Suɔmɔ He Nikasemɔ yɛ Gbɛ ni Nɔ Kwɔ Fe Fɛɛ Nɔ
Kosovo, Lebanon, kɛ Ireland. Gbɛi nɛɛ fɔɔ kpojee yɛ adafitswai amli yɛ nyɛsɛɛ afii nɛɛ amli. Nɔ ni ehaa gbɔmɛi kaiɔ ji láshishwiemɔ, okplɛmii atswiamɔi, kɛ gbɔmɔgbee. Yɛ anɔkwale mli lɛ, tawuu ni jamɔ, hewolonɔ su mli jiemɔ, akutsei aloo béi krokomɛi kɛbaa lɛ jeee nɔ̃ hee ko. Yɛ anɔkwale mli lɛ, saji ni tamɔ nakai eyi yinɔsane baafai amli obɔ, ni ekɛ piŋmɔi babaoo diɛŋtsɛ eba adesai anɔ.
AKƐNI mɛi pii ena akɛ awuɔ ta be fɛɛ be yɛ yinɔsane mli hewɔ lɛ, amɛmuɔ sane naa akɛ tawuu ji nɔ ko ni ajieŋ kɛjɛŋ shihilɛ mli kwraa, ni ákɛ, eji adebɔɔ su akɛ adesai anyɛ̃nyɛ̃ɛ amɛhe. Shi kɛlɛ, susumɔi ni tamɔ enɛɛmɛi kɛ tsɔɔmɔi ni yɔɔ Nyɔŋmɔ Wiemɔ ni ji Biblia lɛ mli lɛ kpãaa gbee kwraa. Ŋmalɛi lɛ kɛɔ yɛ faŋŋ mli akɛ: “Mɔ ni sumɔɔɔ mɔ lɛ, eleee Nyɔŋmɔ; ejaakɛ Nyɔŋmɔ lɛ, suɔmɔ ji lɛ.” (1 Yohane 4:8) Eyɛ faŋŋ akɛ, Bɔlɔ lɛ miisumɔ ni adesai asumɔ amɛhe.
Biblia lɛ hu tsɔɔ akɛ, abɔ gbɔmɔ yɛ Nyɔŋmɔ subaŋ nɔ. (1 Mose 1:26, 27) Enɛ tsɔɔ akɛ adesai yɛ nyɛmɔ ni amɛkɛaajie Nyɔŋmɔ sui lɛ kpo amɛtsɔɔ, ni amɛteŋ nɔ ni he hiaa titri ji suɔmɔ. Akɛni nakai eji hewɔ lɛ, mɛni hewɔ ni adesai nyɛɛɛ ajie suɔmɔ kpo amɛtsɔɔ amɛhe kwraa yɛ yinɔsane fɛɛ mli lɛ? Shikome ekoŋŋ lɛ, Biblia lɛ kɛ shishinumɔ haa. Nɔ hewɔ lɛ ji akɛ, klɛŋklɛŋ adesai enyɔ lɛ, Adam kɛ Hawa tse Nyɔŋmɔ hiɛ atua ni amɛgbee esha mli. Nɔ ni jɛ mli ba ji akɛ, amɛshwiei fɛɛ ná esha kɛ emuu ni ayeee akɛ gboshinii. Romabii 3:23 tsɔɔ mli akɛ: “Mɛi fɛɛ efee esha ni Nyɔŋmɔ anunyam ebɔ amɛ.” Nyɛmɔ ni Nyɔŋmɔ kɛha wɔ koni wɔkɛjie suɔmɔ kpo wɔtsɔɔ lɛ efite, akɛni wɔná esha kɛ emuu ni ayeee ákɛ gboshinii lɛ hewɔ. Ani enɛ tsɔɔ akɛ adesai nyɛŋ asumɔ amɛhe dɔŋŋ? Mɛɛ hiɛnɔkamɔ yɔɔ ni tsɔɔ akɛ wɔbaaná wɔ kɛ nanemɛi nyɛmimɛi ateŋ toiŋjɔlɛ kɛ suɔmɔ wekukpaa mli ŋɔɔmɔ?
