Adesa Shishijee Hiamɔ Nii Ahe Nitsumɔ Kɛtsɔ Nɔkpɛlɛmɔ Nɔ
ANƆKWAYELI ni akɛaakɛɛ “Ahekoo!” “Mi-na onitsumɔ lɛ he miishɛɛ waa!” aloo “Obɔ mɔdɛŋ bɔ ni ooonyɛ; wɔna ohe miishɛɛ jogbaŋŋ diɛŋtsɛ” lɛ yeɔ ebuaa waa ni ehaa bulɛ ni mɔ yɔɔ lɛ yaa hiɛ, titri lɛ kɛ mɔ ko ni obuɔ lɛ waa wie nɛkɛ wiemɔi nɛɛ. Adesai naa miishɛɛ ni amɛbɔɔ mɔdɛŋ hu waa kɛji amɛnaa nɔkpɛlɛmɔ ni sa amɛ. Ehaa amɛyaa hiɛ ni amɛnaa miishɛɛ hu. Yɛ anɔkwale mli lɛ, nɔkpɛlɛmɔ ni sa he miihia waa kɛha jwɛŋmɔ lɛ kɛ tsui lɛ tamɔ bɔ ni niyenii kpakpa ji kɛha gbɔmɔtso lɛ.
Wiemɔi komekomei ashishitsɔɔmɔ wolo ko tsɔɔ nɔkpɛlɛmɔ shishi akɛ “kpɛlɛmɔ ni akpɛlɛɔ mɔ aŋkro lɛ nɔ akɛ mɔ ni sa akɛ asusuɔ ehe loo ajwɛŋɔ ehe” kɛ “yɔsemɔ loo hesusumɔ krɛdɛɛ.” Ebɛŋkɛ bulɛ, ni ji woo henumɔ he kpaakpa, ni kɛ akɛha lɛ, etsɔɔ mɔ lɛ hesusumɔ loo bulɛ ni sa lɛ lɛ yɔsemɔ kɛtsɔ ehe jwɛŋmɔ nɔ, kɛ agbɛnɛ nɔkpɛlɛmɔ ni tsɔɔ bulɛ ni sa ni akɛhaa mɔ lɛ.
Mɔ Nɔkpɛlɛmɔ—Eji Shishijee Hiamɔ Nii
Nilee yɛ mli akɛ akɛ yijiemɔ aaaha yɛ he ni yijiemɔ sa yɛ, ni ehi jogbaŋŋ hu. Yesu fee he nɔkwɛmɔ nɔ yɛ ebɛbua ni kɔɔ tsuji ni nuntsɔ lɛ kɛ enibii wo amɛdɛŋ lɛ ahe lɛ mli. Beni ekpɛlɛɔ bɔ ni akɛ enibii lɛ tsu nii yɛ gbɛ kpakpa nɔ lɛ nɔ lɛ, ekɛɛ: “Ahekoo, tsulɔ kpakpa kɛ anɔkwafo.” (Mateo 25:19-23) Shi, bei pii lɛ, akuɔ hiɛ afɔɔ nɛkɛ bulɛ ni sa nɛɛ nɔ. Nɔkpɛlɛmɔ ni akɛhaaa lɛ fiteɔ mɔdɛŋbɔɔ kɛ hegbɛ ni mɔ lɛ ŋɔɔ ni ekɛtsuɔ nii lɛ kwraa. Iona wie he yɛ nɛkɛ gbɛ nɔ akɛ: “Nɔkpɛlɛmɔ haa onuɔ he akɛ ohe miihia, ataoɔ bo, ni hiɛ sɔɔ bo . . . Ehaa onyɛɔ oŋɔɔ hegbɛ ni bo diɛŋtsɛ okɛtsuɔ nɔ ko. Shi kɛ aku hiɛ afɔ onɔ lɛ, ehaa onii feɔ mɔbɔ ni onijiaŋ jeɔ wui.” Patrick kɛfata he akɛ: “Kɛkɛ lɛ ehaa ewaa kɛhaa bo akɛ oooya nɔ otsu nitsumɔ kpakpa kɛ ekaa tamɔ tsutsu lɛ.” No hewɔ lɛ, kwɛ bɔ ni ehe hiaa waa akɛ wɔɔkase bɔ ni akpɛlɛɔ mɔ nɔ ahaa, kɛ be mli ni afeɔ nakai hu. Wɔ fɛɛ wɔsumɔɔ ni wɔfee shweshweeshwe, ni ji le ni wɔɔle akɛ gbɔmɛi ni bɔle wɔ lɛ kpɛlɛɔ wɔ nɔ. Eji adesai ashishijee hiamɔ nii.
