Sanebimɔi ni Jɛ Kanelɔi Adɛŋ

Amaniɛbɔi ni nine eshɛ nɔ afii komɛi nɛ lɛ tsɔɔ akɛ, gbɔmɛi ni yeɔ Kaimɔ lɛ nibii lɛ eko lɛ ayifalɛ tee hiɛ fioo. Ani enɛ tsɔɔ akɛ, akɛ mumɔ krɔŋkrɔŋ miifɔ mɛi heei pii amu?

Yiŋtoo kpakpa yɛ ni aaadamɔ nɔ ahe aye akɛ, agbe Kristofoi 144,000 ni afɔ amɛ mu lɛ ayibɔ lɛ naa afii nyɔŋmai abɔ ni eho nɛ.

Wɔkaneɔ nakai kuu fioo lɛ mli klɛŋklɛŋ bii lɛ ahe sane yɛ Bɔfoi lɛ Asaji 2:1-4, akɛ: “Ni beni Pentekoste gbi . . . lɛ shɛ lɛ, amɛ fɛɛ amɛnaa bakpe shi kɛ jwɛŋmɔ kome yɛ he kome. Ni trukaa lɛ gbɛɛmɔ ko ni tamɔ ahum, ni tswaa waa jɛ ŋwɛi ba, ni ebayi shia, he ni amɛtara lɛ fɛɛ obɔ. Ni lilɛii ni agbalagbalaa mli ni tamɔ lalilɛii pue; ni ebatara amɛyiteaŋ ekomekome; ni mumɔ krɔŋkrɔŋ bayimɔ amɛ fɛɛ amɛmli obɔbɔ, ni amɛbɔi wiemɔi sɔrɔtoi awiemɔ, taakɛ bɔ ni mumɔ lɛ ŋɔwo amɛnaa lɛ.”

Yɛ no sɛɛ lɛ, Yehowa hala mɛi krokomɛi, ni ekɛ mumɔ krɔŋkrɔŋ fɔ amɛ mu. Akɛ akpei abɔ bafata he yɛ Kristojamɔ shishijee afii lɛ amli. Yɛ Kaimɔ lɛ yeli shishi yɛ wɔ bei nɛɛ amli lɛ, wielɔ lɛ gbalaa jwɛŋmɔ kɛyaa Paulo wiemɔi ni yɔɔ Romabii 8:15-17, ni tsiɔ tã akɛ mɛi ni afɔ amɛ mu lɛ anine shɛɔ ‘biiatsɔmɔ nɔ’ lɛ nɔ shii abɔ. Paulo kɛfata he akɛ, mumɔ krɔŋkrɔŋ ni amɛnine shɛɔ nɔ lɛ ‘kɛ amɛ mumɔ lɛ yeɔ odase akɛ Nyɔŋmɔ bii ji amɛ, Kristo nanemɛi niyelɔi.’ Mɛi ni yɔɔ mumɔ lɛ mufɔɔ nɛɛ le diɛŋtsɛ akɛ eji anɔkwale. Ejeee nɔ ko ni ashweɔ ni ana, aloo henumɔŋ nɔ ko kpojiemɔ kɛ bɔ ni amɛsusuɔ amɛhe bɔ ni esaaa.

Wɔnuɔ shishi akɛ nɛkɛ ŋwɛi tsɛmɔ nɛɛ tee nɔ aahu kɛtsɔ afii ohai abɔ lɛ amli, eyɛ mli akɛ, yɛ be ni atsɛɔ lɛ Duŋ Bei lɛ amli lɛ, ekolɛ bei shɛɔ ni mɛi ni afɔ amɛ mu lɛ ayi faaa kwraa.a Beni aku sɛɛ ato anɔkwa Kristojamɔ ama shi kɛmiiba nyɛsɛɛ afii oha lɛ naagbee gbɛ lɛ, atsɛ mɛi pii ni ahala amɛ. Shi etamɔ nɔ ni 1930 afii lɛ teŋgbɛ ni yibɔ ni ji 144,000 lɛ fɛɛ shɛ. No hewɔ lɛ, Kristofoi anɔkwafoi akuu ko ni yɔɔ shikpɔŋ nɔ hiɛnɔkamɔ je shishi akɛ amɛaapue. Yesu tsɛ mɛi ni tamɔ nɛkɛ lɛ akɛ “tooi krokomɛi,” ni kɛ mɛi ni afɔ amɛ mu lɛ feɔ ekome yɛ jamɔ mli akɛ too kuu kome ni akpɛlɛ amɛnɔ.—Yohane 10:14-16.

