Nɔyelɔi ni Yɔɔ Mumɔŋ Shihilɛ He Lɛ
NAMƆ yeɔ je lɛ nɔ? Ani hewalɛ ko ni fe adesa nɔ yeɔ nɔ? Aloo Nyɔŋmɔ eshi adesai koni amɛbɔ amɛ diɛŋtsɛ amɛhe mɔdɛŋ? Yɛ nɛkɛ sanebimɔi nɛɛ ahetoo taomɔ mli lɛ, klɛŋklɛŋ lɛ, nyɛhaa wɔsusua sane ko ni ba yɛ Yesu Kristo sɔɔmɔ nitsumɔ be lɛ mli lɛ he.
Yɛ Yesu baptisimɔ lɛ sɛɛ etsɛɛɛ ni mumɔŋ bɔɔ nɔ̃ ko ni anaaa lɛ ni atsɛɔ lɛ Satan Abonsam baka lɛ. Beni etsiɔ ekaai lɛ ekome ta lɛ, Biblia lɛ kɛɛ: “Asaŋ Abonsam lɛ ŋɔ lɛ [Yesu] kɛtee gɔŋ kpeteŋkpele ni kwɔ ko nɔ, ni eŋɔ jeŋ maŋtsɛyeli hei fɛɛ kɛ amɛ nunyam lɛ etsɔɔ lɛ.” (Mateo 4:8) Kɛkɛ ni Satan kɛɛ Yesu akɛ: “Bo maŋɔ nɛkɛ hegbɛ nɛɛ fɛɛ kɛ amɛ nunyam lɛ maha; ejaakɛ mi aŋɔha, ni mɔ fɛɛ mɔ ni misumɔɔ lɛ, lɛ miŋɔhaa; no hewɔ lɛ bo lɛ, kɛji oookula shi oja mi lɛ, fiaa-kwa aaatsɔ onɔ̃.”—Luka 4:6, 7.
Satan kɛɛ eyɛ je nɛŋ maŋtsɛyelii fɛɛ, loo nɔyelii fɛɛ nɔ hewalɛ. Ani Yesu kɛɛ ebɛ mli? Dabi. Yɛ anɔkwale mli lɛ, ema enɛ nɔ mi yɛ be kroko mli kɛtsɔ Satan ni etsɛ lɛ “je nɛŋ lumɔ” lɛ nɔ.—Yohane 14:30.
Taakɛ Biblia lɛ tsɔɔ lɛ, Satan ji bɔfo yiwalɔ ni yɔɔ hewalɛ waa. Kristofonyo bɔfo Paulo kɛ Satan toɔ “mumɔi fɔji asafoi” lɛ ahe ni ewieɔ amɛhe akɛ “je nɛŋ lumɛi ni yɔɔ be-nɛ-be duŋ lɛ mli lɛ.” (Efesobii 6:11, 12) Agbɛnɛ hu, bɔfo Yohane kɛɛ “jeŋ muu lɛ fɛɛ ka mɔ fɔŋ lɛ mli.” (1 Yohane 5:19) Biblia mli wolo ni ji Kpojiemɔ lɛ kɛɔ akɛ Satan “shishiuɔ jeŋ muu lɛ fɛɛ.” (Kpojiemɔ 12:9) Kpojiemɔ feɔ Satan he mfoniri yɛ okadi feemɔ mli akɛ drako ni “ŋɔ lɛ diɛŋtsɛ ehewalɛ lɛ kɛ emaŋtsɛsɛi lɛ kɛ hegbɛ kpeteŋkpele” eha jeŋ maŋkwramɔ gbɛjianɔtoo lɛ.—Kpojiemɔ 13:2.
Jeŋ saji hu yeɔ odase akɛ hewalɛ fɔŋ ko miitsu nii, ni eekudɔ adesai kɛmiiye amɛhe awui. Mɛɛ yiŋtoo kroko yɔɔ ni no hewɔ ni adesa nɔyelii nyɛɛɛ ni amɛkɛ toiŋjɔlɛ aba lɛ? Mɛni hu baanyɛ aha gbɔmɛi ana hetsɛ kɛha amɛhe ni amɛgbegbee amɛhe lɛ? Bɔ ni ehe jɔ̃ ehe yɛ bɔ ni agbe gbɔmɛi aha yɛ maŋ ta ko mli hewɔ lɛ, mɔ ko ni kɛ ehiŋmɛi na nɔ ni tee nɔ lɛ kɛɛ: “Mileee bɔ ni fee ni enɛ ba. Efe hetsɛ̃. Mumɔ fɔŋ ko ji mɔ ni kɛ gbɔmɛi nɛɛ tsuɔ nii koni amɛgbegbee amɛhe.”
