Mɛi ni Sheɔ Nyɔŋmɔ Gbeyei lɛ ni akɛ Amɛ Kpeɔ

“GBƆMƐI miishwe heyeli kɛmiijɛ gbeyeishemɔ mli yɛ he fɛɛ he—awuiyeli he gbeyeishemɔ, nitsumɔ ni anaaa atsu he gbeyeishemɔ, kɛ hela ni yɔɔ gbeyei he gbeyeishemɔ. Wɔ hu wɔshweɔ enɛ. . . . Belɛ mɛni hewɔ wɔwieɔ bɔ ni wɔɔfee wɔna gbeyeishemɔ he lɛ?” Wielɔ ni ha wiemɔ titri lɛ yɛ “Nyɔŋmɔ Gbeyeishemɔ” Kpokpaa Wulu nɔ Kpee ni je shishi yɛ June 1994 lɛ eko fɛɛ eko shishi lɛ tee nakai sanebimɔ ni gbalaa mɔ jwɛŋmɔ lɛ shi.

Akpekpei abɔ ni ba lɛ—klɛŋklɛŋ lɛ yɛ Amerika Kooyigbɛ, kɛkɛ lɛ yɛ sɛɛ mli lɛ Europa, Amerika Teŋgbɛ kɛ Wuoyigbɛ, Afrika, Asia, kɛ ŋshɔkpɔi lɛ anɔ lɛ—miisumɔ ni amɛkase gbeyeishemɔ ni tamɔ nɛkɛ. Mɛni hewɔ? Ejaakɛ jɔɔmɔi ni Yehowa Nyɔŋmɔ yɔɔ kɛha ewebii lɛ ni wɔɔna mli gbɛfaŋnɔ lɛ damɔ Nyɔŋmɔ gbeyeishemɔ ni wɔɔna nɔ. Nyɔŋmɔ gbeyeishemɔ kasemɔ hewɔ ni kpeeyalɔi lɛ babua amɛhe naa kutuu lɛ, ni amɛkase babaoo yɛ nɛkɛ Kristofoi asu ni he hiaa nɛɛ he, yɛ gbii etɛ kpee he gbɛjianɔtoo lɛ mli.

“She Nyɔŋmɔ Gbeyei ni Oye Ekitai lɛ Anɔ”

No ji kpee lɛ klɛŋklɛŋ gbi lɛ saneyitso, ni damɔ Jajelɔ 12:13 nɔ. Ni aaashe Nyɔŋmɔ gbeyei lɛ tsɔɔ mɛni? Kpee lɛ shishijee wiemɔi lɛ amli ni kpee lɛ sɛinɔtalɔ lɛ tsɔɔ mli akɛ Nyɔŋmɔ gbeyeishemɔ jieɔ bulɛ kɛ woo kpakpa kɛha Yehowa kɛ agbɛnɛ bɔ ni wɔsheɔ gbeyei akɛ wɔɔfee nɔ ko ni esaaa ehiɛ lɛ kpo. Ŋmiŋmi bɛ Nyɔŋmɔ gbeyeishemɔ ni tamɔ nɛkɛ mli; eji ekpakpa kɛ nɔ ni sa hu.

Mɛɛ gbɛ nɔ gbeyeishemɔ kpakpa nɛɛ he baa sɛɛnamɔ kɛhaa wɔ yɛ? Wiemɔ ni nyiɛ sɛɛ, “Kaaha Eetɔ Bo ni Oŋmɛɛ He” lɛ tsɔɔ mli akɛ, Nyɔŋmɔ gbeyeishemɔ baakanya wɔ ni wɔkɛ miishɛɛ aye Nyɔŋmɔ kitai lɛ anɔ. Gbeyeishemɔ ni tamɔ nɛkɛ kɛ mumɔŋ hewalɛ baawo wɔmli, kɛfata suɔmɔ kɛha Nyɔŋmɔ kɛ naanyo lɛ he. Hɛɛ, Nyɔŋmɔ gbeyeishemɔ baanyɛ aye abua wɔ koni wɔkaba naanɔ wala he foidamɔ lɛ shi.

