Nyɔŋmɔ Toiŋjɔlɛ He Bɔfoi Kpe
KRISTOFONYO onukpa ko ni jɛ United States kɛɛ akɛ, “kpokpaa wulu nɔ kpee fɛɛ kpee ni wɔtee lɛ etswa wɔ ema shi. Shi afi nɛɛ nɔ̃ lɛ fe nakai. Wɔshiɔ daa gbi ni wɔmiisusu bɔ ni gbi ni nyiɛ sɛɛ lɛ nɔ̃ baafe nɔ ni wɔkpaa gbɛ lɛ, ni wɔ hiɛnɔkamɔ efeee yaka!”
Kɛ́ otee “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei lɛ eko lɛ, ŋwanejee ko bɛ he akɛ, okɛ mɔ ni tee eko ni ena miishɛɛ nɛɛ baakpã gbee. Kpee lɛ gbi fɛɛ gbi nifeemɔ lɛ gbalaa mɔ jwɛŋmɔ kɛyaa nitsumɔ ni Yehowa Odasefoi tsuɔ akɛ Nyɔŋmɔ bɔfoi lɛ fã kroko nɔ. Nyɛhãa wɔtia gbii etɛ wiemɔ he gbɛjianɔtoo lɛ mli.
‘Kwɛ Bɔ ni Mɔ ni Shiɛɔ Toiŋjɔlɛ lɛ He Yɔɔ Fɛo Ha’
Enɛ ji kpee lɛ klɛŋklɛŋ gbi lɛ saneyitso. Edamɔ Yesaia 52:7 nɔ. Mɛi pii miisɔmɔ Yehowa yɛ shihilɛi ni mli wawai ashishi yɛ jaramɔ bei nɛɛ amli. Nɔ ni fata wiemɔ, “Sane ni Anuɔ Kɛjɛɔ Toiŋjɔlɛ Sanejajelɔi ni Yɔɔ Ekãa lɛ Anaa” lɛ he ji saji ni abibii anɔkwafoi nɛɛ ateŋ mɛi komɛi. Amɛ diɛŋtsɛ amɛ daaŋ wiemɔi ni wɔnuɔ lɛ ji hewalɛwoo nɔ̃ diɛŋtsɛ, ni ama nɔ mi aha kpeeyalɔi lɛ akɛ Yehowa baanyɛ awo amɛ hu hewalɛ nakai nɔŋŋ, ni eha amɛ “hewalɛ ni fa kɛteke nɔ” po koni eye ebua amɛ ni amɛŋmɛ amɛtsui shi.—2 Korintobii 4:7.
Yehowa taomɔ nii lɛ waaa. (1 Yohane 5:3) Afee enɛ faŋŋ yɛ leebi wiemɔi ahe gbɛjianɔtoo lɛ naagbee nɔ̃ lɛ mli, ni eba naagbee kɛ wolo bibioo ni hiɛ baafai 32 ni egbɛi ji Mɛni Nyɔŋmɔ Taoɔ yɛ Wɔdɛŋ? ni ajie lɛ kpo lɛ. Ŋwanejee ko bɛ he akɛ, nɛkɛ nikasemɔ wolo hee kɛ emli mfonirii fɛfɛji nɛɛ baatsu nɔ̃ titri yɛ mɛi pii ni ayeɔ abuaa amɛ koni amɛkase Nyɔŋmɔ yiŋtoi ahe nii lɛ mli. Anaa bɔ ni akɛ wolo hee nɛɛ baatsu nii aha lɛ yɛ wolo tɛtrɛɛ nɛɛ naagbee nikasemɔ lɛ mli, kɛ baafai 16 kɛ 17 hu.
Wiemɔ, “Nitsumɔ Kpakpa ni Aaaŋmɛ Tsui Shi yɛ Mli” lɛ ma nɔ mi akɛ Yehowa le wɔ kaai lɛ jogbaŋŋ. Ni aaaŋmɛ tsui shi lɛ tsɔɔ akɛ ni wɔɔdamɔ wɔshidaamɔ he ni wɔŋmɛɛɛ wɔ hiɛnɔkamɔ he. Yehowa kɛ e-Wiemɔ, emumɔ lɛ, kɛ egbɛjianɔtoo lɛ eha wɔ koni eye ebua wɔ. Shiɛmɔ biɔ tsuishiŋmɛɛ, ni kɛlɛ shiɛmɔ yeɔ buaa wɔ ni wɔŋmɛɔ wɔtsui shi, ejaakɛ ehãa wɔhemɔkɛyeli hiɔ shi be fɛɛ be. Akɛni wɔbɛŋkɛ naagbee lɛ he kpaakpa hewɔ lɛ, esaaa akɛ wɔhaa wɔ naagbai lɛ baa ekãa ni wɔyɔɔ lɛ shi, ejaakɛ mɛi ni ŋmɛɔ amɛtsui shi kɛyashiɔ naagbee lɛ pɛ abaahere amɛyiwala.—Mateo 24:13.
