Ekpɛlɛ Ŋwɛi Gbɛtsɔɔmɔ Nɔ
ŊƆƆ lɛ ákɛ akɛ abifao ko ni yeɔ emuu kwɛmɔ ewo odɛŋ, ni aakpa gbɛ akɛ obaalɛ lɛ jogbaŋŋ. Mɛɛ nitsumɔ ko ni wa po nɛ! Te aaafee tɛŋŋ ni adesa ko ni yeee emuu anyɛ afee nakai? Kɛtsɔ ŋwɛi gbɛtsɔɔmɔ ni eeekpɛlɛ nɔ ni ekɛtsu nii yɛ daa gbi shihilɛ mli pɛ nɔ.
Nii ni tamɔ nɛkɛ pɛpɛɛpɛ Yosef, ni ŋɔ Yesu efee ebi lɛ fee. Nɔ ni kɛ apokrifa mli blemasaji ni wieɔ nibii babaoo yɛ Yosef he lɛ kpaaa gbee lɛ, nɔ ko fioo ko pɛ Biblia lɛ wieɔ yɛ nii ni etsu yɛ heshibaa mli, yɛ Yesu gbekɛbiiashi lɛ he. Wɔle akɛ, Yosef kɛ eŋa Maria tsɔse Yesu, kɛ gbekɛbii hii krokomɛi ejwɛ, kɛ biyei hu.—Marko 6:3.
Yosef ji Israel Maŋtsɛ David seshinyo kɛtsɔ Salomo wekukpaa lɛ mli. Eji Yakob bi, kɛ Heli shaanuu. (Mateo 1:16; Luka 3:23) Akɛ tso ŋaalɔ yɛ Nazaret maŋ ni yɔɔ Galilea lɛ, shika fioo ko Yosef yɔɔ. (Mateo 13:55; Luka 2:4, 24; okɛto 3 Mose 12:8 he.) Shi eji niiatsɛ yɛ mumɔŋ. (Abɛi 10:22) Eka shi faŋŋ akɛ enɛ jɛ ŋwɛi gbɛtsɔɔmɔ ni ekpɛlɛ nɔ lɛ hewɔ.
Ŋwanejee ko bɛ he akɛ, Yosef ji Yudanyo heshibalɔ kɛ ohiafo ni yɔɔ hemɔkɛyeli yɛ Nyɔŋmɔ mli, ni sumɔɔ ni efee nɔ ni ja. Saji fioo ni kɔɔ eshihilɛ he ni aŋma yɛ ŋmalɛi lɛ amli lɛ tsɔɔ akɛ éfee klalo yɛ be fɛɛ mli akɛ eeebo Yehowa famɔi atoi. Nakai enɛ ji, kɛ enɛɛmɛi yɛ Mla lɛ mli loo Yosef nine shɛ nɔ tɛ̃ɛ kɛtsɔ ŋwɛibɔfoi anɔ.
Nuu Jalɔ ni Yɔɔ Naagbai
Mɛni esa akɛ Nyɔŋmɔ gbeyeishelɔ lɛ afee beni naagba ko ni tsii ebaka enɔ lɛ? Esa akɛ ‘eshɛ ejatsu lɛ efɔ Yehowa nɔ,’ ni enyiɛ ŋwɛi gbɛtsɔɔmɔ sɛɛ! (Lala 55:23) Nakai Yosef fee. Beni etsɛ Maria he baa lɛ, “ni amɛnako amɛbakpe lɛ, ana akɛ ehiɛ musu kɛjɛ mumɔ krɔŋkrɔŋ lɛŋ.” Shi akɛni Yosef ‘ji jalɔ, ni esumɔɔɔ ni ebɔ lɛ ahora yɛ mɛi ahiɛ hewɔ lɛ, eto eyiŋ akɛ ebaatse gbala lɛ mli yɛ teemɔŋ.’ Beni Yosef esusu saji ahe sɛɛ lɛ, Yehowa bɔfo jie ehe kpo etsɔɔ lɛ yɛ lamɔ mli ni ekɛɛ lɛ akɛ: “Yosef, David bi, kaashe oŋa Maria lɛ ŋɔɔ gbeyei, shi hɔ ni ehiɛ lɛ jɛ mumɔ krɔŋkrɔŋ lɛŋ. Ebaafɔ binuu, ni ooowo lɛ gbɛi akɛ Yesu, ejaakɛ lɛ ebaahere emaŋ lɛ yiwala kɛjɛ amɛhe eshai lɛ amli.” Beni Yosef hiɛ tsɛ̃ lɛ, “efee bɔ ni Nuntsɔ [Yehowa] bɔfo lɛ kɛɛ lɛ lɛ, ni eŋɔ eŋa lɛ; shi eleee lɛ aahu kɛyashi beyinɔ ni efɔ ekromɔbi lɛ, ni ewo lɛ gbɛi akɛ Yesu.” (Mateo 1:18-25) Yosef kpɛlɛ ŋwɛi gbɛtsɔɔmɔ nɔ.
