Amɛfee Yehowa Suɔmɔnaa Nii
Petro Shiɛ yɛ Pentekoste
EJI afi 33 Ŋ.B. agbiɛnaa be ko ni naa waaa leebi mli. Shihilɛ lɛ mli eyi obɔ̃ kɛ miishɛɛ! Yudafoi kɛ mɛi ni etsake kɛba Yudafoi ajamɔ mli lɛ asafo babaoo kɛ oyaiyeli eyi Yerusalem gbɛjegbɛi lɛ anɔ obɔ. Amɛjɛ hei tamɔ Elam, Mesopotamia, Kapadokia, Mizraim, kɛ Roma. Kwɛ miishɛɛ ni eji akɛ aaana amɛ ni amɛwo maji ni amɛjɛ mli lɛ atadei, ni anu amɛ wiemɔi sɔrɔtoi lɛ! Amɛteŋ mɛi komɛi efã gbɛ aaafee kilomitai akpei enyɔ koni amɛba kɛha nɛkɛ be krɛdɛɛ nɛɛ. Mɛni ji no? Pentekoste—Yudafoi agbijurɔ ni yɔɔ miishɛɛ ni kadiɔ akoko kpamɔ lɛ naagbee.—3 Mose 23:15-21.
Lasũ fãa kɛjɛɔ afɔlei ni ashãa yɛ sɔlemɔtsu lɛ afɔleshãa latɛ lɛ nɔ lɛ mli, ni Levibii lɛ laa Halel lɛ (Lala 113 kɛyashi 118). Dani leebi ŋmɛji 9 aaashɛ lɛ, nɔ ko ni hɛleɔ mɔ shi ba. “Gbɛɛmɔ ko ni tamɔ ahum ni tswaa waa” jɛ ŋwɛi ba. Ebayi shia ni Yesu Kristo kaselɔi aaafee 120 ebua amɛhe naa yɛ mli lɛ obɔ. Ŋmalɛ mli sane lɛ kɛɔ akɛ: “Ni lilɛii ni agbalagbala mli ni tamɔ lalilɛii pue; ni ebatara amɛyiteaŋ ekomekome; ni Mumɔ krɔŋkrɔŋ bayimɔ amɛ fɛɛ amɛmli obɔbɔ, ni amɛbɔi wiemɔi sɔrɔtoi-sɔrɔtoi awiemɔ, taakɛ bɔ ni Mumɔ lɛ ŋɔwo amɛnaa lɛ.”—Bɔfoi lɛ Asaji 2:1-4.
Mɔ Fɛɛ Mɔ Nuɔ Lɛ Diɛŋtsɛ Emaŋ Wiemɔ
Etsɛɛɛ ni kaselɔi babaoo ke yuu kɛje kpo kɛjɛ shia lɛ mli. Naakpɛɛ sane ji akɛ, amɛnyɛɔ amɛwieɔ yɛ asafo lɛ wiemɔi sɔrɔtoi lɛ amli! Kwɛmɔ bɔ ni saralɔ ko ni jɛ Persia kɛ mɔ ni jɛ Mizraim naa aaakpɛ amɛhe amɛha beni amɛnu ni Galileabii miiwie yɛ amɛmaŋ wiemɔ mli lɛ. Anuɔ shishi akɛ, asafo lɛ naa kpɛ amɛhe naakpa. Amɛbi akɛ: “Te enɛ shishiŋ?” Mɛi komɛi je shishi amɛye kaselɔi lɛ ahe fɛo, amɛkɛɛ: “Dãa dɔkɔdɔkɔ etɔrɔ amɛ.”—Bɔfoi lɛ Asaji 2:12, 13.
Yɛ no sɛɛ lɛ, bɔfo Petro te shi edamɔ shi ni ewie etsɔɔ asafo lɛ. Etsɔɔ mli akɛ, nɛkɛ naakpɛɛ nikeenii ni ji lilɛii sɔrɔtoi nɛɛ ji Nyɔŋmɔ shiwoo kɛtsɔ gbalɔ Yoel nɔ lɛ mlibaa: “Mafɔse mi-Mumɔ lɛ eko mashwie heloo fɛɛ nɔ.” (Bɔfoi lɛ Asaji 2:14-21; Yoel 3:1-5) Hɛɛ, Nyɔŋmɔ efɔse emumɔ krɔŋkrɔŋ lɛ eshwie Yesu kaselɔi lɛ anɔ bianɛ. Enɛ ji odaseyeli ni tsɔɔ faŋŋ akɛ atee Yesu shi kɛjɛ gbohii ateŋ, ni eyɛ ŋwɛi yɛ Nyɔŋmɔ ninejurɔ nɔ agbɛnɛ. “No hewɔ lɛ,” Petro kɛɛ, “ha ni Israel we lɛ fɛɛ ale krɛdɛɛ akɛ, Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuntsɔ kɛ Kristo fɛɛ.”—Bɔfoi lɛ Asaji 2:22-36.
