Saamɔ Ohe Kɛha Afi Akpe Ni He Hiaa Lɛ!
KRISTO Afi Akpe Nɔyeli lɛ kɛ jɔɔmɔi babaoo diɛŋtsɛ baaba ebaha adesai aweku lɛ. Yɛ Yesu gbɛtsɔɔmɔ ni suɔmɔ yɔɔ mli lɛ naa lɛ, abaahole adesai anɔ kɛjɛ shihilɛ gbonyo ni amɛyɔɔ mli amrɔ nɛɛ lɛ mli kɛya anunyam emuuyeli mli. Bo lɛ susumɔ nɔ ni enɛ baatsɔɔ kɛha bo lɛ he okwɛ. Abaaná gbɔmɔtsoŋ hewalɛ kpakpa! Bo lɛ kwɛ ni oote shi daa leebi ni oonu he akɛ oyɛ hewalɛ fe gbi ni ho lɛ. Hii, yei, kɛ gbekɛbii akpekpei abɔ miikpa shihilɛ mli miishɛɛ yɛ nakai be lɛ mli lɛ gbɛ. Amɛkɛ amɛhiɛ fɔ̃ɔ nɔ, ni amɛsɔleɔ yɛ he koni eba. Biblia lɛ ni amɛkase lɛ ema nɔ mi eha amɛ akɛ, nakai jɔɔmɔi lɛ baanyɛ afee amɛnɔ ni amɛbaaná mli ŋɔɔmɔ.
Dani Yesu Kristo aaaje e-Afi Akpe Nɔyeli lɛ shishi lɛ, esa akɛ ejie mɛi fɛɛ ni teɔ shi amɛwoɔ enɔyeli lɛ kɛjɛ shikpɔŋ lɛ nɔ. Ebaafee enɛ yɛ ta ni atsɛɔ lɛ Harmagedon yɛ Biblia lɛ mli lɛ mli. (Kpojiemɔ 16:16) Anɔkwa Kristofoi ni yɔɔ shikpɔŋ lɛ nɔ lɛ fataŋ he yɛ nakai ta lɛ mli. Eji Nyɔŋmɔ ta. Ni jeee he kome pɛ abaawuu ta lɛ yɛ yɛ shikpɔŋ lɛ nɔ. Biblia lɛ kɛɔ akɛ, nakai ta lɛ baashɛ shikpɔŋ lɛ naagbeehei lɛ tɔŋŋ. Abaakpata Kristo nɔyeli lɛ he henyɛlɔi lɛ ahiɛ. Amɛteŋ mɔ ko mɔ ko yeŋ ehe!—Yeremia 25:33.
Kɛkɛ lɛ, no sɛɛ lɛ Yesu baagbala ejwɛŋmɔ kɛya Satan Abonsam kɛ edaimonioi lɛ anɔ. Feemɔ shihilɛ lɛ he mfoniri taakɛ mɔ ni ŋma Kpojiemɔ wolo lɛ na lɛ: “Ni mina bɔfo ko [Yesu Kristo] miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfee lɛ kɛ kɔsɔŋkɔsɔ kpeteŋkpele ko yɛ edɛŋ. Ni emɔ drako lɛ, blema onufu lɛ ni ji diabolo (Abonsam) kɛ satan lɛ, ni efĩ lɛ afii akpe.” (Kpojiemɔ 20:1, 2) No sɛɛ lɛ abaakpata Satan kɛ edaimonioi lɛ ahiɛ kwraa kɛya naanɔ.—Mateo 25:41.
“Asafo babaoo ni mɔ ko mɔ ko nyɛŋ akane,” ayi baaná wala kɛfo Harmagedon. (Kpojiemɔ 7:9) Kristo baakudɔ mɛnɛɛmɛi ni amɛná “wala nubui” lɛ ahe sɛɛ kɛmɔ shi, taakɛ tookwɛlɔ kudɔɔ etooi kɛyaa nu ni haa mɔ yi náa wala lɛ he lɛ. (Kpojiemɔ 7:17) Akɛni Satan kɛ edaimonioi lɛ bɛ jɛmɛ ni amɛbaatsĩ mɛi ni yi ená wala kɛjɛ Harmagedon lɛ mli nɛɛ amumɔŋ nɔyaa naa hewɔ lɛ, abaaye abua amɛ fiofio koni amɛye eshafeemɔ su ni amɛyɔɔ lɛ nɔ kunim aahu kɛyashi amɛaashɛ emuuyeli he kwraa!
