Mɛni Hewɔ Esa akɛ Oda Shi?
MLITEŊ wu he opireshɛn nyɛ̃ Harley nɔ koni etsake nii ni etsuɔ akɛ tsɔne he nitsulɔ lɛ, ni ebatsɔ ɔfis nitsulɔ. Beni abi Harley ni etsɔɔ bɔ ni enuɔ tsakemɔ nɛɛ he ehaa lɛ, ekɛɛ: “Mishweɔ koni mikɛ tsɔne he nibii atsu nii. Shi yɛ faŋŋ mli lɛ, miyɛ nitsumɔ ni mitsuɔ bianɛ lɛ he miishɛɛ waa fe nitsumɔ ni mitsu tsutsu ko lɛ.”
Beni Harley tsɔɔ nɔ hewɔ ni etsui enyɔ emli lɛ, egba akɛ: “Enɛ jɛ gbɔmɛi ni mikɛtsuɔ nii lɛ anifeemɔ hewɔ. Ákɛ mɛi ni tamɔɔɔ mɛi ni yɔɔ he ni mitsu nii yɛ tsutsu ko lɛ, mɔ ni ji minitsumɔ nɔkwɛlɔ kɛ mɛi ni mikɛtsuɔ nii bianɛ lɛ ahiɛ sɔɔ nɔ ni mifeɔ lɛ, ni amɛjieɔ miyi be fɛɛ be. Enɛ ji nɔ ni kɛ tsakemɔ wulu eba mishihilɛ mli lɛ.” Akɛni Harley nuɔ he akɛ ehe yɛ sɛɛnamɔ ni ehe hiaa hewɔ lɛ, amrɔ nɛɛ, eji nitsulɔ ni yɔɔ miishɛɛ.
Kɛ akɛ yijiemɔ loo shidaa wiemɔi ha yɛ be ni sa mli lɛ, ehaa mɔ tsui nyaa waa diɛŋtsɛ. Yɛ gbɛ kroko nɔ lɛ, nɔ ni shi ni adaaa lɛ tsuɔ lɛ baanyɛ atsĩ mɔ ko miishɛɛnamɔ naa taakɛ Shakespeare tsɔɔ mli lɛ, akɛ: “Tswaa, tswaa, bo fɛ̃ibe kɔɔyɔɔ, ojeee mɔ ni bɛ mlihilɛ kwraa taakɛ gbɔmɔ ni edaaa shi ji lɛ.” Mɔbɔ sane ji akɛ, mɛi babaoo ji mɛi ni ajieee mlihilɛ ni tamɔ nɛkɛ kpo atsɔɔɔ amɛ.
Tee Shi Oshi Trumufeemɔ
Anɔkwa wiemɔi ni akɛtsɔɔ shidaa lɛ miilaaje yɛ je lɛŋ ŋmɛnɛ. Akɛ nɔkwɛmɔnɔ lɛ, niŋmalɔ ko tee sanebimɔ ko shi akɛ: “Kɛ ayemforo lɛ ná be ni ekɛŋma yookpeemɔ ninefɔɔ he woji 200 anɔ nii lɛ, mɛni hewɔ enyɛɛɛ ená be ni ekɛŋma woji bibii ni ekɛtsɔɔ shidaa yɛ nikeenii 163 lɛ he lɛ?” Bei pii lɛ, mɛi ekɛɛɛ wiemɔ kuku ni ji “oyiwaladɔŋŋ” lɛ po. Ayaa nɔ akɛ mi klɛŋklɛŋ nifeemɔ yeɔ shidaa najiaŋ. Nɛkɛ shihilɛ nɛɛ ji naagbee gbii lɛ akadimɔnii lɛ ateŋ ekome. Bɔfo Paulo bɔ kɔkɔ akɛ: “Esa akɛ nyɛle akɛ, yɛ naagbee gbii lɛ anɔ lɛ oshara baayi bei lɛ amli obɔ. Gbɔmɛi baafee pɛsɛmkunya waa diɛŋtsɛ . . . Amɛbaafee mɛi ni edaaa shi kwraa.”—2 Timoteo 3:1, 2, Phillips.
