Sanebimɔi ni Jɛ Kanelɔi Adɛŋ

Ani eeefee nɔ ni ja gbɛ akɛ aaakpɛlɛ tsofafeemɔ mli gbuu ni akɛ tsofa ni albumin ni ana kɛjɛ adesa la mli yɔɔ mli lɛ aaagbu mɔ lɛ nɔ?

Kɛ wɔɔkɛɛ yɛ faŋŋ mli lɛ, esa akɛ Kristofonyo fɛɛ Kristofonyo diɛŋtsɛ akpɛ eyiŋ yɛ nɛkɛ sane nɛɛ he.

Nyɔŋmɔ tsuji miisumɔ ni amɛbo gbɛtsɔɔmɔ ni anaa yɛ Bɔfoi lɛ Asaji 15:28, 29, akɛ atsi he kɛjɛ la he lɛ toi, yɛ gbɛ ni ja nɔ. Yɛ enɛ kɛ gbeekpamɔ naa lɛ, Kristofoi yeŋ kooloo ni ashɔ̃tɔ̃, aloo niyenii komɛi ni afee tamɔ la bloŋŋ. Shi Nyɔŋmɔ mla nɛɛ kɔɔ sane lɛ he yɛ tsofafeemɔ gbɛfaŋ hu. Yehowa Odasefoi hiɛɔ wolo ko ni jajeɔ akɛ amɛkpooɔ ‘la ni agbalaa awoɔ mɔ mli lɛ, ni ji la diɛŋtsɛ, la mli wala yibii tsuji, la mli wala yibii yɛji, la mli hewalɛ ni atsɛɔ amɛ platelets, loo la mli plasma.’ Shi, gbɔmɔtso mli nui komɛi ni akɛgbuɔ mɔ, ni ekolɛ la mli hewalɛ ni ji protein lɛ bibii komɛi hiɔ mli lɛ hu?

Odasefoi eyoo be saŋŋ nɛ akɛ nɛkɛ sane nɛɛ ji sane ni mɔ diɛŋtsɛ baakpɛ eyiŋ yɛ he, yɛ mɔ fɛɛ mɔ henilee ni Biblia etsɔse lɛ lɛ kɛ gbeekpamɔ naa. Afee enɛ faŋŋ yɛ “Sanebimɔi ni Jɛ Kanelɔi Adɛŋ,” ni yɔɔ The Watchtower ni je kpo yɛ June 1, 1990, ni wie gbɔmɔtso lɛ mli nui komɛi ni akɛgbuɔ mɔ, ni ekolɛ datrɛfonyo ko baajie yi kɛji helai komɛi mɔ mɔ ko lɛ mli. Hewalɛi ni yɔɔ nɛkɛ nui ni akɛgbuɔ mɔ nɛɛ mli lɛ jeee la mli plasma diɛŋtsɛ, kɛ wɔɔwie he, shi moŋ, la mli wala yibii komɛi ni wuɔ shiɔ muawai, ni jɛ mɛi ni gbɔmɔtso nyɛɔ ewuɔ eshiɔ nakai hela lɛ la mli plasma lɛ mli. Kristofoi komɛi ni nuɔ he akɛ amɛbaanyɛ amɛjɛ henilee kpakpa mli amɛkpɛlɛ nɛkɛ nui ni akɛaagbu amɛ nɛɛ anɔ lɛ ekadi akɛ wala yibii komɛi ni wuɔ shiɔ muawai, ni jɛ yoo-hɔlɔ ko la mli lɛ ebabote abifao ni ehiɛ lɛ hɔ lɛ mli. “Sanebimɔi ni Jɛ Kanelɔi Adɛŋ” lɛ tsĩ enɛ, kɛ agbɛnɛ hu anɔkwale ni eji akɛ albumin fioo ko jɛɔ yoo-hɔlɔ mli kɛyaa bi ni ehiɛ lɛ hɔ lɛ mli lɛ hu tã.

Mɛi pii ena akɛ enɛ sa kadimɔ waa, ejaakɛ tsofai ni akɛgbuɔ mɔ lɛ ekomɛi, ni jeee la akɛfee lɛ, baanyɛ ana plasma albumin fioo ko yɛ mli ni akɛtsu he nii, loo akɛfata he bɔni afee ni eha nibii krokomɛi ni yɔɔ tsofa lɛ mli lɛ akatsake beni afeɔ lɛ. Amrɔ nɛɛ akɛ albumin bibioo ko hu tsuɔ nii yɛ hormone ni ajeɔ gbɛ afeɔ, ni akɛgbuɔ mɔ, ni ji EPO (erythropoietin) lɛ mli. Odasefoi komɛi ekpɛlɛ EPO ni akɛgbuɔ mɔ nɛɛ nɔ ejaakɛ ebaanyɛ eha la mli wala yibii tsuji lɛ afalɛ aya hiɛ oyayaayai, ni no hewɔ lɛ, ekolɛ ehaŋ datrɛfonyo lɛ anu he akɛ ehe miihia ni ekɛ la aha mɔ ni efeɔ lɛ tsofa lɛ.

Ekolɛ akɛ tsofai krokomɛi ni abaafee yɛ wɔsɛɛ be mli lɛ baatsu nii, ni ekolɛ albumin bibioo ko yɛ mli, ejaakɛ nitsumɔ hei ni feɔ tsofai lɛ feɔ tsofai heei daa nɛɛ, aloo amɛtsakeɔ bɔ ni amɛfutuɔ nɔ ni ale momo lɛ amɛhaa. Enɛ hewɔ lɛ, Kristofoi baasumɔ ni amɛsusu he akɛ ani albumin fata tsofa ni akɛbaagbu lɛ loo tsofa kroko ni datrɛfonyo lɛ baatsɔɔ akɛ akɛgbu lɛ lɛ he lo. Kɛ amɛyiŋ feɔ amɛ kɔshikɔshi, aloo amɛyɛ yiŋtoo ni baaha amɛhe amɛye akɛ albumin yɛ mli lɛ, no lɛ amɛbaanyɛ amɛbi amɛ datrɛfonyo lɛ.

Taakɛ wɔkadi lɛ, Odasefoi pii eteee shi amɛwooo kpɛlɛmɔ ni amɛaakpɛlɛ tsofa ni akɛbaagbu amɛ, ni albumin bibioo yɔɔ mli lɛ nɔ. Shi kɛlɛ, esa akɛ mɔ fɛɛ mɔ ni miisumɔ ni ekwɛ sane lɛ mli jogbaŋŋ kɛmɔ shi dani lɛ diɛŋtsɛ ekpɛ eyiŋ eha ehe lɛ asaa ati sane ni aŋma yɛ “Sanebimɔi ni Jɛ Kanelɔi Adɛŋ,” yɛ The Watchtower ni je kpo yɛ June 1, 1990 mli lɛ mli ekoŋŋ.