Eye Ebua ni Agbɛ La lɛ Ashwã “Kɛyashi Shikpɔŋ lɛ Naagbeehei Lɛ”
AKƐ bɔfo Paulo tsu nii ni akɛgbɛ mumɔŋ la ashwã “kɛyashi shikpɔŋ lɛ naagbeehei lɛ.” Nɔ ni jɛ mli ba ji akɛ, mɛi babaoo ni “ajie ato naanɔ wala lɛ hé ye.”—Bɔfoi lɛ Asaji 13:47, 48; Yesaia 49:6.
Shwe ni ashweɔ waa akɛ aaagbɛ mumɔŋ la ashwã lɛ ji nɔ ni anaa faŋŋ hu yɛ William Lloyd Barry, ni ji Yehowa Odasefoi a-Nɔyeli Kuu lɛ mlinyo lɛ Kristofonyo mɔdɛŋbɔɔ he wala shihilɛ mli hetuu-kɛhamɔ ni tɔlɛ bɛ mli lɛ mli. Nyɛminuu Barry gbo July 2, 1999, be mli ni enáa kpokpaa wulu nɔ kpee shishi nifeemɔ pɔtɛɛ ko mli gbɛfaŋnɔ yɛ Hawaii lɛ.
Afɔ́ Lloyd Barry yɛ New Zealand yɛ December 20, 1916 mli. Kɛtsɔ hiɛ lɛ, enyɛ kɛ etsɛ ená Biblia mli anɔkwalei ni yɔɔ C. T. Russel woji lɛ amli lɛ, ní Buu Mɔɔ Biblia kɛ Woji Bibii Asafo lɛ ja lɛ he miishɛɛ waa. No hewɔ lɛ, Nyɛminuu Barry da yɛ shia ni Kristofoi ni etuu amɛhe yɔɔ mli lɛ mli.
Eyɛ mli akɛ esumɔɔ akaŋshii kɛ wolo-kasemɔ, ni ená jweremɔ nɔ̃ yɛ jeŋ nilee mli moŋ, shi Nyɛminuu Barry ha ehiɛ hi mumɔŋ nibii ni esumɔɔ lɛ anɔ. Enɛ hewɔ lɛ, yɛ January 1, 1939 lɛ, ekɛ ehe wo be-fɛɛ sɔɔmɔ nitsumɔ lɛ mli, ni ebatsɔ Bethel weku lɛ mlinyo yɛ Asafo lɛ nitsumɔhe nine ni yɔɔ Australia lɛ. Beni nɔyeli lɛ tsĩ Asafo lɛ naa yɛ afi 1941 lɛ, Nyɛminuu Barry batsɔ mɔ ni bɛ dekã kwraa yɛ nitsumɔhe lɛ, ni bei komɛi lɛ ahaa eŋmalaa saji koni akɛwo nanemɛi heyelilɔi lɛ ekãa. Efee nɔkwɛmɔnɔ kpakpa hu yɛ shiɛmɔ nitsumɔ lɛ hiɛnyiɛmɔ mli.
Yɛ February 1942 mli lɛ, Nyɛminuu Barry kɛ be-fɛɛ sɔɔlɔ kroko bote gbalashihilɛ mli. Melba, ni ji eŋa ni esumɔɔ lɛ lɛ, kɛ lɛ fee ekome kɛsɔmɔ yɛ anɔkwayeli mli yɛ afii nɛɛ fɛɛ mli yɛ shikpɔji babaoo nɔ. Amɛtee amɛhiɛ kɛshɛ sɔɔmɔ yɛ maŋsɛɛ shikpɔji anɔ nitsumɔ he kɛtsɔ Buu Mɔɔ Biblia Gilead Skul klas ni ji 11 ni afee yɛ United States ni amɛtee lɛ nɔ. Nitsumɔ ni akɛwo amɛdɛŋ lɛ ji nɔ ni mɛi babaoo baanyɛ asusu he akɛ ‘shikpɔŋ lɛ naagbeehe lɛ’—Japan. Beni amɛyashɛ shi November 1949 sɛɛ lɛ, amɛje shishi amɛbɔi sɔɔmɔ akɛ maŋsɛɛ sanekpakpa shiɛlɔi yɛ ŋshɔnaa maŋ ni ji Kobe lɛ mli. Yɛ nakai beaŋ lɛ, mɛi aŋkroaŋkroi 12 pɛ shiɛɔ sanekpakpa lɛ yɛ Japan. Nyɛminuu Barry kase eshia hee ni ená lɛ wiemɔ kɛ sui, ni ená hedɔɔ ni mli wa kɛha Japanbii lɛ, mɛi ni esɔmɔ afii 25 ni nyiɛ sɛɛ ba lɛ. Suɔmɔ ní eyɔɔ kɛha mɛi ni “ajie ato naanɔ wala” lɛ ji nɔ ni eka shi faŋŋ akɛ eha Kristofoi anyɛmifeemɔ ni kã he edaa yɛ Japan lɛ ba, enɛ ye ebua lɛ ni nitsumɔhe nine lɛ nɔkwɛmɔ afii nyɔŋmai abɔ lɛ fee nɔ ni mɔɔ shi.
