Ani Obaajie Yehowa Yi?
“NYƆŊMƆ, bɔ ni ogbɛi lɛ yɔɔ lɛ, nakai nɔŋŋ oyijiemɔ lɛ yɔɔ kɛyashi shikpɔŋ lɛ naagbee hei lɛ.” Enɛɛmɛi ji wiemɔi ni jɛ Kora bihii lɛ agbalɛ lala lɛ mli. (Lala 48:11) Ŋmɛnɛ, lalɔi akuu wulu ni feɔ Yehowa Odasefoi akpekpei abɔ miijie Nyɔŋmɔ yi ni amɛha aale egbɛi lɛ kɛtsɔ e-Maŋtsɛyeli sanekpakpa lɛ shiɛmɔ nɔ. Akɛni amɛtsuɔ enɛ he nii yɛ shikpɔji kɛ ŋshɔkpɔi 232 anɔ yɛ wiemɔi ni fa fe 300 mli hewɔ lɛ, eha amɛmiishɛ “shikpɔŋ lɛ naagbee hei lɛ” ahe diɛŋtsɛ.
Mɛni tsirɛɔ mɛi ni esoro amɛ kusumii, shihilɛ, kɛ wiemɔi sɔrɔtoi lɛ ni amɛjieɔ Yehowa yi lɛ? Nyɔŋmɔ Wiemɔ, Biblia mli anɔkwa nilee lɛ he shidaa ji yiŋtoo titri. Mumɔŋ anɔkwale lɛ eha amɛye amɛhe kɛjɛ apasa hemɔkɛyelii kɛ jamɔŋ hemɔkɛyelii ni ŋɔɔ mɔ nom tamɔ naanɔ piŋmɔ nɛkɛ lɛ he. (Yohane 8:32) Anɔkwale lɛ hu yeɔ ebuaa amɛ koni amɛhiɛ asɔ Nyɔŋmɔ sui ni yɔɔ naakpɛɛ, tamɔ esuɔmɔ, hewalɛ, nilee, kɛ jalɛ saneyeli ni mɔbɔnalɛ fata he lɛ nɛkɛ. Nyɔŋmɔ Bi koome, Yesu Kristo, ni ekɛ lɛ ha adesai akɛ kpɔmɔ afɔleshãa nɔ lɛ he shishinumɔ kanyaa mɛi ni ja lɛ koni amɛjie Yehowa yi ni amɛsɔmɔ lɛ.
Taakɛ Biblia mli wolo ni ji Kpojiemɔ lɛ tsɔɔ lɛ, ŋwɛi lalɔi akuu ko jaje akɛ: “Nuntsɔ [Yehowa], bo ji mɔ ni sa akɛ oŋɔɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” (Kpojiemɔ 4:11) Yijiemɔ ni tamɔ nɛkɛ jeee nɔ ni jɛ gbɛnaa nii ko henumɔ ni anáa kɛkɛ mli. Shi moŋ ejɛɔ woo ni ayɔɔ kɛha Yehowa lɛ mli.
Jiemɔ Nyɔŋmɔ Yi Kɛtsɔ Sanekpakpa lɛ Jajemɔ Nɔ
Akaseɔ Yesu Kristo, Nyɔŋmɔ yijielɔ fe fɛɛ lɛ nɔkwɛmɔ nɔ ni nɔ bɛ lɛ, yɛ Yehowa yijiemɔ mli. Nyɔŋmɔ Maŋtsɛyeli lɛ he sanekpakpa lɛ shiɛmɔ nitsumɔ ni akɛ he woɔ mli lɛ fata Yesu nanemaa hei asɛɛnyiɛmɔ lɛ he. (Mateo 4:17, 23; 24:14) Shiɛmɔ nitsumɔ nɛɛ ebatsɔ mɔdɛŋ kpeteŋkpele ni fe fɛɛ ni abɔɔ yɛ Yehowa yijiemɔ mli.
