Yiwalaheremɔ Nɔ ni Etsɔ̃ɔ Diɛŋtsɛ

‘ANI ahere oyiwala?’ Yɛ bei pii amli lɛ, mɛi ni biɔ sane ni tamɔ nɛkɛ lɛ nuɔ he akɛ áhere amɛyiwala, ejaakɛ ‘amɛkpɛlɛ Yesu nɔ akɛ amɛ diɛŋtsɛ amɛ-Yiwalaherelɔ.’ Ni kɛlɛ, mɛi krokomɛi nuɔ he akɛ gbɛi sɔrɔtoi pii yɛ ni kɛ mɔ yaa yiwalaheremɔ mli, ni ákɛ, bei abɔ ni ‘Yesu yɔɔ otsui mli nɛɛ,’ nɔ ni oheɔ oyeɔ loo sɔlemɔ ni oyaa lɛ po kɔɔɔ he eko.

Biblia lɛ kɛɔ akɛ Nyɔŋmɔ suɔmɔnaa nii ji ni “ehere gbɔmɛi fɛɛ yiwala.” (1 Timoteo 2:3, 4) No hewɔ lɛ, yiwalaheremɔ yɛ kɛha mɛi fɛɛ ni baakpɛlɛ nɔ. Shi akɛ aaahere mɔ ko yiwala lɛ tsɔ̃ɔ mɛni diɛŋtsɛ? Ani eji nɔ ko ni baa onɔ diɛŋtsɛ ni mɔdɛŋ fioo ko pɛ obɔɔ yɛ he loo obɔɔɔ he mɔdɛŋ kwraa?

Wiemɔ “yiwalaheremɔ” shishi ji “kpɔmɔ kɛmiijɛ oshara loo hiɛkpatamɔ mli.” No hewɔ lɛ, anɔkwa yiwalaheremɔ kɔɔ babaoo he fe jwɛŋmɔŋ shihilɛ ni hejɔlɛ yɔɔ mli. Etsɔ̃ɔ mɔ ko yiwala ni aaahere kɛjɛ ŋmɛnɛŋmɛnɛ nibii agbɛjianɔtoo fɔŋ nɛɛ hiɛkpatamɔ lɛ mli, koni yɛ naagbee lɛ ajie lɛ kɛjɛ gbele mli! Shi namɔ kwraa ji mɔ ni Nyɔŋmɔ baahere eyiwala lɛ? Yɛ ehetoohamɔ mli lɛ, nyɛhaa wɔpɛia nɔ ni Yesu Kristo tsɔ̃ɔ yɛ sane nɛɛ he lɛ mli wɔkwɛa. Nɔ ni baajɛ wɔ nibii amlipɛimɔ lɛ mli aba lɛ baaha onaa akpɛ ohe.

Yiwalaheremɔ—Ani Anáa yɛ Jamɔi Fɛɛ Mli?

Be ko lɛ, Yesu kɛ Samariayoo ko ná sanegbaa. Tsɛbelɛ ejeee Yudanyo moŋ, shi ehe eye yɛ gbɛ ni ja nɔ akɛ, Mesia “ni atsɛɔ lɛ Kristo lɛ” baaba. (Yohane 4:25) Ani hemɔkɛyeli ni tamɔ nɛkɛ fa bɔ ni aaahere eyiwala? Dabi, ejaakɛ Yesu kɛ ekãa kɛɛ yoo lɛ akɛ: “Nyɛ lɛ, nyɛleee nɔ ni nyɛjaa.” Yesu le akɛ kɛji akɛ yoo nɛɛ nine baashɛ yiwalaheremɔ nɔ lɛ, ehe baahia ni etsake gbɛ ni etsɔ̃ɔ nɔ ejáa Nyɔŋmɔ lɛ. No hewɔ lɛ, Yesu tsɔ̃ɔ mli akɛ: “Shi kɛlɛ ŋmɛlɛtswaa lɛ miiba, ni eshɛ agbɛnɛ, beni anɔkwa jalɔi lɛ aaaja tsɛ lɛ yɛ mumɔ kɛ anɔkwale mli, ejaakɛ mɛi ni jaa lɛ nɛkɛ, tsɛ lɛ hu taoɔ.”—Yohane 4:22. 23.

