Toiboo—Ani Eji Nikasemɔ ni He Hiaa yɛ Gbekɛbiiashi?
“FƆLƆI Sumɔɔ Mɛi ni Yɔɔ Jeŋba, Jeee Gbekɛbii ni Buɔ Mɔ Kɛkɛ.” Nakai ji bɔ ni aŋma saneyitso ko yɛ adafitswaa wolo ko mli. Nɛkɛ amaniɛbɔɔ kuku nɛɛ jɛ niiamlipɛimɔ ko ni afee yɛ New Zealand lɛ mli, ni mɛi pɛ ni ji “mɛi oha mlijaa 22 ha hetoo akɛ amɛsusuɔ akɛ esa akɛ atsɔse gbekɛbii lɛ ni amɛle bɔ ni afeɔ akɛ bulɛ haa mɔ yɛ shia.” Niiamlipɛimɔ ni afee lɛ hu tsɔɔ akɛ, ŋmɛnɛ, fɔlɔi heɔ yeɔ akɛ ehe hiaa waa akɛ atsɔɔ gbekɛbii lɛ saji tamɔ agwaseaŋ nifeemɔi, heyeli kɛ gbɛnaa nii ahe nitsumɔ.
Yɛ nɛkɛ pɛsɛmkunya bei nɛɛ amli lɛ, ebɛ naakpɛɛ akɛ mɛi pii aaaná jwɛŋmɔ gbonyo yɛ tsɔsemɔ ni akɛaaha gbekɛbii ni amɛfee toiboo lɛ mli. Shi ani esa akɛ abu toiboo he tsɔsemɔ ni akɛaaha kɛjɛ gbekɛbiiashi lɛ akɛ nɔ ko ni ebe eho? Aloo eji nikasemɔi ni he hiaa ni gbekɛbii baanyɛ akase ni amɛná he sɛɛ lɛ ateŋ ekome? Nɔ ni fe fɛɛ lɛ, te Yehowa Nyɔŋmɔ, ni ji weku gbɛjianɔtoo lɛ Shishitolɔ lɛ buɔ toiboo ní esa akɛ akɛha fɔlɔi lɛ tɛŋŋ, ni mɛni ji sɛɛnamɔi komɛi ni jɛɔ toiboo ni tamɔ nakai lɛ mli baa?—Bɔfoi lɛ Asaji 17:28; Efesobii 3:14, 15.
“Enɛ Ja”
Bɔfo Paulo ŋma eyaha klɛŋklɛŋ afii oha lɛ mli Kristofoi asafo ni yɔɔ Efeso lɛ akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuntsɔ lɛ mli; ejaakɛ enɛ ja.” (Efesobii 6:1) No hewɔ lɛ, oti titri ni yɔɔ nakai toiboo lɛ sɛɛ ji akɛ, ekɛ Nyɔŋmɔ jalɛ tɛi ni efolɔ shwie shi lɛ kpãa gbee. Taakɛ Paulo kɛɛ lɛ, “enɛ ja.”
Yɛ enɛ kɛ gbeekpamɔ naa lɛ, wɔkadiɔ akɛ, Nyɔŋmɔ Wiemɔ lɛ tsɔɔ akɛ tsɔsemɔ ni fɔlɔi kɛhaa yɛ suɔmɔ mli lɛ tamɔ wulamɔ nii fɛfɛo ko ni ji “anunyam akekere ha oyitso kɛ kɔsɔŋkɔsɔ ha okuɛ” ni agbɛnɛ hu ákɛ nɔ ni “sa Nuntsɔ lɛ hiɛ jogbaŋŋ.” (Abɛi 1:8, 9; Kolosebii 3:20) Belɛ nɔ ni tamɔɔɔ nakai kwraa lɛ, fɔlɔi anɔ toigbele haaa aná Nyɔŋmɔ hiɛ duromɔ.—Romabii 1:30, 32.