Nɔ ni nyiɛ gbɛjianɔtoo lɛ sɛɛ ji saji ni abiɔ kɛ hetooi ni ahaa ni yeɔ odase diɛŋtsɛ akɛ Nyɔŋmɔ gbeyeishemɔ baanyɛ awaje wɔ. Mɛi ni abibii amɛ saji lɛ gba bɔ ni Nyɔŋmɔ gbeyeishemɔ ni woo yɔɔ mli ná amɛnɔ hewalɛ koni amɛkã sɔɔmɔ lɛ he yɛ shikpilikpii ni afeɔ, sane ni kɔɔɔ mɔ he nɔ ko su, loo yiwaa fɛɛ sɛɛ, ni eye ebua amɛ ni amɛŋmɛ amɛtsui shi yɛ kaai ni mli wawai ni ba amɛ diɛŋtsɛ amɛnɔ lɛ fɛɛ sɛɛ.

Shi, mɛni hewɔ mɛi komɛi yɔɔ Nyɔŋmɔ gbeyeishemɔ yɛ be mli ni mɛi krokomɛi bɛ eko lɛ? Mɔ ni ha wiemɔ titri, “Nyɔŋmɔ Gbeyeishemɔ ni Wɔɔna ni Wɔna He Sɛɛ” lɛ tsɔɔ mli akɛ, Yehowa wo shi yɛ Yeremia 32:37-39 (NW) akɛ, E-kɛ Nyɔŋmɔ gbeyeishemɔ tsui baaha E-webii lɛ. Yehowa tɛoɔ Nyɔŋmɔ gbeyeishemɔ yɛ wɔtsuii amli. Yɛ mɛɛ gbɛ nɔ? Kɛtsɔ emumɔ krɔŋkrɔŋ lɛ kɛ e-Wiemɔ ni jɛ mumɔŋ, ni ji Biblia lɛ nɔ. Shi eka shi faŋŋ akɛ, esa akɛ wɔbɔ mɔdɛŋ waa ni wɔkase Nyɔŋmɔ Wiemɔ lɛ, ni wɔŋɔ hegbɛ ni mumɔŋ nibii babaoo ni eto he gbɛjianɔ lɛ kɛhaa lɛ. Nɔ ni fata enɛɛmɛi ahe ji wɔ kpeei wuji kɛ asafoŋ kpeei, ni yeɔ buaa wɔ ni wɔkase bɔ ni wɔɔfee wɔshe lɛ gbeyei lɛ.

Shwane gbɛjianɔtoo lɛ je shishi kɛ ŋaawoo koni wɔkɛ wɔhe afɔ Yehowa kɛ e-Wiemɔ lɛ nɔ. Nɔ ni nyiɛ enɛ sɛɛ ji gbɛi titrii ni esa akɛ Maŋtsɛyeli lɛ ana Kristofoi ashihilɛ nɔ hewalɛ lɛ ahe susumɔ.

Kɛkɛ ni wiemɔi etɛ ni ahaa kɛtsaraa nɔ yɛ kpee lɛ shishi lɛ klɛŋklɛŋ nɔ lɛ ba. Wiemɔi ni ahaa kɛtsaraa nɔ nɛɛ yitso ji, “Nyɔŋmɔ Gbeyeishemɔ Tsirɛɔ Wɔ koni Wɔbo Ŋwɛi Taomɔ Nii Atoi,” ni egbala jwɛŋmɔ kɛtee weku lɛ nɔ. Nɔ ni nyiɛ sɛɛ nɛɛ ji Ŋmalɛ mli ŋaawoo—ni anyɛɔ atsuɔ he nii—ni akɛha lɛ he nɔ ko fioo.

