Gbɛ Leleoo ni Yaa Heyeli Mli
MƐI ni yɔɔ nilee lɛ ateŋ mɛi fioo ko pɛ jeɔ ŋwane akɛ adebɔɔ mli mlai kudɔɔ jeŋ muu lɛ fɛɛ. Nɛkɛ mlai nɛɛ kudɔɔ nɔ fɛɛ nɔ, kɛjɛ atɔm bibii anɔ aahu kɛyashi ŋulamii kushai ni ŋulamii akpekpei akpei abɔ yɔɔ mli lɛ anɔ. Eji jeee nakai kulɛ, anyɛŋ ato nɔ ko he gbɛjianɔ ni anyɛŋ anu nɔ ko kwraa shishi; kulɛ wala diɛŋtsɛ nyɛŋ ahi shi. Kɛtsɔ adebɔɔ mli mlai ashishinumɔ kɛ amɛkɛ nitsumɔ nɔ lɛ, adesai enyɛ amɛfee nibii wuji ni sa kadimɔ waa, tamɔ nyɔŋtsere lɛ nɔ nyiɛmɔ kɛ mfonirii ni hiɛ sui sɔrɔtoi ni ashaa kɛjɛɔ shikpɔŋ nɛɛ nɔ he fɛɛ he, aloo ashaa kɛjɛɔ hei ni bɛ wɔ shikpɔŋ nɛɛ niiaŋ kwraa, ni akɛbawoɔ wɔ tɛlivishin nɔ yɛ wɔshiai amli lɛ.
Shi jeŋba he mlai hu? Ani sɛɛnamɔi kɛ yibii kpakpai jɛɔ amɛnɔ yeli mli kɛbaa nakai nɔŋŋ? Etamɔ nɔ ni mɛi pii nuɔ he akɛ jeŋba he mlai bɛ, no hewɔ lɛ amɛhalaa jeŋ nilee loo jamɔ ni ŋmɛɔ nɔ fɛɛ nɔ feemɔ gbɛ, ni saa amɛ akɔnɔi lɛ.
Shi, mɛi krokomɛi hu yɛ ni kɔɔ gbɛ kroko, ‘gbɛ leleoo ni kɛ mɔ yaa wala mli’ taakɛ atsɔɔ yɛ Biblia lɛ mli lɛ. Esaaa ni efeɔ wɔ naakpɛɛ akɛ mɛi fioo ko pɛ ji mɛi ni kɔɔ gbɛ nɛɛ, ejaakɛ Yesu wie yɛ gbɛ leleoo lɛ he akɛ: “Mɛi fioo ji mɛi ni naa no.” (Mateo 7:14) Mɛni hewɔ mɛi fioo pɛ?
Ejaakɛ Nyɔŋmɔ mlai kɛ shishitoo tɛi kudɔɔ gbɛ leleoo lɛ nɔ nyiɛmɔ. Mɔ ko ni kɛ anɔkwayeli miisumɔ ni eshihilɛ kɛ Nyɔŋmɔ shishitoo mlai akpa gbee pɛ baana enɔ nyiɛmɔ he miishɛɛ. Nɔ ni tamɔɔɔ gbɛ tɛtrɛ̀ɛ, ni lakaa mɔ akɛ ehaa anaa heyeli shi yɛ anɔkwale mli lɛ eyeɔ mɔ nyɔŋ lɛ kwraa lɛ, gbɛ leleoo lɛ, ni tamɔ nɔ ni naatsii yɔɔ nɔ lɛ, haa mɔ yeɔ ehe yɛ gbɛi ni he hiaa fɛɛ nɔ. “Heyeli mla ni hi kɛwula shi” lɛ ji nɔ ni foɔ ehusui lɛ.—Yakobo 1:25.
Bɔ ni Gbɛ Leleoo lɛ Haa Heyeli
Eji anɔkwale akɛ, jeee be fɛɛ be gbɛ leleoo lɛ nɔ nyiɛmɔ feɔ mlɛo. Adesa fɛɛ adesa ni yɔɔ wala mli lɛ yeee emuu, ni eyɛ efɔŋ feemɔ henumɔ ko ni akɛfɔ lɛ. No hewɔ lɛ, ekolɛ eeeha mɔ ko agba afã fioo. Shi kɛlɛ, sɛɛnamɔi ni ‘gbɛ ni nɔ etsa’ lɛ nɔ nyiɛmɔ daa kɛbaa lɛ sa he-tsɔsemɔ aloo tsakemɔi ni he hiaa lɛ, ejaakɛ Nyɔŋmɔ ‘tsɔɔ wɔ nii ni he baaba sɛɛnamɔ aha wɔ.’—Yesaia 48:17; Romabii 3:23.