Esa akɛ Wɔkase Bɔ ni Afeɔ Asumɔɔ Nyɔŋmɔ
Yehowa Nyɔŋmɔ le akɛ bɔ fɛɛ bɔ ni shihilɛ ji eha fɛɛ sɛɛ lɛ, adesai yɛ nyɛmɔ lolo ni amɛkɛaajie suɔmɔ kpo amɛtsɔɔ. No hewɔ ni ebiɔ koni mɛi fɛɛ ni sumɔɔ akɛ amɛsa ehiɛ lɛ ajie suɔmɔ kpo amɛtsɔɔ bɔ ni amɛaanyɛ lɛ. Yesu Kristo ni ji Nyɔŋmɔ Bi lɛ ha taomɔ nii nɛɛ fee faŋŋ beni ebi koni atsɔɔ lɛ kita lɛ mli otu ni yɔɔ Mla ni akɛha Israel lɛ mli lɛ. Ekɛɛ akɛ: “ ‘Suɔmɔ [Yehowa, NW], o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.’ Kitai lɛ amli otu kɛ ewulu nɛ.” Kɛkɛ ni ekɛfata he akɛ: “Ni nɔ ni nyiɛ sɛɛ lɛ tamɔ no, akɛ: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ Kitai enyɔ nɛɛ mla lɛ . . . fɛɛ tsotsoro.”—Mateo 22:37-40.
Shi gbɔmɛi pii nuɔ he akɛ ebaawa akɛ aaasumɔ mɔ ko ni anyɛɛɛ ana lɛ, ni adesai nyɛɛɛ ana Yehowa Nyɔŋmɔ, ejaakɛ Mumɔ ji lɛ. (Yohane 4:24) Shi yɛ fɛɛ sɛɛ lɛ, nibii ni Nyɔŋmɔ feɔ lɛ saa wɔhe daa gbi, yɛ be mli ni wɔkɛ wɔhe fɔ̃ɔ nibii kpakpai babaoo ni ebɔ lɛ anɔ ni wɔnáa amɛhe sɛɛ lɛ. Bɔfo Paulo ha anɔkwale nɛɛ fee faŋŋ beni ekɛɛ akɛ: “[Nyɔŋmɔ] efɔ̃ɔ̃ lɛ diɛŋtsɛ ehe odaseyeli, shi moŋ efeɔ ejurɔ ni ehaa nugbɔ jɛɔ ŋwɛi nɛɔ haa nyɛ, kɛ afii ni baa nii pii hu, ekɛ ŋmãa kɛ miishɛɛ woɔ nyɛtsuiiaŋ obɔ.”—Bɔfoi lɛ Asaji 14:17.
Eyɛ mli akɛ mɔ fɛɛ mɔ náa nibii ni Bɔlɔ lɛ kɛhaa lɛ he sɛɛ yɛ gbɛ̀i srɔtoi anɔ moŋ, shi kɛ aabu naa lɛ, mɛi fioo ko pɛ jieɔ hiɛsɔɔ kpo amɛtsɔɔ lɛ aloo etsirɛɔ amɛ ni amɛda lɛ shi. Enɛ hewɔ lɛ ehe miihia ni wɔsusu nibii kpakpai fɛɛ ni Nyɔŋmɔ efee eha wɔ lɛ he, ni wɔjwɛŋ naakpɛɛ sui ni haa efeɔ nibii nɛɛ fɛɛ lɛ nɔ. Ni esa akɛ nakai feemɔ aye abua wɔ koni wɔyɔse Bɔlɔ Kpeteŋkpele lɛ naakpɛɛ nilee kɛ hewalɛ lɛ. (Yesaia 45:18) Nɔ ni fe fɛɛ lɛ, esa akɛ eye ebua wɔ koni wɔna nɔ̃ suɔmɔ Nyɔŋmɔ ni eji, akɛni ehaaa wɔ wala kɛkɛ, shi moŋ ehaa wɔnáa nibii ni haa shihilɛ feɔ nɔ ni yɔɔ miishɛɛ lɛ mli ŋɔɔmɔ hu lɛ hewɔ.