Yijiemɔ wiemɔ, gbɛnaa nii kroko ni akɛaafata he, aloo heloonaa nikeenii po kanyaa bo ni oyaa nɔ obɔɔ mɔdɛŋ waa bɔ ni ooonyɛ. Enɛ ji anɔkwale, ekɔɔɔ he eko akɛ oji fɔlɔ, wu, ŋa, bi, asafo lɛ mli nyo, aloo nɔkwɛlɔ. Margaret wie akɛ: “Kɛ akɛ bulɛ kpɛlɛ minɔ lɛ, ehaa minaa miishɛɛ, ni minuɔ he akɛ mihe hiaa, ni mishweɔ ni mabɔ mɔdɛŋ waa fe bɔ ni mitsuɔ lɛ.” Andrew kɛ lɛ kpaa gbe, ni ekɛɔ akɛ: “Minuɔ he akɛ awo minɔ waa, ni ewoɔ mi hewalɛ ni maya nɔ matsu nii waa kɛya hiɛ.” Shi, mɔ nɔkpɛlɛmɔ kɛ bulɛ ni akɛaaha mɔ ko lɛ biɔ nii ahesusumɔ jogbaŋŋ kɛ jwɛŋmɔ kpakpa.
Kasemɔ Yehowa Nɔkwɛmɔ nɔ lɛ yɛ Nɔkpɛlɛmɔ Kɛhamɔ Mli
Mɔ ni feɔ nɔkwɛmɔ nɔ ni fe fɛɛ yɛ bulɛ ni sa mɛi krokomɛi lɛ anɔkpɛlɛmɔ mli ji Yehowa Nyɔŋmɔ. Ebuɔ mɛi ni sa nɔkpɛlɛmɔ lɛ. Ekadi gbɔmɛi tamɔ Habel, Henok, kɛ Noa. (1 Mose 4:4; 6:8; Yuda 14) Yehowa kpɛlɛ David nɔ yɛ enɔkwayeli ni ekaaa lɛ hewɔ. (2 Samuel 7:16) Nyɔŋmɔ wo Samuel, mɔ ni wo Yehowa hiɛ nyam afii babaoo akɛ gbalɔ lɛ hu hiɛ nyam, beni ekɛ oyaiyeli here sɔlemɔ ni Samuel sɔle kɛha yelikɛbuamɔ koni eye Filistibii lɛ anɔ kunim lɛ nɔ lɛ. (1 Samuel 7:7-13) Ani onuŋ he akɛ awo ohiɛ nyam kɛji ona ŋwɛi nɔkpɛlɛmɔ ni tamɔ nɛkɛ?
Shidaa kɛ hiɛsɔɔ kɛ mɔ nɔkpɛlɛmɔ yɛ tsakpaa ni bɛŋkɛ kpaakpa. Biblia lɛ woɔ wɔ hewalɛ ni ‘wɔle shidaa,’ ni wɔjie hiɛsɔɔ kpo yɛ nɔ ko ni mɔ ko aaafee aha wɔ lɛ he. (Kolosebii 3:15; 1 Tesalonikabii 5:18) Eyɛ mli akɛ enɛ kɔɔ shidaa ni wɔkɛaaha Yehowa lɛ he titri moŋ, shi ekɔɔ wɔ daa gbi shihilɛ mli saji hu he. Bɔfo Paulo yɔse enɛ jogbaŋŋ. Ekɛ nɔkpɛlɛmɔ ni tsɔɔ bulɛ ha Foibe akɛ ‘mɛi pii ahefalɔ,’ kɛ Priska kɛ Akwila hu yɛ ‘amɛhe ni amɛkɛwo gbele mli’ yɛ lɛ kɛ mɛi krokomɛi hu ahewɔ lɛ he. (Romabii 16:1-4) Bo diɛŋtsɛ feemɔ bɔ ni amɛbaanu he amɛha beni amɛnine shɛ nɛkɛ shidaa wiemɔi ni ewie faŋŋ nɛɛ nɔ lɛ he mfoniri okwɛ. Ehi kɛha Paulo hu akɛ eeena miishɛɛ kɛaajɛ mɔ nɔkpɛlɛmɔ, kɛ woo, kɛ hewalɛwoo ni ekɛha nɛɛ mli. Wɔ hu wɔbaanyɛ wɔkase Yehowa kɛ ejalɔi ni hiɛ sɔɔ nii lɛ, kɛtsɔ mɔ nɔkpɛlɛmɔ kpakpa ni wɔɔjie kpo wɔtsɔɔ mɛi ni sa nakai nɔkpɛlɛmɔ lɛ nɔ.—Bɔfoi lɛ Asaji 20:35.
