Sanebimɔi ni Jɛ Kanelɔi Adɛŋ
Kɛ aawie he ŋmiiŋmi lɛ, ani sɔrɔto-feemɔ yɛ Biblia mli wiemɔ “tooi krokomɛi” kɛ “asafo babaoo” lɛ teŋ?
Hɛɛ, eyɛ mli akɛ esaaa akɛ wɔgbaa wɔhe naa tsɔ yɛ wiemɔ kɛ nitsumɔ he loo wɔhaoɔ kɛ mɔ ko kɛ wiemɔi enyɔ nɛɛ miitsu nii kɛmiiha nɔ kome too.
Kristofoi pii le ŋmalɛi ni wɔnaa wiemɔi nɛɛ yɛ mli lɛ. Yohane 10:16 ji ekome. Jɛmɛ Yesu wie yɛ akɛ: “Ni miyɛ tooi krokomɛi ni jɛɛɛ tooi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni tooi lɛ fee kuu kome kɛ kwɛlɔ kome.” Wiemɔ kroko, “asafo babaoo,” lɛ jeɔ kpo yɛ Kpojiemɔ 7:9. Wɔkaneɔ akɛ: “Nii nɛɛ asɛɛ lɛ, mikwɛ, ni naa, asafo babaoo ni mɔ ko mɔ ko nyɛŋ akane, ni jɛ jeŋmaŋ-fɛɛ-jeŋmaŋ, kɛ akutsei, kɛ maji, kɛ majianɔ wiemɔi amli damɔ maŋtsɛsɛi lɛ hiɛ, kɛ Toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛŋ.”
Nyɛhaa wɔsusua Yohane 10:16 he klɛŋklɛŋ. Namɛi ji tooi lɛ? Ojogbaŋŋ, ebaahi akɛ aaaha ehi jwɛŋmɔ mli akɛ, awieɔ Yesu sɛɛnyiɛlɔi anɔkwafoi lɛ fɛɛ he akɛ tooi. Etsɛ ekaselɔi lɛ ni baaya ŋwɛi lɛ akɛ “asafoku bibioo” yɛ Luka 12:32. Mɛɛ asafoku? Tooi aku. “Asafoku bibioo” lɛ mli “tooi” lɛ baafee ŋwɛi Maŋtsɛyeli lɛ fa. Shi mɛi krokomɛi yɛ, mɛi ni yɔɔ hiɛnɔkamɔ kroko, ni Yesu buɔ amɛ hu akɛ tooi.
Wɔbaanyɛ wɔna enɛ yɛ Yohane yitso 10. Yɛ be mli ni ewie tooi ni tamɔ ebɔfoi lɛ, ni ebaafɔ amɛ nine kɛya ŋwɛi shihilɛ mli lɛ ahe lɛ sɛɛ lɛ, Yesu kɛfata he yɛ kuku 16 akɛ: “Ni miyɛ tooi krokomɛi ni jɛɛɛ tooi atsu nɛɛ mli; ni nomɛi hu, ja miŋɔ amɛ kɛba.” Yehowa Odasefoi ejɛ jeeŋmɔ eyoo akɛ Yesu miiwie gbɔmɛi ni yɔɔ shikpɔŋ nɔ wala he hiɛnɔkamɔ he yɛ kuku nɛɛ mli. Anɔkwafoi pii ni hi shi kɛtsɔ Kristofoi abe lɛ hiɛ, tamɔ Abraham, Sara, Noa, kɛ Maleaki, ná gbɛkpamɔi ni tamɔ nɛkɛ. No hewɔ lɛ, wɔbaanyɛ ni wɔkɛɛ akɛ amɛfata “tooi krokomɛi” ni yɔɔ Yohane 10:16 lɛ ahe yɛ gbɛ ni ja nɔ. Abaatee odasefoi anɔkwafoi ni tsɔ Kristofoi abe lɛ hiɛ lɛ ashi, yɛ Afii Akpe lɛ mli, ni amɛbaakase ni amɛbaakpɛlɛ Kristo Yesu nɔ, ni amɛbaatsɔmɔ Tookwɛlɔ Kpakpa lɛ “tooi krokomɛi.”