□ Kɛha wumɛi: Esa akɛ Nyɔŋmɔ gbeyeishemɔ atsirɛ nuu ni esumɔ eŋa tamɔ lɛ diɛŋtsɛ egbɔmɔtso. (Efesobii 5:28, 29) Nuu ejeee gbɛ eyeee lɛ diɛŋtsɛ egbɔmɔtso awui, eshwie lɛ diɛŋtsɛ ehiɛ shi yɛ enanemɛi ahiɛ, ni asaŋ ewieee lɛ diɛŋtsɛ efatɔɔi ahe etsɔɔɔ mɛi. No hewɔ lɛ, esa akɛ ekɛ bulɛ kɛ woo ni ekɛhaa ehe lɛ aha eŋa.

□ Kɛha ŋamɛi: Nyɔŋmɔ gbeyeishemɔ ni Yesu yɔɔ lɛ tsirɛ lɛ koni ‘esa Nyɔŋmɔ hiɛ daa.’ (Yohane 8:29) Mumɔ kpakpa ni esa akɛ ŋamɛi akase beni amɛkɛ amɛ wumɛi yeɔ lɛ nɛ.

□ Kɛha fɔlɔi: Fɔlɔi Kristofoi baanyɛ ajie Nyɔŋmɔ gbeyeishemɔ kpo kɛtsɔ gbɛnaa nii ni ka fɔlɔi anɔ lɛ ni amɛaabu lɛ akɛ hiɛdɔɔ sane, ni amɛbu amɛbii lɛ akɛ gboshinii ni jɛ Yehowa ŋɔɔ lɛ nɔ. (Lala 127:3) Oti titri ni ma fɔlɔi ahiɛ ji ni amɛtsɔse amɛ bii ni amɛbatsɔmɔ anɔkwa Kristofoi.

□ Kɛha bii: Yehowa fãa bii akɛ amɛbo “[amɛ]fɔlɔi lɛ atoi yɛ Nuntsɔ lɛ mli.” (Efesobii 6:1) No hewɔ lɛ, toiboo ni amɛfeɔ amɛhaa amɛ fɔlɔi lɛ tsɔɔ toiboo ni amɛfeɔ amɛhaa Nyɔŋmɔ.

Gbi lɛ naagbee wiemɔ lɛ sa wɔhenumɔi ahe, ejaakɛ ewie henumɔi ni mli wa ni wɔ fɛɛ wɔtsɔɔ mli beni wɔ suɔlɔ ko egbo lɛ he. Shi yɛ be mli ni wiemɔ lɛ shɛ teŋgbɛ lɛ, kɛkɛ ni naakpɛɛ nii ko ba. Wielɔ lɛ ha toibolɔi lɛ na miishɛɛ babaoo kɛtsɔ adafi ni etswa yɛ wolo bibioo, Beni Mɔ Ko ni Osumɔɔ lɛ Egbo ni ajie lɛ kpo lɛ hewɔ. Wolo ni hiɛ baafai 32, ni akala yɛ sui sɔrɔtoi amli lɛ wieɔ babaoo yɛ nɔ ni baaye abua mɛi ni yeɔ awerɛho lɛ he, koni amɛnu amɛhenumɔi kɛ kanyamɔi ni jeɔ kpo yɛ suɔlɔ ko gbele sɛɛ lɛ shishi. Ani ofee mɔ ni leee nɔ ni eeekɛɛ mɔ ni agbo ashi lɛ lɛ pɛŋ? Wolo bibioo nɛɛ fa ko wieɔ bɔ ni wɔɔfee ni wɔye wɔbua mɛi ni yeɔ awerɛho lɛ he. Yɛ be mli ni amɛboɔ wielɔ lɛ toi lɛ, no mli lɛ toibolɔi lɛ ateŋ mɛi pii miisusu mɔ ni wolo hee nɛɛ he baaba sɛɛnamɔ aha lɛ lɛ he.

