitso akɛ, “Ni Wɔkɛ Mlifilimɔ Aaatsu Wɔ Shiɛmɔ kɛ Nitsɔɔmɔ ni Atuu Awo Wɔdɛŋ lɛ He Nii” wo amɛ fai shi ni amɛtswa akɛ amɛaaya nɔ amɛkɛ amɛhe awo odaseyeli nitsumɔ lɛ mli lɛ mli hewalɛ. Wiemɔ ni akɛgbele kpee lɛ susu sane ni kɔɔ mɛi aŋɔɔ ni aaaya klɛŋklɛŋ kwraa lɛ he, ni wiemɔ ni ji enyɔ lɛ kɔɔ sɛɛsaramɔi ahe, ni wiemɔ ni ji etɛ lɛ kɔɔ Biblia mli nikasemɔi ahe. Afɔ nine atsɛ maŋsɛɛ sanekpakpa shiɛlɔi fɛɛ ni yɔɔ je lɛŋ he fɛɛ he lɛ ni amɛku amɛsɛɛ kɛya amɛmaji amli ni amɛkɛ amɛ wekumɛi kɛ nanemɛi ayafee kpee lɛ. Yɛ hei komɛi lɛ, maŋsɛɛ sanekpakpa shiɛlɔi, ha wiemɔ yɛ wiemɔ-hamɔ fa nɛɛ mli. Eji miishɛɛ sane akɛ aaale omanye ni amɛyeɔ yɛ amɛnitsumɔi sɔrɔtoi ni atuu awo amɛdɛŋ lɛ amli lɛ ahe nii. Wiemɔ ni nyiɛ sɛɛ ni ji, “Ni Akɛ Sanekpakpa lɛ Aaashɛ Mɔ Fɛɛ Mɔ Ŋɔɔ” lɛ susu bɔ ni trukaa odaseyeli lɛ naa mɔ nɔ hewalɛ ehaa lɛ he.
Leebi kpee lɛ ba naagbee kɛ baptisimɔ wiemɔ, ni ji nɔ ko ni sa kadimɔ yɛ Yehowa Odasefoi akpeei wuji ashishi yɛ be fɛɛ mli lɛ. Yɛ kpeei sɔrɔtoi fɛɛ ni afee lɛ ashishi lɛ, mɛi heei babaoo ni ejɔɔ amɛhe nɔ lɛ badamɔɔ asafoi babaoo ahiɛ ni amɛkɛ ekãa hereɔ sanebimɔi enyɔ ni abi amɛ lɛ hetoo akɛ, hɛɛ. Kɛkɛ lɛ abaptisi amɛ yɛ mɛi babaoo ahiɛ. Mɛɛ ŋwɛi nitsɔɔmɔ ni naa mɔ nɔ hewalɛ babaoo lɛ he odaseyeli ni mli wa nɛ!
Gbi Etɛ lɛ Shwane
Aje shwane kpee lɛ shishi kɛ Ŋmalɛ mli sane ni asusu he kɛmɔ shi lɛ. Yehowa Odasefoi le wiemɔi ni yɔɔ Mateo yitso 24 kɛ Luka yitso 21 lɛ. Ani mɛi komɛi le akɛ nɔ hee ko kwraa bɛ ni abaanyɛ awie yɛ Biblia yitsei nɛɛ ahe? Kwɛ bɔ ni amɛsusumɔi lɛ ejaaa ha! Wiemɔi ni aha ni ji, “Mɛni ji Beni Oba lɛ he Okadi?” kɛ “Tsɔɔmɔ wɔ Beyinɔ ni Aaafee Nii Nɛɛ?” lɛ kɛ mɛi ni ba kpee lɛ bote saji ahe susumɔi sɔrɔtoi ni kɔɔ nakai yitsei enyɔ lɛ ahe lɛ mli yɛ emli kukuji lɛ ekomɛi amligbalamɔi heei ni akɛha ni haa mɔ mii shɛɔ ehe waa lɛ hewɔ. Sanegbaa kɛ miishɛɛ tee nɔ yɛ wiemɔ ni aha lɛ sɛɛ be mli ni mɛi ni ba kpee lɛ kɛ amɛnii ni amɛŋmala yɛ woji amli lɛ toɔ amɛteŋ mɛi komɛi anɔ he amɛkwɛɔ akɛ aleee nɔ amɛnu otii ni ajie lɛ kpo lɛ shishi lɛ. Ŋwanejee ko bɛ he akɛ, abaaha sanebimɔi babaoo hetoo kɛ akɛ amaniɛbɔɔ nɛɛ wo Buu-Mɔɔ lɛ mli.
