Ani Nɔ̃nalɔi Baanyɛ Aná Hejɔlɛ Kɛ̃?

ANI obaasumɔ ni ona nɔ̃naa naagbee, jeee kɛha bo diɛŋtsɛ ohe kɛkɛ, shi kɛha adesai fɛɛ? Susumɔ nɔkwɛmɔ nii nɛɛ ahe:

Sonia ena nɔ̃ babaoo diɛŋtsɛ fe nine.a Klɛŋklɛŋ lɛ, ekpa shi ena akɛ ewu kɛ yoo kroko efite gbala aahu afii nyɔŋma. Kɛkɛ ni HIV hela lɛ tsɛŋe ebinuu fioo kwraa lɛ, ni AIDS gbe lɛ. Afii enyɔ sɛɛ lɛ, ebinuu kroko lɛ he baye, ni etsɛɛɛ ni lɛ hu AIDS gbe lɛ. Sonia kaiɔ akɛ: “Ehela lɛ naagbee gbɛ lɛ sɛɛ tsɛ waa. Epiŋ kɛ nɔnyɛ̃ɛ ni naa wa, eyiteŋ tsɔi famɔ, ni enyɛɛɛ ena nii jogbaŋŋ. Eyɛ mɔbɔ pam.”

Fabiana, Brazil univɛsiti nikaselɔ ko susuɔ jalɛ sane ni ayeee yɛ je lɛ mli yɛ shihilɛ mli lɛ he. Kɛkɛ ni oshara ko ba eshihilɛ mli. Enyɛmi nuu ni miina nɔ̃ kɛ nɔnyɛɛ lɛ gbe ehe. Beni Fabiana nitsumɔ je edɛŋ lɛ, enaanyo ko wo lɛ ŋaa ni etao pai-de-santo (wɔŋtsɛ) ko sɛɛ gbɛ, ejaakɛ esusu akɛ kɛ nɔ̃naa ni tamɔ nɛkɛ baa Fabiana nɔ lɛ, belɛ mɔ ko elomɔ lɛ! Shi pai-de-santo lɛ kɛ hejɔlɛ ko bahaaa lɛ. Yɛ no najiaŋ lɛ, Fabiana nu piŋmɔ he, enyɛɛɛ ewɔ yɛ amanehului ni baa enɔ lɛ hewɔ.

Ana nɔ̃naa lɛ je shishi mra yɛ eshihilɛ mli. Egba akɛ: “Beni miye afi lɛ, minyɛ jo foi eshi mi, no hewɔ lɛ minaa baŋɔ mi.” Ni beni Ana ye afii etɛ pɛ ni enaa lɛ gbo. Akɛ Ana tee awusai akwɛmɔhe yɛ Rio de Janeiro, ni ehi jɛmɛ kɛyashi eye afii 13. Ekɛɛ: “Afee wɔ niseniianii waa yɛ jɛmɛ, ni mibatsɔ mɔ ni tseɔ atua. Beni midaa lɛ, miwu mishi nɔ fɛɛ nɔ.”

Etamɔ nɔ ni nɔ̃naa saa gbɔmɔ fɛɛ gbɔmɔ shihilɛ he yɛ gbɛ kome loo gbɛ kroko nɔ. Lɛlɛŋ, wɔnuɔ adesai amanehului ahe saji daa gbi—be fɛɛ be ni wɔɔkwɛ, wɔɔkane nii, loo wɔɔbo adafitswaa saji atoi. Dr. Mary Sykes Wylie ŋma akɛ: “Saji gbohii ni kɔɔ adesa amanehulu he ni wɔkɛkpeɔ daa gbi ni baa yɛ . . . wɔbe nɛɛ mli lɛ haaa wɔnyɛ wɔjo naa foi dɔŋŋ. Tawuu, adebɔɔ naa osharai, nitsumɔ mli osharai, gbɛjegbɛi anɔ osharai ni kɛ gbele baa, awuiyeli, hegbeyeiwolɔi ni kɛ gbele tutuaa mɔ, bɔlɛnamɔ mli jeŋba shara, yoomɔmɔ ekãa naa, awuiyeli ni yaa nɔ yɛ shia—fɛɛ efee nii ni yɔɔ gbeyei ni baa daa gbi yɛ afii ohai 20 lɛ mli.” Kristofonyo bɔfo Paulo mu adesa niiashikpamɔ lɛ naa yɛ gbɛ ni ja nɔ akɛ: “Bɔɔ nii lɛ fɛɛ kɛ wɔ dɔmɔɔ ntsɔi ni amɛkɛ wɔ kɔmɔɔ kɛbashi ŋmɛnɛŋmɛnɛ.”—Romabii 8:22.

Ni bo hu? Ani oona nɔ̃? Mɛɛ hejɔlɛ obaanyɛ okpa gbɛ? Ani onine baashɛ anɔkwa toiŋjɔlɛ nɔ kɛ̃? Sonia, Fabiana, kɛ Ana ná miishɛjemɔ diɛŋtsɛ kɛ toiŋjɔlɛ diɛŋtsɛ ni fa saŋŋ! Obaanyɛ okane enɛ yɛ sane ni aŋma ni nyiɛ sɛɛ lɛ mli.

[Shishigbɛ niŋmai]