Be kroko mli ní Yesu jie bɔ ni esusuɔ yiwalaheremɔ he ehaa lɛ kɔɔ Farisifoi lɛ, ni ji Yudajamɔ mli jamɔ kuu ko ni ehe gbɛi waa lɛ ahe. Farisifoi lɛ eto jamɔ gbɛjianɔtoo ko amɛma shi, ni amɛheɔ amɛyeɔ akɛ Nyɔŋmɔ nɔkpɛlɛmɔ hɔ sɛɛ. Shi, bo nɔ ni Yesu kɛɛ Farisifoi lɛ toi: “Nyɛ osatofoi! Yesaia sane lɛ ja beni egba yɛ nyɛhe akɛ: ‘Nɛkɛ gbɔmɛi nɛɛ kɛ amɛnaabu woɔ mi, shi amɛtsui kɛ mi teŋ jɛkɛ. Yakatswaa amɛjaa mi lɛ; amɛtsɔ̃ɔmɔi lɛ ji mlai ni gbɔmɛi wo.’ ”—Mateo 15:7-9, New International Version.

Ni Nyɔŋmɔjamɔ kui babaoo ni yɔɔ ŋmɛnɛ ni kɛɔ akɛ amɛheɔ Kristo nɔ amɛyeɔ lɛ hu? Ani Yesu baakpɛlɛ fɛɛ nɔ akɛ gbɛi ni sa ni atsɔ̃ɔ nɔ anáa yiwalaheremɔ? Esaaa akɛ wɔsusuɔ wɔyiŋ yɛ enɛ he, ejaakɛ Yesu wie faŋŋ akɛ: “Jeee mɔ fɛɛ mɔ ni kɛɔ mi akɛ: Nuntsɔ, Nuntsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ. Mɛi pii aaakɛɛ mi yɛ no gbi lɛ nɔ akɛ: Nuntsɔ, Nuntsɔ! ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi yɛ, ni ogbɛi lɛ mli wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!”—Mateo 7:21-23.

Yesu he Anɔkwale Nilee he Miihia Kɛha Yiwalaheremɔ

Nɛkɛ Yesu wiemɔi nɛɛ hiɛ saji ni esa akɛ akɛ hiɛdɔɔ asusu he. Amɛtsɔ̃ɔ akɛ gbɔmɛi pii ni amɛtu amɛhe amɛha lɛ efeee ‘Tsɛ lɛ suɔmɔnaa nii.’ Belɛ te mɔ ko aaafee tɛŋŋ ni ena anɔkwa yiwalaheremɔ? Klɛŋklɛŋ Timoteo 2:3, 4 haa hetoo akɛ: “[Nyɔŋmɔ] sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.” (Wɔma efã ko nɔ mi.)—Okɛto Kolosebii 1:9, 10 he.

Nilee ni tamɔ nɛkɛ he miihia waa kɛha yiwalaheremɔ ni aaaná. Beni Roma gbokɛlɛfoi anɔkwɛlɔ ko bi bɔfo Paulo kɛ enaanyo Sila sane akɛ: “Te mafee tɛŋŋ ni mana yiwalaheremɔŋ?” lɛ, amɛha hetoo akɛ: “Hemɔ Nuntsɔ Yesu Kristo lɛ nɔ oye, ni aaahere okɛ owe lɛ fɛɛ yiwala.” (Bɔfoi lɛ Asaji 16:30, 31) Ani no tsɔ̃ɔ akɛ, fɛɛ ni ehe hiaa ni gbokɛlɛfoi anɔkwɛlɔ lɛ kɛ eweku lɛ afee ji ni amɛná henumɔ ko yɛ amɛtsuii amli? Dabi, nɔ kome ji akɛ, amɛnyɛŋ ‘amɛhe Nuntsɔ Yesu Kristo nɔ amɛye’ yɛ anɔkwale mli, ja amɛna amɛle mɔ ni Yesu ji, nɔ ni efee, kɛ nɔ ni etsɔ̃ɔ lɛ ahe shishinumɔ ko dã.