Kaisare Augusto wo akpɔ akɛ gbɔmɛi aya ni ayakane amɛ yɛ amɛ diɛŋtsɛ amɛmaji amli. Yɛ toiboo mli lɛ, Yosef kɛ Maria tee Betlehem yɛ Yudea. Ni jɛmɛ Maria fɔ Yesu yɛ, ni ekɛ lɛ fɔ kooloi aniyeniianɔ mli, ejaakɛ tsũ ko kwraa bɛ kɛha amɛ. Tookwɛlɔi ni nu ŋwɛibɔfo lɛ adafitswaa ni kɔɔ fɔmɔ krɛdɛɛ nɛɛ he nakai gbɛkɛ lɛ ba koni amɛbana abifao lɛ. Gbii 40 sɛɛ lɛ, Yosef kɛ Maria bo Mla lɛ toi, ni amɛkɛ Yesu yatsɔɔ yɛ Yerusalem sɔlemɔwe lɛ kɛ ehe afɔleshaa. Amɛyi enyɔ lɛ fɛɛ naa kpɛ amɛhe beni amɛnu Simeon ni egbɔ lɛ gbalɛ wiemɔi ni kɔɔ nibii wuji ni Yesu baafee lɛ he lɛ.—Luka 2:1-33; okɛto 3 Mose 12:2-4, 6-8 he.
Eyɛ mli akɛ etamɔ nɔ ni Luka 2:39 miitsɔɔ akɛ Yosef kɛ Maria fɛɛ tee Nazaret yɛ beni amɛkɛ Yesu eyatsɔɔ yɛ sɔlemɔwe lɛ sɛɛ nɔŋŋ moŋ, shi ŋmalɛ nɛɛ ji sane ni afo lɛ kuku ko fã. Etamɔ nɔ ni yɛ be mli ni amɛkɛ lɛ eyatsɔɔ yɛ sɔlemɔwe lɛ sɛɛ be kpalaŋŋ ko sɛɛ lɛ, Bokagbɛ ŋulamiiaŋkwɛlɔi (Magi) basara Maria kɛ Yesu yɛ shia ko mli yɛ Betlehem. Nyɔŋmɔ ni kɛ ehe wo mli lɛ tsi gbɛ koni saramɔ nɛɛ kɛ Yesu gbele akaba. Beni Magi lɛ tee sɛɛ lɛ, Yehowa bɔfo jie ehe kpo etsɔɔ Yosef yɛ lamɔ mli ni ekɛɛ lɛ akɛ: “Herode baatao abifao lɛ ni egbe lɛ.” Taakɛ efɔɔ feemɔ lɛ, Yosef bo ŋwɛi gbɛtsɔɔmɔ lɛ toi ni eŋɔ eweku lɛ kɛtee Mizraim.—Mateo 2:1-14.
Beni Herode gbo sɛɛ lɛ, ŋwɛibɔfo jie ehe kpo etsɔɔ Yosef yɛ lamɔ mli yɛ Mizraim, akɛ: “Tee shi, ni oŋɔ abifao lɛ kɛ enyɛ lɛ, ni oya Israel shikpɔŋ lɛ nɔ.” Beni Yosef nu akɛ Herode bi, Arkelao miiye maŋtsɛ yɛ etsɛ najiaŋ lɛ, eshe gbeyei akɛ eeeku esɛɛ kɛaaya Yudea. Akɛni ebo ŋwɛi kɔkɔbɔɔ ni akɛha lɛ yɛ lamɔ mli lɛ toi hewɔ lɛ, etee Galilea shikpɔŋkuku lɛ mli ni eyahi Nazaret maŋ lɛ mli.—Mateo 2:15-23.