Mɔ Nɔkpɛlɛmɔ yɛ Weku Kɔkrɔɔ lɛ Mli
Mitchell, ni ji wu kɛ Kristofonyo onukpa lɛ wie akɛ: “Nɔkpɛlɛmɔ bibioo ni okɛaaha mɔ lɛ yeɔ ebuaa ni ehaa shihilɛ feɔ nɔ ni yɔɔ miishɛɛ waa. Ehaa onaa suɔmɔ ni mli wa ohaa mɔ ni kɛ nɔkpɛlɛmɔ kɛ bulɛ haa bo lɛ waa, ekolɛ kɛmiiya naanɔ.” Akɛ nɔkwɛmɔ nɔ lɛ, gbɛnaa nii ni tsii ka Kristofonyo wu lɛ nɔ, ni efeɔ yiŋkpɛi ni he hiaa ni kɔɔ weku lɛ hilɛ-kɛhamɔ he. Esa akɛ eha eweku lɛ amɛ mumɔŋ, kɛ heloonaa, kɛ henumɔŋ hiamɔ nii fɛɛ. (1 Timoteo 5:8) Kwɛ bɔ ni edaa shi waa ehaa kɛji ajie nɔkpɛlɛmɔ kɛ bulɛ ni sa kpo yɛ enitsumɔ ni Nyɔŋmɔ kɛwo edɛŋ akɛ weku yitso lɛ he, ni eŋa hu jieɔ ‘bulɛ ni mli kwɔ’ kpo etsɔɔ lɛ!—Efesobii 5:33.
Nɔ kroko hu ni esaaa akɛ akuɔ hiɛ afɔɔ nɔ ji yoogbayoo nitsumɔ, ni etsuɔ ni mɛi pii enaaa lɛ. Ekolɛ ŋmɛnɛŋmɛnɛ susumɔi ni ayɔɔ lɛ baa nitsumɔ nɛɛ shi ni ehaa woo kɛ bulɛ ni sa akɛ ana aha lɛ lɛ laajeɔ. Shi kɛlɛ, Nyɔŋmɔ naa he miishɛɛ. (Tito 2:4, 5) Kwɛ bɔ ni ŋa mii shɛɔ ehe jogbaŋŋ kɛji wu ni yooɔ nii lɛ jie eyi, titri lɛ yɛ shihilɛ mli nibii fɛɛ ni ebɔɔ mɔdɛŋ waa lɛ amli, ni ekɛ nakai nɔkpɛlɛmɔ lɛ ha lɛ yɛ eyitsoyeli lɛ shishi! (Abɛi 31:28) Rowena wie yɛ ewu he akɛ: “Kɛ ejie hiɛsɔɔ kpo yɛ nibii ni mifeɔ lɛ ahe lɛ, ehaa efeɔ mlɛo kɛhaa mi akɛ maba mihe shi maha lɛ ni mikɛ woo kɛ bulɛ hu aha lɛ.”