Wiemɔ krɛdɛɛ, “Wɔ Gbɛnaa Nii akɛ Nyɔŋmɔ Toiŋjɔlɛ He Bɔfoi” lɛ gbala jwɛŋmɔ kɛtee Yuda nomii lɛ akpɔmɔ kɛmiijɛ Babilon kɛ jamɔ krɔŋŋ ni ato ama shi ekoŋŋ yɛ Yerusalem yɛ 537 D.Ŋ.B. lɛ nɔ. Wielɔ lɛ tsɔɔ mli akɛ, nɔ ni ba nɛɛ ji nɔ ni etsɛŋ ni Nyɔŋmɔ Maŋtsɛyeli lɛ baatsu yɛ jeŋ muu fɛɛ lɛ he nɔkwɛmɔ nɔ bibioo ko. (Lala 72:7; Yesaia 9:6) Nitsumɔ ni kã wɔnɔ ŋmɛnɛ ji ni wɔshiɛ Maŋtsɛyeli lɛ he sanekpakpa nɛɛ, ni wɔhi shi yɛ nakai shɛɛ sane lɛ kɛ gbeekpamɔ naa. Esa akɛ suɔmɔ kɛha Nyɔŋmɔ kɛ naanyo akãnyã wɔ ni wɔya nɔ yɛ nitsumɔ nɛɛ mli ni wɔkpaaa.—Bɔfoi lɛ Asaji 5:42.
Nɔ ni sa kadimɔ yɛ Sohaa wiemɔi ahe gbɛjianɔtoo lɛ mli ji wiemɔi ni ahaa kɛtsaraa nɔ, “Kwɛmɔ Ohe Nɔ Jogbaŋŋ yɛ Hiɛtserɛjiemɔ He Tsɔnei ni Aŋɔtee lɛ Ahe.” Ŋmɛnɛ lalai, sinii, videoi, tɛlivishin nɔ nibii, video shwɛmɔi, woji, woji tɛtrɛbii, kɛ kɔmiks jieɔ daimonioi asusumɔ kpo. No hewɔ lɛ, ehe miihia ni ‘wɔhi efɔŋ kwraa’ ni ‘wɔkpɛtɛ ekpakpa he.’ (Romabii 12:9) Hɛɛ, esa akɛ wɔnyaŋe ni wɔkpoo hiɛtserɛjiemɔ ni ekpɔtɔ lɛ, ni wɔ jwɛŋmɔ ahi nibii ni he tse, ni yɔɔ gbɛi kpakpa, ni sa yijiemɔ lɛ anɔ. (Filipibii 4:8) Woji kɛ dɛŋdadei ni akɛpɛiɔ saji amli ni Yehowa gbɛjianɔtoo lɛ kɛha lɛ kɛ susumɔi ni tswaa mɔ maa shi kãnyãa wɔ jwɛŋmɔi ni etsɔseɔ wɔ koni wɔle ekpakpa kɛ efɔŋ mlikpamɔ. (Hebribii 5:14) Esa akɛ wɔkɛ wɔhe akpɛtɛ nɛkɛ gbɛjianɔtoi nɛɛ ahe gbagbalii tamɔ bɔ ni wɔɔmɔ ŋmoŋmolo ni tɛo ŋshɔ ni efee hamahama hiɛ mli lɛ.