Ákɛ nɔkwɛmɔnɔ lɛ, susumɔ fɔfɔi fɛfɛji srɔtoisrɔtoi pii ni Nyɔŋmɔ bɔ yɛ shikpɔŋ lɛ nɔ lɛ he okwɛ. Kwɛ bɔ ni eyɔɔ naakpɛɛ akɛ eha wɔ nyɛmɔ ni wɔkɛna, ni wɔná miishɛɛ babaoo kɛjɛ nɛkɛ nibii fɛfɛji nɛɛ amli! Nakai nɔŋŋ Nyɔŋmɔ eha wɔ niyenii srɔtoi babaoo ni wɔye. Kwɛ bɔ ni esusuɔ wɔhe akɛni ebɔ wɔ koni wɔnyɛ wɔsa nii anaa bɔni afee ni wɔná niyenii yeli mli ŋɔɔmɔ lɛ hewɔ! Ani enɛɛmɛi etsɔɔɔ faŋŋ diɛŋtsɛ akɛ Nyɔŋmɔ sumɔɔ wɔ yɛ anɔkwale mli, ni ákɛ eyɛ wɔhilɛ-kɛhamɔ he miishɛɛ?—Lala 145:16, 17; Yesaia 42:5, 8.
Kɛfata ehe kpo ni ejieɔ etsɔɔ wɔ kɛtsɔɔ “adebɔɔ wolo” lɛ nɔ lɛ sɛɛ lɛ, Bɔlɔ lɛ tsɔɔ wɔ Nyɔŋmɔ ni eji kɛtsɔ e-Wiemɔ ni ji Biblia lɛ nɔ. Nɔ hewɔ lɛ ji akɛ, aŋmala nibii ni Yehowa Nyɔŋmɔ ejɛ esuɔmɔ mli efee tsutsu lɛ ahe saji babaoo awo Biblia lɛ mli, kɛ jɔɔmɔi babaoo ni ewo shi akɛ ekɛbaaha adesai yɛ wɔsɛɛ be mli lɛ ahe saji hu. (1 Mose 22:17, 18; 2 Mose 3:17; Lala 72:6-16; Kpojiemɔ 21:4, 5) Nɔ ni fe fɛɛ lɛ, Biblia lɛ jieɔ suɔmɔ ni fe fɛɛ ni Nyɔŋmɔ jie kpo etsɔɔ adesai lɛ kpo etsɔɔ—ekɛ e-Bi koome lɛ ha akɛ wɔ Kpɔlɔ bɔni afee ni wɔnyɛ wɔye wɔhe kɛjɛ esha kɛ gbele nyɔŋyeli mli. (Romabii 5:8) Hɛɛ, babaoo ni wɔkaseɔ wɔ-Bɔlɔ ni yɔɔ suɔmɔ lɛ he nii lɛ, babaoo ni ekanyaa wɔ koni wɔsumɔ lɛ kɛjɛ wɔtsui mli ji no.
Ní Wɔɔkase Bɔ ni Wɔɔfee Wɔsumɔ Wɔnanemɛi Adesai
Taakɛ Yesu tsĩ tã lɛ, kɛfata Nyɔŋmɔ ni wɔɔsumɔ lɛ kɛ wɔtsui, wɔsusuma kɛ wɔjwɛŋmɔ fɛɛ lɛ he lɛ, esa akɛ wɔsumɔ wɔnanemɛi tamɔ bɔ ni wɔsumɔɔ wɔ diɛŋtsɛ wɔhe. Yɛ anɔkwale mli lɛ Nyɔŋmɔ suɔmɔ lɛ nyɛɔ wɔnɔ koni wɔsumɔ wɔnanemɛi gbɔmɛi. Bɔfo Yohane tsɔɔ mli akɛ: “Suɔmɔmɛi, kɛ Nyɔŋmɔ sumɔɔ wɔ nɛkɛ lɛ, esa akɛ wɔ hu wɔsumɔsumɔɔ wɔhe.” Etee nɔ ema nɔ mi akɛ: “Kɛji mɔ ko kɛɛ akɛ: Miisumɔ Nyɔŋmɔ, ni enyɛ̃ɔ lɛ diɛŋtsɛ enyɛmi lɛ, amalelɔ ji lɛ. Ejaakɛ mɔ ni sumɔɔɔ lɛ diɛŋtsɛ enyɛmi ni enaa lɛ lɛ, Nyɔŋmɔ ni enaaa lɛ lɛ, te aaafee tɛŋŋ ni eeenyɛ lɛ esumɔŋ? Ni nɛkɛ kita nɛɛ wɔná kɛjɛ eŋɔɔ koni mɔ ni sumɔɔ Nyɔŋmɔ lɛ esumɔ lɛ diɛŋtsɛ enyɛmi hu.”—1 Yohane 4:11, 20, 21.