‘Okɛ Sɔɔmɔ Krɔŋkrɔŋ Aha kɛ Woo kɛ Gbeyeishemɔ’

No ji saneyitso kɛha gbi ni ji enyɔ lɛ, ni damɔ Hebribii 12:28 nɔ. Leebi gbɛjianɔtoo lɛ mli ni wiemɔi ni ahaa kɛtsaraa nɔ, ni ji enyɔ, “Asafoi ni Nyiɛɔ yɛ Yehowa Gbeyeishemɔ Mli” lɛ ba. Eklɛŋklɛŋ fa lɛ tsu kpeeyaa he nii. Kpeei ashishi ni anaa wɔ yɛ lɛ tsɔɔ bulɛ ni wɔyɔɔ kɛha Nyɔŋmɔ kɛ mumɔŋ nibii ni eto he gbɛjianɔ lɛ. Kɛ wɔtee kpee lɛ, wɔtsɔɔ akɛ wɔsheɔ egbɛi lɛ gbeyei, ni wɔmiishwe waa ni wɔfee esuɔmɔnaa nii. (Hebribii 10:24, 25) Wielɔ ni ji enyɔ lɛ tsɔɔ mli akɛ, kɛ asafo muu lɛ fɛɛ aaanyiɛ yɛ Yehowa gbeyeishemɔ mli lɛ, belɛ esa akɛ aŋkroaŋkro fɛɛ afee egbɛfaŋnɔ yɛ jeŋba kpakpa ni eeehiɛ mli lɛ mli. Naagbee wielɔ lɛ wie hegbɛ kɛ gbɛnaa nii ni ka Kristofoi fɛɛ nɔ lɛ he—ni amɛjaje sanekpakpa lɛ ni amɛkpaaa. Be enyiɛ wɔbaaya nɔ wɔshiɛ? Kɛyashi be mli ni Yehowa aaakɛɛ akɛ ehi.—Yesaia 6:11.

“Yehowa Miishɛɛ lɛ Ji Nyɛ Mɔɔ” ji saneyitso kɛha wiemɔ ni nyiɛ sɛɛ, ni akaseɔ bianɛ yɛ wolo tɛtrɛɛ nɛɛ mli lɛ. (Nehemia 8:10) Mɛni hewɔ Yehowa webii yɔɔ miishɛɛ lɛ? Wielɔ lɛ tsɔɔ yiŋtoi sɔrɔtoi amli. Ekome ni sa kadimɔ jogbaŋŋ ji akɛ wɔkɛ Nyɔŋmɔ teŋ wekukpaa ni bɛŋkɛ kpaakpa haa wɔfeɔ gbɔmɛi ni yɔɔ miishɛɛ fe fɛɛ yɛ shikpɔŋ nɔ. Wielɔ lɛ kai mɛi ni eba kpee lɛ akɛ, wɔna hegbɛ akɛ wɔɔfata gbɔmɛi ni Yehowa egbala amɛ kɛba Yesu Kristo masɛi lɛ ahe. (Yohane 6:44) Mɛɛ yiŋtoo ni mli wa kɛha miishɛɛnamɔ po nɛ!

Nɔ ni anyãa he waa yɛ kpee fɛɛ kpee shishi ji baptisimɔ lɛ, ni esorooo “Nyɔŋmɔ Gbeyeishemɔ” Kpeei lɛ yɛ enɛ gbɛfaŋ. Wielɔ lɛ tsɔɔ mli yɛ wiemɔ, “Henɔjɔɔmɔ kɛ Baptisimɔ yɛ Yehowa Gbeyeishemɔ Mli” lɛ mli akɛ, gbɛnaa nii ni ka mɛi ni abaptisi amɛ lɛ fɛɛ nɔ lɛ bɔ he toi ejwɛ: (1) Esa akɛ wɔkɛ woji ni yeɔ buaa wɔ ni haa wɔnuɔ Nyɔŋmɔ Wiemɔ lɛ shishi ni wɔkɛtsuɔ nii lɛ akase no; (2) esa akɛ wɔsɔle; (3) esa akɛ wɔkɛ nanemɛi heyelilɔi abɔ yɛ asafoŋ kpeei ashishi; ni (4) esa akɛ wɔye Yehowa gbɛi lɛ kɛ e-Maŋtsɛyeli lɛ he odase.

