Nyɛkɛ Nɔmimaa ni Mli Wa Adamɔa Shi Shiŋŋ

Emuuyeli Mlihiɛlɔi ni Yɔɔ Ekãa lɛ Ye Nazi Yiwaa Nɔ Kunim

“MIBI, feemɔ ohe nilelɔ, ní oha mitsui anyɔ mimli, ní maná hetoo maha mɔ ni bɔɔ mi ahora lɛ.” (Abɛi 27:11) Nɛkɛ miishɛɛ faikpamɔ nɛɛ jieɔ lɛ kpo akɛ Nyɔŋmɔ bɔɔ nii ni yɔɔ nilee baanyɛ aha Yehowa tsui anya ejaakɛ amɛyeɔ lɛ anɔkwa. (Zefania 3:17) Shi kɛlɛ, Satan ni ji ahorabɔlɔ lɛ, etswa efai shi akɛ ebaaku emuuyeli mli ni mɛi ni sɔmɔɔ Yehowa lɛ hiɛ lɛ mli.—Hiob 1:10, 11.

Kɛjɛ afii ohai 20 lɛ shishijee fã lɛ mli titri beni ashɛ Satan afɔ̃ kɛjɛ ŋwɛi kɛba shikpɔŋ lɛ nɔ nɛɛ, egiri waa ewo Yehowa webii naakpa. (Kpojiemɔ 12:10, 12) Shi kɛlɛ, anɔkwa Kristofoi kɛ ‘nɔmimaa ni mli wa’ edamɔ shi ‘shiŋŋ’ ni amɛ́hiɛ amɛ emuuyeli kɛha Nyɔŋmɔ lɛ mli. (Kolosebii 4:12) Nyɛhaa wɔsusuaa emuuyeli mlihiɛmɔ he nɔkwɛmɔnɔ kome ko ni sa kadimɔ ni kɔɔ enɛ he lɛ he kuku—nɔ ni kɔɔ Yehowa Odasefoi ni yɔɔ Germany dani Jeŋ Ta II je shishi kɛ ta be lɛ mli lɛ he.

Nifeemɔ ní Ekãa Yɔɔ Mli Kɛ Emuuyeli Mlihiɛmɔ he Kaai Baa

Yɛ afi 1920 afii lɛ kɛ afi 1930 afii lɛ shishijee mli lɛ, Bibelforscher, taakɛ ale Yehowa Odasefoi yɛ Germany nakai beaŋ lɛ, ja Biblia kasemɔ woji ni fa babaoo. Kɛjɛ afi 1919 kɛyashi 1933 lɛ, kɛ́ aja mli lɛ amɛkɛ woji, woji bibii, loo woji tɛtrɛbii kpaanyɔ hã weku fɛɛ weku ni yɔɔ Germany.

Yɛ nakai beaŋ lɛ, Germany hiɛ Kristo sɛɛnyiɛlɔi ni afɔ amɛ mu lɛ akuu ko ni fa fe fɛɛ lɛ eko. Yɛ anɔkwale mli lɛ, mɛi 83,941 ni yɔɔ je lɛŋ fɛɛ ni ye Nuntsɔ lɛ Gbɛkɛnaashi Niyenii lɛ yɛ afi 1933 lɛ ateŋ mɛi ni miihe ashɛ oha fɛɛ oha mlijaa 30 yɛ Germany. Etsɛɛɛ tsɔ ni Germany Odasefoi nɛɛ ná emuuyeli mlihiɛmɔ he kaai ni mli wa mli niiashikpamɔ. (Kpojiemɔ 12:17; 14:12) Oya nɔŋŋ ni shwiemɔ kɛmiijɛ nitsumɔi amli, tutuamɔi yɛ shiai amli kɛ shwiemɔ kɛmiijɛ skul srɔtoi amli lɛ mli bawo wu kɛbatsɔ yii, amɛmɔmɔ, kɛ tsuŋwoo. (Mfoniri 1) No hewɔ lɛ, yɛ afii ni tsɔ Jeŋ Ta II hiɛ lɛ mli lɛ, no mli lɛ mɛi fɛɛ ni awo amɛ tsuŋ yɛ yiwalɛ nsrai amli lɛ oha fɛɛ oha mlijaa 5 kɛmiishɛ 10 ji Yehowa Odasefoi.