Nɔ ni nyiɛ sɛɛ ba ji wiemɔ, “Tee Shi Owo Abonsam—Kaaŋmɛ Awuŋayeli ko Kwraa Gbɛ.” Beni eshwɛ fioo ni amɛaabote Shiwoo Shikpɔŋ lɛ nɔ lɛ, jeŋba shara tsɔ̃ Israelbii akpei abɔ tsɔne. Pinehas eŋmɛɛɛ awuŋayeli ko kwraa gbɛ yɛ anɔkwa jamɔ gbɛfaŋ. Efee nii oya eshi efɔŋ feelɔi, ni ehetuu kɛ mɔ kome hamɔ lɛ sa Yehowa hiɛ. (4 Mose 25:1-13) Satan yiŋtoo ji ni eha wɔteŋ mɔ fɛɛ mɔ afee mɔ ni esaaa akɛ eboteɔ Nyɔŋmɔ jeŋ hee lɛ mli. No hewɔ lɛ, taakɛ Pinehas ji lɛ, esa akɛ wɔte shi wɔshi mɔdɛŋ ni Abonsam bɔɔ koni ewo wɔhe muji lɛ. Kɛji akɛ wɔbote gbalashihilɛ mli loo wɔji oshijafoi lɛ, esa akɛ ‘wɔjo ajwamaŋbɔɔ naa foi.’—1 Korintobii 6:18.
“Anɔkwayeli ni Akɛaafi Emuu ni Nyɔŋmɔ Wiemɔ lɛ Yeɔ lɛ Sɛɛ” ji kpee lɛ klɛŋklɛŋ gbi lɛ naagbee wiemɔ. Shishitsɔɔlɔi pii tsakeɔ Ŋmalɛi lɛ loo amɛshiɔ emli wiemɔi komɛi. Akɛ nɔkwɛmɔ nɔ lɛ, bɔni afee ni asa mɛi ni fiɔ yei ahegbɛi asɛɛ lɛ ahiɛ hewɔ lɛ, mɛi ni tsɔɔ The New Testament and Psalms: An Inclusive Version lɛ shishi lɛ ewieee Nyɔŋmɔ he akɛ Tsɛ, shi moŋ akɛ Tsɛ-kɛ-Nyɛ̃, ni amɛwie Yesu he akɛ “Adesa Kome lɛ,” shi jeee akɛ “gbɔmɔ Bi.” Nɔ ni tamɔɔɔ nakai lɛ, New World Translation lɛ kɛ ehe kpɛtɛɔ shishijee ŋmalɛ lɛ he yɛ anɔkwayeli mli aahu akɛ éye ebua ni eha bɔ ni wɔsusuɔ Ŋmalɛ mli saji komɛi ahe wɔhaa lɛ mli efee faŋŋ. Akɛ nɔkwɛmɔ nɔ lɛ, wielɔ lɛ kɛɛ: “Bɔ ni atsɔɔ New World Translation lɛ mli wiemɔi ashishi yɛ gbɛ ni ja nɔ lɛ ji nɔ ni kɛ nɔdaamɔ nɔ̃ kɛha asafoi lɛ ahe gbɛjianɔ ni ato ekoŋŋ, kɛtsɔ onukpai akui ni ahala amɛ, ni ekɛ nɔkwɛmɔ nɔ ni afee afɔ̃ shi yɛ klɛŋklɛŋ afii oha lɛ mli Kristofoi asafo lɛ mli lɛ akpa gbee babaoo lɛ ba.” Wɔjieɔ anɔkwa ni wɔyeɔ Nyɔŋmɔ Wiemɔ lɛ kpo kɛtsɔɔ ekanemɔ daa gbi lɛ nɔ, ni agbɛnɛ kɛtsɔ eŋaawoo lɛ kɛ nitsumɔ nɔ. Wielɔ lɛ kɛɛ hu akɛ: “Wɔtsɔɔ akɛ wɔji Nyɔŋmɔ Wiemɔ lɛ sɛɛfilɔi anɔkwafoi kɛtsɔ ekãa ni wɔkɛshiɛɔ wɔtsɔɔ mɛi krokomɛi, kɛ ekɛ nitsumɔ jogbaŋŋ yɛ be mli ni wɔkɛtsɔɔ mɛi anii, ni wɔbɔɔɔ mɔdɛŋ kɔkɔɔkɔ akɛ wɔɔha etamɔ wɔ diɛŋtsɛ wɔsusumɔi kɛtsɔ nɔ ni ekɛɔ lɛ ni wɔɔtsɔmɔ loo wɔkpã mli lɛ nɔ.”
‘Nyɔŋmɔ Toiŋjɔlɛ Fe Jwɛŋmɔi Fɛɛ’
Saneyitso nɛɛ ni damɔ Filipibii 4:7 nɔ lɛ akɛje kpee gbi ni ji enyɔ lɛ shishi. Saji ni akɛha lɛ babaoo tsũ bɔ ni esa akɛ mɔ ana esɔɔmɔ, eweku, henɔjɔɔmɔ, kɛ daa gbi shihilɛ mli nibii krokomɛi lɛ ahe jwɛŋmɔ kpakpa lɛ he nii.