Shiɛmɔ nitsumɔ nɛɛ he hiaa aahu akɛ Biblia lɛ kɛtoɔ yiwalaheremɔ he. Romabii 10:13-15 kaneɔ akɛ: “ ‘Mɔ fɛɛ mɔ ni aaabo atsɛ Nuntsɔ [Yehowa] gbɛi lɛ, aaahere eyiwala.’ Shi te aaafee tɛŋŋ ni amɛaabo amɛtsɛ mɔ ni amɛheko lɛ amɛyeko lɛ? Ni te aaafee tɛŋŋ ni amɛaahe mɔ ni amɛnuko ehe sane lɛ amɛyeŋ? Ni asaŋ te aaafee tɛŋŋ ni amɛaanu kɛ shiɛlɔ ko bɛ lɛ? Ni te aaafee tɛŋŋ ni amɛaashiɛ, kɛ atsuko amɛ lɛ? Taakɛ bɔ ni aŋma akɛ: ‘Kwɛ bɔ ni hejɔlɛ he sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!’ ”
Yehowa Odasefoi kɛ ŋmɛlɛtswai ni fa fe akpekpei akpe wo shiɛmɔ nitsumɔ lɛ mli yɛ nyɛsɛɛ afi lɛ pɛ mli. Ni kwɛmɔ yibii kpakpai ni jɛ Nyɔŋmɔ yijiemɔ nɛɛ mli ba! Mɛi 314‚000 bafata lalɔi akuu ni feɔ yijielɔi lɛ ahe kɛtsɔ amɛ henɔjɔɔmɔ ni amɛfee he okadi amɛha Yehowa kɛtsɔ nu mli baptisimɔ nɔ lɛ nɔ.
Ni kɛlɛ, mɛni abaanyɛ awie yɛ mɛi 12,288,917 ni ba 1994 Kristo gbele Kaimɔ lɛ shishi lɛ ahe? Mɛi ni fata amɛhe ji mɛi ni fa fe 7,000,000 ni bɔiko Yehowa yijiemɔ akɛ sanekpakpa shiɛlɔi. Shi nifeemɔ ni he hiaa fe fɛɛ nɛɛ shishi ni amɛba lɛ baaha lalɔi akuu ni feɔ yijielɔi akpekpei abɔ babaoo abafata he yɛ naagbee mli. Mɛni abaanyɛ afee koni aye abua mɛi ni yɔɔ wiemɔ lɛ he miishɛɛ nɛɛ ni amɛbatsɔmɔ Yehowa yijielɔi?
Yelikɛbuamɔ ni Yɔɔ
Ekolɛ mɛi ni yɔɔ wiemɔ lɛ he miishɛɛ lɛ ateŋ mɛi pii baasumɔ ni amɛjie Yehowa yi, shi amɛnuɔ he akɛ amɛnyɛŋ amɛshɛ taomɔ nii lɛ ahe. Ebaahi jogbaŋŋ akɛ amɛaakai lalatsɛ lɛ wiemɔi lɛ: “Miihole mihiŋmɛii anɔ makwɛ gɔji lɛ: nɛgbɛ miyelikɛbuamɔ baajɛ aba? Miyelikɛbuamɔ jɛɔ Yehowa, Mɔ ni fee ŋwɛi kɛ shikpɔŋ lɛ, ŋɔɔ.” (Lala 121:1, 2) Eka shi faŋŋ akɛ, lalatsɛ lɛ hole ehiŋmɛii anɔ ekwɛ Yerusalem gɔji lɛ yɛ he ni akɛ Yehowa sɔlemɔwe kɛ shikpɔŋ nɔ teokrase nɔyeli hewalɛ ema lɛ. Wɔbaanyɛ wɔmu sane naa yɛ gbɛ ni ja nɔ akɛ, yelikɛbuamɔ ni he hiaa ni akɛaajie Nyɔŋmɔ yi koni ajaje Maŋtsɛyeli shɛɛ sane lɛ jɛɔ Yehowa kɛ egbɛjianɔtoo lɛ pɛ ŋɔɔ kɛbaa.—Lala 3:5; Daniel 6:10.
Ŋmɛnɛ, mɛi ni sumɔɔ ni amɛjie Yehowa yi lɛ baanyɛ akpa yelikɛbuamɔ ni jɛɔ suɔmɔ mli lɛ gbɛ kɛjɛ eshikpɔŋ nɔ gbɛjianɔtoo lɛ mli. Akɛ nɔkwɛmɔ nɔ lɛ, Yehowa Odasefoi yeɔ amɛbuaa kɛtsɔɔ shia Biblia mli nikasemɔi ni akɛ mɛi ni yɔɔ wiemɔ lɛ he miishɛɛ lɛ feɔ ni aheee nɔ ko lɛ nɔ. Babaoo fata tsɔsemɔ he gbɛjianɔtoo nɛɛ he fe Biblia tsɔɔmɔi lɛ akasemɔ kɛkɛ. Eyeɔ ebuaa nikaselɔ lɛ koni ehiɛ asɔ nɔ ni ekaseɔ lɛ kɛ gbɛjianɔtoo ni Yehowa kɛtsuɔ nii lɛ hu.