Nɔ Hewɔ ni Nazibii lɛ Wa Odasefoi lɛ Ayi

Shi, mɛni hewɔ Yehowa Odasefoi lɛ tée Nazi nɔyeli lɛ mlifu shi lɛ? Yɛ ewolo ni ji Hitler—1889-1936: Hubris lɛ mli lɛ, yinɔsane he nilelɔ Ian Kershaw wie akɛ Odasefoi lɛ batsɔmɔ mɛi ni ajie hiɛ aka amɛ kɛha yiwaa ejaakɛ amɛkpoo akɛ “amɛaaŋmɛɛ amɛhe amɛha nibii fɛɛ ni Nazi nɔyeli lɛ kɛɔ lɛ.”

Wolo ni ji Betrayal—German Churches and the Holocaust, ni yinɔsane he nilelɔ Robert P. Ericksen kɛ nilelɔ ni kaseɔ Yudafoi ahe nii Susannah Heschel ŋma lɛ, tsɔɔ mli akɛ Odasefoi lɛ “kpoo akɛ amɛkɛ amɛhe baawo yiwalɛ nifeemɔ loo asraafoi ata kɛ nitsumɔ mli. . . . Odasefoi kɛ amɛhe wooo maŋkwramɔ saji amli, ni tsɔɔ akɛ amɛfɔŋ oshiki amɛhaŋ Hitler loo ni amɛkɛ ŋamɔ ni jamɔ fata he aaaha Hitler.” Nakai wolo lɛ nɔŋŋ kɛfata he akɛ, enɛ tée Nazibii lɛ amlifu shi ni eha Odasefoi lɛ yaje shihilɛ ni abaanyɛ aye amɛ awui yɛ mli lɛ mli ejaakɛ “Kwasafo Maŋ lɛ ekpɛlɛŋ nikpoomɔ ni tamɔ nɛkɛ.”

Jeŋ Muu Fɛɛ Wiemɔ kɛ Shimɔ kɛ Tutuamɔ ko ni Mli Wa Fe Fɛɛ

Kɛtsɔ tsulɔ krɛdɛɛ ko nɔ lɛ, yɛ February 9, 1934 lɛ, Joseph F. Rutherford, ni nyiɛ nitsumɔ lɛ hiɛ yɛ nakai beaŋ lɛ, ŋma wiemɔ kɛ mɔ shimɔ wolo kɛmaje Hitler akɛ nɔheremɔ kɛha mɛi ahe tsui ni Nazi naaa lɛ. (Mfoniri 2) Yɛ October 7, afi 1934 lɛ, Yehowa Odasefoi ni yɔɔ maji 50 nɔ, ni Germany fata he lɛ kɛ wiemɔ kɛ mɔ shimɔ woji kɛ tɛligram ni shɛɔ 20,000 maje Hitler kɛnyiɛ Rutherford wolo lɛ sɛɛ.

Nazibii lɛ tsu enɛ he nii kɛtsɔ amɛyiwalɛ nifeemɔ lɛ ni amɛha emli wo wu lɛ nɔ. Yɛ April 1, afi 1935 lɛ, agu Odasefoi anitsumɔ lɛ yɛ maŋ muu lɛ fɛɛ mli. Ni yɛ August 28, afi 1936 lɛ, Gestapo lɛ kɛ tutuamɔ ni mli wa fe fɛɛ ba amɛnɔ. Betrayal—German Churches and the Holocaust lɛ wie akɛ, kɛlɛ Odasefoi lɛ “tee nɔ amɛja woji bibii lɛ ni amɛhiɛ amɛnɔkwayeli lɛ mli.”