Amerikanyo nitsɔɔlɔ Christian Bovee wie be ko akɛ: “Yijiemɔ kpakpa ni akɛhaa gbekɛbii lɛ he hiaa amɛ waa tamɔ bɔ ni hulu ji kɛha fɔfɔii lɛ pɛpɛɛpɛ.” Hɛɛ, ehe hiaa ni awo gbekɛ ni edako kwraa lɛ po hewalɛ be fɛɛ be akɛ eji weku lɛ mli nyo ni he hiaa waa. Afii nyɔŋma kɛ enyɔ sɛɛ kɛyaa, beni anaa ejeŋba nɔ hewalɛ, ni ji afii ni eyi obɔ kɛ henumɔŋ kɛ gbɔmɔtsoŋ tsakemɔi heei lɛ amli lɛ, bɔ ni ehiɛ baa ehe nɔ yɛ lɛ diɛŋtsɛ epuemɔ he, kɛ bɔ ni esumɔɔ waa akɛ ena heyeli kɛ nɔkpɛlɛmɔ lɛ yaa hiɛ babaoo. Yɛ nɛkɛ bei amli titri ehe hiaa ni gbekɛ ni eye afii nyɔŋma kɛ enyɔ kɛyaa lɛ anu he akɛ efɔlɔi sumɔɔ lɛ waa, ní akɛ lɛ aye yɛ shishinumɔ kɛ adesa mlihilɛ mli hu. Nakai nɔŋŋ esa akɛ fɔlɔi kɛ nii-mɛi kɛ naa-mɛi ni miigbɔlɔ lɛ hu ana nɔmimaa ko ni tsɔɔ akɛ amɛhe yɛ sɛɛnamɔ ni asumɔɔ amɛ waa lolo, ni ‘ashɛrɛko amɛ ashwieko yɛ amɛgbɔlɛ be lɛ mli.’ (Lala 71:9; 3 Mose 19:32; Abɛi 23:22) Bɔ ni nɔkpɛlɛmɔ he hiaa ha lɛ he nii ni aaatsu jogbaŋŋ lɛ kɛ miishɛɛnamɔ kɛ omanyeyeli babaoo baa weku kɔkrɔɔ lɛ mli.
Mɔ Nɔkpɛlɛmɔ yɛ Kristofoi Asafo lɛ Mli
Sɛɛnamɔ kpele yɛ mɛi krokomɛi ni yɔɔ Kristofoi asafo lɛ mli lɛ ahe miishɛɛ ni aaana, ni aaajɛ suɔmɔ mli ajie hiɛsɔɔ kpo atsɔɔ amɛ yɛ amɛnitsumɔi kɛ amɛmɔdɛŋbɔi ahe lɛ he waa diɛŋtsɛ. Esa akɛ Kristofoi onukpai lɛ anyiɛ hiɛ kɛtsɔ mɛi krokomɛi ni yɔɔ asafo lɛ mli lɛ anitsumɔi kɛ mɔdɛŋbɔi ni amɛhiɛ aaasɔ lɛ nɔ. Margaret wie akɛ: “Beni abasara mi shii abɔ kɛha hewalɛwoo lɛ sɛɛ dani miyoo bɔ ni wiemɔi ni tsɔɔ mɔ nɔkpɛlɛmɔ lɛ ahe yɔɔ sɛɛnamɔ waa yɛ mɔ hewalɛwoo, kɛ tsui ni nyɔɔ mɔ mli, kɛ miishɛɛnamɔ gbɛfaŋ. Eha mibayoo nɔ ni mɔ ko laajeɔ kɛji enaaa nɔkpɛlɛmɔ kɛ bulɛ ni sa akɛ ena lɛ.” Kwɛ yiŋtoo kpakpa ni eji, ni wɔɔdamɔ nɔ wɔjie anɔkwa suɔmɔ kɛ miishɛɛ kpo yɛ mɛi fɛɛ ni yɔɔ asafo lɛ mli lɛ ahe! Wiemɔ amɛnitsumɔ kpakpa lɛ he. Okɛ miishɛɛ ajie amɛ yi ni owo amɛ hewalɛ. Fɔlɔ komekomei yɛ asafoi pii amli, ni miibɔ mɔdɛŋ waa ni amɛdũ mumɔŋ sui kpakpai amɛwo amɛbii lɛ amli. Mɛnɛɛmɛi sa yijiemɔ krɛdɛɛ. Esa akɛ awie nibii kpakpai ni sa lɛ ahe, moŋ fe ni aaawie nibii ni asumɔɔɔ lɛ ahe. Ha mɛi krokomɛi ana nyɛmimɛi asuɔmɔ kɛ hedɔɔ ni oyɔɔ kɛha amɛ. Ha amɛna akɛ osusuɔ amɛhe. Nɛkɛ gbɛ nɔ nɔkwɛlɔi ni yɔɔ suɔmɔ lɛ tsɔɔ amɛtsuɔ nii ni amɛkɛtswaa asafo lɛ amɛmaa shi. (2 Korintobii 10:8) Asafo lɛ mli bii aŋkroaŋkroi lɛ hu toɔ najiaŋ kɛtsɔɔ nɔkpɛlɛmɔ kɛ bulɛ ni sa ni amɛjieɔ kpo amɛtsɔɔ nɛkɛ anɔkwafoi ni tsuɔ nii waa yɛ amɛgbɛfaŋ nɛɛ nɔ.—1 Timoteo 5:17; Hebribii 13:17.