Atsa Biblia mli nikasemɔ he saneyitso lɛ nɔ yɛ wiemɔ ni ji, “O-Biblia mli Sanebimɔi lɛ Ahetoo ni Akaseɔ Nii Kɛjɛɔ Mli” lɛ mli. Kɛkɛ ni wiemɔ ni ato he gbɛjianɔ lɛ tsɔ kɛtee sane kroko nɔ. Afi 1993 kadi Buu Mɔɔ Biblia Gilead Skul afi ni ji 50 lɛ. Wiemɔ ni ji, “Afii Nyɔŋmai Enumɔ Gilead Maŋsɛɛ Sanekpakpa Shiɛlɔi Atsɔsemɔ kɛ Amɛnitsumɔ” lɛ tsɔɔ mɛi ni eba kpee lɛ nɔ ni atsu yɛ nakai bei lɛ amli. Kɛ maŋsɛɛ sanekpakpa shiɛlɔi komɛi yɛ kpee lɛ shishi yɛ be mli ni ahaa wiemɔ ni ji, “Nɔ ni Sanekpakpa Shiɛmɔ lɛ Etsu yɛ Jeŋ Fɛɛ” lɛ, afɔɔ nine atsɛɔ amɛ koni amɛbagba amɛ niiashikpamɔi lɛ ekomɛi amɛtsɔɔ toibolɔi lɛ. Maŋsɛɛ sanekpakpa shiɛlɔi lɛ amaniɛbɔi ni amɛkɛha lɛ ha mɛi amli fili amɛ waa!
Wiemɔ ni nyiɛ sɛɛ ni aha ni ji, “Nɔ Hewɔ ni Yehowa Odasefoi Yaa Nɔ Amɛsaraa,” lɛ ji yinɔsane mli nikasemɔ kroko hu. Etsɔɔ mli akɛ Kristofoi lɛ etee nɔ amɛsara kɛjɛ klɛŋklɛŋ afii oha Ŋ.B. lɛ mli aahu kɛbashi amrɔ nɛɛ. Enɛ hu ha mɛi anaa kpɛ amɛhe. Yɛ wiemɔ ni nyiɛ sɛɛ ni eyitso ji, “Maŋtsɛyeli Jajelɔi yɛ Ekãa yɛ Shikpɔŋ lɛ nɔ He Fɛɛ He” lɛ shishijee mli lɛ, wielɔ lɛ wo wolo agbo ko nɔ (kɛ akala yɛ maŋ lɛ wiemɔ mli momo) ni ekɛɛ akɛ: “Eji miishɛɛ sane akɛ aaatswa nyɛ adafi yɛ biɛ ŋmɛnɛ akɛ ajie wolo hee nɛɛ kpo, ni eyitso ji Jehovah’s Witnesses—Proclaimers of God’s Kingdom.” Ŋmɛnɛŋmɛnɛ beaŋ Yehowa Odasefoi ayinɔsaji ni atsɔɔ mli fitsofitso yɛ wolo lɛ mli. Egbaa saji ni haa mɔ mli filiɔ lɛ yɛ shifimɔ, faishitswaa, kɛ omanyeyeli he, ni ekɛ Yehowa mumɔ lɛ ni miitsu nii waa yɛ esɔɔlɔi anɔ lɛ he odaseyeli ni mli wa haa.