“Koni Ahi Ahao”
Paulo tsĩ sɛɛnamɔ kroko ni jɛɔ toiboo mli baa lɛ tã beni eŋma akɛ: “‘Wo otsɛ kɛ onyɛ,’ no ji klɛŋklɛŋ kita ni hiɛ shiwoo akɛ: ‘koni ahi ahao, ni otsɛ yɛ shikpɔŋ lɛ nɔ.’” (Efesobii 6:2, 3; 2 Mose 20:12) Mɛɛ gbɛ̀i anɔ toiboo ni aaafee aha fɔlɔi lɛ haa ehiɔ ehaa mɔ yɛ?
Klɛŋklɛŋ lɛ, ani ejeee anɔkwale akɛ, fɔlɔi ji mɛi ni le shihilɛ mli saji jogbaŋŋ yɛ afii abɔ ni amɛye kɛ niiashikpamɔi ni amɛyɔɔ lɛ hewɔ? Eyɛ mli akɛ ekolɛ, amɛleŋ kɔmpiutai ahe nibii pii aloo nii ni atsɔɔ yɛ skul lɛ ateŋ ekomɛi ahe nii babaoo moŋ, shi amɛle nibii pii ni kɔɔ shihilɛ kɛ bɔ ni afeɔ akpeeɔ shihilɛ mli naagbai anaa. Yɛ gbɛ kroko nɔ lɛ, oblahii kɛ oblayei nyɛɛɛ amɛsusu nii ahe ni eŋmɛ pɛpɛɛpɛ kɛ́ ekɔɔ dalɛ he. No hewɔ lɛ, amɛkɛ oyaiyeli kpɛɔ amɛyiŋ, ni bei pii lɛ, amɛŋmɛɛɔ amɛhe amɛhaa tipɛŋfoi anɔnyɛɛ ni esaaa, ni efiteɔ amɛ. Biblia lɛ kɛɔ yɛ anɔkwale mli akɛ: “Buuluufeemɔ kpɛtɛ gbekɛ tsui he.” Ni te atsuɔ he nii tɛŋŋ? “Tsɔsemɔ tso lɛ aaashwie lɛ kɛaajɛ ehe kɛaatee flooflo.”—Abɛi 22:15.
Sɛɛnamɔi ni jɛɔ bulɛ mli baa lɛ yaa shɔŋŋ fe fɔlɔ kɛ bi teŋ wekukpaa pɛ kɛkɛ. Bɔni afee ni adesai aweku lɛ aya nɔ jogbaŋŋ ni ewo yibii lɛ, ekomefeemɔ kɛ toiboo hu he hiaa yɛ gbɛ ko nɔ. Ákɛ nɔkwɛmɔnɔ lɛ, yɛ gbalashihilɛ mli lɛ, suɔmɔ mli ni ajɛɔ afeɔ nɔ ko lɛ ji nɔ ni kɛ toiŋjɔlɛ, ekomefeemɔ kɛ miishɛɛ baa, shi jeee gbɛ ni akpaa koni mɔ kroko lɛ afee nii eha aloo ni ejie henumɔ kpo etsɔɔ. Yɛ nitsumɔhe lɛ, heshibaa ni nitsulɔi kɛtsuɔ nii lɛ ji nɔ ni haa nitsumɔ yaa nɔ jogbaŋŋ ni eyeɔ omanye. Yɛ nɔyeli lɛ mlai kɛ gbɛtsɔɔmɔi agbɛfaŋ lɛ, jeee heyeli kɛmiijɛ toigbalamɔ mli pɛ toiboo kɛbaa, shi moŋ kɛ hoo lɛ, ekɛ shweshweeshwe shihilɛ kɛ hebuu haa.—Romabii 13:1-7; Efesobii 5:21-25; 6:5-8.
Bei pii lɛ, ataooo gbekɛbii ni booo hegbɛ ni yeɔ nɔ toi yɛ maŋbii ateŋ. Nɔ ni tamɔɔɔ nakai lɛ, nikasemɔ ni anáa kɛjɛɔ gbekɛbiiashi lɛ baanyɛ ekɛ nyɔmɔwoo aba yɛ mɔ lɛ shihilɛ fɛɛ mli. Belɛ, kwɛ sɛɛnamɔ ni yɔɔ he akɛ aaakase enɛ kɛaajɛ gbekɛbiiashi!