Akɛ nɔkwɛmɔ nɔ lɛ: Fɔlɔi ni le nii lɛ kɛ niyenii he naatsii ni tamɔ ‘gbɛ ni nɔ etsa’ haa amɛbii lɛ. Bei komɛi lɛ, enɛ tsɔɔ shiŋŋfeemɔ yɛ niyeli bei amli. Shi kɛ gbekɛbii lɛ dara saŋŋ lɛ, amɛhiɛ baasɔ amɛfɔlɔi atsɔsemɔ ni suɔmɔ yɔɔ mli nɛɛ. Akɛ onukpai lɛ, no mli lɛ amɛle bɔ ni niyenii ni hewalɛ yɔɔ mli he hiaa ha. Ni niyenii kpakpai sɔrɔtoi babaoo ni yɔɔ lɛ haŋ amɛnu he akɛ amɛyɛ naatsii ko shishi.
Yɛ mumɔŋ shishinumɔ naa lɛ, Nyɔŋmɔ feɔ nakai yɛ mɛi ni nyiɛ gbɛ leleoo ni kɛ mɔ yaa wala mli lɛ nɔ lɛ agbɛfaŋ. Edũɔ akɔnɔi kpakpai ni haa mɔ naa miishɛɛ kɛ anɔkwa heyeli yɛ mɛi ni he jɔ lɛ amli. Efeɔ enɛ kɛtsɔɔ e-Wiemɔ, ni ji Biblia lɛ ni ekɛhaa lɛ nɔ. Kɛfata he lɛ, ehaa wɔ hegbɛ ni wɔsɔle wɔbi emumɔ lɛ ni eye ebua wɔ, ni efãa wɔ ni wɔkɛ nanemɛi Kristofoi krokomɛi, ni baanyɛ awo wɔ hewalɛ ni wɔya nɔ wɔnyiɛ gbɛ leleoo lɛ nɔ lɛ abɔ. (Hebribii 10:24, 25) Hɛɛ, Nyɔŋmɔ lɛ, suɔmɔ ji lɛ, ni anaa su ni fe fɛɛ nɛɛ yɛ eyiŋtoi kɛ gbɛ ni etsɔɔ nɔ etsuɔ he nii lɛ fɛɛ mli.—1 Yohane 4:8.
Kɛ suɔmɔ, toiŋjɔlɛ, ejurɔfeemɔ, henɔyeli, kɛ Nyɔŋmɔ mumɔ lɛ yibii krokomɛi lɛ fa babaoo lɛ, no lɛ gbɛ leleoo lɛ nɔ nyiɛmɔ efeee nɔ ni naatsii yɔɔ mli. Taakɛ ŋmalɛi lɛ kɛɔ lɛ, “enɛɛmɛi lɛ mla ko eguuu.” (Galatabii 5:22, 23) “He ni Nuntsɔ [Yehowa] mumɔ lɛ yɔɔ lɛ, jɛi heyeli yɔɔ.” (2 Korintobii 3:17) Amrɔ nɛɛ po, anɔkwa Kristofoi miina nɛkɛ heyeli nɛɛ mli ŋɔɔmɔi lɛ eko. Amɛye amɛhe kɛjɛ gbeyeishemɔi ni haoɔ gbɔmɛi ŋmɛnɛ, tamɔ wɔsɛɛ be he gbeyeishemɔ kɛ gbele he gbeyeishemɔ ni damɔ apasa hemɔkɛyeli nɔ lɛ, ateŋ babaoo he. Kwɛ bɔ ni eyɔɔ miishɛɛ akɛ wɔɔsusu wɔsɛɛ be he, beni “shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ”! (Yesaia 11:9) No mli lɛ, awuiyeli he gbeyeishemɔ po bɛ dɔŋŋ. Kladowai kɛ samfɛji amli dadei bɛ dɔŋŋ kɛmiiya naanɔ. Mɔ fɛɛ mɔ baana heyeli kɛ shweshweeshwe feemɔ—shwane kɛ nyɔɔŋ, yɛ shia kɛ agbo naa fɛɛ. No baafee heyeli diɛŋtsɛ!
