Sanebimɔi ni Jɛ Kanelɔi Adɛŋ

Ani wɔbaanyɛ wɔkɛɛ akɛ, Nyɔŋmɔ tsuji ni yɔɔ ŋmɛnɛ, ni yɔɔ shikpɔŋ nɔ hiɛnɔkamɔ lɛ yɛ Nyɔŋmɔ mumɔ lɛ falɛ ko tamɔ bɔ ni Kristofoi ni akɛ mumɔ efɔ amɛ mu lɛ yɔɔ lɛ?

Sanebimɔ nɛɛ jeee ehee. Atsɔɔ sanebimɔ nɛɛ nɔŋŋ mli yɛ “Sanebimɔi ni Jɛ Kanelɔi Adɛŋ” ni je kpo yɛ April 15, 1952 Blɔfo Buu-Mɔɔ lɛ mli lɛ mli. Kɛjɛ nakai be lɛ mli kɛbaa nɛɛ, mɛi pii ebatsɔmɔ Odasefoi, no hewɔ lɛ wɔbaanyɛ wɔsusu sane lɛ he ekoŋŋ, koni wɔtsɔ nakai feemɔ nɔ wɔti nɔ ni akɛɛ klɛŋklɛŋ lɛ mli.

Titri lɛ, hetoo lɛ ji, hɛ̃ɛ, nyɛmimɛi hii kɛ yei anɔkwafoi ni ji tooi krokomɛi lɛ kɛ mɛi ni afɔ amɛ mu lɛ fɛɛ nine baanyɛ ashɛ Nyɔŋmɔ mumɔ krɔŋkrɔŋ lɛ nɔ pɛpɛɛpɛ.—Yohane 10:16.

Shi enɛ etsɔɔɔ akɛ mumɔ lɛ tsuɔ nii nakai nɔŋŋ yɛ aŋkroaŋkroi fɛɛ nɔ. Kaimɔ tsuji anɔkwafoi ni hi shi dani Kristofoi abei lɛ shɛ, ni eka shi faŋŋ akɛ amɛnine shɛ Nyɔŋmɔ mumɔ lɛ nɔ lɛ. Yɛ hewalɛ ni jɛ mumɔ lɛ ŋɔɔ hewɔ lɛ, amɛteŋ mɛi komɛi gbe kooloi awuiyelɔi, amɛtsa helai, ni amɛtee gbohii ashi po. Ni mumɔ lɛ he miihia koni amɛnyɛ amɛŋmala Biblia mli woji ni jɛ mumɔŋ lɛ. (Kojolɔi 13:24, 25; 14:5, 6; 1 Maŋtsɛmɛi 17:17-24; 2 Maŋtsɛmɛi 4:17-37; 5:1-14) Buu-Mɔɔ lɛ kɛɛ: “Eyɛ mli akɛ amɛjeee kuu ni afɔ amɛ mu lɛ mli bii moŋ, shi mumɔ krɔŋkrɔŋ yiɔ amɛmli obɔ.”

Kɛ akwɛ enɛ yɛ gbɛ kroko nɔ lɛ, susumɔ hii kɛ yei ni hi shi yɛ klɛŋklɛŋ afii oha lɛ mli, ni akɛ mumɔ krɔŋkrɔŋ fɔ amɛ mu, ni amɛbatsɔmɔ Nyɔŋmɔ mumɔŋ bii ni yɔɔ ŋwɛi hiɛnɔkamɔ lɛ ahe okwɛ. Afɔ amɛ fɛɛ mu, shi no etsɔɔɔ akɛ, yɛ no sɛɛ lɛ, mumɔ lɛ tsu nii yɛ gbɛ kome nɔ yɛ amɛ fɛɛ nɔ. Enɛ jeɔ kpo faŋŋ yɛ 1 Korintobii yitso 12. Bɔfo Paulo wieɔ mumɔ lɛ nikeenii lɛ ahe yɛ jɛmɛ. Wɔkaneɔ yɛ kukuji 8, 9, kɛ 11 (NW), akɛ: “Shi mɔ ko lɛ atsɔ mumɔ lɛ nɔ aha lɛ nilee wiemɔ; ni mɔ kroko hu aha lɛ niiashishinamɔ wiemɔ yɛ nakai mumɔ lɛ nɔŋŋ naa; mɔ ko lɛ, aha lɛ hemɔkɛyeli yɛ nakai mumɔ lɛ nɔŋŋ mli; ni mɔ kroko hu lɛ tsamɔ duromɔ keenii yɛ nakai mumɔ lɛ nɔŋŋ mli. . . . Shi nɛkɛ nibii nɛɛ fɛɛ, mumɔ kome lɛ nɔŋŋ tsuɔ, ni ejaa mli ehaa mɔ fɛɛ mɔ aŋkroaŋkro, bɔ ni esumɔɔ.”