Akɛ nɔkwɛmɔnɔ lɛ, Yesu tsɔ̃ɔ ŋwɛi nɔyeli ko ni ato ama shi—“Nyɔŋmɔ maŋtsɛyeli” lɛ he nii. (Luka 4:43) Eto shishitoo mlai ni kɔɔ Kristofoi ajeŋba kɛ subaŋ he efɔ̃ shi. (Mateo, yitsei 5-7) Etsɔ̃ɔ gbɛhe ni esa akɛ ekaselɔi lɛ akɔ kɛ aawie maŋkwramɔŋ saji ahe. (Yohane 15:19) Eto jeŋ muu fɛɛ shiɛmɔ nitsumɔ he gbɛjianɔ ni efã esɛɛnyiɛlɔi lɛ ni amɛná mli gbɛfaŋnɔ. (Mateo 24:14; Bɔfoi lɛ Asaji 1:8) Hɛɛ, ‘Yesu nɔ ní aaahe aye’ lɛ tsɔ̃ɔ nibii pii ni aaanu shishi! Belɛ ŋwanejee ko bɛ he akɛ, Paulo kɛ Sila ‘jaje Yehowa wiemɔ lɛ amɛtsɔ̃ɔ [gbokɛlɛfoi anɔkwɛlɔ] lɛ kɛ mɛi fɛɛ ni yɔɔ ewe lɛ’ dani abaptisi heyelilɔi heei nɛɛ.—Bɔfoi lɛ Asaji 16:32, 33.

Nyɔŋmɔ he Anɔkwale Nilee Hu he Miihia

He ní aaahe Yesu nɔ aye yɛ anɔkwale mli lɛ fã ni he hiaa lɛ kɔɔ ja ni aaaja Nyɔŋmɔ ni Yesu diɛŋtsɛ jaa lɛ lɛ he. Yesu sɔle akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.”—Yohane 17:3, NW.

Yɛ Nyɔŋmɔ Bi lɛ shikpɔŋ nɔ sɔɔmɔ nitsumɔ lɛ mli lɛ, egbalaa jwɛŋmɔ kɛyaa e-Tsɛ lɛ nɔ be fɛɛ be, shi jeee lɛ diɛŋtsɛ enɔ. Ekɛɛɛ akɛ lɛ ji Nyɔŋmɔ Ofe lɛ kɔkɔɔkɔ. (Yohane 12:49, 50) Shii abɔ ni Yesu fee egbɛhe yɛ Nyɔŋmɔ gbɛjianɔtoo mli lɛ faŋŋ, kɛtsɔ kɛɛmɔ ni ekɛɛ akɛ ehɔ e-Tsɛ lɛ shishi lɛ nɔ. (Luka 22:41, 42; Yohane 5:19) Ejaakɛ Yesu jaje akɛ: “mitsɛ da fe mi.” (Yohane 14:28) Ani osɔlemɔ lɛ etsɔ̃ɔ bo anɔkwa wekukpaa ni kã Nyɔŋmɔ kɛ Kristo teŋ lɛ he nii? Aloo áha ohe oye akɛ Yesu diɛŋtsɛ ji Nyɔŋmɔ Ofe lɛ? Oyiwalaheremɔ damɔ anɔkwa shishinumɔ ni oooná nɔ.

Yɛ Nuntsɔ lɛ Sɔlemɔ lɛ mli lɛ, Yesu wo ekaselɔi lɛ hewalɛ ni amɛsɔle akɛ: “Ha ogbɛi lɛ he atse.” (Mateo 6:9, NW) Biblia shishitsɔɔmɔi pii etsake Nyɔŋmɔ gbɛi lɛ hiɛ, ni amɛtsɛɔ lɛ “Nuntsɔ.” Shi Nyɔŋmɔ gbɛi lɛ je kpo fe shii akpei ekpaa yɛ blema “Kpaŋmɔ Momo” lɛ shishitsɔɔmɔi ni afee lɛ amli! No hewɔ lɛ Lala 83:19 kaneɔ akɛ: “Koni amɛna amɛle akɛ bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” (Wɔma efã ko nɔ mi.) Ani atsɔ̃ɔ bo ni okɛ Nyɔŋmɔ gbɛi, Yehowa, atsu nii? Kɛ jeee nakai lɛ, oyiwalaheremɔ yɛ oshara mli, ejaakɛ “mɔ fɛɛ mɔ ni aaabo atsɛ Yehowa gbɛi lɛ, aaahere eyiwala”!—Bɔfoi lɛ Asaji 2:21, NW; okɛto Yoel 3:5 he.