Yɛ shihilɛi komɛi amli lɛ, akɛ yiteŋmuluwoo yeɔ shidaa najiaŋ. Ahaa shidaa wiemɔi jɛɔ tsuiŋ yɛ be mli ni mɔ lɛ susuuu akɛ eeená he sɛɛ. Shi kɛlɛ, yiteŋmuluwoo ni bei pii lɛ anɔkwayeli bɛ mli, ni awo he lɛ, baanyɛ ajɛ yiŋtoo ni mli wa tsɔ̃ akɛ aaaya hiɛ fe mɔ ko loo mɔ diɛŋtsɛ aaaná sɛɛnamɔi komɛi lɛ mli aba. (Yuda 16) Yɛ ŋaa gbɛ ni atsɔɔ nɔ akɔneɔ mɔ lɛ yiŋ lɛ sɛɛ lɛ, naadɔkɔmɔ wiemɔ nɛɛ bafeɔ nɔ ni jɛɔ henɔwomɔ kɛ hewoo mli baa. Belɛ namɔ baasumɔ ni akɛ wiemɔ ni jɛɛɛ anɔkwayeli mli awo eyiteŋ mulu? Shi anɔkwa shidaa haa mɔ náa miishɛɛ diɛŋtsɛ.
Mɔ ni jieɔ shidaa kpo etsɔɔ lɛ náa nakai feemɔ he sɛɛ. Miishɛɛ ni enáa yɛ etsuiŋ ni ejɛɔ etsɔɔ hiɛsɔɔ hewɔ lɛ, no haa enáa miishɛɛ kɛ toiŋjɔlɛ. (Okɛto Abɛi 15:13, 15 he.) Ni akɛni shidaa ji su kpakpa hewɔ lɛ, ebuɔ ehe kɛjɛɔ henumɔi ni esaaa tamɔ mlifu, awuŋayeli, kɛ nɔ ko he mlifu ni anáa lɛ he.
“Nyɛlea Shidaa”
Biblia lɛ woɔ wɔ hewalɛ koni wɔjie mumɔ ni tsɔɔ shidaa loo hiɛsɔɔ kpo. Paulo ŋma akɛ: “Nyɛdaa shi yɛ nɔ fɛɛ nɔ mli: ejaakɛ no ji Nyɔŋmɔ suɔmɔnaa nii yɛ Kristo Yesu mli yɛ nyɛgbɛfaŋ.” (1 Tesalonikabii 5:18) Ni Paulo wo Kolosebii lɛ ŋaa akɛ: “Nyɛhaa [Kristo, NW] hejɔlɛ lɛ ayea lumɔ yɛ nyɛtsuii amli, . . . ni nyɛlea shidaa.” (Kolosebii 3:15) Shidaa wiemɔi yɛ lalai awolo lɛ babaoo mli, ni tsɔɔ akɛ shidaa ni jɛ tsuiŋ lɛ ji Nyɔŋmɔjamɔ su kpakpa. (Lala 27:4; 75:2) Eka shi faŋŋ akɛ, Yehowa Nyɔŋmɔ náa miishɛɛ kɛ́ wɔjie hiɛsɔɔ kpo yɛ daa gbi shihilɛ mli saji amli lɛ.
Shi mɛɛ nibii komɛi yɔɔ trumufeemɔ jeŋ nɛɛ mli ni haa ewaa kɛhaa wɔ akɛ wɔɔjie shidaa mumɔ kpo lɛ? Mɛɛ gbɛ nɔ wɔɔtsɔ wɔnyɛ wɔjie hiɛsɔɔ su kpo yɛ daa gbi shihilɛ mli? Abaasusu sanebimɔi nɛɛ ahe yɛ sane ni nyiɛ sɛɛ nɛɛ mli.