Hɔɔ shwane gbɛjianɔtoo lɛ je shishi kɛ wiemɔ ni haa mɔ tsui nyɔɔ emli, “Gbɔmɛi ni Yehowa Kwako Amɛ.” Afii ohai nyɔŋmai-etɛ-kɛ-enumɔ nɛ, beni Israel maŋ lɛ kɛ bei ni mli wa kpeɔ lɛ, Yehowa ma sane nɔ aduatsɔ kɛtsɔ Mose nɔ, akɛ: “Yehowa o-Nyɔŋmɔ lɛ, . . . eshiŋo ni esaa ekwaŋo!” (5 Mose 31:6) Yehowa ye nakai sane nɔmimaa lɛ anɔkwale kɛtsɔ Israelbii lɛ ni ebu amɛhe beni amɛbote Shiwoo Shikpɔŋ lɛ nɔ ni amɛyahi nɔ lɛ nɔ. Ŋmɛnɛ, kɛ wɔkɛ kaai ni mli wawai miikpe lɛ, wɔ hu wɔbaanyɛ wɔna hekɛnɔfɔɔ ni yeɔ emuu kwraa akɛ Yehowa kwaŋ wɔ, kɛ wɔkɛ wɔhe kpɛtɛ ehe gbagbalii, ni wɔbo e-Wiemɔ lɛ mli ŋaawoo toi.

Mɛɛ gbɛ nɔ wɔɔtsɔ wɔna miishɛɛ yɛ Biblia lɛ kanemɔ mli? Yɛ wiemɔ, “Kanemɔ Nyɔŋmɔ Wiemɔ, Ŋmalɛ Krɔŋkrɔŋ Biblia lɛ, Daa Gbi” lɛ mli lɛ, wielɔ lɛ wo ŋaa akɛ akane kɛ jwɛŋmɔ akɛ aatao ale nibii amli, ni abi saji babaoo, tamɔ enɛɛmɛi: Mɛni mikaseɔ kɛjɛɔ nɛkɛ sane nɛɛ mli, yɛ Yehowa sui kɛ egbɛ̀i ahe? Te mafee tɛŋŋ matamɔ Yehowa babaoo yɛ enɛɛmɛi amli? Biblia lɛ kanemɔ yɛ nɛkɛ gbɛ nɔ lɛ ŋɔɔ ni eji niiashikpamɔ ni nyɔmɔwoo yɔɔ mli.

Yɛ no sɛɛ lɛ agbala jwɛŋmɔ kɛtee wiemɔ ni ahaa kɛtsaraa nɔ lɛ mli nɔ ni ji etɛ, “Gbɛjianɔtoi ni Akɛye Abua Mɛi ni Sheɔ Yehowa Gbeyei” lɛ nɔ. Eyɛ mli akɛ ekolɛ Yehowa tsuŋ naakpɛɛ nii yɛ ewebii ahe ŋmɛnɛ moŋ, shi kɛlɛ, eyeɔ ebuaa mɛi ni sheɔ lɛ gbeyei lɛ. (2 Petro 2:9) Wiemɔi ni tsaraa nɔ nɛɛ tsu gbɛjianɔtoi ejwɛ ni jɛ Yehowa ŋɔɔ ni baaye abua wɔ yɛ jaramɔ bei nɛɛ amli lɛ ahe nii: (1) Yehowa tsɔɔ e-mumɔ lɛ nɔ ewoɔ wɔ hewalɛ ni wɔtsuɔ nitsumɔi ni fe wɔ hewalɛ kwraa. (2) Etsɔɔ e-Wiemɔ lɛ nɔ ekɛ ŋaawoo kɛ gbɛtsɔɔmɔ haa wɔ. (3) Yɛ kpɔmɔ nɔ lɛ hewɔ lɛ, ehaa wɔnaa henilee ni mli tse. (4) Etsɔɔ e-gbɛjianɔtoo, ni onukpai fata he lɛ nɔ ekɛ gbɛtsɔɔmɔ kɛ hebuu haa wɔ. (Luka 11:13; Efesobii 1:7; 2 Timoteo 3:16; Hebribii 13:17) Gbɛjianɔtoi nɛɛ ni wɔkɛ fɛɛ aaatsu nii kɛmɔ shi lɛ baaha wɔnyɛ wɔŋmɛ wɔtsui shi ni wɔna Yehowa nɔkpɛlɛmɔ.