Yɛ Mumɔ kɛ Anɔkwale Mli

Yesu Kristo gbala jwɛŋmɔ kɛtee Nyɔŋmɔ Wiemɔ, ni ji Biblia lɛ hu nɔ. Kɛ eetsɔɔ jwɛŋmɔ ni Nyɔŋmɔ hiɛ yɛ saji komɛi ahe lɛ mli lɛ, efɔɔ kɛɛmɔ akɛ: “Aŋma akɛ.” (Mateo 4:4, 7, 10; 11:10; 21:13) Yesu sɔle yɛ ekaselɔi lɛ ahewɔ, yɛ gbɛkɛ ni enɔ jetsɛremɔ egbo lɛ, akɛ: “Feemɔ amɛ krɔŋkrɔŋ yɛ onɔkwale lɛ mli; owiemɔ lɛ anɔkwaleŋ.”—Yohane 17:17.

Ni aaaná Nyɔŋmɔ Wiemɔ, ni ji Biblia lɛ mli tsɔ̃ɔmɔi ahe shishinumɔ hu ji taomɔ nii kroko kɛha yiwalaheremɔ. (2 Timoteo 3:16) Biblia lɛ pɛ haa sanebimɔi ni tamɔ nɛkɛ hetoo: Mɛni ji wala shishinumɔ? Mɛni hewɔ Nyɔŋmɔ ŋmɛ efɔŋfeemɔ gbɛ koni eya nɔ yɛ be kakadaŋŋ mli lɛ? Mɛni baa mɔ ko nɔ kɛ egbo? Ani Nyɔŋmɔ piŋɔ mɛi yɛ hɛl la ni tsoɔ mli lɛɛlɛŋ? Mɛni ji Nyɔŋmɔ yiŋtoo kɛha shikpɔŋ lɛ?a Mɔ ko nyɛŋ aja Nyɔŋmɔ yɛ gbɛ kpakpa nɔ kɛ ebɛ nɛkɛ saji nɛɛ ahe shishinumɔ ni ja, ejaakɛ Yesu kɛɛ akɛ: “Anɔkwa jalɔi lɛ aaaja tsɛ lɛ yɛ mumɔ kɛ anɔkwale mli.”—Yohane 4:23.

Hemɔkɛyeli Tsirɛɔ Mɔ Kɛyaa Nifeemɔ Mli

Yiwalaheremɔ kɔɔ nibii babaoo he fe saji kɛkɛ ni aaale. Nyɔŋmɔ he anɔkwale nilee kɛ hemɔkɛyeli baa tsui ni kpɛlɛɔ sane nɔ lɛ mli. (Romabii 10:10, 17; Hebribii 11:6) Hemɔkɛyeli ni tamɔ nɛkɛ tsirɛɔ mɔ kɛyaa nifeemɔ mli. Akɛ nɔkwɛmɔnɔ lɛ, Biblia lɛ woɔ ŋaa akɛ: “No hewɔ lɛ nyɛtsakea nyɛtsuiiaŋ, ni nyɛkua nyɛ sɛɛ, koni agbe nyɛhe eshai lɛ, bɔni afee ni hejɔɔmɔ yinɔ ajɛ [Yehowa, NW] hiɛ aba.”—Bɔfoi lɛ Asaji 3:19, 20.

Hɛɛ, yiwalaheremɔ kɔɔ subaŋ kɛ jeŋba he tɛi ni Nyɔŋmɔ kɛha ni mɔ ko aaahi shi yɛ naa lɛ hu he. Nyɔŋmɔ Wiemɔ lɛ mli hewalɛ ni tsakeɔ mɔ lɛ hewalɛ shishi ni abaa lɛ haa akɛ anɔkwayeli bayeɔ subaŋi komɛi ni eka mɔ he tamɔ amale kɛ shishiumɔ lɛ najiaŋ. (Tito 2:10) Aŋmɛɛɔ jeŋba shara mli nifeemɔi tamɔ hii kɛ hii ni kɛ amɛhe feɔ yakayakanii, gbalafitemɔ, kɛ ajwamaŋbɔɔ he, ni akɛ jeŋba mli hetsemɔ yeɔ najiaŋ. (1 Korintobii 6:9-11) Enɛ jeee hetsimɔ kɛmiijɛ nɔ ko he yɛ be fioo mli ni damɔ henumɔ nɔ, shi moŋ tsakemɔ kwraa ni baa kɛjɛɔ Nyɔŋmɔ Wiemɔ lɛ kasemɔ jogbaŋŋ kɛ ekɛ nitsumɔ mli.—Efesobii 4:22-24.