Beni asusu daa gbi ŋmalɛ lɛ he agbe naa lɛ, akɛ wiemɔi ni ahaa kɛtsaraa nɔ, ni eyitso ji “Bɔfoi ni Kɛ Toiŋjɔlɛ He Sanekpakpa Baa” ha. Wɔ shɛɛ sane lɛ ji toiŋjɔlɛ nɔ̃, ni esa akɛ akɛha yɛ toiŋjɔlɛ mli. (Efesobii 6:15) Wɔ yiŋtoo ji ni wɔye kunim yɛ tsuii ni nine shɛɔ nɔ lɛ mli, jeee yɛ ŋwanejeei amli. Tsɔsemɔ kɛ woji ni wɔnine shɛɔ nɔ kɛjɛɔ Yehowa gbɛjianɔtoo lɛ dɛŋ lɛ yeɔ ebuaa wɔ ni wɔfee nakai pɛpɛɛpɛ. Esaaa akɛ wɔhaa shikpilikpiifeemɔ loo sane ni kɔɔɔ mɔ ko he su jeɔ wɔnijiaŋ wui. Shi moŋ, esa akɛ wɔya nɔ ‘wɔfee bɔ fɛɛ bɔ ni wɔɔnyɛ,’ ni wɔna teemɔŋ nikasemɔ, kpeeiyaa, kɛ shiɛmɔ nitsumɔ lɛ mli ni akɛhe woɔ lɛ he su kpakpa. (2 Timoteo 2:15) Nɔ ni esaaa akɛ akũɔ hiɛ ashwieɔ nɔ ji ekpakpa ni wɔɔfee mɛi krokomɛi, titri lɛ mɛi ni kɛ wɔ yɔɔ hemɔkɛyeli lɛ mli lɛ. (Galatabii 6:10) Shi, bɔ fɛɛ bɔ ni wɔɔnyɛ lɛ feemɔ etsɔɔɔ akɛ, wɔfee nii kɛteke nɔ koni etɔ wɔ. Nɔ ni mɔ fɛɛ mɔ feɔ yɛ lɛ diɛŋtsɛ enyɛmɔ kɛ shihilɛ ni eyɔɔ mli lɛ naa lɛ saa Yehowa hiɛ.
Nyɔŋmɔ webii kɛ amɛbe, hewalɛ, kɛ nibii ni amɛyɔɔ hãa kɛfiɔ Maŋtsɛyeli lɛ he nibii asɛɛ. Wiemɔ, “Nikee ni Akɛhaa yɛ Miishɛɛ Mli yɛ Yehowa Gbɛjianɔtoo lɛ Mli” lɛ jie lɛ kpo akɛ, yɛ be mli ni mɛi ni tamɔ gwantɛŋi lɛ babaoo hereɔ Maŋtsɛyeli shɛɛ sane lɛ nɔ lɛ, ehe bahiaa ni ana nibii ni akɛbaatsu he nii, kpee hei, kɛ nitsumɔ he niji. Onia ni wɔtsũɔ lɛ haa gbɛjianɔtoo lɛ nine shɛɔ nɔ fɛɛ nɔ ni he hiaa ni akɛbaatsu jeŋ muu fɛɛ shiɛmɔ nitsumɔ lɛ agbe naa lɛ nɔ. Mlihilɛ mli ni ajɛɔ ahaa nii lɛ hu kɛ woo haa Yehowa ni ehãa nihalɔ lɛ naa miishɛɛ. No hewɔ lɛ, akɛ Kristofoi lɛ, esaaa akɛ wɔhiɛ kpaa wɔ jamɔ lɛ fã ni he hiaa nɛɛ nɔ.—2 Korintobii 8:1-7.