Yɛ enɛ kɛ gbeekpamɔ naa lɛ, Odasefonyo ni kwɛɔ Biblia mli nikasemɔ nɔ lɛ bɔɔ mɔdɛŋ koni ekwɛ ni anɔkwalei hee ni anáa lɛ akabote yitso lɛ pɛ mli, shi ebote tsui lɛ hu mli. Ni esaaa akɛ tsɔɔlɔ lɛ tsiɔ ehe kɛjɛɔ tsɔɔmɔ ni eeetsɔɔ nikaselɔ lɛ bɔ ni Yehowa kɛ E-gbɛjianɔtoo lɛ tsuɔ nii ni ekɛtsuɔ E-yiŋtoo he nii yɛ shikpɔŋ nɔ lɛ he. Bei pii lɛ, Yehowa Odasefoi—Miifee Nyɔŋmɔ Suɔmɔnaa Nii yɛ Ekomefeemɔ Mli yɛ Jeŋ Fɛɛ wolo bibioo lɛ kɛ Jehovah’s Witnesses—The Organization Behind the Name video ni yɔɔ kpaa nɔ lɛ eye ebua yɛ enɛ he nitsumɔ mli.
Kristofoi akpeei hu tsuɔ gbɛfaŋnɔ ko ni he hiaa waa yɛ mɛi ni baatsɔ Yehowa yijielɔi lɛ ayelikɛbuamɔ mli. Ekolɛ abaafɔ nikaselɔ lɛ nine kɛba Kristofoi akpeei yɛ Biblia mli nikasemɔ lɛ shishijee mli kwraa. Yɛ be ko sɛɛ lɛ, ebaakase bɔ ni ehe hiaa akɛ aya asafoŋ kpeei lɛ fɛɛ eko daa, ni akɛ he awo mli hu lɛ. (Hebribii 10:24, 25) Nɔkwɛlɔi baanyɛ ni amɛkɛ yelikɛbuamɔ ni sɛɛnamɔ yɔɔ he aha nanemɛi heyelilɔi kɛ mɛi ni baatsɔ Yehowa yijielɔi wɔsɛɛ ko lɛ kɛtsɔ kpeei ni tswaa mɔ maa shi yɛ mumɔŋ ni abaanyɛ akɛtsu nii hu ni amɛaasaa amɛhe yɛ mli ni amɛkɛha lɛ nɔ.
Ye Obua Gbekɛbii Koni Amɛjie Yehowa Yi
Gbekɛbii fata mɛi babaoo ni baanyɛ atsɔ sanekpakpa lɛ shiɛlɔi yɛ wɔsɛɛ be ni bɛŋkɛ lɛ ahe. Biblia mli gbɛnaa nii ka tsɛmɛi anɔ titri akɛ amɛlɛ amɛbii “yɛ Nuntsɔ [Yehowa] tsɔsemɔ kɛ ŋaawoo lɛ mli.” (Efesobii 6:4) Kɛ fɔlɔi ni sheɔ Nyɔŋmɔ gbeyei lɛ tsɔse amɛ jogbaŋŋ lɛ, gbekɛbii bibii kwraa po baanyɛ ana suɔmɔ amɛha Yehowa yijiemɔ.