Ŋmɛnɛ, wɔyɛ jeŋ ko ni mɛi babaoo jieɔ mi klɛŋklɛŋ subaŋ kpo, ni amɛtsɔmɔ “hesuɔlɔi,” taakɛ Biblia lɛ gba efɔ̃ shi lɛ. (2 Timoteo 3:2) No hewɔ lɛ, kɛji akɛ wɔmiisumɔ ni wɔjie suɔmɔ ni nɔ kwɔ fe fɛɛ kpo wɔtsɔɔ lɛ, no lɛ esa akɛ wɔbɔ mɔdɛŋ waa ni wɔsusu nibii ahe ni wɔkase wɔ-Bɔlɔ ni yɔɔ suɔmɔ lɛ moŋ fe ni wɔɔkase gbɔmɛi ni feɔ pɛsɛmkunya. (Romabii 12:2; Efesobii 5:1) Nyɔŋmɔ ‘mli hi yɛ trumui kɛ mɛi fɔji anɔ’ ni “ehaa ehulu teɔ shi yɛ mɛi fɔji kɛ mɛi kpakpai anɔ, ni ehaa nyɔŋmɔ nɛɔ yɛ jalɔi kɛ mɛi ni bɛ jalɛ lɛ anɔ.” Akɛni wɔŋwɛi Tsɛ lɛ efee nɔkwɛmɔnɔ ni nɔ bɛ nɛɛ efɔ̃ shi eha wɔ hewɔ lɛ, esa akɛ wɔbɔ mɔdɛŋ ni wɔmli ahi aha mɛi fɛɛ ni wɔye wɔbua amɛ. Kɛ wɔfee nakai lɛ, wɔbaanyɛ wɔtsɔɔ lɛɛlɛŋ akɛ wɔji ‘wɔŋwɛi Tsɛ lɛ bii.’—Luka 6:35; Mateo 5:45.
Yɛ bei komɛi amli lɛ, nɔ ni jɛɔ suɔmɔ nifeemɔi ni tamɔ enɛɛmɛi amli baa ji yelikɛbuamɔ ni akɛhaa gbɔmɛi ni amɛbatsɔmɔ anɔkwa Nyɔŋmɔ lɛ jálɔi. Afii komɛi ni eho nɛ ni yoogbayoo ko ni eji Yehowa Odasefoi lɛ ateŋ mɔ ko ka koni ekɛ enaanyo yoo ko agba Biblia lɛ mli sane, shi yoo lɛ te shi ewo enɛ waa diɛŋtsɛ. Shi ehaaa nakai nifeemɔ lɛ aje enijiaŋ wui. Yɛ no najiaŋ lɛ, etee nɔ ejie mlihilɛ kpo etsɔɔ enaanyo lɛ ni eye ebua lɛ. Be ko lɛ eye ebua enaanyo lɛ kɛto enibii beni efãa kɛyahi shia kroko mli lɛ. Eto gbɛjianɔ be kroko hu ni mɔ ko kɛ enaanyo lɛ tee ni ayakpa ewekunyo ko gbɛ yɛ kɔɔyɔŋ lɛji ashidaamɔhe lɛ. Yɛ sɛɛ mli lɛ, enaanyo lɛ kpɛlɛ koni akɛ lɛ akase Biblia lɛ, ni yɛ naagbee lɛ ebatsɔ Kristofonyo ni yɔɔ ekãa yɛ yiwaa ni ewu kɛba enɔ lɛ fɛɛ sɛɛ. Hɛɛ, nakai suɔmɔ nifeemɔ lɛ gbele gbɛ kɛha naanɔ jɔɔmɔi.