Ákɛ nɔkwɛmɔnɔ lɛ, yɛ he ni bɛŋkɛ kpaakpa ni Gestapo lɛ baanyɛ ayɔse amɛ yɛ, yɛ December 12, 1936 lɛ, Odasefoi ni naa shɛɔ 3,500 ja yiŋkpɛɛ komekomei akpei nyɔŋmai abɔ ní akala ní kɔɔ amɛnehulu ni amɛnaa yɛ niseniianii ni afeɔ amɛ lɛ he. Yɛ nɔ ni kɔɔ tafaa nɛɛ he lɛ, The Watchtower lɛ bɔ amaniɛ akɛ: “Eji kunimyeli kpeteŋkpele kɛ henyɛlɔ lɛ awui ni naa wa ni aye, ni eha nitsulɔi anɔkwafoi lɛ ná miishɛɛ babaoo.”—Romabii 9:17.

Yiwaa lɛ Yeee Omanye!

Nazibii lɛ tee nɔ amɛtao Yehowa Odasefoi lɛ. Beni shɛɔ afi 1939 lɛ, awo amɛteŋ mɛi akpei ekpaa tsuŋ, ni akɛ akpei abɔ eyawo yiwalɛ nsrai amli. (Mfoniri 3) Te shihilɛ lɛ yɔɔ tɛŋŋ beni shɛɔ Jeŋ Ta II lɛ naagbee lɛ? Odasefoi ni shɛɔ 2,000 egboi, mɛi ni fe 250 lɛ kɛtsɔ gbe ni agbe amɛ lɛ nɔ. Shi kɛlɛ, Nilelɔi ni ji Ericksen kɛ Heschel ŋma akɛ: “Yehowa Odasefoi hiɛ amɛhemɔkɛyeli lɛ mli kpɛŋŋ yɛ haomɔ lɛ mli.” Nɔ ni jɛ mli kɛba ji akɛ, beni Hitler nɔyeli lɛ gbee shi lɛ, Odasefoi ni fa fe akpe je kpo ákɛ kunimyelɔi kɛjɛ nsrai lɛ amli.—Mfoniri 4; Bɔfoi lɛ Asaji 5:38, 39; Romabii 8:35-37.

Mɛni hã Yehowa webii lɛ hewalɛ koni amɛnyɛ amɛŋmɛ amɛtsui shi yɛ yiwaa shishi? Adolphe Arnold ní yi na wala kɛjɛ yiwalɛ nsra lɛ mli lɛ tsɔɔ mli akɛ: “Kɛji mumɔŋ kɛ gbɔmɔtsoŋ hewalɛnamɔ he miihia bo po lɛ, Yehowa miina bo, ele nɔ ni mli ni otsɔɔ lɛ, ni ebaaha bo hewalɛ ni he hiaa bo lɛ koni okɛye shihilɛ lɛ nɔ kunim ni ohi shi akɛ anɔkwafo. Enine efoko kuku.”

Kwɛ bɔ ni gbalɔ Zefania wiemɔi lɛ kɔɔ nakai Kristofoi anɔkwafoi lɛ ahe jogbaŋŋ hã! Ejaje akɛ: “Yehowa, o-Nyɔŋmɔ lɛ, yɛ oteŋ, nuu ekãalɔ ni aaanyɛ oyiwala ahere ni; eeenya ohe kɛ miishɛɛ.” (Zefania 3:17) Eba akɛ Nyɔŋmɔ anɔkwa jálɔi fɛɛ ni yɔɔ ŋmɛnɛ lɛ baakase nakai Odasefoi anɔkwafoi ni hiɛ amɛ emuuyeli mli yɛ Nazi yiwalɛ lɛ shishi lɛ ahemɔkɛyeli lɛ koni tamɔ amɛ lɛ wɔha Yehowa tsui anya.—Filipibii 1:12-14.

[He ni Mfoniri ni yɔɔ baafa 8 lɛ Jɛ]

Państwowe Muzeum Oświȩcim-Brzezinka, courtesy of the USHMM Photo Archives