Mɔ ko Diɛŋtsɛ ni Teɔ Shi Ewoɔ Nyɔŋmɔ
Ŋmɛnɛ, mɛi pii heee yeee akɛ Satan Abonsam yɛ. Ni kɛlɛ, ejeee efɔŋ susumɔ ko kɛkɛ ni yɔɔ adesai ateŋ, taakɛ mɛi komɛi heɔ yeɔ lɛ. Biblia lɛ kɛ jeŋ saji fɛɛ tsɔɔ akɛ eji mɔ ko diɛŋtsɛ. Kɛfata he lɛ, Satan teɔ shi ewoɔ Yehowa Nyɔŋmɔ kwraa. Eyɛ mli akɛ Satan kɛ Nyɔŋmɔ yeee egbɔ. Akɛni Yehowa ji Bɔlɔ kɛ hewalɛ-fɛɛ tsɛ hewɔ lɛ, lɛ ji bɔɔ nii fɛɛ nɔ Nɔyelɔ ni ja.—Kpojiemɔ 4:11.
Nyɔŋmɔ ebɔɔɔ bɔɔ nɔ̃ fɔŋ koni ebate shi ewo lɛ. Shi moŋ, “Nyɔŋmɔ bii” ni ji ŋwɛibɔfoi lɛ ateŋ mɔ kome na pɛsɛmkunya akɔnɔ ko akɛ eeeshɔ̃ jamɔ ni ja ni akɛhaa Yehowa lɛ eha lɛ diɛŋtsɛ ehe. (Hiob 38:7; Yakobo 1:14, 15) Nɛkɛ akɔnɔ nɛɛ ha eje atua ni atseɔ ashiɔ Nyɔŋmɔ lɛ shishi. Akɛni etse atua hewɔ lɛ, nɛkɛ mumɔŋ bɔɔ nɔ nɛɛ fee ehe Satan (eshishi ji “shitee-kɛ-wolɔ”) kɛ Abonsam (eshishi ji “mɔheguɔgbelɔ”). Yɛ enɛɛmɛi fɛɛ hewɔ lɛ, obaasusu nɔ hewɔ ni aŋmɛ Satan gbɛ koni eye je lɛ nɔ lɛ he.
Nɔ Hewɔ ni Aŋmɛ Satan Gbɛ Koni Eye Nɔ
Ani okaiɔ nɔ ni Satan kɛɛ Yesu yɛ shikpɔŋ lɛ nɔyeli he lɛ? Satan kɛɛ: “Bo maŋɔ nɛkɛ hegbɛ nɛɛ fɛɛ . . . maha; ejaakɛ mi aŋɔha.” (Luka 4:6) Nakai wiemɔ lɛ tsɔɔ akɛ Satan Abonsam yeɔ nɔ yɛ Nyɔŋmɔ gbɛŋmɛɛ pɛ naa. Shi, mɛni hewɔ Nyɔŋmɔ eŋmɛ Satan gbɛ lɛ?
Nakai sanebimɔ lɛ hetoo kɔɔ saji ni ba yɛ Eden abɔɔ lɛ mli lɛ he, he ni Satan je enitsumɔ shishi yɛ akɛ jeŋ nɔyelɔ lɛ. Jɛmɛ Satan tsɔɔ yɛ akɛ Nyɔŋmɔ miiye nɔ yɛ gbɛ fɔŋ nɔ, akɛni eŋmɛɛɛ klɛŋklɛŋ nuu kɛ yoo, Adam kɛ Hawa gbɛ koni amɛnine ashɛ nɔ ko ni hi kɛha amɛ lɛ nɔ lɛ hewɔ. Taakɛ Satan tsɔɔ lɛ, kɛ amɛye tso yibii ni Nyɔŋmɔ egu eyeli lɛ, amɛbaaye amɛhe. Adam kɛ Hawa baaye amɛhe kwraa kɛjɛ Yehowa he. Amɛbaatsɔmɔ tamɔ Nyɔŋmɔ diɛŋtsɛ!—1 Mose 2:16, 17; 3:1-5.