Shi nɔ kroko, loo fã kroko hu yɛ ni kɔɔ sane nɛɛ he. Kɛ wɔɔkpɛlɛ nɔ lɛ, bɔ ni asumɔɔ ni ana nɔkpɛlɛmɔ kɛjɛ mɛi aŋɔɔ lɛ mli wa waa. Yɛ Yesu gbii lɛ amli lɛ, ebatsɔ nɔ titri ni adiɔ sɛɛ yɛ jamɔ mli hiɛnyiɛlɔi lɛ ateŋ. Ehe bahia ni Yesu ajaje ekaselɔi lɛ asusumɔ ni ejaaa yɛ enɛ gbɛfaŋ. (Marko 9:33-37; Luka 20:46) Ehe miihia ni Kristofoi ana hiɛshikamɔ kɛ pɛpɛɛpɛ-ŋmɛɛ. Kɛ ashĩ ni akudɔɔɔ lɛ lɛ, no lɛ suɔmɔ ni ayɔɔ kɛha nɔkpɛlɛmɔ namɔ lɛ baanyɛ aye awui yɛ mumɔŋ. (Yakobo 3:14-16) Kwɛ bɔ ni eeefee dɔlɛ sane eha, akɛ nɔkwɛmɔ nɔ lɛ, kɛji onukpa ko bɔi ehe nɔwomɔ ni ebɔi mɛi krokomɛi anɔnyɛɛ koni amɛkpɛlɛ bɔ ni ekɛ henɔwomɔ buɔ lɛ diɛŋtsɛ ehe lɛ nɔ!—Romabii 12:3.
Bɔfo Paulo kɛ nilee wo nanemɛi Kristofoi ni hi Roma lɛ ŋaa akɛ: “Nyɛkɛ nyɛmimɛi asuɔmɔ asumɔsumɔa nyɛhe; mɔ fɛɛ mɔ kɛ woo aha enaanyo tsutsu.” (Romabii 12:10) Nɛkɛ wiemɔi nɛɛ kɔɔ Kristofoi onukpai, ni sa akɛ amɛkpɛlɛ Kristo nɔ akɛ asafo lɛ Yitso be fɛɛ be lɛ ahe klɛŋklɛŋ kwraa. Amɛtsɔɔ heshibaa ni amɛyɔɔ kɛhaa eninejurɔ ni ji hegbɛ ni eyɔɔ lɛ, kɛtsɔ Kristo gbɛtsɔɔmɔ ni amɛtaoɔ kɛtsɔ mumɔ krɔŋkrɔŋ lɛ nɔ, kɛ Biblia mli shishitoo mlai, kɛ “tsulɔ anɔkwafo kɛ nilelɔ” lɛ Nɔyeli Kuu lɛ hiɛnyiɛmɔ sɛɛ ni amɛdiɔ lɛ nɔ.—Mateo 24:45-47; kwɛmɔ Kpojiemɔ 1:16, 20; 2:1.
Enɛ hewɔ lɛ, kɛ onukpai kpe, ni amɛsɔle kɛha Yehowa gbɛtsɔɔmɔ ni amɛkɛaakudɔ Nyɔŋmɔ asafoku lɛ, amɛbaabɔ mɔdɛŋ ni amɛfee yiŋkpɛi ni hi jogbaŋŋ yɛ Ŋmalɛ naa. Kristofoi ahiɛshikamɔ, heshibaa, kɛ humifeemɔ baatsi onukpa ko gbɛ ni ekaka akɛ eeewo ehe nɔ, ni eye enyɛmimɛi krokomɛi lɛ anɔ, ni ekɛ lɛ diɛŋtsɛ esusumɔi afĩ amɛnɔ yɛ nɛkɛ kpeei nɛɛ ashishi. (Mateo 20:25-27; Kolosebii 3:12) Be fɛɛ be ni eeehi nakai lɛ, onukpai akuu lɛ sɛinɔtalɔ lɛ baafee jogbaŋŋ akɛ eeebi susumɔi kɛjɛ nanemɛi onukpai krokomɛi lɛ adɛŋ tsutsu koni etsɔ no nɔ eŋmala nibii ni sa akɛ asusu he yɛ kpee lɛ mli lɛ mra kwraa kɛtsɔ hiɛ, bɔni afee ni amɛna be ni amɛkɛsusu saji ni abaasusu he lɛ eko fɛɛ eko he jogbaŋŋ kɛtsɔ sɔlemɔ nɔ. Beni afeɔ onukpai akpee lɛ, ebaabɔ mɔdɛŋ akɛ enaŋ onukpai krokomɛi lɛ asusumɔi anɔ hewalɛ, shi moŋ, ebaawo amɛ hewalɛ ni amɛkɛ ‘wiemɔ mli heyeli’ atsu nii yɛ sane ni asusuɔ he lɛ mli. (1 Timoteo 3:13) Yɛ amɛ hu amɛgbɛfaŋ lɛ, esa akɛ nanemɛi onukpai lɛ abo wiemɔi ni mɛi krokomɛi lɛ wieɔ lɛ toi jogbaŋŋ koni amɛkɛ miishɛɛ ana sɛɛyoomɔ ni onukpai ni kɛ afii babaoo ena Kristofoi aniiashikpamɔ lɛ yɔɔ lɛ he sɛɛ.—2 Mose 18:21, 22.