Gbekɛ yoo bibioo ko ni yɔɔ Argentina lɛ tee asafoŋ onukpai lɛ aŋɔɔ shii abɔ yɛ nyɔji babaoo mli, ni eebi koni amɛye amɛbua lɛ ni ehe anyɛ asa akɛ Maŋtsɛyeli shiɛlɔ. Yɛ be ni sa mli lɛ, efɔlɔi kɛ onukpai lɛ kpɛlɛ nɔ, ni amɛha ebatsɔ shiɛlɔ ni abaptisiko lɛ. No mli lɛ ebɔi Maŋtsɛyeli sane lɛ kɛhamɔ jogbaŋŋ momo yɛ shinaai anaa. Eyɛ mli akɛ gbekɛ yoo bibioo nɛɛ eye afii enumɔ pɛ ni eleee nikanemɔ moŋ, shi ekase he ni abaana Biblia mli ŋmalɛi lɛ ekomɛi yɛ lɛ ewo eyitsoŋ. Kɛ ena ŋmalɛ lɛ, ehaa shiatsɛ lɛ kaneɔ, kɛkɛ lɛ etsɔɔ mli.
Eka shi faŋŋ akɛ onukpai kɛ fɔlɔi fɛɛ baanyɛ atsu nibii kpakpai babaoo kɛtsɔ mɛi ni yaa hiɛ ni amɛbatsɔmɔ Yehowa yijielɔi lɛ ahewalɛwoo kɛ yelikɛbuamɔ nɔ.—Abɛi 3:27.
Naanɔ Wekukpaa ni Aaaka Mɔ kɛ Yehowa Teŋ
Shi kɛlɛ, kɛ bo diɛŋtsɛ lɛ, okɛ Yehowa Odasefoi ebɔ kɛyashi be ko shi ofatako amɛhe lolo yɛ amɛ shiɛmɔ nitsumɔ lɛ mli hu? Ehe aaaba sɛɛnamɔ akɛ ooobi ohe saji ni nyiɛ sɛɛ nɛɛ, ‘Ani miheɔ miyeɔ akɛ mina anɔkwale lɛ, ni akɛ Yehowa ji anɔkwa Nyɔŋmɔ kome pɛ lɛ? Ani miheɔ miyeɔ akɛ Nyɔŋmɔ Maŋtsɛyeli lɛ pɛ ji nɔ ni kɛ adesai anaagbai anaa tsabaa baaba? Ani mikpoo apasa jamɔi fɛɛ, kɛ je lɛŋ kusumii kɛ nifeemɔi ni teɔ shi woɔ Yehowa lɛ? Ani miyɛ suɔmɔ ni mli kwɔ kɛha Nyɔŋmɔ kɛ ejalɛ taomɔ nii lɛ?’ (Lala 97:10) Kɛ obaanyɛ oha sanebimɔi nɛɛ ahetoo akɛ hɛɛ yɛ anɔkwayeli mli lɛ, no lɛ mɛni tsiɔ onaa yɛ Yehowa yijiemɔ mli?—Okɛto Bɔfoi lɛ Asaji 8:36 he.
Babaoo fata Yehowa yijiemɔ he fe sanekpakpa lɛ shiɛmɔ kɛkɛ. Kɛ ona anɔkwa nilee, oyɛ anɔkwa hemɔkɛyeli, ni ohaa oshihilɛ kɛ ŋwɛi taomɔ nii kpaa gbee lɛ, no lɛ ehe miihia ni oha okɛ Nyɔŋmɔ teŋ wekukpaa lɛ mli awa kpɛŋŋ. Yɛ mɛɛ gbɛ nɔ? Kɛtsɔ ohe nɔ ni ooojɔɔ oha lɛ yɛ sɔlemɔ mli, koni no sɛɛ lɛ okɛ nu mli baptisimɔ afee enɛ he okadi lɛ nɔ. Oshara eba naanɔ wala he. No hewɔ lɛ, tsu Yesu ŋaawoo nɛɛ he nii amrɔ, akɛ: “Nyɛbotea agbo fintɔ̃ɔ lɛ mli! Ejaakɛ agbo ni lɛɛ kɛ gbɛ tɛtrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ni boteɔ mli lɛ fa pii. Shi agbo fintɔ̃ɔ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.”—Mateo 7:13‚ 14.
Akɛni ŋmɛnɛŋmɛnɛ nibii agbɛjianɔtoo nɛɛ miibɛŋkɛ enaagbee yɛ hiɛkpatamɔ mli hewɔ lɛ, jeee be ni akɛshashaoɔ shi nɛ. Tsu okɛ Yehowa teŋ naanɔ wekukpaa he nii amrɔ nɔŋŋ. Lɛlɛŋ, be ni akɛ hetoo kpakpa aaaha sanebimɔ, Ani obaajie Yehowa yi? lɛ nɛ.