Kɛtsɔ malemɔ yɛ nɛkɛ gbɛ nɔ kɛ Hawa lakamɔ ni etsɔ enɔ etsɔ Adam yiŋ koni eku Nyɔŋmɔ mla mli hewɔ lɛ, Satan kɛ klɛŋklɛŋ adesai enyɔ lɛ bawo ehiɛnyiɛmɔ kɛ kudɔmɔ shishi. Kɛkɛ ni Abonsam batsɔ amɛ nyɔŋmɔ, mɔ ni teɔ shi ewoɔ Yehowa. Ni heyeli moŋ aaaba lɛ, Adam kɛ Hawa batsɔmɔ nyɔji amɛha Satan, esha, kɛ gbele.—Romabii 6:16; Hebribii 2:14, 15.
Yɛ ejalɛ saneyeli ni yeɔ emuu lɛ naa lɛ, kulɛ Yehowa baanyɛ akpata Satan kɛ esɛɛnyiɛlɔi heei enyɔ lɛ ahiɛ amrɔ nɔŋŋ. (5 Mose 32:4) Kɛlɛ, ekɔɔ jeŋba he sane ko he. Satan ebi sane yɛ ja ni gbɛ ni Yehowa tsɔɔ nɔ eyeɔ nɔ lɛ ja lɛ he. Yɛ Nyɔŋmɔ nilee hewɔ lɛ, eŋmɛ gbɛ koni be ashwie mli koni anyɛ aye odase akɛ ehe ni atse he kɛjɛ lɛ kɛ oshara baa. Yehowa ŋmɛ atuatselɔi lɛ gbɛ koni amɛya nɔ amɛhi shi, eŋmɛ Adam kɛ Hawa gbɛ koni amɛfɔ bii.—1 Mose 3:14-19.
Eyɛ mli akɛ Adam shwiei lɛ ateŋ mɛi ni fa bako amɛhe shi amɛhako Yehowa nɔyeli moŋ, shi bɔ ni Nyɔŋmɔ kɛ mɛi ni jaa Lɛ lɛ yeɔ haa lɛ eye bɔ ni enɔ̃ lɛ nɔ kwɔ ha lɛ he odase. Yehowa nɔyeli-hegbɛ ni akpɛlɛɔ nɔ yɛ gbɛ kpakpa nɔ lɛ kɛ miishɛɛ kɛ anɔkwa shweshweeshwe feemɔ baa. Yɛ gbɛ kroko nɔ lɛ, haomɔi kɛ shweshweeshwe shihilɛ ni bɛ ejɛ adesa nɔyeli ni yɔɔ Satan hewalɛ shishi lɛ mli eba. Hɛɛ, “gbɔmɔ yeɔ enaanyo gbɔmɔ nɔ ni ekɛyeɔ ehe awui.” (Jajelɔ 8:9) Adesai anine shɛko shweshweeshwe shihilɛ diɛŋtsɛ kɛ naanɔ miishɛɛ nɔ yɛ adesa nɔyeli shishi yɛ jeŋ ni ka Satan hewalɛ mli nɛɛ mli. Shi kɛlɛ, yiŋtoo kpakpa yɛ ni aaadamɔ nɔ ana enɛ he jwɛŋmɔ kpakpa.
Satan Be lɛ Faaa!
Hewalɛ ni Satan yɔɔ yɛ shikpɔŋ nɔ lɛ hiɔ shi be kuku ko kɛkɛ. Yehowa eŋmɛŋ Satan nɔyeli gbɛ babaoo dɔŋŋ! Etsɛŋ ni ebaaha Abonsam he ajɔ. Nɔyelɔ hee baakwɛ shikpɔŋ nɔ saji anɔ, maŋtsɛ jalɔ ni Nyɔŋmɔ diɛŋtsɛ hala lɛ. Nakai Maŋtsɛ lɛ ji Yesu Kristo. Kpojiemɔ wieɔ be mli ni akɛ lɛ ta maŋtsɛsɛi nɔ yɛ ŋwɛi lɛ he akɛ: “Je nɛŋ maŋtsɛyeli lɛ etsɔ wɔ-Nuntsɔ [Yehowa] kɛ e-Kristo (mɔ ni efɔ lɛ mũ) lɛ nɔ.” (Kpojiemɔ 11:15) Biblia be-buu, kɛ Ŋmalɛ mli gbalɛ mlibaa fɛɛ yeɔ odase akɛ, sane nɛɛ ba yɛ afi 1914.—Mateo 24:3, 6, 7.