Toiboo He Nyɔmɔwoo ni Fe Fɛɛ
Jeee miishɛɛ pɛ toiboo kɛbaa weku shihilɛ mli, ni asaŋ jeee wala shihilɛ mli sɛɛnamɔi hu pɛ kɛkɛ ekɛbaa, shi moŋ, ekɛ shishitoo nɔ ni abaanyɛ atswa wekukpaa ni he hiaa fe fɛɛ ama nɔ lɛ hu haa—no ji nɔ ni bakaa mɔ ko kɛ e-Bɔlɔ lɛ teŋ lɛ. Ákɛ Yehowa Nyɔŋmɔ ji ‘Bɔlɔ Kpeteŋkpele’ ní lɛ eŋɔɔ “wala nubu yɔɔ” lɛ, esa toiboo ni yeɔ emuu ni wɔɔfee wɔha lɛ lɛ yɛ gbɛ ni ja nɔ.—Jajelɔ 12:1; Lala 36:10.
Wiemɔ “toiboo” lɛ jeɔ kpo yɛ gbɛ̀i srɔtoi ni fe 160 nɔ yɛ Biblia lɛ mli. Kɛfata he lɛ, ayɛ saji ohai abɔ ni kɔɔ Nyɔŋmɔ mlai, famɔi, kitai, kojomɔi, kɛ gbɛtsɔɔmɔi ahe, ni fɛɛ biɔ ni aná heshibaa. Belɛ eyɛ faŋŋ akɛ, Nyɔŋmɔ buɔ toiboo ni aaafee lɛ akɛ taomɔ nii ni baaha wɔná ehiɛ duromɔ lɛ mli ŋɔɔmɔ. Hɛɛ, toiboo ji nɔ ko ni bɔ fɛɛ bɔ ni fee lɛ ehe miihia ni aná ni anyɛ atswa mɔ kɛ Yehowa teŋ wekukpaa ama nɔ. (1 Samuel 15:22) Dɔlɛ sane ji akɛ, adesa su akɛ egbo toi, jeee ni efee toiboo. Biblia lɛ kɛɔ akɛ: “Gbɔmɔ tsuiŋ jwɛŋmɔ lɛ efɔŋ ji kɛjɛ egbekɛbiiashi.” (1 Mose 8:21) No hewɔ lɛ, jeee gbekɛbiiashi pɛ esa akɛ akase toiboo yɛ, shi moŋ yɛ wala shihilɛ be fɛɛ mli. Nakai feemɔ kɛ nyɔmɔwoo ni fe fɛɛ lɛ baa.
Kaimɔ akɛ, taakɛ bɔfo Paulo tsĩ tã lɛ, kita akɛ abo fɔlɔi atoi lɛ kɛ shiwoi srɔtoi enyɔ haa, nomɛi ji, koni ‘ahi ahao, ni otsɛ yɛ shikpɔŋ lɛ nɔ.’ Anaa shiwoo nɛɛ he nɔmimaa yɛ Abɛi 3:1, 2: “Mibi, ohiɛ akakpa mimla lɛ nɔ, shi ha otsui ato mikitai lɛ! Ejaakɛ gbii asɛɛjɛkɛmɔ kɛ wala afii kɛ hejɔlɛ amɛaaŋɔfata he amɛhao.” Nyɔmɔwoo ni fe fɛɛ ni yɔɔ kɛha mɛi ni feɔ toiboo lɛ ji, amɛ kɛ Yehowa teŋ wekukpaa amrɔ nɛɛ kɛ naanɔ wala yɛ toiŋjɔlɛ jeŋ hee mli.—Kpojiemɔ 21:3, 4.
[Mfonirii ni yɔɔ baafa 30, 31]
Toiboo kɛ wekukpaa ni miishɛɛ yɔɔ mli baa weku lɛ mli, ebaa nitsumɔhe, kɛ Yehowa teŋ