Anɔkwa saji ni jeɔ kpo yɛ afii nyɔŋmai abɔ lɛ amli lɛ tsɔɔ akɛ, ágbe mɛi ni afɔ amɛ mu lɛ atsɛmɔ naa, ni Yehowa jɔɔmɔ yɛ “asafo babaoo” lɛ ni yɔɔ hiɛnɔkamɔ akɛ amɛbaaje “amanehulu kpeteŋkpele” lɛ mli lɛ anɔ. (Kpojiemɔ 7:9, 14) Akɛ nɔkwɛmɔ nɔ lɛ, beni ayeɔ Kaimɔ lɛ yɛ 1935 ni mɛi 63,146 ba shishi lɛ, mɛi ni ye Kaimɔ lɛ nibii lɛ eko, ni amɛkɛye amɛ mufɔɔ lɛ he odase ji 52,465. Afii nyɔŋmai etɛ sɛɛ, loo yɛ 1965 lɛ, mɛi ni ba ji 1,933,089, yɛ be mli ni mɛi ni ye eko lɛ ayifalɛ ba shi kɛyashɛ 11,550. Kɛ wɔba hiɛ afii 30 lɛ, mɛi ni ba shishi yɛ 1995 mli lɛ ayifalɛ tũ kɛyashɛ 13,147,201, shi gbɔmɛi 8,645 pɛ ye aboloo lɛ ni amɛnu wein lɛ eko. (1 Korintobii 11:23-26) Eyɛ faŋŋ akɛ, beni afii nyɔŋmai abɔ lɛ hoɔ lɛ, mɛi ni kɛɔ akɛ amɛji shwɛɛnii lɛ ayifalɛ ba shi waa—gbɔmɛi 52,400 yɛ 1935; 11,500 yɛ 1965; 8,600 yɛ 1995. Shi kɛlɛ, ajɔɔ mɛi ni yɔɔ shikpɔŋ nɔ hiɛnɔkamɔ lɛ, ni amɛyifalɛ lɛ etee hiɛ babaoo diɛŋtsɛ.

Nyɛsɛɛ amaniɛbɔɔ hee kwraa ni akɛha ji afi 1995 nɔ̃ lɛ, ni etsɔɔ akɛ amɛyi efa kɛ mɛi 28 fe afi ni tsɔ enɛ hiɛ lɛ, eyɛ mli akɛ kɛ akɛ mɛi ni yeɔ lɛ to mɛi ni baa shishi lɛ ahe lɛ, amɛyifalɛ ba shi. Kɛ asusu nibii fɛɛ he lɛ, ákɛ mɛi fioo ko hala akɛ amɛaaye okadi nibii lɛ eko lɛ jeee naagba. Mɛi ni abaptisi amɛ ehee yɛ afii ni eho lɛ amli lɛ ateŋ mɛi komɛi bɔi yeli trukaa. Yɛ shihilɛi pii amli lɛ, amɛkpɛlɛɔ nɔ yɛ sɛɛ mli akɛ eji tɔmɔ. Mɛi komɛi eyoo akɛ amɛye eko, yɛ amɛ henumɔ ni tsirɛ amɛ, ekolɛ yɛ gbɔmɔtsoŋ loo jwɛŋmɔŋ nɔnyɛɛ hewɔ. Shi amɛbana akɛ, atsɛko amɛ ahako ŋwɛi shihilɛ. Amɛbi ni Nyɔŋmɔ kɛ mɔbɔnalɛ anu amɛ shishi. Ni ámɛtee nɔ amɛsɔmɔ lɛ akɛ Kristofoi anɔkwafoi kpakpai, ni yɔɔ naanɔ wala yɛ shikpɔŋ nɔ he hiɛnɔkamɔ.

Ehe ehiaaa ni wɔteŋ mɔ ko ahao kɛ mɔ ko bɔi okadi nibii lɛ yeli loo ekpa nakai feemɔ. Jeee wɔ wɔbaatsɔɔ, kɛ akɛ mumɔ krɔŋkrɔŋ efɔ mɔ ko mu diɛŋtsɛ ni atsɛ lɛ kɛtee ŋwɛi shihilɛ mli, aloo jeee nakai eji. Kaimɔ Yesu nɔmimaa ni ma shi shiŋŋ lɛ: “Miji tookwɛlɔ kpakpa lɛ, ni mile mitooi lɛ.” Ni nɔmimaa hu yɛ akɛ, Yehowa le mɛi ni ehala akɛ emumɔŋ bii lɛ. Wɔyɛ nɔ ni wɔɔdamɔ nɔ wɔhe wɔye akɛ mɛi ni afɔ amɛ mu lɛ ayibɔ lɛ baaya nɔ aba shi, beni gbɔlɛ kɛ nibii krokomɛi ni aleee ni baa, kɛ amɛ shikpɔŋ nɔ shihilɛi lɛ baa naagbee lɛ. Kɛlɛ, yɛ be mli ni mɛi ni afɔ amɛ mu lɛlɛŋ nɛɛ yeɔ anɔkwa kɛyashiɔ gbele mli, ni amɛkpaa naanɔ wala akekre ni amɛnine aaashɛ nɔ lɛ gbɛ lɛ, tooi krokomɛi lɛ, ni amɛfɔ amɛ atadei ahe yɛ Toobi lɛ lá lɛ mli lɛ, baanyɛ akpa gbɛ akɛ amɛbaaje amanehulu kpeteŋkpele ni baa lɛ mli.—2 Timoteo 4:6-8; Kpojiemɔ 2:10.

[Shishigbɛ niŋmaa]