Sanebimɔi ni Jɛ Kanelɔi Adɛŋ
Ani Habel le akɛ koolooi afɔleshaa ko he miihia koni aná Nyɔŋmɔ nɔkpɛlɛmɔ?
Biblia lɛ ewieee Kain kɛ Habel afɔleshaa lɛ he sane lɛ he tsɔ̃. Wɔkaneɔ yɛ 1 Mose 4:3-5 lɛ akɛ: “Eba mli akɛ yɛ mli aahu lɛ Kain ŋɔ shikpɔŋ nibaanii lɛ eko eyashã afɔle eha Yehowa; ni Habel hu kɛ etooi akromɔbii lɛ kɛ amɛfɔi lɛ eko baha. Ni Yehowa hiɛ sɔ Habel kɛ efɔle lɛ; shi Kain kɛ efɔle lɛ, ehiɛ esɔɔɔ no.”
Atsĩii tã yɛ Biblia lɛ mli he ko he ko akɛ dani nifeemɔ nɛɛ aaaba nɔ lɛ, no mli lɛ Yehowa kɛ sane pɔtɛɛ ko ni kɔɔ afɔleshaai loo afɔleshaai henɔi ní ebaakpɛlɛ nɔ lɛ ehã. No hewɔ lɛ, eka shi faŋŋ akɛ Kain kɛ Habel diɛŋtsɛ kpɛ amɛyiŋ yɛ afɔle ni amɛshã lɛ he. Átsĩ amɛnaa koni amɛkaya Paradeiso shia ni akɛha amɛfɔlɔi kɛjɛ shishijee mli lɛ mli; amɛ́bɔi nibii ni jɛɔ esha mli baa lɛ he numɔ; ni amɛtsi amɛhe kɛjɛ Nyɔŋmɔ he. Yɛ esha kɛ mɔbɔ shihilɛ mli ni amɛyɔɔ lɛ hewɔ lɛ, ekolɛ amɛnu bɔ ni ehe hiaa ni amɛtsɔ amɛhe kɛya Nyɔŋmɔ ŋɔɔ kɛha yelikɛbuamɔ lɛ he waa. Ekolɛ, yɛ amɛgbɛfaŋ lɛ, nikeenii ni amɛkɛaaha Nyɔŋmɔ lɛ ji nifeemɔ ko ni amɛjɛɔ suɔmɔ mli amɛfeɔ koni amɛkɛná Nyɔŋmɔ nɔkpɛlɛmɔ.
Nɔ ni jɛ mli ba ji akɛ, Nyɔŋmɔ kpɛlɛ Habel afɔleshaa lɛ nɔ, shi ekpɛlɛɛɛ Kain nɔ̃ lɛ nɔ. Mɛni hewɔ? Ani enɛ jɛ nibii kpakpai ni Habel kɛha ni Kain efeee nakai lɛ hewɔ? Wɔnyɛŋ wɔná nɔmimaa akɛ nɔ̃ afɔle ni amɛshã lɛ kɔɔɔ sane lɛ he, akɛni akɛko amɛteŋ mɔ ko nɔ ni akpɛlɛɔ nɔ kɛ nɔ ni akpɛlɛɛɛ nɔ lɛ hewɔ. Shi kɛlɛ, eeenyɛ eba lɛ akɛ akpɛlɛɔ henɔi enyɔ lɛ fɛɛ nɔ. Yɛ Mla ni yɛ naagbee lɛ Yehowa kɛha Israel maŋ lɛ mli lɛ, jeee kooloi loo kooloi ahe nibii pɛ fata afɔleshaai ni akpɛlɛɔ nɔ lɛ he, shi moŋ ŋmãa ní ashã, akoko kushai, ŋmãa mamu, shãa nii, kɛ wein hu fata he. (3 Mose 6:19-23; 7:11-13; 23:10-13) Eka shi faŋŋ akɛ, jeee nibii ni Kain kɛ Habel kɛyashã afɔle lɛ pɛ hã Nyɔŋmɔ kpɛlɛ mɔ kome nɔ, ni ekpoo mɔ kroko lɛ.—Okɛto Yesaia 1:11; Amos 5:22 he.
Afii ohai abɔ sɛɛ lɛ, bɔfo Paulo jaje akɛ: “Hemɔkɛyeli Habel kɛshã afɔle ni fe Kain nɔ̃ lɛ eha Nyɔŋmɔ, no hewɔ hu ni aye ehe odase akɛ jalɔ ji lɛ lɛ; ejaakɛ Nyɔŋmɔ ye enikeenii lɛ ahe odase.” (Hebribii 11:4) No hewɔ lɛ, hemɔkɛyeli hewɔ ni Nyɔŋmɔ kpɛlɛ Habel nɔ akɛ eji jalɔ lɛ. Shi hemɔkɛyeli yɛ mɛni mli? Hemɔkɛyeli yɛ shiwoo ni Yehowa kɛha akɛ ebaaha Seshi, mɔ ni ‘baatswa onufu lɛ yitso nɔ’ ní esaa ekɛ toiŋjɔlɛ kɛ emuuyeli ni adesa ná mli ŋɔɔmɔ be ko ni eho lɛ aba ekoŋŋ lɛ mli. Yɛ sane jajemɔ akɛ ‘abaatswa’ Seshi lɛ ‘nanetsitsi nɔ̃’ lɛ mli lɛ, ekolɛ Habel susu akɛ afɔleshaa ko ni aaafɔse lá ashwie shi yɛ mli lɛ he miihia. (1 Mose 3:15) Ni kɛlɛ, eji anɔkwale akɛ hemɔkɛyeli ni Habel jie lɛ kpo lɛ ji nɔ ni hã ‘afɔle ni eshã lɛ fe Kain nɔ̃ lɛ.’
Nakai nɔŋŋ akpoo Kain, jeee akɛ afɔle ni eshã lɛ esaaa, shi moŋ akɛni ebɛ hemɔkɛyeli lɛ hewɔ, taakɛ enifeemɔi lɛ tsɔɔ lɛ. Yehowa efee lɛ faŋŋ eha Kain akɛ: “Aso kɛji ofee ekpakpa lɛ, ohiɛ baŋ nyam lo?” (1 Mose 4:7) Nyɔŋmɔ kpooo Kain yɛ mlifu ko ni ená yɛ afɔle ni eshã lɛ hewɔ. Yɛ anɔkwale mli lɛ, nɔ hewɔ lɛ ji akɛ “lɛ diɛŋtsɛ enitsumɔi lɛ efɔji ni”—ni nɔ ni kadi enɛ ji awuŋayeli, hetsɛ, kɛ naagbee lɛ gbɔmɔgbee—no hewɔ ni Nyɔŋmɔ kpoo Kain lɛ.—1 Yohane 3:12.