Ama Nyɔŋmɔ Yelikɛbuamɔ nɔ Mi Aha Wɔ
Eji anɔkwale akɛ, ni aaahi shi yɛ Nyɔŋmɔ shishitoo mlai anaa lɛ biɔ mɔdɛŋbɔɔ, shi kɛlɛ, “ekitai lɛ waaa,” kɛha adesai ni yeee emuu po. (1 Yohane 5:3) Yɛ be mli ni wɔfeɔ tsakemɔi kɛha gbɛ leleoo lɛ nɔ nyiɛmɔ ni wɔnuɔ sɛɛnamɔi ni jɛɔ mli kɛbaa lɛ ahe lɛ, wɔnaa nyɛɛ ko ni yaa nɔ edaa be fɛɛ be wɔhaa nifeemɔi kɛ susumɔi ni kadiɔ mɛi ni nyiɛɔ gbɛ tɛtrɛ̀ɛ lɛ nɔ lɛ. (Lala 97:10) Nyɔŋmɔ mlai anɔ yeli kɛ henilee kpakpa ni yɔɔ wɔ fɛɛ wɔmli lɛ kpaa gbee. Yɛ “tsuiŋdɔlɛ” kɛ “mumɔ ni ekumɔ” ni anaa yɛ mɛi pii agbɛfaŋ ŋmɛnɛ lɛ najiaŋ lɛ, Nyɔŋmɔ woɔ shi akɛ: “Naa, mitsuji lɛ aaala kɛ tsuijurɔ.” Hɛɛ, tsui ni Yehowa etsɔse lɛ lɛ naa miishɛɛ kɛ heyeli.—Yesaia 65:14.
Yesu gbo koni wɔna heyeli diɛŋtsɛ. Biblia lɛ kɛɔ akɛ: “Nɛkɛ Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) Amrɔ nɛɛ, Yesu kɛ nakai afɔleshaa lɛ mli sɛɛnamɔi lɛ miitsu nii ákɛ Nyɔŋmɔ ŋwɛi Maŋtsɛyeli lɛ nɔ Maŋtsɛ. Be fioo sɛɛ, yɛ “amanehulu kpeteŋkpele,” ni ji be mli ni gbɛ tɛtrɛ̀ɛ kɛ mɛi ni nyiɛɔ nɔ lɛ baaba amɛ naagbee lɛ sɛɛ lɛ, agbɛnɛ ebaabɔi adesai toibolɔi lɛ kudɔmɔ yɛ tsuishitoo mli kɛnyiɛ gbɛ leleoo lɛ jekɛmɔ ni eshwɛ lɛ nɔ aahu kɛyashi enaagbee, adesa emuuyeli mli. (Kpojiemɔ 7:14-17; Mateo 24:21, 29-31) Yɛ naagbee lɛ, wɔbaana shiwoo ni yɔɔ nyam nɛɛ mlibaa mli niiashikpamɔ diɛŋtsɛ, akɛ: “Bɔɔ nii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.” Heyeli ko bɛ ni baafe heyeli ni Nyɔŋmɔ kɛbaaha nɛɛ. Abaajie gbele po.—Romabii 8:21; Kpojiemɔ 21:3, 4.
Kɛ mɔ ko na ni enu he ni gbɛ leleoo lɛ yaa lɛ shishi jogbaŋŋ lɛ, enyɛɔ eyeɔ ebuaa lɛ waa ni ehalaa gbɛ nɛɛ ni eyaa nɔ enyiɛɔ nɔ daa. Ayeɔ abuaa gbekɛbii titri koni amɛsusu nii ahe kɛya shɔŋŋ, ni amɛmli akafu yɛ nɔ ni amɛbuɔ akɛ eji naatsii ni Nyɔŋmɔ shishitoo mlai kɛshwieɔ amɛnɔ lɛ hewɔ. Amɛbanaa enɛ akɛ Nyɔŋmɔ suɔmɔ lɛ he odaseyeli, kɛ agbɛnɛ hu ákɛ hebuu nɔ kɛha nibii fɔji ni jɛɔ gbɛ tɛtrɛ̀ɛ lɛ nɔ kɛbaa lɛ. (Hebribii 12:5, 6) Shi kɛlɛ, esa akɛ mɔ ato etsui shi, ni ekai akɛ eheɔ be dani anaa Nyɔŋmɔ jamɔ sui kɛ akɔnɔi kpakpai, tamɔ bɔ ni eheɔ be dani tso ni woɔ aduawa lɛ woɔ yibii kpakpai lɛ. Shi ja akwra tso lɛ ni ashwie nɔ nu dani ebaawo yibii.
No hewɔ lɛ kasemɔ Nyɔŋmɔ Wiemɔ lɛ, okɛ Kristofoi krokomɛi abɔ, ni ‘osɔle daa’ kɛha mumɔ krɔŋkrɔŋ lɛ namɔ. (1 Tesalonikabii 5:17) Okɛ ohe afɔ Nyɔŋmɔ nɔ ni eye ebua bo ni “[ojaje] otempɔŋi lɛ.” (Abɛi 3:5, 6) Shi ani enɛ fɛɛ baahi feemɔ? Ani enyɛɔ etsuɔ nii lɛlɛŋ? Hɛɛ, etsu nii kɛha Tom, kɛ agbɛnɛ kɛha Mary hu, mɛi ni atsĩ amɛ tã yɛ sane ni tsɔ enɛ hiɛ lɛ mli lɛ.