Wɔle hu akɛ, kɛjɛ be mli ni ŋwɛi kuu lɛ tsɛmɔ ba naagbee nɛɛ, akpekpei abɔ ebatsɔmɔ anɔkwa Kristofoi. Atsɛɔ mɛnɛɛmɛi hu yɛ gbɛ ni ja nɔ akɛ “tooi krokomɛi,” ejaakɛ amɛjeee “asafoku bibioo” lɛ fã. Shi moŋ, tooi krokomɛi ni yɔɔ ŋmɛnɛ lɛ kwɛɔ shikpɔŋ nɔ paradeiso mli ni amɛaahi lɛ gbɛ.
Agbɛnɛ, mɛni abaanyɛ awie yɛ mɛi ni “asafo babaoo” ni awie amɛhe yɛ Kpojiemɔ 7:9 lɛ ji he? Ojogbaŋŋ, kwɛmɔ kuku 13, kɛ sanebimɔ, “Namɛi ni, ni nɛgbɛ amɛjɛ?” Wɔnaa hetoo lɛ yɛ Kpojiemɔ 7:14: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ.” No hewɔ lɛ, mɛi ni feɔ “asafo babaoo” lɛ ji mɛi ni jɛ, loo amɛyi naa wala yɛ amanehulu kpeteŋkpele lɛ mli lɛ. Taakɛ kuku 17 kɛɔ lɛ, ‘abaatsɔɔ amɛ gbɛ kɛya wala nu bui ahe’ yɛ shikpɔŋ nɔ.
Shi, anuɔ shishi akɛ, dani mɛnɛɛmɛi aaaje amanehulu kpeteŋkpele ni baa lɛ mli lɛ, esa akɛ amɛfee mɛi ni amɛfɔ amɛtadei lɛ ahe momo yɛ Toobi lɛ la lɛ mli, ni amɛbatsɔmɔ anɔkwa jalɔi. No hewɔ lɛ, eyɛ mli akɛ Kpojiemɔ 7:9 miitsɔɔ bɔ ni asafo nɛɛ ji yɛ amanehulu lɛ sɛɛ moŋ, shi wɔbaanyɛ ni wɔkɛ wiemɔ, “asafo babaoo” lɛ ato mɛi fɛɛ ni yɔɔ shikpɔŋ nɔ hiɛnɔkamɔ, ni kɛ sɔɔmɔ krɔŋkrɔŋ haa Yehowa bianɛ, dani amanehulu kpeteŋkpele lɛ afɛ kɛ jeŋmaji lɛ atutuamɔ ni amɛkɛaaba apasa jamɔ nɔ lɛ ahe.
Yɛ sane lɛ naamuu mli lɛ, wɔbaanyɛ wɔkai akɛ, “tooi krokomɛi” lɛ hiɛ shishinumɔ ni mli lɛɛ, ni ekɔɔ Nyɔŋmɔ tsuji fɛɛ ni yɔɔ hiɛnɔkamɔ akɛ amɛaahi shi kɛya naanɔ yɛ shikpɔŋ nɔ lɛ ahe. Mɛi ni tamɔ gwaŋtɛŋi, ni amɛyi faaa tsɔ, ni ŋmɛnɛ abuaa amɛnaa akɛ “asafo babaoo” kɛ hiɛnɔkamɔ akɛ amɛbaahi shi kɛtsɔ amanehulu kpeteŋkpele ni baa lɛ mli lɛ fata he. Kristofoi anɔkwafoi ni yɔɔ wala mli ŋmɛnɛ lɛ ateŋ mɛi pii ji “tooi krokomɛi” lɛ mli bii kɛ agbɛnɛ “asafo babaoo” lɛ fa.
Esa akɛ ati mli akɛ, ehi jogbaŋŋ akɛ aaanu saji pɔtɛɛ nɛɛ ashishi diɛŋtsɛ moŋ, shi ehe ehiaaa ni Kristofonyo ko ahao ehe tsɔ yɛ wiemɔ he—nɔ ni abaanyɛ atsɛ lɛ akɛ wiemɔ mli kolimɔ lɛ. Paulo bɔ kɔkɔ yɛ mɛi ni ‘woɔ amɛhe nɔ’ ni kɛ amɛhe woɔ “ŋwanejeei kɛ naataamɔi” amli lɛ ahe. (1 Timoteo 6:4) Kɛ wɔ diɛŋtsɛ lɛ wɔyoo sɔrɔto-feemɔi komɛi ni yɔɔ wiemɔi amli lɛ, ehi. Ni kɛlɛ, esaaa akɛ wɔwieɔ wɔshiɔ mɔ ko ni kɛ Biblia mli wiemɔi tsuŋ nii pɛpɛɛpɛ lɛ yɛ mligbɛ loo kponɔgbɛ lɛ.