Hɔɔ shwane naagbee wiemɔ lɛ yitso ji, “Yehowa Gbi ni Yɔɔ Gbeyei lɛ Ebɛŋkɛ,” ni edamɔ Maleaki gbalɛ lɛ nɔ. Gbii ni yɔɔ gbeyei ehi shi yɛ yinɔsane be ni eho lɛ amli, tamɔ be mli ni akɛ kojomɔ ba Yerusalem nɔ yɛ 70 Ŋ.B. lɛ nɛkɛ. Shi gbi ni yɔɔ gbeyei fe fɛɛ yɛ adesai aniiashikpamɔ fɛɛ mli baafee Yehowa gbi ni baa, beni ‘ekɛ oweletɔɔ baa mɛi ni leee Nyɔŋmɔ lɛ kɛ mɛi ni booo wɔ Nuntsɔ Yesu he sanekpakpa lɛ toi lɛ anɔ lɛ.’ (2 Tesalonikabii 1:6-8) Mɛɛ mra mli enɛ baaba? Wielɔ lɛ jaje akɛ: “Naagbee lɛ ebɛŋkɛ! Yehowa le nakai gbi kɛ ŋmɛlɛtswaa lɛ. Etsakeŋ be ni eto eha ehe lɛ. Aabi ni wɔkɛ tsuishitoo aŋmɛ wɔtsui shi.”

Ewa akɛ aaahe aye akɛ gbii enyɔ eho momo. Mɛni naagbee gbi lɛ kɛbaaba?

“Nyɛshea Nyɔŋmɔ Gbeyei ni Nyɛkɛ Anunyam Ahaa Lɛ”

Saneyitso kɛha gbi ni ji etɛ lɛ damɔ Kpojiemɔ 14:7 nɔ. Wiemɔi sɔrɔtoi ma tsɔɔmɔi ni haa Yehowa Odasefoi feɔ sɔrɔto yɛ jamɔ gbɛjianɔtoi krokomɛi fɛɛ he lɛ anɔ mi yɛ leebi wiemɔi ahe gbɛjianɔtoo lɛ mli.

Wielɔ lɛ tee sanebimɔ ko ni yɔɔ miishɛɛ shi yɛ wiemɔ, “Jalɔi lɛ Baana Gbohiiashitee” lɛ mli: “Mɛɛ be abaatee mɛi ni gboi yɛ anɔkwayeli mli, yɛ Satan nibii agbɛjianɔtoo nɛɛ naagbee afii nɛɛ amli lɛ ashi, yɛ nakai afii-akpe Kojomɔ Gbi lɛ mli?” Mɛni ji hetoo lɛ? Wielɔ lɛ tsɔɔ mli akɛ, “Biblia lɛ ewieee he. Shi, ani shishinumɔ bɛ mli akɛ, aaatee mɛi ni gboi yɛ wɔgbii nɛɛ amli lɛ ashi mra, bɔni afee ni amɛkɛ asafo babaoo lɛ ni jeɔ Harmagedon mli lɛ abana tsɔsemɔ nitsumɔ kpeteŋkpele ni abaatsu yɛ Kojomɔ Gbi lɛ fɛɛ mli lɛ mli gbɛfaŋnɔ? Shishinumɔ yɛ mli, ni nakai ebaaba lɛ!” Ani abaahere mɛi komɛi ayiwala? Hɛɛ. Atsɔɔ Biblia mli tsɔɔmɔi kɛ nɔkwɛmɔ nii ni maa enɛ nɔ mi kɛhaa wɔ lɛ mli yɛ wiemɔ, “Ahere Amɛyiwala Hiɛkalɔi Kɛtsɔ Amanehulu Kpeteŋkpele lɛ Mli” lɛ mli.