Leebi ni Ji Ejwɛ Lɛ
Agbɛnɛ kpee lɛ naagbee gbi lɛ eshɛ shi eta. Gbi lɛ sane yitso ni ji, “Ni Wɔɔna Ŋwɛi Nitsɔɔmɔ He Sɛɛ,” lɛ kɛ shiwoo ha akɛ kpee lɛ baaba naagbee fɛfɛo. (Yesaia 48:17) Agbala mɛi ni ba kpee lɛ ajwɛŋmɔ kɛba wiemɔ ni tsara nɔ ni hiɛ wiemɔi sɔrɔtoi etɛ ni yɔɔ ekãa lɛ nɔ waa. Atsɔɔ Yeremia yitsei 23, 24, kɛ 25 lɛ kuku fɛɛ kuku mli yɛ wiemɔ ni tsara nɔ, ni yitso ji, “Yeremia Kɔkɔbɔɔ Shɛɛ Sane Ni Jɛ Mumɔŋ—Kɛha Blema kɛ Ŋmɛnɛŋmɛnɛ Beaŋ” lɛ mli. Mɛɛ shɛɛ sane ni mli wa po yɔɔ yitsei nɛɛ amli nɛkɛ! Ekolɛ Israel ni yeee anɔkwa ni yɔɔ Yeremia gbii lɛ amli lɛ ahe kpokpo yɛ ekɔkɔbɔi ni yɔɔ faŋŋ, ni ajɛ ŋwɛi akɛha yɛ mumɔŋ lɛ hewɔ. Jeŋ muu lɛ fɛɛ he kpokpo babaoo po diɛŋtsɛ beni aha nakai kɔkɔbɔi lɛ ba mli lɛ. Ani nibii yɛ sɔrɔto ŋmɛnɛ? Dabi kwraa. Yehowa Odasefoi kɛ ekãa shiɛɔ Nyɔŋmɔ kojomɔ lɛ he saji. Yɛ naagbee mli kwraa lɛ, ŋmɛnɛŋmɛnɛ nibii agbɛjianɔtoo nɛɛ fɛɛ kɛ Yehowa kojomɔ mli nifeemɔi baakpe. Enɛ baatsɔɔ hiɛkpatamɔ kwraa kɛha Satan je lɛ.
Hɔgbaa leebi lɛ ba naagbee kɛ drama ni ji enyɔ ni eyitso ji, “Kaaha Alaka Bo ni Kaali Nyɔŋmɔ Hu.” Efee bɔ ni ŋwɛi nitsɔɔmɔ baanyɛ abu wɔhe bɔni afee ni video nɔ nibii kɛ lalai ni baa mɔ shi lɛ akana wɔnɔ hewalɛ kɛ agbɛnɛ ni ebu wɔhe ni wɔkɛ mligbalamɔ akaba wɔnanemɛi Kristofoi ateŋ lɛ he mfoniri. Beni drama lɛ baa naagbee lɛ, sɛinɔtalɔ lɛ tsɛ mɛi ni fee drama lɛ ateŋ mɔ kome wiemɔ ni taa mɔ jwɛŋmɔŋ waa lɛ sɛɛ akɛ: “Wɔjeee mɛi ni je lɛŋ nibii nyɛŋ ana wɔnɔ hewalɛ. Kɛ wɔteee shi wɔwooo lɛ, je lɛ baanyɛ etsɔ ŋaa gbɛ nɔ efite wɔjwɛŋmɔ. Ni kɛ wɔye anɔkwa jio wɔyeee anɔkwa jio, no baadamɔ nɔ ni wɔduɔ lɛ nɔ.” Kwɛ bɔ ni eji anɔkwale ha!