Shi kɛlɛ, nɔkwɛlɔi nuɔ shishi akɛ Kristo baanyɛ ekɛ onukpai akuu lɛ mli mɔ fɛɛ mɔ atsu nii ni ekɛ Biblia shishitoo mlai ni he hiaa ni akɛkpee shihilɛ ko naa loo akɛkpɛ yiŋ ko ni he hiaa waa lɛ aha. Kɛ ahaa onukpai lɛ ateŋ mɔ fɛɛ mɔ nɔkpɛlɛmɔ kpakpa yɛ yelikɛbuamɔ ni ekɛhaa yɛ asafo lɛ mumɔŋ hiamɔ nii ahe nitsumɔ mli lɛ, ebaaha mumɔ kpakpa ahi kuu lɛ mli be fɛɛ be.—Bɔfoi lɛ Asaji 15:6-15; Filipibii 2:19, 20.
Bɔɔ Mɔdɛŋ ni Oha Mɛi Krokomɛi kɛ Bo Fɛɛ Nine Ashɛ Nɔkpɛlɛmɔ ni Sa Nɔ
Mɔ nɔkpɛlɛmɔ tswaa mɔ emaa shi. Ewoɔ mɔ hewalɛ ni anaa he miishɛɛ waa hu. Mary wie akɛ: “Kɛ wɔnuɔ he akɛ mɛi foji kɛkɛ ji wɔ po lɛ, hewalɛwoo he hiaa wɔ kɛha bulɛ ni wɔɔna wɔha wɔ diɛŋtsɛ wɔhe.” Okɛ anɔkwayeli akpɛlɛ mɛi krokomɛi adaa gbi mɔdɛŋbɔi lɛ anɔ. Nakai feemɔ haa shihilɛ feɔ nɔ ni ŋɔɔ waa kɛha amɛ ni amɛnaa he miishɛɛ hu. Fɔlɔi, bii, nɔkwɛlɔi, kɛ Kristofoi asafo lɛ mli bii, nyɛbaanyɛ nyɛna nɔkpɛlɛmɔ ni tsɔɔ bulɛ kɛtsɔ bɔ ni nyɛwieɔ kɛ bɔ ni nyɛfeɔ nyɛnii nyɛhaa lɛ nɔ. Biblia lɛ jieɔ mɛi ni tsuɔ nii kɛ hiɛdɔɔ lɛ, kɛ hiɛshikalɔi, kɛ heshibalɔi ayi. (Abɛi 11:2; 29:23; Hebribii 6:1-12) Kasemɔ bɔ ni akɛ hiɛnyamwoo buɔ mɛi krokomɛi ahaa. Susumɔ mɛi krokomɛi ahenumɔi ahe beni okɛ amɛ tsuɔ nii lɛ. Bɔfo Petro kɛ ŋaawoo nɛɛ ha akɛ: “Nyɛ fɛɛ nyɛhiɛa jwɛŋmɔ kome, nyɛnanaa nyɛhaa nyɛhe, nyɛdɔa nyɛhe akɛ nyɛmimɛi, nyɛmli ajɔa ahaa nyɛhe, nyɛjwɛŋa heshibaa jwɛŋmɔ.” (1 Petro 3:8) Enɛ biɔ ni wɔkɛ bulɛ kɛ nɔkpɛlɛmɔ aha mɛi krokomɛi, ni wɔkɛ nakai feemɔ atsu adesai ashishijee hiamɔ nii nɛɛ he nii.