Nuu Hiɛkɔ̃lɔ Lɛ

HEBRI wiemɔ lɛ yɛ shishitoo wiemɔ kome pɛ kɛha “awuŋayeli.” Kɛ akɛmiito adesai eshafeelɔi ahe lɛ, abaanyɛ atsɔɔ Hebri wiemɔ lɛ shishi akɛ “hiɛkɔ̃ɔ” loo “hetsɛ̃.” (1 Mose 26:14; Jajelɔ 4:4) Shi, Hela wiemɔ lɛ yɛ wiemɔi fe ekome kɛha “awuŋayeli.” Wiemɔ zeʹlos, taakɛ Hebri nɔ̃ lɛ ji lɛ, baanyɛ akɔ awuŋayeli fɔŋ kɛ nɔ ni ja fɛɛ he. Hela wiemɔ kroko, phthoʹnos, kɔɔ nɔ ni ji efɔŋ lɛ pɛ he. Atsɔɔ shishi be fɛɛ be yɛ New World Translation lɛ mli akɛ “hiɛkɔ̃ɔ.”

Te akɛ wiemɔ phthoʹnos tsu nii yɛ blema Hela aha tɛŋŋ? The Anchor Bible Dictionary lɛ kɛɔ akɛ: “Ákɛ mɔ ni tamɔɔɔ nuu hiɛjoolɔ lɛ, jeee akɛ mɔ ni phthonos haoɔ lɛ lɛ miisumɔ nibii ni etaooo ni mɔ kroko nine ashɛ nɔ lɛ; esumɔɔɔ kɛkɛ ni eyaje nakai mɔ kroko lɛ dɛŋ. Esoro lɛ yɛ nuu mpleshilɔ lɛ he, ejaakɛ oti ni ma ehiɛ, ni tamɔɔɔ nuu mpleshilɔ lɛ nɔ ji akɛ, jeee ni enine ashɛ nɔ, shi moŋ ni mɛi krokomɛi anine akashɛ nɔ.”

Yɛ bei pii amli lɛ, nuu hiɛkɔlɔ lɛ leee akɛ lɛ diɛŋtsɛ esubaŋ titri ji nɔ ni kɛ enaagbai lɛ baa. Nakai wiemɔi komekomei ashishitsɔɔmɔ wolo lɛ nɔŋŋ tsɔɔ mli akɛ “Phthonos sui sɔrɔtoi lɛ ekome ji mɔ ni hiɛ bɛ ehe nɔ ni eji lɛ. Kɛ atsɛ phthoneros nuu ni hiɛ bɛ ehe nɔ lɛ akɛ ebu ejeŋba lɛ bem lɛ, ebaakɛɛ lɛ diɛŋtsɛ ehe kɛ mɛi krokomɛi akɛ, mɛi ni etutuaa amɛ lɛ sa nakai, ni ákɛ bɔ ni jalɛ sane bɛ shihilɛ lɛ mli lɛ tsirɛɔ lɛ ni ewieɔ eshiɔ. Kɛ abi lɛ nɔ hewɔ ni ewieɔ naanyo ko he taakɛ efeɔ lɛ, ebaakɛɛ akɛ ewiemɔ-kɛ-shimɔ lɛ hi kɛha enaanyo lɛ.”

Sanekpakpa ŋmalalɔi Mateo kɛ Marko kɛ Hela wiemɔ phthoʹnos tsu nii amɛkɛtsɔɔ yiŋtoo ni mɛi ni ha agbe Yesu lɛ yɔɔ lɛ mli. (Mateo 27:18; Marko 15:10) Hɛɛ, hetsɛ̃ ji nɔ ni tsirɛ amɛ. Nakai henumɔ fɔŋ lɛ nɔŋŋ eha mɛi ni ekwa hemɔkɛyeli lɛ etsɔmɔ mɛi ni nyɛ̃ɛɔ amɛ tsutsu nyɛmimɛi lɛ waa lɛ. (1 Timoteo 6:3-5) Ebɛ naakpɛɛ akɛ atsiɔ hii hiɛkɔ̃lɔi agbɛ kɛjɛɔ Nyɔŋmɔ Maŋtsɛyeli lɛ mlibotemɔ he! Yehowa Nyɔŋmɔ efa akɛ mɛi fɛɛ ni baaya nɔ “amɛyimɔ tɔ kɛ nyɛ̃ɛ” lɛ “sa gbele.”—Romabii 1:29, 32; Galatabii 5:21.

[Mfonirii ni yɔɔ baafa 7]

Kaaha hiɛkɔ̃ɔ miifite oshihilɛ