Naagbee Shwane Lɛ
Kpee lɛ miiba naagbee oyayaayai beni wielɔ lɛ tee kpoku lɛ nɔ eyaha maŋshiɛmɔ lɛ ni eyitso ji, “Tsamɔ Tsɔɔmɔ Kɛha Wɔ Jaramɔ Bei Nɛɛ.” Etsɔ gbɛ ni mli ka shi faŋŋ ni jwɛŋmɔ yɔɔ mli nɔ etsɔɔ naagbai titrii komɛi ni gbaa wɔnaa ŋmɛnɛ ni etsɔɔ gbɛi komɛi anɔ ni ŋwɛi nitsɔɔmɔ baanyɛ atsɔ nɔ aye abua wɔ ni wɔna shihilɛ kpakpa mli ŋɔɔmɔ. Ekɛɛ akɛ, kɛ wɔmiinyiɛ Ŋmalɛ nitsɔɔmɔ sɛɛ amrɔ nɛɛ, belɛ wɔbaanyɛ wɔnyiɛ sɛɛ kɛya naanɔ yɛ Yehowa jeŋ hee lɛ mli.
Yɛ daa otsi Buu-Mɔɔ nikasemɔ lɛ naamuamɔ lɛ sɛɛ lɛ, be bashɛ kɛha naagbee wiemɔ lɛ. Wielɔ lɛ bote gbii ejwɛ wiemɔi ni aha lɛ mli otii wuji ni je kpo lɛ amli ekai mɛi ni ba kpee lɛ yɛ woji heei ni eje kpo lɛ ahe. Esaa etswa adafi ekoŋŋ akɛ etsɛŋ ni abaajie video-kasɛt ni hiɛ yitso akɛ The Bible—A Book of Fact and Prophecy lɛ mli sɔrɔtoi ni afee lɛ mli nɔ ni ji enyɔ lɛ kpo. Yɛ anɔkwale mli lɛ, video-kasɛt ni yitso ji, “The Bible—Mankind’s Oldest Modern Book” lɛ yɛ Blɔfo wiemɔ mli amrɔ nɛɛ. Akane amaniɛbɔi ni yɔɔ mɔbɔ ni jɛ hei sɔrɔtoi ni shihilɛ mli wawai yɛ jɛmɛ lɛ atsɔɔ, tamɔ Bosnia kɛ Herzegovina nɛkɛ. Wielɔ lɛ kane wiemɔi ni yɔɔ Jajelɔ 12:13 lɛ kɛmu kpee lɛ naa akɛ: “Nyɛhaa wɔboa saji lɛ fɛɛ naagbee toi: She Nyɔŋmɔ gbeyei ni oye ekitai lɛ anɔ! Shi enɛ ji gbɔmɛi fɛɛ agbɛnaa.”
Mɛɛ kaimɔ nɔ̃ fɛfɛo nɛ! Nyɛhaa wɔhia shi wɔhaa gbi ni adesai fɛɛ aaajie wɔ Tsɔɔlɔ Kpeteŋkpele, Yehowa yi, ni amɛaabo eŋwɛi nitsɔɔmɔ lɛ toi lɛ.
[Mfonirii ni yɔɔ baafa 24, 25]
“Ŋwɛi Nitsɔɔmɔ” kpeei sɔrɔtoi ni afee yɛ Moscow kɛ Kiev lɛ ha ana miishɛɛ babaoo
[Mfonirii ni yɔɔ baafa 26, 27]
1. Mɛi babaoo fee amɛ henɔjɔɔmɔ kɛha Nyɔŋmɔ lɛ he okadi kɛtsɔ baptisimɔ nɔ
2. Nuu ko ni ba kpee lɛ ni eye afii 100 lɛ mli fili lɛ akɛ enine eshɛ wolo hee nɔ
3, 4. Ana dramai sɔrɔtoi ni kanyaa jwɛŋmɔŋ waa lɛ ahe miishɛɛ waa
5. Maŋsɛɛ sanekpakpa shiɛlɔi ni abiɔ amɛ saji yɛ kpeei sɔrɔtoi ashishi lɛ ma sɛɛnamɔi ni jɛɔ ŋwɛi nitsɔɔmɔ mli baa lɛ nɔ mi