Yɛ be ni sa mli lɛ, suɔmɔ kɛ hiɛsɔɔ kɛha Nyɔŋmɔ tsirɛɔ mɔ ni yɔɔ tsuijurɔ lɛ koni ejɔɔ ehe nɔ kwraa eha Nyɔŋmɔ, koni ekɛ nu mli baptisimɔ afee he okadi. (Mateo 28:19, 20; Romabii 12:1) Yɛ Nyɔŋmɔ hiɛ lɛ, áhere Kristofoi ni abaptisi amɛ lɛ yiwala. (1 Petro 3:21) Nyɔŋmɔ baahere amɛyiwala kwraa yɛ yiwalɛ jeŋ nɛɛ hiɛkpatamɔ ni baa lɛ mli, kɛtsɔ amɛyibaamɔ kɛmiitsɔ nakai amanehulu lɛ mli lɛ nɔ.—Kpojiemɔ 7:9, 14.

Nɔ ni Yiwalaheremɔ Baatsɔ̃ɔ Kɛha Bo

Anaa faŋŋ kɛjɛɔ sane hesusumɔ kuku nɛɛ mli akɛ, yiwalaheremɔ ni aaaná lɛ kɔɔ nibii babaoo he fe ‘Nuntsɔ Yesu ni aaahi otsui mli.’ Etsɔ̃ɔ Yehowa Nyɔŋmɔ kɛ Yesu Kristo he anɔkwale nilee ni aaaná kɛ tsakemɔi ni he hiaa ni aaafee yɛ shihilɛ mli lɛ he. Enɛ feemɔ baatamɔ nɔ ko ni wa waa, shi Yehowa Odasefoi miisumɔ ni amɛye amɛbua bo yɛ enɛ he nitsumɔ mli. Amɛbaanyɛ ni amɛye amɛbua bo koni oje shishi ni onyiɛ gbɛ ni kɛ mɔ yaa anɔkwa yiwalaheremɔ mli lɛ nɔ kɛtsɔ shia Biblia mli nikasemɔ ni aheee bo nɔ ko lɛ nɔ.b

Yɛ bɔ ni Nyɔŋmɔ kojomɔ gbi ni baa lɛ ebɛŋkɛ kpaakpa eha hewɔ lɛ, nakai feemɔ he ebahia waa fe bei fɛɛ! Be ni esa akɛ okɛbo gbalɔ lɛ wiemɔi lɛ atoi nɛ: “Dani Yehowa mlifu gbi lɛ aba nyɛnɔ! Nyɛtaoa Yehowa sɛɛgbɛ, nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtaoa jalɛ sɛɛgbɛ, nyɛtaoa heshibaa sɛɛgbɛ: ekolɛ aaaŋɔ nyɛ atee yɛ Yehowa mlifu gbi lɛ nɔ!”—Zefania 2:2, 3.

[Shishigbɛ niŋmai]

[Akrabatsa ni yɔɔ baafa 6]

Yiwalaheremɔ Baa Kɛjɛɔ . . .

◻ Nyɔŋmɔ kɛ Yesu he anɔkwale nilee ni aaaná lɛ mli.—Yohane 17:3.

◻ Hemɔkɛyeli ni aaaná lɛ mli.—Romabii 10:17; Hebribii 11:6.

◻ Tsuitsakemɔ kɛ esha he jee mli.—Bɔfoi lɛ Asaji 3:19; Efesobii 4:22-24.

◻ Henɔjɔɔmɔ kɛ baptisimɔ mli.—Mateo 16:24; 28:19, 20.

◻ Sane lɛ ni ayaa nɔ ajajeɔ yɛ mɛi fɛɛ hiɛ lɛ mli.—Mateo 24:14; Romabii 10:10.

[Mfoniri ni yɔɔ baafa 7]

Biblia lɛ kasemɔ, nɔ ni akaseɔ lɛ kɛ nitsumɔ, henɔjɔɔmɔ, kɛ baptisimɔ ji gbɛi ni kɛ mɔ yaa yiwalaheremɔ mli