Yɛ afi 1975 teŋgbɛ, beni Odasefoi ayifalɛ yɛ Japan ji 30,000 lɛ, ajie Nyɛminuu kɛ Nyɛmiyoo Barry kɛtee Brooklyn, New York. Ákɛ Kristofonyo ni akɛ mumɔ efɔ lɛ mu lɛ, áfɔ̃ Nyɛminuu Barry nine koni ebasɔmɔ akɛ Yehowa Odasefoi a-Nɔyeli Kuu lɛ mlinyo. (Romabii 8:16, 17) Niiashikpamɔ ni ená yɛ niŋmaa mli lɛ baafee yelikɛbuamɔ nɔ diɛŋtsɛ yɛ enitsumɔ hee ni ebaatsu yɛ Niŋmaa Nitsumɔhe lɛ. Niiashikpamɔ ni mli lɛɛ ni eyɔɔ yɛ nitsumɔhe nine lɛ kɛ majimaji ateŋ lɛ wula lɛ koni ekɛ yelikɛbuamɔ ko ni jara wa aha akɛ Wolo-Kalamɔ Ajinafoi Akuu ni yɔɔ Nɔyeli Kuu lɛ mli lɛ mlinyo.
Yɛ afii abɔ ni eho lɛ amli lɛ, Nyɛminuu Barry tee nɔ ehiɛ suɔmɔ ni eyɔɔ kɛha Bokagbɛ kɛ emli bii lɛ mli. Skulbii ní eba Gilead kɛ Bethel weku lɛ mli bii baanyɛ aná nɔmimaa akɛ ewiemɔi kɛ esaji ahetoohamɔi baama saji ni haa mɔ tsui nyɔɔ emli ni kɔɔ mɛi babaoo ni esɔmɔ yɛ maŋsɛɛ sanekpakpa shiɛmɔ nitsumɔ lɛ mli lɛ nɔ mi. Maŋtsɛyeli shiɛmɔ nitsumɔ lɛ yɛ ‘shikpɔŋ lɛ naagbeehei lɛ’ bafee faŋŋ lɛɛlɛŋ taakɛ Nyɛminuu Barry kɛ ekãa gba lɛ diɛŋtsɛ eniiashikpamɔ lɛ. Átsĩ enɛɛmɛi ateŋ ekomɛi atã yɛ ewala shihilɛ he saji ni aŋmala yɛ The Watchtower ni je kpo yɛ September 15, 1960 nɔ̃ lɛ mli lɛ.
Wɔyɛ nɔmimaa akɛ, ákɛ ‘Kristo hefatalɔi gboshiniyelɔ’ lɛ, miishɛɛ ni Nyɛminuu Barry yɔɔ yɛ mɛi ni “ajie ato naanɔ wala” lɛ ahe lɛ baatsa nɔ. Yɛ anɔkwale mli lɛ, mɛi fɛɛ ni le lɛ ni amɛsumɔɔ lɛ akɛ mumɔŋ gbɔmɔ ni etuu ehe eha Yehowa, kɛ suɔmɔ ni miishɛɛ yɔɔ mli ni eyɔɔ kɛha Nyɔŋmɔ webii lɛ baashwe lɛ waa. Ni kɛlɛ, wɔnáa miishɛɛ waa akɛ Nyɛminuu Barry ŋmɛ etsui shi yɛ anɔkwayeli mli kɛyashi eshikpɔŋ nɔ sɔɔmɔ lɛ naagbee.—Kpojiemɔ 2:10.
[Caption on page 16]
Lloyd Barry kɛ John Barr beni ajie Insight on the Scriptures wolokpo lɛ kpo yɛ afi 1988 lɛ
Klas ni ji 11 lɛ mli bii ni gbe Gilead tsɔsemɔ naa lɛ, kpe yɛ Japan afii 40 sɛɛ