Nɔ ni akɛgbe leebi kpee lɛ naa ji baptisimɔ wiemɔ—ni be fɛɛ be lɛ eji nɔ titri yɛ Yehowa Odasefoi ahenaabuamɔi wuji ashishi lɛ. Mɛɛ miishɛɛ nɛ akɛ aaana ni mɛi heei ni ejɔɔ amɛhe nɔ miinyiɛ Yesu nanemaa hei asɛɛ kɛtsɔ amɛhe ni amɛkɛhaa nu mli baptisimɔ nɔ! (Mateo 3:13-17) Mɛi fɛɛ ni kɔɔ gbɛ ni tamɔ nɛkɛ lɛ ená tsɔsemɔ kɛjɛ nilee ni fe fɛɛ jɛɛhe—ni ji Biblia, lɛ mli. Agbɛnɛ hu, amɛna yiŋtoo diɛŋtsɛ ni yɔɔ shihilɛ sɛɛ, ni akɛ toiŋjɔlɛ ni baa kɛjɛɔ le ni amɛleɔ akɛ amɛmiifee nɔ ni ja lɛ mli lɛ ejɔɔ amɛ.—Jajelɔ 12:13.
Akɛ ŋaawoo ni kɔɔ nibii pɔtɛɛ ahe ha yɛ wiemɔ, “Ha Sɛɛyoomɔ Abu Ohe” lɛ mli. Sɛɛyoomɔ he miihia waa yɛ heloo gbɛfaŋ nitsumɔi amli nifeemɔi amli. Esaaa akɛ wɔtsuɔ wɔ heloo gbɛfaŋ nitsumɔi ahe nii yɛ Maŋtsɛyeli Asa lɛ nɔ, ni asaŋ wɔkaye nanemɛi Kristofoi ahe nii kɛha shika sɛɛnamɔ. (Okɛto Yohane 2:15, 16 he.) Sɛɛyoomɔ hu he miihia beni wɔkɛ shika woɔ nitsumɔ ko mli loo beni wɔfaa loo wɔkɛ shika faa lɛ. Wielɔ lɛ kɛɛ akɛ, “jarayeli nitsumɔi ni fiteɔ yɛ Kristofoi ateŋ kɛ hiɛnɔkamɔ ni feɔ yaka eba, ni eha mɛi komɛi ni kɛ amɛhe wo shikataomɔ gbɛjianɔtoi ni yɔɔ oshara nɛɛ mli yɛ oyaiyeli mli lɛ elaaje amɛ mumɔŋ shidaamɔ po.” Eyɛ mli akɛ ejeee efɔŋ akɛ Kristofoi kɛ amɛhe aaawo nitsumɔi amli moŋ, shi henɔkwɛmɔ ji nilee gbɛ diɛŋtsɛ. Ni kɛ mɛi enyɔ miito gbeekpamɔ he gbɛjianɔ kɛha nitsumɔ lɛ, esa akɛ aŋmala saji ni kɔɔ he lɛ fɛɛ ashwie shi.
Awie tɛi ni Nyɔŋmɔ efolɔ eshwie shi kɛha hii kɛ yei lɛ ahe yɛ wiemɔ, “Nuu kɛ Yoo Ebɔ Amɛ” lɛ mli. Áfite gbɛnaa nii ni kã nuu kɛ yoo nɔ lɛ yɛ yinɔsane bei fɛɛ mli. Wielɔ lɛ kɛɛ akɛ, “mɛi pii kɛ nuufeemɔ toɔ mɔ nɔ yeli dɛŋdɛŋ, keketee feemɔ, loo hewalɛ henumɔ he yɛ gbɛ ni ejaaa nɔ. Yɛ maji komɛi anɔ lɛ, afɔɔɔ namɔ, ni eyɛ hiɛgbele po akɛ nuu aaafo yɛ mɛi ahiɛ aloo yɛ teemɔŋ. Ni kɛlɛ, Yohane 11:35 gbaa akɛ, beni eyɔɔ asafoi lɛ ateŋ, yɛ Lazaro gbonyo bu lɛ hiɛ lɛ, ‘Yesu fo.’ ” Ni yei hu? Abuɔ yoofeemɔ yɛ bei pii amli akɛ eji gbɔmɔtsoŋ hefɛo kɛkɛ. Shi wielɔ lɛ bi akɛ: “Kɛ yoo he yɛ fɛo, shi ebɛ jwɛŋmɔ, ni eji ŋwanejelɔ, béi tsɛ, loo henɔwolɔ lɛ, ani ehe baanyɛ afee fɛo yɛ nakai wiemɔ lɛ shishinumɔ diɛŋtsɛ naa?” (Okɛto Abɛi 11:22; 31:26 he.) Kristofoi hii kɛ yei bɔɔ mɔdɛŋ yɛ amɛ wiemɔ, jeŋba, kɛ hesaamɔ mli koni amɛnyiɛ Biblia taomɔ nii asɛɛ. Wielɔ lɛ kɛɛ: “Ewaaa akɛ aaana bulɛ aha nuu ni jieɔ mumɔ lɛ yibii lɛ kpo, ni ewaaa akɛ aaasumɔ yoo ni feɔ nakai.”—Galatabii 5:22, 23.