Nɔ ni sa kadimɔ ji akɛ, jeee mɛi ni afɔ amɛ mu yɛ nakai blema beaŋ lɛ fɛɛ yɔɔ mumɔ lɛ naakpɛɛ nikeenii lɛ eko. Paulo tsi asafo ko tã yɛ 1 Korintobii yitso 14, ni mɔ ko yɛ nikeenii ni ji lilɛii sɔrɔtoi awiemɔ, shi mɔ ko bɛ mli ni yɔɔ shishitsɔɔmɔ nikeenii lɛ. Shi kɛlɛ, akɛ mumɔ lɛ fɔ amɛteŋ mɔ fɛɛ mɔ mu yɛ mra be ko mli. Ani nilee aaahi mli akɛ aaakɛɛ akɛ, nyɛmi nuu ni yɔɔ lilɛii sɔrɔtoi awiemɔ lɛ yɛ mumɔ lɛ babaoo fe mɛi krokomɛi ni yɔɔ jɛmɛ lɛ? Dabi. Nɔ ko eŋmɛɛɛ mɛi krokomɛi ni afɔ amɛ mu lɛ, tamɔ nɔ ni amɛnyɛɛɛ amɛnu Biblia lɛ shishi jogbaŋŋ tamɔ mɔ kroko lɛ aloo amɛnyɛɛɛ amɛkpee kaai anaa tamɔ lɛ. Mumɔ lɛ tsu nii yɛ gbɛ krɛdɛɛ ko nɔ yɛ nyɛmi ni nyɛɔ ekɛ lilɛii sɔrɔtoi wieɔ lɛ nɔ. Kɛlɛ, ehe miihia ni lɛ kɛ amɛ fɛɛ abɛŋkɛ Yehowa ni ‘amɛya nɔ amɛyimɔ obɔbɔ kɛ mumɔ’ taakɛ Paulo ŋma lɛ.—Efesobii 5:18.

Yɛ shwɛɛnii ni yɔɔ ŋmɛnɛ lɛ ahe lɛ, eji anɔkwale akɛ amɛnine eshɛ Nyɔŋmɔ mumɔ lɛ nɔ. Ekɛ amɛ tsu nii yɛ gbɛ krɛdɛɛ ko nɔ yɛ be ko mli—beni afɔ amɛ mu ni aŋɔ amɛ akɛ mumɔŋ bii lɛ. Yɛ no sɛɛ lɛ, ‘amɛyaa nɔ amɛyimɔɔ obɔbɔ kɛ mumɔ,’ amɛnine shɛɔ eyelikɛbuamɔ nɔ yɛ be mli ni amɛtaoɔ ni amɛnu Biblia lɛ shishi jogbaŋŋ, amɛnyiɛɔ shiɛmɔ nitsumɔ lɛ hiɛ, loo amɛkɛ kaai kpeɔ—nɔ ni baa amɛnɔ yɛ teemɔŋ akɛ aŋkroaŋkroi loo gbɛjianɔtoo naa nɔ lɛ.

Eyɛ mli akɛ “tooi krokomɛi” lɛ amli bii lɛ nako mufɔɔ he niiashikpamɔ nɛɛ eko moŋ, shi amɛ hu amɛnine shɛɔ mumɔ krɔŋkrɔŋ lɛ nɔ yɛ gbɛi krokomɛi anɔ. April 15, 1952 Blɔfo Buu-Mɔɔ lɛ kɛɛ:

“ ‘Tooi krokomɛi’ lɛ ni yɔɔ ŋmɛnɛ lɛ tsuɔ shiɛmɔ nitsumɔ ni shwɛɛnii lɛ tsuɔ lɛ nɔŋŋ eko, yɛ shihilɛi ni mli wawai lɛ nɔŋŋ shishi, ni amɛjieɔ anɔkwayeli kɛ emuuyeli lɛ nɔŋŋ kpo. Amɛ fɛɛ amɛyeɔ nii yɛ mumɔŋ okpɔlɔ lɛ nɔŋŋ he, amɛyeɔ niyenii kome lɛ nɔŋŋ eko, ni amɛkpɛlɛɔ anɔkwalei lɛ nɔŋŋ nɔ. Akɛni amɛji shikpɔŋ nɔ kuu, ni amɛyɔɔ shikpɔŋ nɔ hiɛnɔkamɔi kɛ shikpɔŋ nɔ nibii ahe miishɛɛ waa hewɔ lɛ, amɛkɛ amɛhe baawo Ŋmalɛi ni kɔɔ shikpɔŋ nɔ shihilɛi ahe yɛ jeŋ hee lɛ mli lɛ amli babaoo; yɛ be mli ni shwɛɛnii ni afɔ amɛ mu, ni yɔɔ ŋwɛi hiɛnɔkamɔi, ni yɔɔ mumɔ lɛ nibii ahe miishɛɛ babaoo lɛ, kɛ hiɛdɔɔ baakase nakai nibii lɛ ahe nii babaoo yɛ Nyɔŋmɔ Wiemɔ lɛ mli. . . . Kɛlɛ, eji anɔkwale akɛ, nakai anɔkwalei lɛ kɛ nakai shishinumɔ lɛ nɔŋŋ yɛ kɛha kui enyɔ lɛ fɛɛ, ni bɔ ni aŋkroaŋkroi lɛ kɛ amɛhe haa nikasemɔ lɛ nɔ adamɔɔ anaa ŋwɛi kɛ shikpɔŋ nɔ nibii ahe shishinumɔ ni amɛyɔɔ. Nuntsɔ lɛ mumɔ lɛ yɛ kɛha kui enyɔ lɛ fɛɛ pɛpɛɛpɛ, ni akɛ nilee kɛ shishinumɔ haa kui enyɔ lɛ fɛɛ pɛpɛɛpɛ, ni hegbɛi ni amɛkɛaanu shishi lɛ yɛ pɛpɛɛpɛ.”