Maŋtsɛyeli Jajelɔi Bɔ Amaniɛ
“Daa Nɛɛ yɛ Jara lɛ Nɔ”
BƆFO Paulo kɛ hegbɛ fɛɛ hegbɛ tsu nii ni ekɛgbɛ Maŋtsɛyeli shɛɛ sane lɛ eshwa. Bɔni afee ni ená gbɔmɛi ni sa lɛ, “ekɛ Yudafoi ni yɔɔ kpeehe lɛ . . . kɛ mɛi ni kɛ lɛ kpeɔ daa nɛɛ yɛ jara lɛ nɔ lɛ” yiyii.—Bɔfoi lɛ Asaji 17:17.
Kɛjɛ Ŋ.B. klɛŋklɛŋ afii oha lɛ mli kɛbaa nɛɛ lɛ, nakai ekãa lɛ ebafee Yehowa jalɔi akadimɔnɔ ni yɔɔ srɔto. (Mateo 28:19, 20) Ŋmɛnɛ, nakai nɔŋŋ Yehowa Odasefoi kɛ gbɛ̀i srɔtoi tsuɔ nii, yɛ be mli ni amɛkɛ ekãa yeɔ amɛbua mɛi ni hiɛ tsui ni ja lɛ, koni amɛshɛ anɔkwale lɛ lee mli lɛ. (1 Timoteo 2:3, 4) Niiashikpamɔ ni nyiɛ sɛɛ nɛɛ ni jɛ Australia lɛ tsɔɔ enɛ mli.
Daa gbii enumɔ yɛ otsi lɛ mli lɛ, Sid yakwɛɔ Biblia he woji fioo ni wɔto yɛ Sydney oketeke shidaamɔhe lɛ nɔ, ni Harold hu yafeɔ nakai nɔŋŋ kɛ eshɛ enɔ. Kɛbashi amrɔ nɛɛ, amɛkɛ aaafee afii enumɔ ená Nyɔŋmɔ Maŋtsɛyeli sanekpakpa lɛ mli gbɛfaŋnɔ yɛ nɛkɛ gbɛ nɔ. Sid ni eye afii 95 lɛ tsɔɔ mli akɛ: “Beni miye afii 87 lɛ, minyɛɛɛ makudɔ kar dɔŋŋ. Enɛ ha minijiaŋ je wui, ejaakɛ mináa odaseyeli nitsumɔ yɛ maŋ lɛ mli lɛ he miishɛɛ. Be ko beni miyɔɔ he ko ni shisharalɔi fɔɔ jɛmɛ yaa, ni atsɛɔ jɛmɛ akɛ Echo Point, ni yɔɔ Katoomba lɛ, mina nitɛŋlɔ ko ni miihɔɔ shikpɔji ni atɛŋ. Mikwɛ nitɛŋmɔi lɛ jogbaŋŋ, ni mikɛɛ mihe akɛ, ‘Miyɛ mfonirii ni yɔɔ fɛo fe nomɛi yɛ midaseyeli baagi lɛ mli—ni ejara baa shi kwraa fe no!’ No hewɔ lɛ, mikpɛ miyiŋ akɛ mawo jara fioo ko koni ana, ni mawo yɛ he ko ni mɛi pii baa jɛmɛ, koni mikɛ Biblia mli woji mfoniri fɛfɛji ni Yehowa Odasefoi jaa lɛ aha mɛi ni hoɔ lɛ.
“Afii ejwɛ sɛɛ lɛ, miwo jara lɛ kɛtee Sydney, ni Harold bafata mihe. Wɔja bei ni wɔkɛwoɔ jara lɛ, ni wɔkɛ wɔ asafoi lɛ tsuɔ nii.” Harold ni amrɔ nɛɛ eye afii 83 lɛ kɛɔ akɛ: “Kɛjɛ Ju kɛyashi Sohaa lɛ gbɔmɛi fioo ko pɛ yɔɔ shia. No hewɔ lɛ Maŋtsɛyeli lɛ shɛɛ sane lɛ ni wɔkɛ wɔhe woɔ mli yɛ nɛkɛ gbɛ nɔ lɛ kɛ wɔ yaa he ni gbɔmɛi lɛ yɔɔ. Taakɛ eji lɛ, enɛ kɛ yibiiwoo kpakpai bahaa wɔ. Wɔwoji ni wɔkɛhaa yɛ maŋ nɛɛ mli lɛ yɛ srɔto kwraa.”
Sid kɛɔ akɛ: “Eyɛ mli akɛ hei srɔtoi ejwɛ loo enumɔ wɔwo jara lɛ yɛ yɛ afii ni eho lɛ amli moŋ, shi etsɛɛɛ ni ayoɔ wɔ. Mɛi komɛi baheɔ woji yɛ wɔŋɔɔ. Mɛi krokomɛi hu babiɔ saji ni aha amɛ hetoo. Ni mɛi komɛi miitao ni amɛ kɛ wɔ agba sane be fioo ko kɛkɛ. Nɛkɛ be mli pɛ ni mɛi ni miyasara amɛ lɛ baa miŋɔɔ,” kɛkɛ ni eŋmɔ fioo.
Harold kɛfata he akɛ: “Gbɔmɛi pii yɛ Biblia lɛ he miishɛɛ yɛ anɔkwale mli. Yɛ nyɔŋ kome mli lɛ, Odasefoi lɛ kɛ mɛi ejwɛ ko je Biblia mli nikasemɔ shishi, yɛ woji ni amɛhe yɛ wɔdɛŋ, kɛ Biblia lɛ mli ni wɔjɛ wɔnyɛ wɔha amɛ sanebimɔi ahetooi lɛ hewɔ. Niiashikpamɔi ni tamɔ enɛ woɔ wɔ hewalɛ waa diɛŋtsɛ.”
Taakɛ Sid kɛ Harold—kɛ agbɛnɛ taakɛ bɔfo Paulo ji lɛ—Yehowa Odasefoi ni yɔɔ he fɛɛ he lɛ kɛ gbɛ̀i fɛɛ ni amɛaaná lɛ tsuɔ nii ni amɛkɛgbɛɔ shɛɛ sane ni he hiaa lɛ amɛshwaa. Enɛ hewɔ lɛ, aaya nɔ aashiɛ “sanekpakpa” yɛ “je nɛŋ fɛɛ.”—Mateo 24:14.