Biblia lɛ tsɔɔ nɔ ni ba beni akɛ Yesu ta maŋtsɛsɛi nɔ lɛ sɛɛ nɔŋŋ. Ekɛɔ akɛ: “Ni ta te shi yɛ ŋwɛi: Mikael [Yesu Kristo] kɛ ebɔfoi lɛ fa drako lɛ [Satan Abonsam] nɔ ta. Ni drako lɛ bɔfoi fata ehe kɛwuu, ni amɛnyɛɛɛ, ni asaŋ amɛnaaa gbɛ dɔŋŋ yɛ ŋwɛi. Ni ashɛ drako kpeteŋkpele lɛ afɔ, mɔ ni ji blema onufu lɛ ni atsɛɔ lɛ diabolo (naafolɔlɔ loo Abonsam) lɛ kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.”—Kpojiemɔ 12:7-9.
Mɛni baajɛ Satan ni ashwie lɛ kɛjɛ ŋwɛi lɛ mli aba? Mɛi ni yɔɔ ŋwɛi lɛ baanyɛ anyã, shi shikpɔŋ lɛ nɔ bii hu? Kpojiemɔ 12:12 kɛɔ akɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.” Satan ni ashwie lɛ kɛjɛ ŋwɛi lɛ kɛ kpoo ebaha shikpɔŋ lɛ nɔ bii lɛlɛŋ. The Columbia History of the World lɛ kɛɔ akɛ: “Afii Ejwɛ Ta ni Awuu yɛ 1914-1918 ni kɛ oshara kpeteŋkpele ba lɛ . . . tsɔɔ Anaigbɛ je lɛ akɛ enyɛɛɛ ebu hiŋmɛigbelemɔ he kɛjɛ lɛ diɛŋtsɛ ebuulufeemɔ loo kanyamɔ fɔŋ lɛ ahe. Anaigbɛ mumɔ lɛ damɔko shi diɛŋtsɛ kɛjɛko nakai nii ni hoso amɛ lɛ mli.”
Nɔ ni ekadi yinɔ nɛɛ amanehului lɛ amli wa kwraa fe mumɔ ni ekumɔ kwraa. Yesu gba akɛ: “Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔmɔ kɛ helai kɛ shikpɔŋhosomɔi aaaba hei sɔrɔtoi fɛɛ.” Egba tsɛŋemɔ helai hu. (Mateo 24:7, 8; Luka 21:11) Agbɛnɛ hu Biblia lɛ kɛɔ akɛ, yɛ Satan nibii agbɛjianɔtoo lɛ “naagbee gbii” lɛ amli lɛ, mɛi pii baatsɔmɔ “hesuɔlɔi, shikasuɔlɔi, . . . fɔlɔi anɔ toigbolɔi, . . . kpaŋmɔ mlikulɔi.” Gbɔmɛi baasumɔ “shwɛmɔ kɛ ŋɔɔmɔ [hu] fe Nyɔŋmɔ.”—2 Timoteo 3:1-5.
Tawuu, tsɛŋemɔ helai, hɔmɔ, shikpɔŋhosomɔi, kɛ jeŋba ni baa shi kwraa—nibii nɛɛ fɛɛ eba mli yɛ gbɛ ni da fe fɛɛ nɔ kɛjɛ 1914, taakɛ Biblia lɛ gba fɔ shi lɛ pɛpɛɛpɛ. Enɛɛmɛi tsɔɔ akɛ, ashɛ Nyɔŋmɔ kɛ gbɔmɔ henyɛlɔ—Satan Abonsam—ni mli efu lɛ kɛjɛ ŋwɛi afɔ ni amrɔ nɛɛ esa akɛ ekɛ emlifu aba shikpɔŋ nɛɛ nɔ. Shi Biblia lɛ hu tsɔɔ akɛ, aŋmɛŋ Satan gbɛ ni eya nɔ nɛkɛ dɔŋŋ. “Be fioo kɛkɛ” eshwɛ lɛ dani Harmagedon, be mli ni Nyɔŋmɔ kpataa jeŋ gbɛjianɔtoo ni Satan kudɔɔ lɛ hiɛ lɛ aba.
Mɛni baaba Satan nɔ yɛ nakai be lɛ mli? Bɔfo Yohane ŋma akɛ: “Ni mina bɔfo ko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfee lɛ kɛ kɔsɔŋkɔsɔ kpeteŋkpele ko yɛ edɛŋ. Ni emɔ drako lɛ, blema onufu lɛ, ni ji diabolo (Abonsam) kɛ Satan lɛ, ni efi lɛ afii akpe. Ni eŋɔ lɛ ewo bu kwɔŋkwɔŋ lɛ mli, ni eŋa eyi ni esɔo naa.” (Kpojiemɔ 20:1-3) Mɛɛ heyeli nɛ kɛha adesai ni piŋɔ lɛ!