Kɛ́ wɔɔwie yɛ anɔkwale mli lɛ, wɔbaakpɛlɛ nɔ akɛ, jeee subaŋ kpakpai ni wɔyɔɔ lɛ hewɔ Nyɔŋmɔ sumɔɔ wɔ. Nɔ ni tamɔɔɔ nakai lɛ, esumɔɔ wɔ yɛ tɔmɔi kɛ fãtɔi babaoo ni wɔyɔɔ lɛ fɛɛ sɛɛ. Akɛni nakai eji hewɔ lɛ, esa akɛ wɔ hu wɔsumɔ wɔnanemɛi adesai yɛ tɔmɔi ni yɔɔ amɛhe lɛ fɛɛ sɛɛ. Kɛ wɔtsɔse wɔhe koni wɔna ni wɔyɔse mɛi krokomɛi asui kpakpai moŋ fe ni wɔɔtao amɛfãtɔi lɛ, no lɛ ewaŋ kɛhaŋ wɔ akɛ wɔɔjie suɔmɔ kpo wɔtsɔɔ amɛ. Bɔ ni wɔnuɔ he wɔhaa amɛ lɛ baanyɛ ateke suɔmɔ ni shishitoo mlai kudɔɔ ni mɔhedɔɔ ni anaa yɛ nanemɛi ni bɛŋkɛ kpaakpa ateŋ lɛ fata he.
Ní Oooha Osuɔmɔ lɛ Ada
Suɔmɔ ji nɔ ko ni ehe hiaa akɛ aná ni alɛ lɛ, ni anɔkwayeli ji nɔ ko ni fata nibii ni he hiaa ni akɛtsuɔ enɛ he nii lɛ ahe. Mɛi komɛi bɔɔ mɔdɛŋ ni amɛtsimɔ amɛfãtɔi anɔ, bɔni afee ni amɛsa gbɔmɛi ni amɛtaoɔ akɛ amɛkɛ amɛ abɔ naanyo lɛ ahiɛ. Shi kɛlɛ, bei pii lɛ, nifeemɔ ni tamɔ enɛ nyɛɛɛ ahi ejaakɛ yɛ naagbee mli lɛ mɛi krokomɛi leɔ anɔkwale lɛ, ni amale ni tamɔ enɛ haa amɛtsiɔ amɛhe kɛjɛɔ amɛhe. No hewɔ lɛ, esaaa akɛ wɔsheɔ gbeyei akɛ wɔɔha mɛi krokomɛi ale bɔ ni wɔyɔɔ diɛŋtsɛ—eyɛ mli akɛ wɔyɛ fãtɔi ni wɔmiibɔ mɔdɛŋ koni wɔye nɔ kunim moŋ. Enɛ baanyɛ aye abua koni akɛ amɛ abɔ naanyo.
Ákɛ nɔkwɛmɔnɔ lɛ, nyɛmi yoo Odasefonyo nukpa ko ni yɔɔ Far East lɛ leee woloŋ tsɔ. Shi ebɔɔɔ mɔdɛŋ akɛ ekɛ nakai anɔkwale lɛ aaatee mɛi krokomɛi. Ákɛ nɔkwɛmɔnɔ lɛ, ekɛ anɔkwayeli kpɛlɛɔ nɔ akɛ, enyɛɛɛ ejɛ Biblia gbalɛi kɛ yinɔsaji amli ebu akɔntaa ni ekɛtsɔɔ mɛi krokomɛi akɛ Jeŋmaji Abei lɛ ba naagbee yɛ afi 1914.a Shi efeɔ ekãa yɛ sɔɔmɔ nitsumɔ lɛ mli he nɔkwɛmɔnɔ kpakpa efɔ̃ɔ shi, kɛ agbɛnɛ hu yɛ suɔmɔ kpojiemɔ yɛ nihamɔ hu mli etsɔɔ nyɛmimɛi lɛ, ni no hewɔ lɛ, atsɛɔ lɛ akɛ asafo lɛ jwetri.