Nɔ ni nyiɛ sɛɛ ba ji wiemɔi ni ahaa kɛtsaraa nɔ, “Toiŋjɔlɛ Nyɔŋmɔ lɛ Susuɔ Ohe.” Kristofoi pii feɔ yeyeeye yɛ shika he. Ni kɛlɛ, Yehowa woɔ shi akɛ: “Mishiŋo, ni misaa mikwaŋo gbi ko gbi ko.” (Hebribii 13:5) Yɛ shika helɛtemɔ mli naagbai lɛ fɛɛ sɛɛ lɛ, mɛi komɛi ena hekɛnɔfɔɔ yɛ shiwoo nɛɛ mli kɛtsɔ gbɛgbalɔi awamɔ loo daa gbɛgbamɔ sɔɔmɔ lɛ ni amɛkɛ amɛhe wo mli lɛ nɔ. Mɛi krokomɛi ni nyɛŋ afee gbɛgbalɔi bianɛ lɛ kɛ Maŋtsɛyeli lɛ he nibii yeɔ klɛŋklɛŋ gbɛhe kɛtsɔɔ hegbɛ fɛɛ hegbɛ ni baa ni amɛkɛyeɔ odase lɛ nɔ. (Mateo 6:33) Esa akɛ ajie mɔdɛŋbɔi ni tamɔ nɛkɛ lɛ fɛɛ yi! Yehowa gbɛjianɔtoo lɛ kɛ woji babaoo eha koni ewa wɔ yɛ wɔ sɔɔmɔ lɛ mli ni eye ebua wɔ ni wɔdamɔ wɔ naagbai anaa. Kɛ wɔjie hiɛsɔɔ kpo yɛ Yehowa mumɔŋ gbɛjianɔtoi lɛ ahe lɛ, ekɛ toiŋjɔlɛ baajɔɔ wɔ yɛ shika helɛtemɔ mli bei ni yɔɔ basabasa nɛɛ mli.—Lala 29:11.
Yɛ gbi lɛ naagbee wiemɔ, “Dii Toiŋjɔlɛ ni Nyɔŋmɔ Gbeyeishemɔ Yɔɔ Mli Sɛɛ yɛ Weku Shihilɛ Mli” lɛ sɛɛ lɛ, kpeeyalɔi lɛ amii shɛ amɛhe akɛ amɛnine aaashɛ wolo hee, Nɔ Diɛŋtsɛ ni Kɛ Weku Miishɛɛ Baa lɛ nɔ. Wielɔ lɛ wo hewalɛ akɛ: “Bɔɔ mɔdɛŋ ni bo diɛŋtsɛ okase wolo nɛɛ, ni nyɛkase akɛ wekui hu. Okɛ eŋaawoo ni damɔ Biblia lɛ nɔ lɛ atsu nii kɛ hiɛdɔɔ, ni enɛ baaha oweku lɛ toiŋjɔlɛ kɛ miishɛɛ afa.”
‘Nyɛyea Ekomefeemɔ ni Yɔɔ Toiŋjɔlɛ Kpãa ni Feɔ Mɛi Ekome lɛ Mli lɛ Nɔ’
Akɛdamɔ Efesobii 4:3 nɔ, ni eji saneyitso ni sa kɛha kpee lɛ naagbee gbi lɛ. Nyɔŋmɔ etsɔɔ Yehowa Odasefoi ni agbala amɛ kɛjɛ shikpɔŋ nɔ jeŋmaji fɛɛ mli lɛ nii. No hewɔ lɛ, amɛsumɔɔ toiŋjɔlɛ. Amɛnyiɛɔ Yesu nɔkwɛmɔ nɔ lɛ sɛɛ, ni amɛbɔɔ mɔdɛŋ ni ‘amɛye ekomefeemɔ ni yɔɔ toiŋjɔlɛ kpaa ni feɔ mɛi ekome lɛ mli lɛ nɔ.’