Te toibolɔi lɛ fee amɛnii yɛ he amɛha tɛŋŋ? “Etsurɔ amɛtsuiiaŋ,” sane lɛ kɛɔ akɛ, “ni amɛkɛɛ Petro kɛ bɔfoi ni eshwɛ lɛ akɛ: ‘Ataamɛi kɛ anyɛmimɛi, te wɔɔfee tɛŋŋ?’ ” Petro ha hetoo: “Nyɛtsakea nyɛtsuii amli ni nyɛteŋ mɔ fɛɛ mɔ aha abaptisi lɛ.” Aaafee mɛi 3,000 fee nakai pɛpɛɛpɛ! Yɛ no sɛɛ lɛ, “amɛhiɛ bɔfoi lɛ atsɔɔmɔ lɛ . . . amli.”—Bɔfoi lɛ Asaji 2:37-42.
Akɛni etsɔ hiɛ yɛ wiemɔ mli yɛ be ni sa kadimɔ nɛɛ mli hewɔ lɛ, Petro kɛ “ŋwɛi maŋtsɛyeli lɛ naa samfei lɛ” ni Yesu ewo shi akɛ ekɛbaaha lɛ lɛ ateŋ klɛŋklɛŋ nɔ lɛ tsu nii. (Mateo 16:19) Nɛkɛ samfei nɛɛ gbele hegbɛi krɛdɛɛi anaa kɛha gbɔmɛi akui sɔrɔtoi. Nɛkɛ klɛŋklɛŋ samfee nɛɛ ha Yudafoi nyɛ amɛbatsɔmɔ Kristofoi ni akɛ mumɔ efɔ amɛ mu. Yɛ sɛɛ mli lɛ, samfei ni ji enyɔ kɛ etɛ lɛ kɛ nɛkɛ hegbɛ nɛɛ nɔŋŋ ha Samariabii kɛ Jeŋmajiaŋbii fɛɛ.—Bɔfoi lɛ Asaji 8:14-17; 10:44-48.
Nikasemɔi Kɛha Wɔ
Eyɛ mli akɛ Yudafoi kɛ mɛi ni amɛtsake amɛtsɔmɔ Yudafoi asafo nɛɛ bajeɔ sɔ̃ ni kã maŋ muu fɛɛ nɔ lɛ shishi, yɛ Nyɔŋmɔ Bi lɛ gbele hewɔ moŋ, shi Petro kɛ bulɛ wie tsɔɔ amɛ, ni etsɛ amɛ “anyɛmimɛi.” (Bɔfoi lɛ Asaji 2:29) Oti ni ma ehiɛ ji ni ekanya amɛ kɛya tsuitsakemɔ mli, shi jeee ni ebu amɛ fɔ. No hewɔ lɛ, gbɛ ni etsɔ nɔ lɛ hi. Ekɛ anɔkwa saji lɛ fɔ̃ amɛhiɛ, ni etsɛ Ŋmalɛi ekɛfi esaji lɛ asɛɛ.
Mɛi ni shiɛɔ sanekpakpa lɛ ŋmɛnɛ lɛ aaafee jogbaŋŋ akɛ amɛaadi Petro nɔkwɛmɔ nɔ lɛ sɛɛ. Esa akɛ amɛbɔ mɔdɛŋ ni amɛkɛ amɛ toibolɔi lɛ akpa gbee yɛ nɔ ko he, ni amɛtsɔ ŋaa gbɛ nɔ amɛjɛ Ŋmalɛi lɛ amli amɛkɛ amɛ asusu saji ahe. Kɛ akɛ Biblia mli anɔkwale ha yɛ gbɛ ni ja nɔ lɛ, mɛi ni yɔɔ tsuijurɔ lɛ baakpɛlɛ nɔ.—Bɔfoi lɛ Asaji 13:48.
Petro ekãafeemɔ kɛ tsuisalɛ yɛ Pentekoste gbi lɛ nɔ lɛ jeɔ kpo faŋŋ, ni esoro no kwraa yɛ be mli ni ekwa Yesu aaafee otsii kpawo ni tsɔ hiɛ lɛ he. Gbɔmɔ he gbeyeishemɔ kumɔ Petro kwraa yɛ nakai be lɛ mli. (Mateo 26:69-75) Shi Yesu sɔle eha Petro. (Luka 22:31, 32) Ŋwanejee ko bɛ he akɛ, bɔ ni Yesu jie ehe kpo etsɔɔ Petro yɛ eshitee lɛ sɛɛ lɛ waje bɔfo lɛ. (1 Korintobii 15:5) Nɔ ni jɛ mli ba ji akɛ, Petro hemɔkɛyeli lɛ baaa naagbee. Yɛ be kukuoo mli lɛ, ekɛ ekãa shiɛ. No hewɔ lɛ eshiɛ, ni jeee yɛ Pentekoste pɛ, shi yɛ eshihilɛ be ni eshwɛ lɛ fɛɛ mli.
Shi, kɛji akɛ wɔtɔ̃ yɛ gbɛ ko nɔ, tamɔ Petro fee po lɛ hu? Nyɛhaa wɔjiea tsuitsakemɔ kpo, wɔsɔle wɔbi eshaifaa, ni wɔfee nii ni baaha wɔna mumɔŋ yelikɛbuamɔ. (Yakobo 5:14-16) Kɛkɛ lɛ wɔbaanyɛ wɔya wɔhiɛ kɛ hekɛnɔfɔɔ akɛ, wɔ-ŋwɛi Tsɛ, Yehowa, mɔbɔnalɔ lɛ kpɛlɛɔ wɔ sɔɔmɔ krɔŋkrɔŋ lɛ nɔ.—2 Mose 34:6.