Sanebimɔi ni Jɛ Kanelɔi Adɛŋ

Mɛni ji baptisimɔ kɛha gbohii lɛ?

Beni bɔfo Paulo ŋmaa wolo yɛ ŋwɛi shitee lɛ he lɛ, eŋma sane ko ni yɔɔ miishɛɛ waa. Wɔkaneɔ yɛ Ga Biblia lɛ mli akɛ: “Mɛi ni haa abaptisiɔ amɛ yɛ gbohii anajiaŋ lɛ, té amɛbaafee tɛŋŋ? Kɛ́ gbohii eteŋ shi kwraa lɛ, mɛɛba mɔ ni amɛhaa abaptisiɔ amɛ yɛ gbohii anajiaŋ lɛ?” Ni The New Jerusalem Bible lɛ tsɔɔ sane nɛɛ shishi akɛ: “Mɛni ji oti ni ma gbɔmɛi ni eha abaptisi amɛ yɛ gbohii anajiaŋ lɛ hiɛ? Kɛji ateŋ gbohii lɛ ashi kwraa lɛ, mɛɛ shishinumɔ yɔɔ baptisimɔ ni aaabaptisi mɔ yɛ amɛnajiaŋ lɛ he?”—1 Korintobii 15:29.

Ani Paulo miitsɔɔ mli yɛ biɛ akɛ esa akɛ abaptisi hiɛkalɔi yɛ mɛi ni gboi ni abaptisiko amɛ lɛ anajiaŋ? Nakai ji bɔ ni ekolɛ etamɔ yɛ enɛ kɛ Biblia shishitsɔɔmɔi krokomɛi amli. Shi kɛlɛ, Ŋmalɛi lɛ kɛ shishijee Hela wiemɔ ni Paulo kɛtsu nii lɛ amlipɛimɔ jogbaŋŋ kɛ sane naamuu kroko haa. Paulo miitsɔɔ akɛ abaptisiɔ loo amiiɔ Kristofoi ni afɔ amɛ mu lɛ nu awoɔ shihilɛ gbɛ ko ni baaha amɛhiɛ amɛ emuuyeli lɛ mli kɛyashi gbele mli tamɔ Kristo nɔ̃ lɛ mli. No sɛɛ lɛ, abaatee amɛ shi kɛya mumɔŋ shihilɛ mli taakɛ atee Kristo shi lɛ.

Ŋmalɛi lɛ fiɔ sane mlitsɔɔmɔ nɛɛ sɛɛ. Paulo ŋma yɛ ewolo ni eŋma kɛyaha Romabii lɛ mli akɛ: “Nyɛleee akɛ wɔteŋ mɛi abɔ ni abaptisi wɔ awo Kristo Yesu mli lɛ, egbele lɛ mli abaptisi wɔ awo?” (Romabii 6:3) Yɛ wolo ni Paulo ŋma kɛyaha Filipibii lɛ mli lɛ, ewie ehe akɛ: ‘Miiná Kristo amanehului lɛ amli naanyobɔɔ lɛ, ni matamɔ lɛ yɛ egbele lɛ gbɛfaŋ; akɛ aleenɔ minine aaashɛ gbohiiashitee lɛ nɔ lo.’ (Filipibii 3:10, 11) Paulo miitsɔɔ mli akɛ nɔ ni fata Kristo sɛɛnyiɛlɔ ni afɔ lɛ mu lɛ shihilɛ gbɛ lɛ he ji emuuyeli mlihiɛmɔ yɛ kaa mli, shihilɛ gbɛ ni haa akɛ gbele kpeɔ daa, kɛ naagbee lɛ emuuyeli mlihiɛmɔ kɛyashi gbele mli, ní nɔ ni nyiɛ sɛɛ ji hiɛnɔkamɔ akɛ abaaná ŋwɛi shitee lɛ.

Esa kadimɔ akɛ ŋmalɛi nɛɛ kɛ ŋmalɛi krokomɛi ni tsĩɔ gbele tã tɛ̃ɛ kɛkɔɔ mɛi ni abaptisi amɛ lɛ ahe lɛ wieɔ aŋkroaŋkroi ni yɔɔ wala mli ni abaptisi amɛ lɛ ahe shi jeee mɛi ni egboi lɛ. Paulo kɛɛ nanemɛi Kristofoi ni afɔ amɛ mu lɛ hu akɛ: “Afu nyɛ afata ehe yɛ baptisimɔ lɛ mli, mɔ mli hu ni atee nyɛ shi yɛ, yɛ Nyɔŋmɔ ni tee lɛ shi kɛjɛ gbohii ateŋ lɛ hewalɛ nitsumɔ lɛ nɔ hemɔkɛyeli naa lɛ.”—Kolosebii 2:12.

Hela wiemɔ ni tsɔɔ gbɛi ko hiɛ ni ji hy·perʹ, ni atsɔɔ shishi akɛ “kɛha” loo “yɛ najiaŋ” yɛ Biblia shishitsɔɔmɔi srɔtoi babaoo amli yɛ 1 Korintobii 15:29 lɛ hu baanyɛ atsɔɔ “kɛ yiŋtoo akɛ.” Yɛ Biblia ŋmalɛi krokomɛi kɛ gbeekpãmɔ naa lɛ, New World Translation of the Holy Scriptures lɛ tsɔɔ nɛkɛ kuku nɛɛ shishi yɛ gbɛ ni ja nɔ akɛ: “Mɛi ni haa abaptisiɔ amɛ kɛ yiŋtoo akɛ amɛaatsɔmɔ gbohii lɛ, té amɛbaafee tɛŋŋ? Kɛ́ ateŋ gbohii ashi kwraa lɛ, mɛɛba mɔ ni amɛhaa abaptisiɔ amɛ kɛ yiŋtoo akɛ amɛaatsɔmɔ gbohii lɛ?”