Mumɔŋ Gbɔmɔ
Yosef kwɛ koni eweku lɛ aye ŋwɛi mla nɔ, ni akɛ mumɔŋ niyenii waje amɛ. Daa afi lɛ, eŋɔɔ eweku muu lɛ fɛɛ kɛyaa Hehoo lɛ yeli yɛ Yerusalem. Nɛkɛ bei nɛɛ ekome mli, ni Yosef kɛ Maria miiku amɛsɛɛ kɛya Nazaret, ni amɛfa gbɛ gbi kome jɛkɛmɔ kɛjɛ Yerusalem, ni amɛyoo akɛ Yesu ni eye afii 12 lɛ elaaje. Amɛku amɛsɛɛ kɛtee Yerusalem, ni amɛyatao lɛ yɛ he fɛɛ he, ni yɛ naagbee lɛ amɛyana lɛ yɛ sɔlemɔwe lɛ, ni eebo tsɔɔlɔi ni yɔɔ jɛmɛ lɛ atoi ni eebibii amɛ saji.—Luka 2:41-50.
Etamɔ nɔ ni Yosef kɛ hegbɛ haa eŋa lɛ yɛ nibii komɛi amli. Akɛ nɔkwɛmɔ nɔ lɛ, beni amɛku amɛsɛɛ kɛtee Yerusalem ni amɛna Yesu yɛ sɔlemɔwe lɛ, Maria ji mɔ ni wie etsɔɔ ebinuu fioo lɛ yɛ sane lɛ he. (Luka 2:48, 49) Yesu nine shɛ mumɔŋ tsɔsemɔ nɔ, beni edaa akɛ “ŋaalɔ lɛ bi” lɛ. Yosef tsɔɔ lɛ tso ŋaa he nitsumɔ lɛ, ejaakɛ atsɛ Yesu akɛ “ŋaalɔ lɛ . . . Maria bi lɛ.” (Mateo 13:55; Marko 6:3) Esa akɛ fɔlɔi ni sheɔ Nyɔŋmɔ gbeyei ŋmɛnɛ lɛ hu kɛ hegbɛi ni tamɔ nakai ni baa lɛ atsu nii kɛmɔ shi koni amɛkɛtsɔse amɛbii, titri lɛ ni amɛkɛ mumɔŋ tsɔsemɔ aha amɛ.—Efesobii 6:4; 2 Timoteo 1:5; 3:14-16.
Yosef Gbɛkpamɔi
Ŋmalɛi lɛ ewieee nɔ ko yɛ Yosef gbele he. Shi esa kadimɔ akɛ Marko 6:3 tsɛ Yesu akɛ “Maria bi lɛ,” jeee Yosef bi. Enɛ tsɔɔ akɛ, no mli lɛ Yosef egbo. Agbɛnɛ hu, eji Yosef hi shi kɛyashɛ afi 33 Ŋ.B. kulɛ, enyɛŋ eba akɛ Yesu ni asɛŋ lɛ lɛ kɛ Maria baawo bɔfo Yohane kwɛmɔ shishi.—Yohane 19:26, 27.
No hewɔ lɛ, Yosef baafata gbohii ni baanu gbɔmɔ Bi lɛ gbee ni atee amɛ shi lɛ ahe. (Yohane 5:28, 29) Akɛni eeekase Yehowa gbɛjianɔtoo kɛha naanɔ wala lɛ he nii hewɔ lɛ, ŋwanejee ko bɛ he akɛ Yosef kɛ ehe baaha enɛ yɛ miishɛɛ mli, ni ebaafee ŋwɛi Maŋtsɛ kpeteŋkpele, Yesu Kristo, shishinyo ni feɔ toiboo, taakɛ ebo ŋwɛi gbɛtsɔɔmɔ yɛ afii 1,900 ni eho lɛ toi lɛ.
[Mfoniri ni yɔɔ baafa 31]
Yosef kɛ mumɔŋ tsɔsemɔ ha Yesu ni etsɔɔ lɛ tso ŋaa he nitsumɔ lɛ hu