Yehowa Odasefoi ejɛ jeeŋmɔ beebe amɛnu shishi akɛ, Biblia lɛ kɛ hiɛnɔkamɔi enyɔ haa—naanɔ wala yɛ paradeiso shikpɔŋ nɔ kɛha akpekpei abɔ ni anyɛŋ akane amɛ kɛ ŋwɛi shihilɛ ni gbele bɛ mli kɛha yibɔ fioo ko ni kɛ Kristo baaye nɔ yɛ e-Maŋtsɛyeli lɛ mli. Awie ŋwɛi hiɛnɔkamɔ lɛ he yɛ wiemɔ, “Kaashe Gbeyei, Asafoku Bibioo” lɛ mli. (Luka 12:32) Yɛ amrɔ jeŋ shihilɛ nɛɛ hewɔ lɛ, esa akɛ asafoku bibioo lɛ afee mɛi ni sheee gbeyei; esa akɛ amɛteŋ mɔ fɛɛ mɔ aŋmɛ etsui shi kɛyashi naagbee tɔ̃ɔ. (Luka 21:19) Wielɔ lɛ kɛɛ: “Gbeyei ni amɛsheee lɛ ji hewalɛwoo nɔ̃ kɛha asafo babaoo lɛ. Esa akɛ amɛ hu amɛna su ni tsɔɔ gbeyei ni amɛsheee, yɛ be mli ni amɛkpaa kpɔmɔ gbɛ yɛ amanehulu be ni fe fɛɛ ni shikpɔŋ lɛ ena pɛŋ lɛ mli lɛ.”

Yɛ leebi wiemɔi ahe gbɛjianɔtoo lɛ naagbee lɛ, toibolɔi kɛ miishɛɛ kwɛ Biblia drama, Nibii ni Esa akɛ Ohala Mli ni Jwere Ohiɛ Lɛ. Yɛ Yoshua gbii lɛ amli, kɛ agbɛnɛ yɛ gbalɔ Elia be lɛ mli lɛ, no mli ehe ebahia ni Israelbii lɛ akpɛ amɛyiŋ. Esa akɛ amɛhala nɔ ko mli. Elia kɛɛ: “Mɛɛ beyinɔ nɔŋŋ nyɛaadidãa yɛ saji enyɔ teŋ kɛyashi? Kɛji Yehowa ji Nyɔŋmɔ lɛ, nyɛnyiɛa esɛɛ; shi kɛji Baal ni lɛ, no lɛ nyɛnyiɛa esɛɛ.” (1 Maŋtsɛmɛi 18:21) Adesai eshɛ he ni esa akɛ amɛkpɛ amɛyiŋ ŋmɛnɛ hu. Jeee be ni akɛdidãa yɛ saji sɔrɔtoi enyɔ teŋ nɛ. Te nɔ ni ja ni esa akɛ ahala lɛ? Nɔ ni blema Yoshua hala lɛ nɔŋŋ. Ekɛɛ: “Mikɛ miwe lɛ, wɔɔsɔmɔ Yehowa!”—Yoshua 24:15.

Trukaa, ni ebafee tamɔ wɔshɛ Hɔgbaa shwane, kɛ be kɛha maŋ shiɛmɔ, ni eyitso ji, “Nɔ Hewɔ ni Esa akɛ Wɔshe Anɔkwa Nyɔŋmɔ lɛ Gbeyei Bianɛ” lɛ. Awo adesai fɛɛ hewalɛ yɛ Kpojiemɔ 14:6, 7 akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ.” Mɛni hewɔ ebiɔ oyaiyeli waa akɛ wɔɔshe Nyɔŋmɔ gbeyei bianɛ lɛ? Ejaakɛ taakɛ ŋmalɛ lɛ yaa nɔ ekɛɔ lɛ, “ekojomɔ ŋmɛlɛtswaa lɛ eshɛ.” Yehowa baatsɔ e-Bi, ni awo lɛ Nyɔŋmɔ ŋwɛi Maŋtsɛyeli lɛ nɔ Maŋtsɛ bianɛ lɛ nɔ ekɛ ŋmɛnɛŋmɛnɛ atuatsemɔ nibii agbɛjianɔtoo ni he tseee nɛɛ aba naagbee. Wielɔ lɛ tsɔɔ mli akɛ, enɛ ji gbɛ kome pɛ ni abaatsɔ nɔ akɛ hejɔlɛ abaha mɛi ni sheɔ Nyɔŋmɔ gbeyei lɛ, ni agbɛnɛ ahere wɔ shikpɔŋ ni ji wɔshia nɛɛ ni abaa yi. Akɛni nibii agbɛjianɔtoo nɛɛ naagbee gbii lɛ nɛ hewɔ lɛ, ehe miihia ni wɔshe anɔkwa Nyɔŋmɔ lɛ gbeyei bianɛ!