Ama toiŋjɔlɛ ni jeɔ kpo yɛ Nyɔŋmɔ gbɛjianɔtoo lɛ mli fɛɛ lɛ nɔ mi yɛ wiemɔ ni ahaa kɛtsaraa nɔ, “Anɔkwa Bɔfoi lɛ Ayɔsemɔ” lɛ mli. Amale gbalɔi hi blema Israel. Shi kɛlɛ, Nyɔŋmɔ anɔkwa bɔfoi—gbalɔi tamɔ Yesaia, Ezekiel, kɛ Yeremia—gba Yerusalem shigbeemɔ, be ni amɛbaahi nomŋɔɔ mli, kɛ amɛkpɔ̃mɔ akɛ Nyɔŋmɔ webii lɛ he sane amɛfɔ shi pɛpɛɛpɛ. Shihilɛ ni tamɔ nakai yɛ ŋmɛnɛ. Apasa gbalɔi fá yɛ maŋkwramɔŋ kɛ apasa jamɔŋ nɔyeli hei lɛ. Ni kɛlɛ, Yehowa etee e-Dasefoi ashi koni amɛjaje eyiŋtoi ni kɔɔ nibii agbɛjianɔtoo nɛɛ he lɛ amɛtsɔɔ. Akɛ Yehowa tsuji etsu nii, titri lɛ kɛjɛ 1919 koni amɛjaje Nyɔŋmɔ shɛɛ sane lɛ. Kwɛ bɔ ni amɛyɔɔ sɔrɔto kwraa yɛ Kristendom apasa jamɔ bɔfoi lɛ ahe! Eba akɛ wɔkɛ hiɛdɔɔ aaafee wɔ gbɛfaŋnɔ yɛ nitsumɔ nɛɛ mli kɛyashi be mli ni Yehowa aaakɛɛ akɛ agbe naa.
Wiemɔ, “Bo Nyɔŋmɔ Wiemɔ lɛ Toi ni Oye Nɔ” lɛ ma nɔ mi akɛ Ŋmalɛi lɛ ji gbɛtsɔɔmɔ, miishɛjemɔ, kɛ hiɛnɔkamɔ jɛɛhe ni da fe fɛɛ. (Yesaia 30:20, 21; Romabii 15:4) Ŋmɛnɛŋmɛnɛ je lɛ miiŋmɛ nɔ fɛɛ nɔ feemɔ gbɛ babaoo. No hewɔ lɛ, enɛ ji be ni esa akɛ wɔbo ŋaawoo ni baa kɛjɛɔ Nyɔŋmɔ Wiemɔ lɛ kɛ gbɛjianɔtoo lɛ ŋɔɔ lɛ toi babaoo fe bei fɛɛ. Yehowa le wɔ gbɔjɔmɔi, ni etsɔɔ gbɛ ni he baaba sɛɛnamɔ aha wɔ lɛ faŋŋ yɛ e-Wiemɔ lɛ mli. Akɛni wɔle akɛ Yehowa miifi wɔ sɛɛ lɛ haa wɔnaa hekɛnɔfɔ̃ɔ koni wɔya wɔhiɛ yɛ nɔ fɛɛ nɔ ni ebiɔ kɛjɛɔ wɔdɛŋ lɛ mli.
Enɛ saa toibolɔi lɛ ajwɛŋmɔ kɛha drama ni nyiɛ sɛɛ ni awo no beaŋ blemabii atadei akɛfee lɛ. Eyitso ji, “Mɛni Hewɔ Esa akɛ Okɛ Bulɛ Aha Teokrase Gbɛjianɔtoi?” Nifeemɔ ni damɔ Biblia mli sane ni kɔɔ Gideon he lɛ nɔ lɛ ma nikasemɔ ko nɔ mi waa—esa akɛ wɔnyiɛ Nyɔŋmɔ fãmɔi asɛɛ ni wɔkɛ wɔ diɛŋtsɛ wɔ susumɔi akato najiaŋ aloo ni wɔɔbɔ mɔdɛŋ wɔtsi wɔhe kɛjɛ teokrase ŋaawoo he.