Amɛkpa Gbɛ Tɛtrɛ̀ɛ lɛ Nɔ Nyiɛmɔ
Tom ŋma akɛ: “Yɛ afii 70 lɛ teŋ gbɛ lɛ, wɔkɛ Yehowa Odasefoi kpe beni amɛteŋ mɔ kome ba wɔ ŋɔɔ yɛ wɔshia lɛ. Sanegbaa lɛ tsa nɔ kɛtee Biblia lɛ kasemɔ mli. Fiofio, kɛkɛ ni mibɔi mishihilɛ jajemɔ. Abaptisi mi yɛ 1982 mli, ni amrɔ nɛɛ miisɔmɔ yɛ asafo ni miyɔɔ mli lɛ mli. Amrɔ nɛɛ abaptisi wɔ binuu lɛ hu. Midaa miŋa shi waa akɛ ena tsui eha mi aahu yɛ nakai afii lɛ amli fɛɛ dani mibana anɔkwale lɛ. Ni nɔ ni fe fɛɛ ji akɛ, midaa Yehowa kɛ e-Bi, Kristo Yesu shi, yɛ nibii fɛɛ ni amɛha wɔ kɛ hiɛnɔkamɔ ni wɔyɔɔ amrɔ nɛɛ kɛha wɔsɛɛ lɛ hewɔ.”
Ni Mary hu? Ojogbaŋŋ, enu he akɛ Nyɔŋmɔ kɛ ehe ekeŋ lɛ kɔkɔɔkɔ, shi eesumɔ ni ekase ehe nii hu yɛ ebii lɛ ahewɔ. Beni ena ele akɛ Yehowa Odasefoi miitsɔɔ enaanyo ko Biblia mli saji lɛ, lɛ hu ebi ni aye abua lɛ. Shi kɛlɛ, subaŋi gbohii ni eka ehe lɛ ha ehiɛyaa bawa saŋŋ. Nikasemɔ lɛ tsɔ hiɛyaa kɛ sɛɛsɛɛ-baa bei sɔrɔtoi amli. Shi, ebiyoo ni eye afii kpawo lɛ tee nɔ ewo lɛ hewalɛ be fɛɛ be. “Onijiaŋ akaje wui, Awo. Obaanyɛ oye omanye!” taakɛ ekɛɔ lɛ lɛ. Kɛkɛ lɛ Mary emia ehiɛ waa kɛtsa nikasemɔ lɛ nɔ.
Beni ehemɔ-feemɔ wu, ni lɛ hu ekɛ tsofai fɔji tsuɔ nii lɛ, ku esɛɛ eba shia lɛ, lɛ hu ebafata nikasemɔ lɛ he. Yɛ naagbee lɛ, amɛyi enyɔ lɛ fɛɛ amɛye amɛsubaŋi fɔji lɛ anɔ. No sɛɛ lɛ, beni amɛkɛ amɛgbalashihilɛ lɛ wo mla shishi ni amɛkɛ amɛhe ha kɛha baptisimɔ sɛɛ lɛ, amɛna miishɛɛ babaoo, ni nakai be mli amɛnu he klɛŋklɛŋ kwraa akɛ amɛtsɔ weku diɛŋtsɛ. Dɔlɛ sane ji akɛ, yɛ naagbee lɛ AIDS gbe Mary, shi egbo yɛ be mli ni ekɛ etsui ema Biblia mli gbohiiashitee kɛ shikpɔŋ nɔ paradeiso shihilɛ, ni ajie gbɛ tɛtrɛ̀ɛ lɛ nɔ nibii fɔji fɛɛ kɛjɛ nɔ lɛ he shiwoo lɛ nɔ.
Hɛɛ, abaanyɛ aje gbɛ tɛtrɛ̀ɛ ni lɛɛ ni kɛ mɔ yaa hiɛkpatamɔ mli lɛ nɔ. Kristo Yesu wie akɛ: “Enɛ ji naanɔ wala lɛ, akɛ amɛaana bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Belɛ, mɛni hewɔ otswaaa ofai shi akɛ obaanyiɛ gbɛ leleoo ni kɛ mɔ yaa wala mli lɛ nɔ? Kɛ oŋɔ nɔ ni okaseɔ yɛ Nyɔŋmɔ Wiemɔ lɛ mli lɛ oto otsui mli ni okɛtsu nii lɛ, no lɛ bo diɛŋtsɛ obaana Biblia mli shiwoo ni haa mɔ tsui naa miishɛɛ nɛɛ mli niiashikpamɔ, akɛ: “Ni nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:32.