Yɛ Buu-Mɔɔ nikasemɔ kɛha otsi lɛ naamuamɔ sɛɛ lɛ, naagbee wielɔ lɛ ba kpoku lɛ nɔ koni ebaha ewiemɔ lɛ. Etsɔɔ mli akɛ, yɛ kpee he gbɛjianɔtoo lɛ hewɔ lɛ, Nyɔŋmɔ gbeyeishemɔ he shishinumɔ lɛ etee hiɛ babaoo kɛha mɛi ni ba kpee lɛ. Ema sɛɛnamɔi babaoo ni mɛi ni sheɔ Nyɔŋmɔ gbeyei lɛ anine shɛɔ nɔ lɛ nɔ mi. Wielɔ lɛ tswa video hee—United by Divine Teaching, ni ajie lɛ kpo lɛ he adafi. Emaa “Ŋwɛi Nitsɔɔmɔ” Majimaji Ateŋ Kpeei ni afee yɛ 1993-94 mli lɛ saji pɔtɛɛ komɛi ni yɔɔ sɔrɔto lɛ anɔ mi. Yɛ be mli ni wiemɔ lɛ baa naagbee lɛ, nɔ ni mɛi pii susu ji, ‘Mɛni wɔbaanyɛ wɔkpa gbɛ wɔsɛɛ afi?’ Gbii etɛ kpokpaa wulu nɔ kpeei yɛ hei pii.

Yɛ naagbee lɛ, wielɔ lɛ gbala jwɛŋmɔ kɛtee Maleaki 3:16, ni kɛɔ nɛkɛ lɛ nɔ: “Kɛkɛ ni mɛi ni sheɔ Yehowa gbeyei lɛ kɛ amɛhe wie, ni Yehowa bo toi, ni enu, ni aŋma kaimɔ wolo yɛ ehiɛ aha mɛi ni sheɔ Yehowa gbeyei lɛ, kɛ mɛi ni jwɛŋɔ egbɛ́i lɛ he lɛ.” Mɛi ni ba kpee lɛ shi kɛtee shia, kɛ faishitswaa ni mli ka shi faŋŋ akɛ, amɛbaajwɛŋ Yehowa gbɛ́i lɛ he, ni amɛkɛ Nyɔŋmɔ gbeyeishemɔ asɔmɔ lɛ.

[Mfoniri ni yɔɔ baafa 24]

Ehe miihia ni mɛi ni abaabaptisi amɛ lɛ aya nɔ ajie Nyɔŋmɔ gbeyeishemɔ kpo

[Mfoniri ni yɔɔ baafa 25]

Drama, “Nibii ni Esa akɛ Ohala Mli ni Jwere Ohiɛ” lɛ ma bɔ ni ehe hiaa ni toibolɔi lɛ akpɛ amɛyiŋ shiŋŋ yɛ Yehowa sɔɔmɔ he lɛ nɔ mi

[Mfoniri ni yɔɔ baafa 26]

Mɛi ni ba kpee lɛ na miishɛɛ akɛ amɛnine aaashɛ wolo hee bibioo, “Beni Mɔ Ko ni Osumɔɔ lɛ Egbo” nɔ