Mlifilimɔ Yɛ Maŋtsɛyeli Nɔyeli Shishi
Akɛni Satan bɛ dɔŋŋ hewɔ lɛ, Nyɔŋmɔ Maŋtsɛyeli lɛ ni yɔɔ Yesu Kristo shishi lɛ baaye adesai ashihilɛ mli nibii fɛɛ kwa nɔ. Yɛ nɔ najiaŋ ni aaana nɔyelii pii yɛ shikpɔŋ nɔ lɛ, ŋwɛi nɔyeli kome pɛ baahi shi ni eye shibɔlemɔ ŋulami lɛ fɛɛ nɔ. Tawuu baafee nɔ ni bɛ dɔŋŋ, ni toiŋjɔlɛ baahi he fɛɛ he. Mɛi fɛɛ baahi shi yɛ ekomefeemɔ mli yɛ nyɛmimɛi asuɔmɔ mli yɛ Nyɔŋmɔ Maŋtsɛyeli lɛ nɔyeli shishi.—Lala 72:7, 8; 133:1; Daniel 2:44.
Mɛɛ nɔyelɔ nɛkɛ Yesu baaji? Beni eyɔɔ shikpɔŋ nɔ lɛ, ejie gbɔmɛi ahe suɔmɔ babaoo kpo. Yesu jɛ musuŋtsɔlɛ mli ekɛ niyenii ha mɛi ni hɔmɔ yeɔ amɛ. Etsa mɛi ni he yeɔ lɛ, eha shwilafoi na nii, mumuii wie, ni eha obubuafoi nyiɛ. Yesu tee gbohii ashi kɛba wala mli po! (Mateo 15:30-38; Marko 1:34; Luka 7:11-17) Nakai naakpɛɛ nii lɛ feɔ nibii ni ebaafee akɛ Maŋtsɛ lɛ he mfoniri. Kwɛ naakpɛɛ nii ni eeeji akɛ aaana nɔyelɔ ni feɔ ejurɔ babaoo nɛkɛ!
Mɛi ni baa amɛhe shi amɛhaa Yehowa nɔyeli lɛ anine baashɛ naanɔ jɔɔmɔi anɔ. Ŋmalɛi lɛ woɔ shi akɛ: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaala kɛ nyamɔ.” (Yesaia 35:5, 6) Be mli ni etsɔɔ nakai gbi ni yɔɔ nyam lɛ, bɔfo Yohane ŋma akɛ: “Ni minu gbee kpeteŋkpele ko jɛ maŋtsɛsɛi lɛ mli kɛɛ: ‘Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.’ ”—Kpojiemɔ 21:3, 4.
Miishɛɛ ni abaatsɔ Yehowa Nyɔŋmɔ nɔyeli ni yɔɔ e-Bi, Yesu Kristo dɛŋ lɛ nɔ akɛha lɛ baafe piŋmɔi fɛɛ ni ekolɛ wɔtsɔ mli yɛ ŋmɛnɛŋmɛnɛ nibii agbɛjianɔtoo ni Satan Abonsam yeɔ nɔ nɛɛ mli lɛ kɛteke nɔ. Yɛ Nyɔŋmɔ shiwoo jeŋ hee lɛ mli lɛ, gbɔmɛi biŋ akɛ, ‘Shi namɔ kwraa yeɔ nɔ lɛ?’ (2 Petro 3:13) Adesai toibolɔi baana miishɛɛ ni amɛbaafee shweshweeshwe yɛ Nɔyelɔi ni yɔɔ suɔmɔ ni yɔɔ mumɔi anɔyeli he lɛ, Yehowa kɛ Kristo shikpɔŋ nɔ nɔyeli he lɛ. Mɛni hewɔ ofeee ohiɛnɔkamɔ akɛ ooofata mɛi ni baafee amɛ shishibii lɛ ahe lɛ atuu?
[Mfoniri ni yɔɔ baafa 7]
Adesai baahi shi shweshweeshwe yɛ Nyɔŋmɔ Maŋtsɛyeli lɛ nɔyeli he ni yɔɔ shikpɔŋ nɔ lɛ mli
[He ni Mfoniri ni yɔɔ baafa 4 lɛ Jɛ]
NASA mfoniri