Yɛ Kristo suɔmɔ nɔyeli lɛ shishi lɛ, shihilɛ baaya nɔ afee nɔ ni hi daa gbi. Yehowa Nyɔŋmɔ baatsɔ ebi Yesu Kristo nɔ ejie nibii fɛɛ ni kɛ piŋmɔ kɛ awerɛho baa lɛ fɛɛ kɛya. ‘Ebaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.’ (Kpojiemɔ 21:4) Gbalɔ Yesaia mu sane lɛ fɛɛ naa akɛ: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaalá kɛ nyamɔ.” (Yesaia 35:5, 6) Ni “mɛi bibii kɛ mɛi wuji” ni egboi lɛ baaba wala mli ekoŋŋ kɛ gbɛkpamɔ akɛ amɛgboŋ dɔŋŋ kɔkɔɔkɔ!—Kpojiemɔ 20:12.
Amrɔ nɛɛ po lɛ aabua “asafo babaoo” ni yi baaná wala yɛ Harmagedon lɛ anaa. Amɛmiifee klalo amɛmiiha Kristo Afi Akpe Nɔyeli lɛ. Eyɛ mli akɛ amɛleee be ni nakai nɔyeli lɛ baaje shishi moŋ, shi amɛyɛ hekɛnɔfɔɔ akɛ, Nyɔŋmɔ kɛbaaba yɛ ebe ni sa mli. Obaanyɛ ofata amɛhe, shi esa akɛ ofee klalo—jeee ni oyahɔɔ ohe nibii, ni ofã gbɛ kɛya shikpɔŋ lɛ nɔ he ko, shi moŋ kɛtsɔ Yehowa Nyɔŋmɔ kɛ eyiŋtoo he anɔkwa nilee ni oooná kɛtsɔ Biblia lɛ kasemɔ nɔ lɛ nɔ. Yehowa Odasefoi kɛ miishɛɛ baatsɔɔ bo bɔ ni ooofee okase Biblia lɛ ni baanyɛ aha bo kɛ oweku lɛ aná he sɛɛ, ni amɛheŋ bo nɔ ko. Mɛi ni fee wolo tɛtrɛɛ nɛɛ baná he miishɛɛ akɛ amɛaaha ole saji krokomɛi lolo kɛfata he.
[Akrabatsa ni yɔɔ baafa 7]
Afi Akpe Lɛ—Nɔ ko Diɛŋtsɛ Aloo Okadi Nɔ Ko?
Akɛni aŋmala Biblia mli wolo ni ji Kpojiemɔ lɛ yɛ okadi wiemɔ mli hewɔ lɛ, sanebimɔ lɛ teɔ shi akɛ. Ni Kristo Afi Akpe Nɔyeli ni atsĩ tã yɛ Kpojiemɔ lɛ hu? Ani eji nɔ ko diɛŋtsɛ aloo eji okadi be ko?
Nibii saŋŋ yɛ ni tsɔɔ akɛ aatsɔɔ afi akpe diɛŋtsɛ. Susumɔ he okwɛ: Bɔfo Paulo tsɛ́ Kristo Afi Akpe Nɔyeli ni akɛbaakojo adesai lɛ yi sɛɛ akɛ gbi kome. (Bɔfoi lɛ Asaji 17:31; Kpojiemɔ 20:4) Bɔfo Petro ŋma akɛ, gbi kome (ŋmɛlɛtswai 24) tamɔ afii akpe yɛ Yehowa hiɛ. (2 Petro 3:8) No tsɔɔ akɛ nɛkɛ kojomɔ “gbi” nɛɛ sɛɛkɛlɛ ji afii akpe diɛŋtsɛ. Kɛfata he lɛ, wɔkaneɔ yɛ Kpojiemɔ 20:3, 5-7 ni wɔnaa hei srɔtoi ejwɛ ni atsĩ ‘afii akpe lɛ’ tã shi akɛɛɛ akɛ ‘afii akpe ko.’ No hewɔ lɛ, etamɔ nɔ ni enɛ miitsɔɔ be sɛɛkɛlɛ pɔtɛɛ ko.