Yɛ maji komɛi anɔ lɛ, suɔmɔ kpo ni ajieɔ yɛ faŋŋ mli lɛ ji nɔ ko ni ajieee hiɛsɔɔ ahaaa; atsɔɔ gbɔmɛi lɛ koni amɛjie agwaseaŋ nifeemɔ kpo amɛtsɔɔ mɛi krokomɛi yɛ amɛkɛ amɛ sharamɔ mli. Eyɛ mli akɛ ehi akɛ aaafee nii yɛ agwaseaŋ ni asusu mɔ he be fɛɛ be moŋ, shi esaaa akɛ wɔŋmɛɔ gbɛ ni wɔ agwaseaŋ nifeemɔ lɛ tsiɔ henumɔ ni wɔyɔɔ kɛha mɛi krokomɛi lɛ anaa. Efeee Yehowa hiɛgbele akɛ eeekɛɛ ewebii ni ehala amɛ, ni ji blema Israel lɛ akɛ: “Naanɔ suɔmɔ mikɛ sumɔo.” (Yeremia 31:3) Nakai nɔŋŋ bɔfo Paulo kɛɛ enanemɛi heyelilɔi ni yɔɔ Tesalonika lɛ akɛ: “Akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.” (1 Tesalonikabii 2:8) No hewɔ lɛ, yɛ be mli ni wɔbɔɔ mɔdɛŋ koni wɔná anɔkwa suɔmɔ wɔha adesai, ni ji wɔnanemɛi lɛ, eji nɔ ni kɛ Biblia tsɔɔmɔ kpãa gbee akɛ wɔɔha nakai henumɔ lɛ ajɛ wɔtsui mli moŋ fe ni eeefee nɔ ko ni aaanyɛ wɔnɔ ni wɔfee.
Mɔdɛŋ ni Aaakã He Abɔ lɛ He Miihia
Henumɔ kɛ suɔmɔ kpo ni ajieɔ atsɔɔ mɛi krokomɛi lɛ ji nifeemɔ ko ni esa akɛ etsara nɔ. Nakai feemɔ biɔ mɔdɛŋbɔɔ babaoo yɛ wɔgbɛfaŋ, ejaakɛ ebiɔ ni wɔtsu nii waa diɛŋtsɛ koni wɔkɛye emuu ni wɔ diɛŋtsɛ lɛ wɔyeee lɛ nɔ, ni agbɛnɛ hu wɔte shi wɔshi hewalɛ babaoo ni jeŋ ni suɔmɔ bɛ mli nɛɛ náa yɛ wɔnɔ lɛ. Shi kɛlɛ, jɔɔmɔi ni jɛɔ enɛ mli baa lɛ he yɛ sɛɛnamɔ waa.—Mateo 24:12.
Yɛ jeŋ ni yeee emuu kwraa nɛɛ mli po lɛ, wɔbaanyɛ wɔná wɔkɛ wɔnanemɛi ateŋ wekukpaa mli ŋɔɔmɔ, ni nɔ ni baajɛ mli aba ji miishɛɛ, toiŋjɔlɛ, kɛ tsui ni nyɔɔ mɔ mli ni wɔ kɛ mɛi krokomɛi aaaná. Kɛ́ wɔbɔ nakai feemɔ he mɔdɛŋ lɛ, wɔbaanyɛ wɔtsɔɔ akɛ wɔsa mɛi ni hiɔ shi yɛ naanɔ shihilɛ he hiɛnɔkamɔ ni baaba yɛ Nyɔŋmɔ jeŋ hee lɛ mli lɛ mli. Nɔ ni fe fɛɛ lɛ, kɛ wɔkase suɔmɔ ni nɔ kwɔ waa he nii lɛ, wɔbaanyɛ wɔná wɔ-Bɔlɔ ni yɔɔ suɔmɔ lɛ nɔkpɛlɛmɔ kɛ jɔɔmɔi amrɔ nɛɛ kɛ agbɛnɛ hu kɛmiiya naanɔ.
[Shishigbɛ niŋmai]
[Caption on page 10]
Abaanyɛ ajie Kristofoi asuɔmɔ kpo atsɔɔ kɛtsɔ mlihilɛ nifeemɔi anɔ
[Caption on page 8]
UN PHOTO 186226/M. Grafman