Maŋ shiɛmɔ lɛ yitso ji, “Anɔkwa Toiŋjɔlɛ Eba Agbɛnɛ!—Kɛjɛ Nɛgbɛ?” Toiŋjɔlɛ ni Nyɔŋmɔ woɔ shi yɛ he lɛ yaa kɛtekeɔ nɔ fɛɛ nɔ ni je nɛɛ baanyɛ asusu. Wielɔ lɛ kɛɛ akɛ: “Anɔkwa toiŋjɔlɛ shishi ji toiŋjɔlɛ daa gbi. Nyɔŋmɔ toiŋjɔlɛ tsɔɔ jeŋ ni hela, piŋmɔ, awerɛho, kɛ gbele bɛ mli.” Biblia lɛ kɛɔ wɔ akɛ, Yehowa “haa tai asɛɛ foɔ kɛyaa shikpɔŋ lɛ naagbee hei lɛ.” (Lala 46:10) Mɛɛ gbɛ nɔ ebaatsɔ efee enɛ? Kɛtsɔ mɔ ni kɛ tawuu baa, ni ji Satan Abonsam ni aaajie lɛ kɛaaya lɛ nɔ. (Kpojiemɔ 20:1-3) Enɛ baagbele gbɛ koni heshibalɔi ‘ahi shikpɔŋ lɛ nɔ ni amɛmii ashɛ amɛhe yɛ toiŋjɔlɛ babaoo mli.’—Lala 37:11.
Yɛ Buu-Mɔɔ nikasemɔ kɛha otsi lɛ naamuamɔ lɛ sɛɛ lɛ, aha naagbee wiemɔ kɛha kpee lɛ. Eyitso ji, “Hiɛ ni Wɔɔya akɛ Nyɔŋmɔ Toiŋjɔlɛ He Bɔfoi,” ni nɛkɛ wiemɔ ni kanyãa mɔ nɛɛ ma nɔ mi akɛ wɔ shiɛmɔ nitsumɔ lɛ yɛ sɔrɔto ni ehe miihia hu. Jeee be ni akɛgbɔjɔɔ he, akɛlilaa shi, loo akuɔ sɛɛ kɛyaa susumɔi ni ejaaa lɛ ahe nɛ. Akɛ nɔ ni he hiaa wɔ lɛ ewula wɔ—Nyɔŋmɔ shɛɛ sane lɛ, emumɔ krɔŋkrɔŋ lɛ, kɛ gbɛjianɔ babaoo ni ato ni baa kɛjɛɔ eteokrase gbɛjianɔtoo ni suɔmɔ yɔɔ mli lɛ dɛŋ lɛ. No hewɔ lɛ, akɛ Yehowa tsuji lɛ, eba akɛ wɔɔya nɔ wɔya wɔhiɛ akɛ Nyɔŋmɔ toiŋjɔlɛ he bɔfoi!
[Akrabatsa/Mfonirii ni yɔɔ baafa 9]
Gbɛjianɔtoo ni Suɔmɔ Yɔɔ Mli Kɛha Wekui
Mɛi ni ba “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpee lɛ shishi yɛ gbi ni ji enyɔ lɛ na miishɛɛ akɛ amɛnine aaashɛ wolo hee ni egbɛi ji Nɔ Diɛŋtsɛ ni Kɛ Weku Miishɛɛ Baa lɛ nɔ. Ŋmalɛ mli saji ni he baaba sɛɛnamɔ aha wekui fɛɛ ni sumɔɔ Nyɔŋmɔ yɔɔ wolo nɛɛ mli.
Onukpa ko ni jɛ Connecticut, U.S.A., wie akɛ: “Wɔnine shɛ wɔ Weku Miishɛɛ wolo lɛ nɔ yɛ June 15. Beni shɛɔ June 16 lɛ, migbe efã kanemɔ naa. Wɔkɛfee wɔ klɛŋklɛŋ weku nikasemɔ yɛ gbi ni ji 17 lɛ nɔ, ni ewo wɔ hewalɛ waa! Yɛ nakai gbi lɛ nɔ nɔŋŋ migbe wolo lɛ kanemɔ naa. Ŋwanejee ko bɛ he akɛ wolo kpakpa nɛɛ baafee nɔ ni nɔ bɛ kɛha mɛi fɛɛ ni kaneɔ. Bɔ ni wolo lɛ wieɔ nɔ fɛɛ nɔ faŋŋ, ni emli saji lɛ yɔɔ ebe naa pɛpɛɛpɛ lɛ yeɔ odase lolo akɛ ‘tsulɔ anɔkwafo kɛ nilelɔ’ lɛ kɛ ‘ŋmaa yɛ be ni sa nɔ’ miiha, ni ele wɔhiamɔ nii yɛ bei ni jaraa nɛɛ mli lɛ jogbaŋŋ.”—Mateo 24:45-47.
[Mfoniri ni yɔɔ baafa 7]
Gbekɛbii kɛ onukpai fɛɛ miisumɔ ni amɛle nɔ ni Nyɔŋmɔ taoɔ